ನಿದ್ರೇವೇಗೌಡರು ನಿಧಾನಿಯಾಗಿದ್ದೇಕೆ?: ಸಂಶೋಧನೆ

(ಬೊಗಳೂರು ದಾರಿತಪ್ಪಿದ ವಿಶ್ಲೇಷಣೆ ಬ್ಯುರೋದಿಂದ)

ಬೊಗಳೂರು, ಫೆ.2- ನಿಧಾನಿಯಾಗುವುದಕ್ಕೂ ಮುಂಚಿನಿಂದಲೂ ಮಾಜಿ ನಿಧಾನಿ ಎಂದು ಕರೆಸಿಕೊಳ್ಳುತ್ತಿದ್ದವರೆನ್ನಲಾಗುತ್ತಿರುವ ನಿದ್ರೇವೇಗೌಡರು ಪ್ರಧಾನಿಯಾಗಿದ್ದೇಕೆ ಎಂಬುದನ್ನು ಬೊಗಳೂರು ಬ್ಯುರೋ ತನ್ನ ವಿಶೇಷ ಚಾಣಾಕ್ಷ ಮತ್ತು ಚಾಣಕ್ಯರೂಪಿ ಏಕಸದಸ್ಯ ವರದ್ದಿಗಾರರ ಮಂಡಳಿಯ ಮೂಲಕ ಪತ್ತೆ ಹಚ್ಚಿಸಿದೆ.

ಮಾಡಲು ಬೇರೆ ಕೆಲಸವಿಲ್ಲದ್ದರಿಂದಲೇ ಪ್ರಧಾನಿಯಾಗಬೇಕಾಯಿತು ಎಂದು ಅವರು ಇಲ್ಲಿ ಉವಾಚಿಸಿರುವುದು ಹಲವರು ಹುಬ್ಬುಗಳು (ತಲೆಗಿಂತಲೂ) ಮೇಲೇರಲು ಕಾರಣವಾಗಿದ್ದರೂ, ಅದರೊಳಗಿನ ಸತ್ಯಾಂಶವನ್ನು ಯಾರು ಕೂಡ ನಿರಾಕರಿಸಲು ಅಸಾಧ್ಯವಾಗಿದೆ ಎಂದು ನಮ್ಮ ಸಂಚೋದನಾ ಬ್ಯುರೋ ಕಂಡುಕೊಂಡಿದೆ.

ಜೂನಿಯರ್ ಎಂಜಿನಿಯರ್ ಆಗಲು ಯಾರ್ಯಾರದೋ ಕೈಕಾಲು ಹಿಡಿದು ಇನ್‌ಫ್ಲುಯೆನ್ಸ್ ಮಾಡಿಸಿದ್ದು ಅವರೊಳಗೊಬ್ಬ ಧೀಮಂತ ರಾಜಕಾರಣಿಯಿದ್ದಾನೆ ಎಂಬುದರ ಸೂಚನೆಯಾಗಿತ್ತು ಎಂದು ಬೊ.ರ. ಬ್ಯುರೋ ವಿಶ್ಲೇಷಿಸಿದೆ.

ಆದರೆ ಅವರ ಬಾಯಿಯಿಂದ ಉದುರಿದ ಕೆಲವು ಸತ್ಯಗಳನ್ನು ಯಾರಿಗೂ ಕೂಡ ಅರಗಿಸಿಕೊಳ್ಳಲಾಗುತ್ತಿಲ್ಲ. ಪಂಚೆಯನ್ನೇ ಉಲ್ಟಾಪಲ್ಟಾ ಉಡುತ್ತಿದ್ದ ಅವರು ರಾಜಕೀಯದಲ್ಲೂ ಉಲ್ಟಾಪಲ್ಟಾ ಸೂತ್ರವನ್ನೇ ಅನುಸರಿಸಿದ್ದರಲ್ಲಿ ಯಾವುದೇ ತಪ್ಪಿಲ್ಲ. ಒಂದು ಕಾಲದಲ್ಲಿ ಅಂತಹ ಸ್ಥಿತಿಯಲ್ಲಿದ್ದ ಅವರು ಈಗಲೂ ಅದನ್ನು ಅನುಸರಿಸಿಕೊಂಡು ಹೋಗುತ್ತಿರುವುದು ಅವರೊಳಗೊಬ್ಬ ಧೀಮಂತ ನಾಯಕನಿದ್ದಾನೆ ಎಂಬುದರ ಸಂಕೇತ ಎಂದು ಬೊಗಳೂರಿನ ಸೊಂಪಾದಕರುಗಳ ಬ್ಯುರೋ ತನ್ನ ಸೊಂಪಾದ-ವಿಷಾದಕೀಯದಲ್ಲಿ ಬರೆದಿದೆ.

ಮರಕ್ಕೆ ವಯಸ್ಸಾದರೂ ಮರ್ಕಟ ಅಲ್ಲಲ್ಲ... ಹುಳಿ ಮುಪ್ಪೇ ಎಂದು ಸ್ವತಃ ಅವರೇ ಪ್ರಶ್ನಿಸಿಕೊಂಡಿರುವುದು ಅವರೊಳಗಿನ ಛಲದ ಸೂಚನೆ. 

ಮತ್ತೆ ದಾರಿತಪ್ಪಿದ ಮಗನನ್ನು... ಅಲ್ಲಲ್ಲ... ದಾರಿ ತಪ್ಪಿದ ವ್ಯವಸ್ಥೆಯನ್ನು ಸರಿಪಡಿಸಲು ಯಾವ ರಾಜಕಾರಣಿಯಿಂದಲೂ ಸಾಧ್ಯವಿಲ್ಲ, ಸಾಧ್ಯವಿದ್ದದ್ದೇ ಆದರೆ, ಅವರ ಕಾಲಿಗೆ ಬಿದ್ದು ನಮಸ್ಕರಿಸುತ್ತೇನೆ ಎಂದು ಅವರು ಯಾವುದೇ ಎಗ್ಗಿಲ್ಲದೆ ನುಡಿದಿರುವುದು, ತಾಕತ್ತಿದ್ದರೆ ತಮ್ಮ ದಾರಿ ತಪ್ಪಿದ ಮಗ... ಅಲ್ಲಲ್ಲ... ವ್ಯವಸ್ಥೆಯನ್ನು ಸರಿಪಡಿಸಿ ಎಂದು ವಿರೋಧಪಕ್ಷಗಳಿಗೆ ನೀಡಿದ ಸವಾಲು ಎಂದೂ ಪರಿಗಣಿಸಲಾಗಿದೆ.