ಬಿಜೆಪಿಯ ಕೈಯಲ್ಲ, ಕಾಂಗ್ರೆಸಿನ ಕೈ ಕತ್ತರಿಸಿದೆವು: ಎನ್‌ಸಿಪಿ

(ಬೊಗಳೂರು ರಾಜಕೀಯ ಬ್ಯುರೋದಿಂದ)

ಬೊಗಳೂರು, ಮಾ.6- ಬಿಜೆಪಿ ಅಭ್ಯರ್ಥಿಯೊಬ್ಬನ ಕೈ ಕತ್ತರಿಸಿರುವುದಾಗಿ ಇಲ್ಲಿ ವರದಿಯಾಗಿರುವುದನ್ನು ಎನ್‌ಸಿಪಿ ಕಾರ್ಯಕರ್ತರು ನಿರಾಕರಿಸಿದ್ದಾರೆ ಮಾತ್ರವಲ್ಲದೆ ಆಕ್ಷೇಪವನ್ನೂ ವ್ಯಕ್ತಪಡಿಸಿದ್ದಾರೆ.

ನಮಗೆ ಕೋಪ ಇರುವುದು ಕಾಂಗ್ರೆಸ್‌ನ ಕೈ ಚಿಹ್ನೆಯ ಮೇಲೆ. ಅದಕ್ಕಾಗಿ ಬಿಜೆಪಿ ಮಂದಿ ಕಮಲ ಚಿಹ್ನೆಯನ್ನು ಹಿಡಿದುಕೊಳ್ಳುವುದು ಬಿಟ್ಟು ರಾಜಕೀಯ ಸಭೆಗಳಲ್ಲಿ, ಚುನಾವಣಾ ಪ್ರಚಾರ ಸಭೆಗಳಲ್ಲಿ ಕೈಯನ್ನೆತ್ತಿ ತೋರಿಸುತ್ತಾ ಕಾಂಗ್ರೆಸ್ಸನ್ನು ಬೆಂಬಲಿಸುವಂತೆ ಪರೋಕ್ಷವಾಗಿ ಪ್ರಚಾರ ಮಾಡುತ್ತಿರುವುದು ನಮ್ಮನ್ನು ಸೋಲಿಸುವ ಯತ್ನವಾಗಿತ್ತು ಎಂದು ಅವರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ನಮ್ಮ ಪಕ್ಷದಿಂದ ಓಟು ಸೆಳೆದು ಕಾಂಗ್ರೆಸಿನ "ಕೈ"ಗೆ ಒಪ್ಪಿಸುವ ಕಾರ್ಯವನ್ನು ಬಿಜೆಪಿ ಕಾರ್ಯಕರ್ತರು ಮಾಡುತ್ತಿದ್ದುದರಿಂದಾಗಿ ನಾವು ಕೈ ಚಿಹ್ನೆಯನ್ನು ಮಾತ್ರ ಕತ್ತರಿಸಿದೆವು ಎಂದು ಅವರು ಸಮರ್ಥಿಸಿಕೊಂಡಿದ್ದಾರೆ.