ಅಯೋಗ್ಯರು ಮನೆಗೆ: ಸರಕಾರಿ ಕಚೇರಿ ಖಾಲಿ ಖಾಲಿ!

(ಬೊಗಳೂರು ದುರಾಡಳಿತ ಸುಧಾರಣೆ ಬ್ಯುರೋದಿಂದ)

ಬೊಗಳೂರು, ಡಿ.15- ದೇಶವನ್ನು ಕಾಡುತ್ತಿರುವ ದುರಾಡಳಿತದ ಸುಧಾರಣೆಗೆ ನೇಮಿಸಲಾಗಿರುವ ಆಯೋಗ್ಯವೊಂದು ತನ್ನ ವರದಿಯಲ್ಲಿ ಇಲ್ಲಿ ಸಲ್ಲಿಸಿದ್ದು, ಇದರಿಂದಾಗಿ ದೇಶದ ಸರಕಾರಿ ಕಚೇರಿಗಳೆಲ್ಲವೂ ಬಹುತೇಕ ಸ್ಥಗಿತಗೊಳ್ಳುವ ಸಾಧ್ಯತೆಗಳು ದಟ್ಟವಾಗಿ ಗೋಚರಿಸಿವೆ.

ಅಯೋಗ್ಯ ಅಧಿಕಾರಿಗಳನ್ನು ಅವರವರ ಸ್ವಂತ ಮನೆಗೆ ಕಳುಹಿಸಲು ಶಿಫಾರಸು ಮಾಡಿರುವುದರಿಂದ ಈ ರೀತಿಯ ತುರ್ತು ಪರಿಸ್ಥಿತಿ ಉದ್ಭವವಾಗಿದ್ದು, ಸರಕಾರಿ ಕಚೇರಿಗಳಲ್ಲಿ ಇದುವರೆಗೆ ಇದ್ದ ಅರಾಜಕತೆಯು ಮತ್ತಷ್ಟು ಹೆಚ್ಚಾಗಿಬಿಟ್ಟಿದ್ದು, ಬೊಗಳೂರಿನ ಪ್ರಜೆಗಳು ಕಂಗಾಲಾಗಿದ್ದಾರೆ ಎಂದು ಎಲ್ಲಿಯೂ ವರದ್ದಿಯಾಗಿಲ್ಲ.

ಆದರೆ, 14 ಮತ್ತು 20ನೇ ವರ್ಷಗಳಲ್ಲಿ ಸರಕಾರಿ ನೌಕರರ ನಿಷ್ಕ್ರಿಯತೆಯ ಪರಾಮರ್ಶೆ ನಡೆಯಲಿದೆ ಎಂಬುದು ಸಂತಸಕರ ಸಂಗತಿಯಾಗಿದ್ದು, ಕನಿಷ್ಠ ಇಷ್ಟು ವರ್ಷಗಳ ಕಾಲ ತಾವು ಕಚೇರಿಗೆ ಬಂದು ನಿದ್ದೆ ಮಾಡುತ್ತಿದ್ದರೆ, ಮೂರು ಪೀಳಿಗೆಗೆ ಆಗುವಷ್ಟು ಕಬಳಿಸಲು ಸದವಕಾಶ ದೊರೆಯುತ್ತದಲ್ಲಾ ಎಂಬುದು ಬೊಗಳೂರಿನ ಕಾರ್ಯಮರೆತ ಸರಕಾರಿ ನೌಕರರ ಸಂಘದ ಪದಾಧಿಕಾರಿಗಳ ಅಭಿಪ್ರಾಯ.

ಇಪ್ಪತ್ತು ವರ್ಷಗಳ ಕಾರ್ಯವೈಖರಿ ಪರಾಮರ್ಶೆ ಸಂದರ್ಭವೂ ಅವರು ಅಯೋಗ್ಯರು ಎಂದು ಸಾಬೀತಾಗದಿದ್ದರೆ ದೇಶದ ಪ್ರಜೆಗಳನ್ನು ದೇವರೇ ಕಾಪಾಡಬೇಕು ಎಂದು ಬೊಗಳೆ-ರಗಳೆ ಬ್ಯುರೋ ಸಂತಾಪಕರು ಸಂತಾಪ ಸೂಚಿಸಿದ್ದಾರೆ.

ಆದರೆ, ಈ ದುರಾಡಳಿತ ಸುಧಾರಣಾ ಆಯೋಗವನ್ನೇ ಅಯೋಗ್ಯ ಎಂದು ತಪ್ಪಾಗಿ ಬರೆದ ಸರಕಾರಿ ಮುದ್ರಣಾಲಯದ ಅಧಿಕಾರಿಗಳಿಗೆ ಈಗಾಗಲೇ ನೋಟಿಸ್ ಜಾರಿ ಮಾಡಲಾಗಿದೆ ಎಂದು ತಿಳಿದುಬಂದಿದೆ.

ಹತ್ತು ಹಲವು ವರ್ಷಗಳಿಂದ ದುರಾಡಳಿತ ಸುಧಾರಣೆಗೆ ವರದಿಯ ಮೇಲೆ ವರದಿ ಸಲ್ಲಿಸುತ್ತಲೇ ಬಂದಿರುವ ಕುರಿತು ಈಗಾಗಲೇ ಬೊಗಳೂರು ಬ್ಯುರೋ ಇಲ್ಲಿ ಒಂದೇ ಕಡೆ ನೂರಾರಿ ಬಾರಿ ಎಚ್ಚರಿಸಿದ್ದನ್ನು ಇಲ್ಲಿ ಪುಣ್ಯಸ್ಮರಣೆ ಮಾಡಿಕೊಳ್ಳಬಹುದಾಗಿದೆ.