ಕಂಡಲ್ಲಿ ಗುಂಡು: ರಾಜ್ಯದಲ್ಲಿ ಮದ್ಯ ವ್ಯಾಪಾರ ಜೋರು

[ಬೊಗಳೆ ಗುಂಡು ಬ್ಯುರೋದಿಂದ]

ಬೊಗಳೂರು, ಡಿ.2: ರಾಜ್ಯ ಸರಕಾರವು ಬೆಂಗಳೂರಿನಿಂದ ಬೆಳಗಾವಿಗೆ ಶಿಫ್ಟ್ ಆಗಿ, ಅಲ್ಲಿಂದಲೇ ಕಂಡ ಕಂಡಲ್ಲಿ ಗುಂಡಿಕ್ಕಲು ಆದೇಶ ನೀಡಿರುವ ಹಿನ್ನೆಲೆಯಲ್ಲಿ, ರಾಜ್ಯದ ಎಲ್ಲ ಮದ್ಯ ಕೇಂದ್ರಗಳಲ್ಲಿ, ದ್ರಾಕ್ಷಾರಸಕ್ಕೆ, ತಾಳೆ ರಸಕ್ಕೆ, ಗೇರು ಕೊಳೆಸಿದ ರಸಕ್ಕೆ ಬೇಡಿಕೆ ಹೆಚ್ಚಾಗಿದೆ ಎಂಬ ಅಂಶವನ್ನು ಬೊಗಳೆ ರಗಳೆ ಬ್ಯುರೋ ಪತ್ತೆ ಮಾಡಿದೆ.

ನರ ಭಕ್ಷಕ ಹುಲಿ ಜಾತಿಗೆ ಸೇರಿದ ಪ್ರಾಣಿಗಳಿಗೆ ಗುಂಡಿಕ್ಕಲು ಆದೇಶ ನೀಡಿದ್ದರೂ, ಹೊಸ ಸರಕಾರ ಅಸ್ತಿತ್ವಕ್ಕೆ ಬಂದಂದಿನಿಂದಲೂ ಹಾಲು ಭಾಗ್ಯದ ಸವಿಯುಣ್ಣುತ್ತಿರುವ ಜನರು, ಆಲ್ಕೋಹಾಲು ಭಾಗ್ಯಕ್ಕಾಗಿಯೇ ಕಾತರದಿಂದ ಕಾಯುತ್ತಿದ್ದರು. ಅಗ್ಗದ ಆಲ್ಕೋಹಾಲು ಕೂಡ ಸಿಗುತ್ತದೆ ಎಂದು ತುದಿಗಾಲಲ್ಲಿ ನಿಂತಿದ್ದರು.

ಆದರೆ ಈಗ ಕಂಡ ಕಂಡಲ್ಲಿ ಗುಂಡು ಹಾಕಬಹುದು ಎಂಬ ಸರಕಾರದ ಘೋಷಣೆಯನ್ನೇ ಕಟ್ಟಾಜ್ಞೆ ಎಂದು ಪರಿಗಣಿಸಿದವರೆಲ್ಲರೂ, ನಿಂತಲ್ಲೇ ಕುಂತಲ್ಲೇ, ಎದ್ದಲ್ಲಿ, ಬಿದ್ದಲ್ಲಿ ಗುಂಡು ಹಾಕಲಾರಂಭಿಸಿದ್ದಾರೆ ಎಂದು ಬಲ್ಲ ಮೂಲಗಳು ತಿಳಿಸಿಲ್ಲ.