ಬೊಗಳೆ ರಗಳೆ

ಬೊಗಳೆ: 'Blue ಚಿತ್ರಕ್ಕೆ ಸಾಂವಿಧಾನಿಕ ಮಾನ್ಯತೆ ಕೊಡಿ'

2012-02-08T09:52:00.001+05:30

[ಬೊಗಳೂರು ನೀಲಿ ಚಿತ್ರ ಬ್ಯುರೋದಿಂದ]

ಬೊಗಳೂರು, ಫೆ.8- ಶಾಸಕರು, ಮಂತ್ರಿ ಮಾಗಧರೆಲ್ಲರೂ ನಮಗೆ ಆ ಪ್ಯಾಡು, ಈ ಪ್ಯಾಡು ಬೇಡ, ಐಪ್ಯಾಡೇ ಬೇಕು ಅಂತೆಲ್ಲಾ ಹಠ ಹಿಡಿದು ಕೂತಿದ್ದುದರ ಹಿಂದಿನ ಮರ್ಮವೊಂದು ಈಗಷ್ಟೇ ಬಯಲಾಗಿದೆ.

ಮಹಿಳೆಯರಿಗೆ ಕಲ್ಯಾಣ ಮಾಡಿಸುವ ಕರುನಾಟಕದ ಮಂತ್ರಿವರೇಣ್ಯರಿಗೆ ತಮ್ಮ ಕೈಯಲ್ಲಿದ್ದ ಪಡಪೋಶಿ, ಪುಟ್ಟ ಪರದೆಯ ಮೊಬೈಲ್ ಅನ್ನು ಎಸೆದುಬಿಡುವಷ್ಟು ಕೋಪ ಬಂದಿದೆ ಎಂಬ ಅಂಶವೊಂದು ನಿಧಾನವಾಗಿ ಬಟಾಬಯಲಾಗುತ್ತಿದೆ.

ಮೀನು ಸಚಿವರು ಕಳುಹಿಸಿದ ರೇವ್ ಪಾರ್ಟಿಯ ಕ್ಲಿಪ್ಪೋ, ಅಥವಾ ತರುಣಿಯರ ಕುರಿತ "ಸಾಕ್ಷ್ಯಚಿತ್ರ"ವನ್ನೋ ವೀಕ್ಷಿಸಲು ಈ ಪುಟ್ಟ ಪರದೆ ಸಾಕಾಗುವುದಿಲ್ಲ. ದೊಡ್ಡದಾದ ಐಪ್ಯಾಡೇ ಬೇಕು ಅಂತ ಸಚಿವ ವಿಲಕ್ಷಣ ಸೌದೆಯವರು ಈ ಹಿಂದೆಯೇ ಆಗ್ರಹಿಸಿದ್ದರು ಎಂಬುದನ್ನು ಬೊಗಳೆ ರಗಳೆ ಬ್ಯುರೋ ಪತ್ತೆ ಹಚ್ಚಿದೆ.

ಇದರ ನಡುವೆಯೇ, ಶಾಸಕರು ಸಹಿ ಸಂಗ್ರಹವೊಂದಕ್ಕೆ ಈಗಲೇ ಆರಂಭಿಸಿದ್ದಾರೆ. ಅದು ಬಡಿಯೂರಪ್ಪ ಅವರಿಗೆ ಮುಖ್ಯಮಂತ್ರಿ ಪಟ್ಟವನ್ನು ಮರಳಿ ಕೊಡಿಸುವುದಕ್ಕಾಗಿ ಅಲ್ಲ ಎಂಬುದನ್ನು ಬೊಗಳೆ ಬ್ಯುರೋ ಕಂಡುಕೊಂಡಿದೆ. ಈ ಕುರಿತು ಸೊಂಪಾದಕರ ಆದೇಶ ಪಡೆದ ತಕ್ಷಣ ಏಕಸದಸ್ಯ ಬ್ಯುರೋದ ಸರ್ವ ಸದಸ್ಯರೂ ಕಾರ್ಯಾಚರಣೆಗಿಳಿದು, ಸಹಿ ಸಂಗ್ರಹ ಯಾವುದಕ್ಕೆ ಎಂಬುದನ್ನು ಪತ್ತೆ ಹಚ್ಚಿ ಬಿಟ್ಟಿದ್ದಾರೆ.

