ಬೊಗಳೆಗೆ 1 ಲಕ್ಷ ರೂ ದಂಡ!

(ಬೊಗಳೂರು ಬೊಗಳೆ ಬ್ಯುರೋದಿಂದ)

ಬೊಗಳೂರು, ಜ.30- ನಮ್ಮ ಪತ್ರಿಕೆಯ ಉಲ್ಲೇಖವಿರುವ ಸಾರ್ವಧನಿಕ ಹಿತಾಸಕ್ತಿ ಅರ್ಜಿಗಳಿಗೆ ಹಾಗೂ ಸಾರ್ವಜನಿಕ ಅನಾಸಕ್ತಿ ಅರ್ಜಿಗಳಿಗೆ 1 ಲಕ್ಷ ರೂ. ದಂಡ ವಿಧಿಸುವ ಕಾಲ ಬಂದಿರುವುದರಿಂದ ಬೊಗಳೂರು ಬೊಗಳೆ ಬ್ಯುರೋ ಹರ್ಷಚಿತ್ತವಾಗಿದ್ದು, ಬೊಗಳೆ ಹೆಸರಿನಲ್ಲಿ ದೇಶಕ್ಕೆ ಸಾಕಷ್ಟು ಆದಾಯ ಬರುತ್ತದೆ ಎಂದು ಕುಣಿದು ಕುಪ್ಪಳಿಸಲಾರಂಭಿಸಿದೆ.

ಈಗಾಗಲೇ ಕ್ರಿಮಿನಲ್ ಲಾಯರುಗಳಿಂದಾಗಿ ಕ್ರಿಮಿಗಳು-ನಲ್ ಆಗುತ್ತಾ, ಸಾವಕಾಶವಾಗಿ ಜೈಲಿನಿಂದ ಹೊರಬರುತ್ತಿರುವುದರಿಂದ, ಕಲಾಪ ನೋಡಲು ಯಾರಿಗೂ ಆಸಕ್ತಿ ಇರಲಿಲ್ಲ. ಇದೀಗ ಕೆಲಸಕ್ಕೆ ಬಾರದ ವಿಷಯಗಳನ್ನೆಲ್ಲಾ ಚರ್ಚೆ ಮಾಡಿದಲ್ಲಿ ಸ್ವಲ್ಪ ಮನರಂಜನಾತ್ಮಕ ಸಂಗತಿಗಳು ಹೊರಬರುತ್ತವೆ ಎಂಬ ಕಾರಣಕ್ಕೆ ಹೆಚ್ಚಿನವರು ಇಂಥ ಸಾರ್ವಧನಿಕ ಹಿತಾಸಕ್ತಿ ಅರ್ಜಿಗಳನ್ನು ಹಾಕುತ್ತಿದ್ದರು.

ಇದೀಗ ಈ ಸಾರ್ವ-ಧನಿಕರೆಲ್ಲರೂ ಒಂದೊಂದು ಲಕ್ಷ ರೂಪಾಯಿ ಕಟ್ಟಬೇಕಿರುವುದರಿಂದ ಬೊಗಳೆಗೆ ಸಂಚಕಾರ ಬಂದಿದೆಯಾದರೂ, ಬೊಗಳೆಯ ಬೆಲೆ ಕನಿಷ್ಠ 1 ಲಕ್ಷವಾದರೂ ಇದೆಯಲ್ಲ ಎಂದು ನಮ್ಮ ಸೊಂಪಾದ-ಕರು ಸಮಾಧಾನ ಪಟ್ಟುಕೊಂಡಿದ್ದಾರೆ. ಇನ್ನು ಮುಂದೆ ಎಲ್ಲರೂ ತಮಗಾಗದವರ ವಿರುದ್ಧ ಸಾರ್ವಧನಿಕ ಹಿತಾಸಕ್ತಿಯನ್ನು ಪ್ರಕಟಿಸಿ ಅರ್ಜಿ ಸಲ್ಲಿಸಬಹುದು. ಇದರಿಂದ ಬೊಗಳೆ ಎಂಬ ಪದವೂ ಉದ್ಧಾರವಾಗುತ್ತದೆ, ದೇಶದ ಅಭಿವೃದ್ಧಿಗೂ ಹಣ ಒಟ್ಟಾಗುತ್ತದೆ ಎಂದು ತಿಳಿಸಲಾಗಿದೆ.

ಆದರೂ, ಬೊಗಳೆ ಬೆಲೆಯನ್ನು ಕೇವಲ ಒಂದು ಲಕ್ಷ ಅಂತ ನಿರ್ಧರಿಸಿದ್ದು ಸರಿಯಲ್ಲ ಎಂಬ ನೋವು ಕೂಡ ಎಲ್ಲೋ ಒಂದು ಕಡೆಯಿಂದ ಹೊರಬಿದ್ದಿದೆ. ಇನ್ನು ಕೆಲವರನ್ನು ಬಲವಂತವಾಗಿ ಹಿಡಿದು ನಿಲ್ಲಿಸಿ ಸಮೀಕ್ಷೆಗೊಳಪಡಿಸಿದಾಗ, ಬೊಗಳೆಯ ಬೆಲೆ ಒಂದು ಲಕ್ಷ ಇರಬಹುದು, ಆದರೆ ಅದು ಖಂಡಿತಾ "ರೂಪಾಯಿ"ಯಲ್ಲ, "ನಯಾ ಪೈಸೆ"ಯಾಗಿರಬಹುದು ಎಂದು ಅದನ್ನೂ ತುಸು ಸಂದೇಹದಿಂದಲೇ ಹೇಳಿದರು.

ಈ ಮಧ್ಯೆ, ಬೊಗಳೆಯೇ ದಂಡ ಅನ್ನೋದು ಈ ನಿರ್ಧಾರದ ಹಿಂದಿರುವ ಸತ್ಯವೇ ಎಂಬುದನ್ನು ಸಂಶೋಧನೆ ನಡೆಸಲು ಜಗತ್ತಿನ ಖ್ಯಾತ ನಾಮ ಸಂಶೋಧಕರಿಗೆಲ್ಲಾ ಬೊಗಳೆ ನೋಟಿಸ್ ನೀಡಿದೆ.