ಅಲ್ಲಲ್ಲಿ ಉದುರಿದ ಬೀಜಗಳು: ಕೃಷಿ ಇಲಾಖೆಯ ಅತಿದೊಡ್ಡ ಪ್ರಮಾದ!

ಚಿತ್ರ: ಪಿಕ್ಸಾಬಿ ಕೃಪೆ

[ಬೀಜ ವರದ್ದಿಗಾರರಿಂದ ವಿಶೇಷ ವರದಿ]

ಬೊಗಳೂರು: ಇತ್ತೀಚೆಗೆ ಬೊಗಳೂರಿನ ವಿವಿಧೆಡೆ ಬೀಜಗಳು ಉದುರಿರುವುದು ಪತ್ತೆಯಾಗಿದೆ. ಇದರ ಹಿಂದಿನ ಜಾಲ ಭೇದಿಸಲು ಹೊರಟ ಬೊಗಳೆ ಬ್ಯುರೋದ ವಿಶೇಷ ವರದ್ದಿಗಾರರಿಗೆ ಸಿಕ್ಕಿದ ಆಘಾತಕಾರಿ ವರದ್ದಿಯೊಂದು ಇಲ್ಲಿದೆ.

ಬೊಗಳೂರಿನಲ್ಲಿ ಅಲ್ಲಲ್ಲಿ ಬೀಜಗಳು ಕತ್ತರಿಸಲ್ಪಟ್ಟ ಸ್ಥಿತಿಯಲ್ಲಿ ಪತ್ತೆಯಾಗಿದ್ದವು. ಇವು ಯಾರದೆಂದು ತಿಳಿಯದೆ ಊರಿನವರೆಲ್ಲರೂ ಕಂಗಾಲಾಗಿದ್ದರು. ಈ ಬೀಜಗಳೆಲ್ಲವೂ ಬಹುತೇಕವಾಗಿ ಕರಗಿದ ಸ್ಥಿತಿಯಲ್ಲಿದ್ದವು. ಇದರ ಹಿಂದಿನ ಕಾರಣ ಪತ್ತೆ ಮಾಡಲು ಹೊರಟಾಗ ಸಿಕ್ಕಿದ್ದೇ ಗೊಬ್ಬರ! ಇದು ರಾಸಾಯನಿಕಯುಕ್ತ ಗೊಬ್ಬರ. ಗೊಬ್ಬರಕ್ಕೆ ಮಿಶ್ರ ಮಾಡಿದ ರಾಸಾಯನಿಕದಿಂದಾಗಿ ಈ ಬೀಜಗಳು ಕರಗಿ ಕರಗಿ ಸಣ್ಣಗಾಗಿಬಿಟ್ಟಿದ್ದವು. ಕೆಲವಂತೂ ಕೊರಗಿದ್ದವು ಎಂಬುದನ್ನು ಸ್ಥಳೀಯ ರೈತರ ಬೀಜದಂಗಡಿಯ ಮಾಲೀಕರೊಬ್ಬರು ಬೊಗಳೆ ಬ್ಯುರೋಕ್ಕೆ ರಹಸ್ಯವಾಗಿ ತಿಳಿಸಿದರು.

Follow ಬೊಗಳೆ-ರಗಳೆ On Facebook and Twitter. ಮತ್ತಷ್ಟು ಬೊಗಳೆಗಳಿಗಾಗಿ, ವಾಟ್ಸಪ್ ಗ್ರೂಪ್ ಸೇರಿಕೊಳ್ಳಿ.

ಈ ನಿಟ್ಟಿನಲ್ಲಿ ಸಂಚೋದನೆ ಮುಂದುವರಿಸಿದಾಗ, ಇವೆಲ್ಲವೂ ರೈತರ ಬೀಜಗಳೆಂಬುದು ಪತ್ತೆಯಾದವು. ರೈತರು ಹಗಲು-ರಾತ್ರಿ ಶ್ರಮ ಪಡುತ್ತಿರುವಾಗಲೇ ಕಷ್ಟಪಟ್ಟು ಬೀಜವನ್ನು ಕಾಪಾಡಿಕೊಂಡಿದ್ದರು. ಆದರೆ, ಈಗ ನೋಡಿದರೆ ಈ ಎಲ್ಲ ಬೀಜಗಳು ಉದುರಿಹೋಗಿವೆ. ಇದಕ್ಕೆಲ್ಲ ಕಾರಣ, ನಕಲಿ ಬೀಜ ಮತ್ತು ಗೊಬ್ಬರ ಪೂರೈಕೆದಾರರೆಂಬ ಅಸಲಿ ಕಳ್ಳರು ಎಂಬುದು ತಿಳಿದುಬಂತು.

ಈ ನಕಲಿ ಬೀಜಗಳನ್ನು ನೆಟ್ಟು, ಬೆಳೆಸಿ ಫಲ ತೆಗೆದು, ಆ ಫಲಗಳು ಕೊಡುವ ಬೀಜಗಳೆಲ್ಲವೂ ಉದುರಿಹೋಗುವುದು ಒಂದು ಕಡೆಯಾದರೆ, ಮತ್ತೊಂದು ಕಡೆಗೆ, ಕೃಷಿ ಇಲಾಖೆಯ ವಿಚಕ್ಷಣ ಪಡೆಯ ಅಧಿಕಾರಿಗಳು ಈ ಬೀಜಗಳನ್ನು ಹೊಡೆದು ಉರುಳಿಸುತ್ತಿದ್ದರು ಎಂಬುದನ್ನು ಬೊಗಳೆ ಬ್ಯುರೋ ಪತ್ತೆ ಮಾಡಿದೆ. 

ಬೊಗಳೂರಿನ ಕೃಷಿ ಸಚಿವರು ಇತ್ತೀಚೆಗೆ ಕೃಷಿ ವಿಚಕ್ಷಣಾ ದಳದ ಅಧಿಕಾರಿಗಳೊಂದಿಗೆ ಸಮಾಲೋಚನೆ ನಡೆಸಿದ್ದರು. ಈ ಸಂದರ್ಭದಲ್ಲಿ ನಕಲಿ ಬೀಜ, ಗೊಬ್ಬರ ಮಾರಾಟ ಜಾಲದ ಬುಡವನ್ನೇ ಕತ್ತರಿಸಿ ಎಂಬ ಹೇಳಿಕೆ ನೀಡಿದ್ದೇ ಈ ಎಲ್ಲ ಆವಾಂತರಗಳಿಗೆ ಕಾರಣ ಎಂಬುದನ್ನು ಬೊಗಳೆ ಬ್ಯುರೋ ಸಂಚೋದಿಸಿದೆ. ಇದರ ಬಗ್ಗೆ ಪ್ರತಿಸ್ಫರ್ಧಿ ಪತ್ರಿಕೆಯ ಈ ವರದ್ದಿಯೇ ಕಾರಣ. ನಕಲಿ ಬೀಜದ ಜಾಲದ ಬುಡವನ್ನೇ ಕತ್ತರಿಸಿ ಎಂದು ಕೃಷಿ ಸಚಿವರು ಕರೆ ನೀಡಿದಾಗ, ಕೆಲವು ಅಧಿಕಾರಿಗಳಂತೂ ನಕಲಿ ಬೀಜದ ಜಾಲದ ಬುಡವನ್ನು ಕತ್ತರಿಸುವ ಬದಲಾಗಿ, ಬೀಜದ ಬುಡವನ್ನೇ ಕತ್ತರಿಸಿದ್ದರು!