ಅದು ಬೇರೆ ಯಾವುದೇ ಕಾರಣಕ್ಕಲ್ಲ. ನೀಲಿ ನೀಲಿಯಾಗಿ ಕಾಣುವ ಚಿತ್ರಗಳನ್ನು (ಕನ್ನಡ ಕಡ್ಡಾಯ ಎಂಬ ಕಾರಣಕ್ಕೆ ಈ ರೀತಿ ಉಲ್ಲೇಖಿಸಿದ್ದು) ಶಾಲಾ ಪಠ್ಯ ಕ್ರಮದಲ್ಲಿ ಅಳವಡಿಸಬೇಕು, ಈ ಚಿತ್ರಗಳಿಗೆ ಸಾಂವಿಧಾನಿಕ ಮಾನ್ಯತೆ ನೀಡಬೇಕು ಎಂದು ಆಗ್ರಹಿಸುವುದಕ್ಕಾಗಿಯಂತೆ! ಸದನದಲ್ಲಿ ಇಲ್ಲಸಲ್ಲದ ವಿಷಯಗಳ ಕುರಿತು ಕಚ್ಚಾಡುತ್ತಾ ಕಾಲ ಕಳೆಯುವ ಬದಲು, ಹಾಳು ಮೂಳು ಬೈಗುಳಗಳ ಮೂಲಕ ಸದನದ ಗೌರವಕ್ಕೆ ಧಕ್ಕೆ ತರುವ ಬದಲು, ಈ ರೀತಿಯ ಚಿತ್ರಗಳನ್ನು ನೋಡುತ್ತಾ, ಮೌನವಾಗಿದ್ದುಕೊಂಡೇ ಸದನದ ಗೌರವ-ಘನತೆಯನ್ನು ಎತ್ತಿ ಹಿಡಿಯಬಹುದೆಂಬುದು ಶಾಸಕರ ವಾದವಾಗಿದೆ.

ಇದೇ ಕಾರಣಕ್ಕೆ, ಈ ನೀಲಿ ನೀಲಿ ಚಿತ್ರಗಳ ನಿರ್ಮಾಣ ಕುರಿತು ಹೆಚ್ಚಿನ ಅಧ್ಯಯನಕ್ಕಾಗಿ ಶಾಸಕರ ತಂಡವೊಂದು ಈಗಾಗಲೇ ವಿದೇಶ ಪ್ರಯಾಣಕ್ಕೆ ಸಜ್ಜಾಗಿ ನಿಂತಿದ್ದು, ಅಧ್ಯಯನ ವರದಿಯನ್ನು ಹತ್ತು ವರ್ಷಗಳಿಗಿಂತ ಮೊದಲು ಕೊಡುವುದಿಲ್ಲ, ಅಷ್ಟೂ ವರ್ಷವೂ ಅಧ್ಯಯನ ನಡೆಸುತ್ತಲೇ ಇರಬೇಕಾಗುತ್ತದೆ ಎಂದು ಪಟ್ಟು ಹಿಡಿದ ಪ್ರಸಂಗವೂ ಜರುಗಿದೆ ಎಂಬುದನ್ನು ಬೊಗಳೂರು ಬ್ಯುರೋ ವರದ್ದಿ ಮಾಡಿ ತಂದು ಸುರುವಿದೆ.

ಟ್ರಾಫಿಕ್ಕು ಕಿರಿಕ್ಕು: ಮಂತ್ರಿಗಳನ್ನೇ ಬೊಗಳೂರಿನಿಂದ ಹೊರಹಾಕಿ!

2012-01-24T12:25:00.000+05:30

[ಬೊಗಳೂರು ಟ್ರಾಫಿಕ್ ಕಿರಿಕ್ ಬ್ಯುರೋದಿಂದ]

ಬೊಗಳೂರು, ಜ.24- ಬೊಗಳೂರಿನಲ್ಲಾಗುತ್ತಿರುವ ಟ್ರಾಫಿಕ್ಕಿನ ಜಾಮ್‌ಗೆ ಬೊಗಳೂರು ಬೀಜಪಿ ಶಾಸಕರು ಶಾಪಿಂಗು ಮಾಲುಗಳು ಹಾಗೂ ಅಪಾರ್ಟುಮೆಂಟುಗಳೇ ಕಾರಣ ಎಂಬ ಒಕ್ಕೊರಲಿನ ಕೂಗಾಟ ಮಾಡಿದ್ದರಿಂದ ಆಘಾತಗೊಂಡು ಬೆಚ್ಚಿ ಬಿದ್ದಿರುವ ಬೊಗಳೂರು ಬ್ಯುರೋ, ಇದರ ಹಿಂದಿನ ಅಸತ್ಯವೇನು ಮತ್ತು ಪರಿಹಾರಗಳೇನು ಎಂಬ ಕುರಿತು ತೀವ್ರ ತಪಾಸಣೆಗೆ ತೊಡಗಿಕೊಂಡುಬಿಟ್ಟು ನಿದ್ದೆಗೆ ಜಾರಿತು.

ಈ ನಿದ್ರೆಯ ಫಲಿತಾಂಶವೇ, ಹೊಸದೊಂದು ಸಂಚೋದನೆ. ಟ್ರಾಫಿಕ್ಕು ಕಿರಿಕಿರಿ ಕಡಿಮೆಯಾಗಬೇಕಿದ್ದರೆ, ಏನು ಮಾಡಬೇಕೆಂಬ ಪ್ರಶ್ನೆಗೆ ಉತ್ತರ ಕೆದಕಿ ತತ್ತರಿಸುತ್ತಿರುವಾಗ ಹೊಳೆದು ಬಂದ ಅಂಶವೆಂದರೆ, ಈ ಮಂತ್ರಿಗಳು, ಶಾಸಕರು ಮುಂತಾದ ಕೆಂಪು ಗೂಟದ ಕಾರಿನವರನ್ನೇ ಬೊಗಳೂರಿನಿಂದ ಹೊರಹಾಕಬೇಕು.

ಮಂತ್ರಿ ಬರುತ್ತಾರೆಂದರೆ ನೂರಾರು ವಾಹನಗಳ ಸಾಲು, ಹಿಟ್ ಆಂಡ್ ರನ್ ಕೇಸು ಆಗುತ್ತೆ, ಟ್ರಾಫಿಕ್ಕಿನಲ್ಲಿ ಸಿಲುಕಿಕೊಂಡು ಬ್ರೆಡ್ಡಿಗೆ ಜಾಮು ಹಾಕಿಕೊಂಡು ತಿನ್ನುತ್ತಾ ಕೂರಬೇಕಾಗುತ್ತದೆ. ಅದೇನೋ ರಾಜಕೀಯ ಸಮಾವೇಶ ಮಾಡಿದರೆ ದಿನಗಟ್ಟಲೆ ಜಾಮು ಹಾಕಿಕೊಂಡಿರಬೇಕಾಗುತ್ತದೆ. ಹೀಗಾಗಿ ಇಡೀ ನಗರದ ಸಂಚಾರ ನಿಧಾನಕ್ಕೆ ಕಾರಣವಾಗುವ ವಿಧಾನಸೌಧವನ್ನೇ ಬೊಗಳೂರಿನಿಂದ ಹೊರಗೆ ತಂದುಬಿಟ್ಟರೆ ಎಲ್ಲಾ ಸಮಸ್ಯೆಗಳಿಗೂ ಪರಿಹಾರ ದೊರೆಯುತ್ತದೆ ಎಂಬ ಅಸತ್ಯಾನ್ವೇಷಣೆಯೊಂದು ಎಲ್ಲೆಡೆ ಪ್ರಕಟವಾಗಿ ಪಬ್ಲಿಷ್ ಆಗಿ ಚರ್ಚೆಗೆ ಕಾರಣವಾಗಿ, ವಿಧಾನಸೌಧದ ಮೆಟ್ಟಿಲೇರುವ ಸಾಧ್ಯತೆಗಳೂ ಇವೆ.

ಆನೆಗೇ ಬಕೀಟು: ಪರ್ದಾ ನಿಷೇಧಕ್ಕೆ ಉ.ಪ್ರ.ಸರ್ಕಾರ ಚಿಂತನೆ

2012-01-18T12:20:00.000+05:30

[ಬೊಗಳೂರು ಆನೆಗೆ ಬಕೀಟು ಹಿಡಿಯುವ ಬ್ಯುರೋದಿಂದ]

ಬೊಗಳೂರು, ಜ.18- ತತ್ತರ ಪ್ರದೇಶದಲ್ಲಿ ಪರ್ದಾ ನಿಷೇಧ ಹೇರಲಾಗಿದೆ. ದಲಿತರ ಅಧಿನಾಯಕಿ ಮಾಯಾವತಿ ಇರುವ ನಾಡಿನಲ್ಲಿ, ಮುಸಲ್ಮಾನರ ಏಳಿಗೆಗಾಗಿ ಹಗಲಿರುಳೂ ಶ್ರಮಿಸುತ್ತಿರುವ ಮುಲಾಮು ಸಿಂಗ್ ಕೂಡ ಗರ್ಜಿಸುವ ಈ ನಾಡಿನಲ್ಲಿ ಪರ್ದಾಕ್ಕೆ ಅಷ್ಟು ಸುಲಭವಾಗಿ ಮತ್ತು ಧೈರ್ಯದಿಂದ ನಿಷೇಧ ಹೇರಿದ್ದು ಹೇಗೆ ಎಂಬುದು ಎಲ್ಲರಿಗೂ ಆತಂಕಕ್ಕೂ, ಅಚ್ಚರಿಗೂ, ಕುತೂಹಲಕ್ಕೂ ಕಾರಣವಾಗಿತ್ತು.

ಈ ಕಾರಣಕ್ಕಾಗಿ ಬೊಗಳೂರು ಏಕಸದಸ್ಯ ಬ್ಯುರೋದ ಸರ್ವ ಸದಸ್ಯರೂ ವಿಶೇಷ ಪ್ರವಾಸಕ್ಕೆಂದು ಕೇಂದ್ರ ಸರಕಾರದಿಂದ ಅನುದಾನ ಪಡೆದುಕೊಂಡು ಅಲ್ಲಿಗೆ ಹೋಗಿ ವರದ್ದಿ ತರಲು ತೆರಳಿತು.

ಅಲ್ಲಿ ಹೋಗಿ ನೋಡಲೆನಿತು ಅಚ್ಚರಿ! ಎಲ್ಲೆಲ್ಲೂ ಆನೆಗಳು! ಮತ್ತು ಆನೆ ನಡೆದದ್ದೇ ದಾರಿ ಎಂದು ತಮಗೆ ಮನಬಂದಂತೆ ನಿಯಮಾವಳಿಗಳನ್ನು ರೂಪಿಸುತ್ತಾ, ತಾವು ಮಾಡಿದ್ದೇ ಸರಿ ಎಂಬ ಧೋರಣೆ ತಳೆಯುವ ಈ ಆನೆಗಳ ಹಿಂದೆಯೂ ಮುಂದೆಯೂ ಬಕೀಟು ಹಿಡಿಯುವವರೇ ಹೆಚ್ಚಾಗಿದ್ದಾರೆ!

ಇಂಥ ಒಂದು ಅಚ್ಚರಿಗಳ ನಡುವೆಯೇ, ನಮ್ಮ ವರದ್ದಿಗಾರರು ಬಕೀಟು ಹಿಡಿದದ್ದು ಲದ್ದಿಗೋ ಅಥವಾ ವರದ್ದಿಗೋ ಎಂಬ ಅನುಮಾನ ಬಾರದಿರಲಿ ಎಂದು ಸೊಂಪಾದಕರು ಈಗಾಗಲೇ ಸೂಚಿಸಿರುವ ಹಿನ್ನೆಲೆಯಲ್ಲಿ, ಆನೆಯ ಹಿಂದೆ ಹೋಗುವ ಬದಲು, ಆನೆಗಳೆಲ್ಲವೂ ಪರದೆಯೊಳಗೆ ಅವಿತಿರುವುದರ ಹಿಂದಿನ ರಹಸ್ಯದ ಹಿಂದೆ ಹೋಗಲು ತೀರ್ಮಾನಿಸಲಾಯಿತು.

ನಮ್ಮ ಅಸತ್ಯದ ಅನ್ವೇಷಣೆಯ ಬ್ಯುರೋದವರು ಹೋದಲ್ಲಿ, ಬಂದಲ್ಲಿ, ಕಾಲುಗಳಡಿ ಸಿಲುಕುವ ಈ ಬೃಹತ್ ಗಾತ್ರದ ಆನೆಗಳು ಯಾರ ಕಣ್ಣಿಗೂ ಬೀಳಬಾರದು ಎಂದು ಚುನಾವಣಾ ಆಯೋಗವು ಕಟ್ಟು ನಿಟ್ಟಿನ ಆದೇಶ ಹೊರಡಿಸಿರುವ ಹಿನ್ನೆಲೆಯಲ್ಲಿ ಅಲ್ಲಿನ ಮಾಯಾಂಗನೆ ಸರಕಾರವು, ಬಡಪಾಯಿಗಳ, ದಲಿತರ ಕಲ್ಯಾಣಕ್ಕಾಗಿ ಮೀಸಲಾಗಿಟ್ಟ, ರಾಜ್ಯದ ಪ್ರಜೆಗಳ ತೆರಿಗೆ ಹಣದಲ್ಲಿ ಶತಸಹಸ್ರ ಕೋಟಿ ವ್ಯಯಿಸಿ ನಿರ್ಮಿಸಿದ ಆನೆಗಳನ್ನು ಮುಚ್ಚಲು ಮತ್ತೆ ನೂರು ಕೋಟಿ ವ್ಯಯಿಸುವ ಸಂಕಷ್ಟವನ್ನು ಎದುರಿಸಿತ್ತು.

ಹೀಗಾಗಿ, ಉತ್ತರ ಪ್ರದೇಶದಲ್ಲಿ ಚುನಾವಣೆಗಳು ಮುಗಿಯುವವರೆಗಾದರೂ ಪರ್ದಾ ನಿಷೇಧ ಕಾನೂನು ಜಾರಿಗೊಳಿಸಿದರೆ, ಆನೆಗಳಿಗೆ ಮುಸುಕು ಹಾಕುವ ವ್ಯರ್ಥ ಕಸರತ್ತಿನಿಂದ ಪಾರಾಗಬಹುದು ಎಂದು ಸರಕಾರ ಆಲೋಚಿಸಿದೆ ಎಂದು ನಮ್ಮ ಬಾತು-ಮೀದಾರರು ವರದ್ದಿ ಮಾಡಿದ್ದಾರೆ.

ಬೊಗಳೆ ಬ್ರೇಕಿಂಗ್: ಹ್ಯೂಮನ್ ಆಂಟಿಗಳ ಟ್ರಾಫಿಕ್ ಕಿಂಗ್

2012-01-05T09:02:00.000+05:30

(ಬೊಗಳೂರು ಆಂಟಿ ಟ್ರಾಫಿಕ್ ಕಿಂಗ್ ಬ್ಯುರೋದಿಂದ)

ಬೊಗಳೂರು, ಜ.1- ದೇಶಾದ್ಯಂತ ಆಂಟಿ ಹ್ಯೂಮನ್‌ಗಳ ಟ್ರಾಫಿಕಿಂಗು ಹೆಚ್ಚಾಗುತ್ತಿದೆ ಅಂತ ವರದ್ದಿ ಓದಿದಾಕ್ಷಣ, ಕಳೆದ ವರ್ಷದಿಂದೀಚೆಗೆ ಗಡದ್ದಾಗಿ ನಿದ್ದೆ ಹೊಡೀತಿದ್ದ ಬೊಗಳೆ ರಗಳೆ ಬ್ಯುರೋ ಎಚ್ಚೆತ್ತುಕೊಂಡಿದೆ. ಆಂಟಿ ಹ್ಯೂಮನ್ ಹೆಸರು ಹೇಳಿದಾಕ್ಷಣ ಮಾವನ ಸಂಪನ್ಮೂಲ ಸಚಿವರಾಗಿದ್ದ ಕಪಿಕಪಿಲ ಸಿಬ್ಬಲ್ ಅವರ ಹೆಸರು ನೆನಪಾಗಿ, ಬೊಗಳೂರೆಂಬ ಅಂತರಜಾಲಾಡುವ ಪತ್ರಿಕೆಯ ಎಲ್ಲ ಐಟಂಗಳಿಗೆ ಕಡಿವಾಣ ಹಾಕುತ್ತಾರೆಂಬ ಕಾರಣಕ್ಕೆ ಬೆಚ್ಚಿ, ಕೆಳಗೆ ಬಿದ್ದ ಕಾರಣದಿಂದಾಗಿ ಕಳೆದ ವರ್ಷ ಆರಂಭಿಸಿದ ನಿದ್ರೆ ಜರ್ರನೇ ಇಳಿದು, ಈ ವರ್ಷ ಎಚ್ಚರವಾಗಿತ್ತು. ಈ ಸಂದರ್ಭದಲ್ಲಿ ಬೊಗಳೂರು ಬ್ಯುರೋ, ಸದ್ದು ಗದ್ದಲವಿಲ್ಲದೆ ಹೊಸ ವರ್ಷಾಚರಣೆ ಆರಂಭಿಸಿರುವುದಾಗಿ ತಿಳಿದುಬಂದಿದೆಯಾದರೂ, ಈಗಿನ ಸುದ್ದಿಯ ಮೇಲೆ ಗಮನ ಹರಿಸಲು ಆರಂಭಿಸಿದೆ.

ಸಿಬಿಐ ಎಂಬ ಯುಪಿಎ ಸರಕಾರದ ಅಧೀನದಲ್ಲಿ 'ಸರ್ವತಂತ್ರ ಸ್ವತಂತ್ರ'ವಾಗಿ ಕಾರ್ಯಾಚರಿಸುತ್ತಿರುವ ತನಿಖಾ ಸಂಸ್ಥೆಯು, ಹ್ಯೂಮನ್ ಆಂಟಿಗಳನ್ನು ಟ್ರಾಫಿಕ್ ಮಾಡುವ ಘಟಕವನ್ನೇ ಸ್ಥಾಪಿಸಿರುವುದು ಸ್ವಲ್ಪ ಕುತೂಹಲಕ್ಕೆ ಕಾರಣವಾದ ಕಾರಣ, ನಮ್ಮ ಏಕ ಸದಸ್ಯ ಬ್ಯುರೋದ ಎಲ್ಲಾ ಸಿಬ್ಬಂದಿಗಳೂ ಅಲ್ಲಿಗೆ ಧಾವಿಸಿ ಈ ವರದ್ದಿ ತಂದು ಸುರುವಿದ್ದಾರೆ.

ಇದರ ಪ್ರಕಾರ, ದೇಶಾದ್ಯಂತ ಆಂಟಿಗಳ ಟ್ರಾಫಿಕಿಂಗ್ ಹೆಚ್ಚಾಗುತ್ತಿದೆಯಂತೆ. ಇದಕ್ಕಾಗಿ ಈ ಆಂಟಿಗಳಿಗಾಗಿಯೇ ಟ್ರಾಫಿಕ್ ಯುನಿಟ್ ಒಂದನ್ನು ಸ್ಥಾಪಿಸಲು ಸಿಬಿಐ ನಿರ್ಧರಿಸಿದೆ ಎಂದು ನಮ್ಮ ಬಾತ್‌ಬಾತ್ಮೀದಾರರು ತಿಳಿಸಿದ್ದಾರೆ. ಆದರೂ, ಇದು ಆಂಟಿ ಹ್ಯೂಮನ್‌ಗಳ ಟ್ರಾಫಿಕಿಂಗ್ ಸುಗಮಗೊಳಿಸಲು ರಚಿಸಿದ ಘಟಕವೇ? ಅಥವಾ ಹ್ಯೂಮನ್ ಆಂಟಿಗಳ ಟ್ರಾಫಿಕಿಂಗ್ ಸರಳವಾಗಿಸುವ ಘಟಕವೇ, ಇಲ್ಲಾಂದ್ರೆ, ಹ್ಯೂಮನ್‌ಗಳಿಗೆ ವಿರುದ್ಧವಾಗಿ (ಆಂಟಿಬಯೋಟಿಕ್ ಮಾದರಿಯಲ್ಲಿ) ರಚಿಸಲಾದ ಘಟಕವೇ ಎಂಬುದರ ಬಗ್ಗೆ ಬೊಗಳೂರು ಪಂಡಿತರೆಲ್ಲರೂ ತಲೆ ಕೆರೆದುಕೊಳ್ಳಲಾರಂಭಿಸಿದ್ದಾರೆ. ಅಲ್ಲದೆ, ಇದು ಆಂಟಿಗಳನ್ನು ಟ್ರಾಫಿಕ್ ಮಾಡುವ ಟ್ರಾಫಿಕ್ ಕಿಂಗ್ ಒಬ್ಬಾತನನ್ನು ನೇಮಿಸಿಕೊಳ್ಳಲು ನಡೆಸಿದ ಹುನ್ನಾರವೇ ಎಂಬುದೂ ಬಟಾಬಯಲಾಗಬೇಕಿದೆ.

ಈ ಮಧ್ಯೆ, ಕೇಂದ್ರೀಯ ತನಿಖಾ ಮಂಡಳಿಯೇ ಈ ಘಟಕವನ್ನು ಸ್ಥಾಪಿಸಿರುವುದರಿಂದ, ಈ ಘಟಕ ಸ್ಥಾಪನೆಯ ಉದ್ದೇಶದ ಬಗ್ಗೆಯೇ ತನಿಖೆ ನಡೆಸಲು ಸಿಬಿಐ ಲೋಕಪಾಲವೊಂದನ್ನು ರಚಿಸಲು ನಿರ್ಧರಿಸಲಾಗಿದೆ ಎಂದು ತಿಳಿದುಬಂದಿದೆ.

ಆದರೂ, ಟ್ರಾಫಿಕ್ ಕಿಂಗು ಮಾಡುವ ಕುರಿತು ಯಾರೇ ದೂರು ನೀಡಿದರೂ, ಅವರಿಗೆ 2 ಲಕ್ಷ ರೂಪಾಯಿ ಬಹುಮಾನ ಕೊಡಿಸುವ ಭರವಸೆ ನೀಡಿರುವುದರಿಂದ, ಈ ತನಿಖೆಯನ್ನು ನಡೆಸದಿರಲು ಬೊಗಳೂರು ಬ್ಯುರೋ ನಿರ್ಧರಿಸಿದೆ.

ಬೊಗಳೆ ಬ್ಯುರೋ ಏನಾಯ್ತು?

2012-01-04T17:09:00.001+05:30

ಕಳೆದ ವರ್ಷ ಕಣ್ಣು ಮುಚ್ಚಿಕೊಂಡಿದ್ದ ಬೊಗಳೂರು ಬ್ಯುರೋ, ಈ ವರ್ಷ ಕಾಣಿಸ್ತಾ ಇಲ್ಲವಲ್ಲಾ ಅಂತ ಖುಷಿಯೇ?
ಕಾದು ನೋಡಿ, ಗುರುವಾರ ಮತ್ತೊಂದು ಬ್ರೇಕ್-ಕಿಂಗ್ ನ್ಯೂಸ್‌ನೊಂದಿಗೆ ಬರ್ತಾ ಇದೆ...
ಆಂಟಿಗಳ ಬಗ್ಗೆ...

ಚಿಲ್ಲರೆ ಕ್ಷೇತ್ರಕ್ಕೆ ವಿದೇಶೀ ಹೂಡಿಕೆ: ಚಿಲ್ಲರೆ ಕೊಡದ ಕಂಡಕ್ಟರುಗಳು!

2011-12-02T11:06:00.001+05:30

(ಬೊಗಳೂರು ಚಿಲ್ಲರೆ ಬ್ಯುರೋದಿಂದ)

ಬೊಗಳೂರು, ಡಿ.2- ಚಿಲ್ಲರೆ ಮಾರಾಟ ಕ್ಷೇತ್ರದಲ್ಲಿ ವಿದೇಶೀ ನೇರ ಹೂಡಿಕೆಗೆ ಕೇಂದ್ರ ಸರಕಾರವು ಅನುಮತಿ ನೀಡಲು ನಿರ್ಧರಿಸಿರುವ ಹಿನ್ನೆಲೆಯಲ್ಲಿ ದೇಶಾದ್ಯಂತ ಚಿಲ್ಲರೆಯ ಕೊರತೆ ಕಾಣತೊಡಗಿರುವುದು ಈಗಷ್ಟೇ ಬೊಗಳೆ ರಗಳೆ ಬ್ಯುರೋದ ಅನುಭವಕ್ಕೆ ಬಂದಿದೆ.

ಕಳೆದ ಕೆಲವು ದಿನಗಳಿಂದ ಬೊಗಳೂರಿನ ಬಸ್ಸುಗಳಲ್ಲಿ ಓಡಾಡಿ ಅನುಭವವಿದ್ದ ಏಕ ಸದಸ್ಯ ಬ್ಯುರೋದ ಎಲ್ಲ ಸಿಬ್ಬಂದಿಗಳು, ಚೀಟಿಯನ್ನು ಚುಚ್ಚಿ ತೂತು ಕೊರೆದು ವಿತರಿಸುವ ಕಂಟ್ರಾಕ್ಟರಿಗೆ ನೋಟು ನೀಡಿ ಚಿಲ್ಲರೆ ಕೇಳಿದರು. ಏನಾಶ್ಚರ್ಯ! ಈ ಕಂಟ್ರಾಕ್ಟರರ ಬಾಯಲ್ಲಿ ಒಂದೇ ಒಂದು ಶಬ್ದವಿಲ್ಲ, ಬದಲಾಗಿ ಚೀಟಿಯ ಹಿಂದುಗಡೆ 1 ಅಂತ ಗೀಚಿ ವಾಪಸ್ ಕೊಟ್ಟಿದ್ದರು.

ಇದರ ಹಿಂದಿನ ಮರ್ಮ ಹುಡುಕಿದಾಗ ನಮಗೆ ತಿಳಿದದ್ದು ಇಷ್ಟು. ದೇಶದಲ್ಲಿ ಚಿಲ್ಲರೆ ಮಾರಾಟ ಕ್ಷೇತ್ರದಲ್ಲಿ ವಿದೇಶೀ ನೇರ ಹೂಡಿಕೆಗೆ ಕೇಂದ್ರದ ಬೆಲೆ ಏರಿಕೆ ಸರಕಾರವು ಅನುಮತಿ ನೀಡಲು ನಿರ್ಧರಿಸಿರುವುದರಿಂದ ಎಲ್ಲ ಚಿಲ್ಲರೆಗಳಿಗೂ ಬೇಡಿಕೆ ಹೆಚ್ಚಾಗಿದೆಯಂತೆ. ಹೀಗಾಗಿ ಚಿಲ್ಲರೆಯನ್ನೇ ಬಂಡವಾಳವಾಗಿಸಿಕೊಳ್ಳುವ ಈ ಬಸ್ ಕಂಟ್ರಾಕ್ಟರುಗಳು, ಈ ಚಿಲ್ಲರೆಗಳನ್ನೆಲ್ಲಾ ಒಳಗೆ ಹಾಕಿಕೊಳ್ಳುವ ನಿಟ್ಟಿನಲ್ಲಿ ಇಂಥದ್ದೊಂದು ತಂತ್ರಗಾರಿಕೆಯನ್ನು ಅನುಸರಿಸುತ್ತಿದ್ದಾರೆ ಎಂಬುದನ್ನು ಬೊಗಳೆ ರಗಳೆಯ ಅನ್ವೇಷಕರು ಕಂಡುಕೊಂಡಿದ್ದಾರೆ.

ಈ ತಂತ್ರಗಾರಿಕೆಯ ಪ್ರಕಾರ, ಹಣ ಕೇಳಿ ಪಡೆದುಕೊಂಡ ಚೀಟಿಯ ಹಿಂದುಗಡೆ 1 ಅಥವಾ 2 ಅಂತೆಲ್ಲಾ ಗೀಚಿ ಬರೆಯುವುದು, ರಶ್ ಇರುವ ಸಂದರ್ಭದಲ್ಲೆಲ್ಲಾ ಪ್ರಯಾಣಿಕರು ಇಳಿಯುವಾಗ ಅವರು ಇರುವಲ್ಲಿಂದ ಮತ್ತೊಂದು ಬಾಗಿಲಿನ ಬಳಿ ನಿಂತುಕೊಂಡು ರೈಟ್ ರೈಟ್ (ಈ ನತದೃಷ್ಟ ಪ್ರಯಾಣಿಕನ ಕಡೆ ಬೆನ್ನು ಹಾಕಿ, ಅಂದರೆ ತಿರುಗಿಯೂ ನೋಡದೆ) ಹೇಳುತ್ತಾ ಇರುವುದು .... ಇದರಿಂದಾಗಿ ಚಿಲ್ಲರೆಗಳೆಲ್ಲವೂ ಚರ್ಮದ ಚೀಲದೊಳಗೆಯೇ ಭದ್ರವಾಗಿ ಕುಳಿತಿರುತ್ತವೆ.

ಎಲ್ಲಾದರೂ ಅಪ್ಪಿ ತಪ್ಪಿ ಪ್ರಯಾಣಿಕರು ಚಿಲ್ಲರೆ ವಾಪಸ್ ಕೇಳಿಯೇ ಬಿಟ್ಟರೋ... ಅವರನ್ನು ಚಿಲ್ಲರೆಯಂತೆಯೇ ನೋಡಲಾಗುತ್ತದೆಯಾದರೂ, ಬಸ್ ಈ ಕಂಡಕ್ಟರುಗಳ ಲಾಭದ ಪ್ರಮಾಣವು ಹೆಚ್ಚಾಗುತ್ತದೆ! ಹೇಗೆ ಗೊತ್ತೇ? ಚಿಲ್ಲರೆ ಕೊಡುತ್ತೇನೆ ಎಂಬ ನೆಪದಲ್ಲಿ, ಎಷ್ಟು ಬರೆದಿದ್ದು ಎಂಬುದನ್ನು ನೋಡಲೆಂದು, ಅವರಿಂದ ಪ್ರಯಾಣದ ಚೀಟಿಯನ್ನು ಕಿತ್ತುಕೊಳ್ಳುವುದು; ಒಂದೋ ಎರಡೋ ಚಿಲ್ಲರೆ ಕೊಡುವುದು, ಆದರೆ ತನ್ನ ಕೈಗೆ ಸಿಕ್ಕಿದ ಅದೇ ಚೀಟಿಯನ್ನು ಬೇರೊಬ್ಬ ಪ್ರಯಾಣಿಕನಿಗೆ ವಿತರಿಸುವುದು! ಹೇಗಿದೆ ಚಿಲ್ಲರೆ ಐಡಿಯಾ? ಹೀಗಾಗಿ ಬೊಗಳೂರೆಂಬ ಬೊಗಳೂರಲ್ಲಿ ಹೇಗಾದರೂ ಬದುಕಬಹುದು ಎಂಬುದಕ್ಕೆ ಈ ಕಂಟ್ರಾಕ್ಟರುಗಳು ದಾರಿಯನ್ನು ತೋರಿಸಿದ್ದಾರೆ. ಈಗ ಇದೇ ಅಡ್ಡದಾರಿ ಹಿಡಿಯಲು ಬೊಗಳೂರು ಬ್ಯುರೋದ ಸರ್ವ ಸದಸ್ಯರೂ ಉದ್ಯುಕ್ತರಾಗಿದ್ದಾರೆ ಎಂಬುದನ್ನು ನಮ್ಮ ಹದ್ದಿನ ಕಣ್ಣಿನ ತನಿಖಾ ಮಂಡಳಿ ಪತ್ತೆ ಹಚ್ಚಿರುವುದಾಗಿ ಬೊಗಳೂರಿನ ಪ್ರತಿಸ್ಪರ್ಧಿ ಪತ್ರಿಕೆಯಲ್ಲಿ ವರದಿ ಬಂದಿದೆ.

ತನು,ಮನದಲ್ಲಿ ಕನ್ನಡಕ್ಕೆ ಒತ್ತು ನೀಡೋಣ!

2011-11-03T08:00:00.000+05:30

(ಬೊಗಳೂರು ಕನ್ನಡವೇ ಆತ್ಮ ಬ್ಯುರೋದಿಂದ)

ಭೊಘಳೂರು: ಖಣ್ಣಢ ರಾಝ್ಯೋಥ್ಸವ ಭಂಧಿಧ್ಧರೂ ಭೊಘಳೂರು ಭ್ಯುರೋ ಎಛ್ಛೆಥ್ಥೂ...! ಖೊಂಢಿಳ್ಳವೇಖೆ ಎಂಧು ವಿಷ್ವಾಧ್ಯಂತ ಹರಢಿಖೊಂಢಿರುವ ಭೊಘಳೆ ರಘಳೆ ಅಂಥರ್ಝಾಳ ಫಥ್ರಿಖೆಯ ಏಖೈಖ ಓಧುಘರೆಳ್ಳರೂ ಧಭಾಯಿಸಿಧ ಖಾರಣಧಿಂಧಾಘಿಯೇ ಈ ಒಂಧು ಶ್ಫಷ್ಠಣೆ.

ಮೇಲೆ ಅಕ್ಷರಗಳೆಲ್ಲವೂ ಮಹಾಪ್ರಾಣ ಹೆಚ್ಚಾಗಿದ್ದು, ನಮ್ಮ ಪ್ರಾಣ ಯಾಕೆ ತಿಂತೀರಾ ಎಂದು ಕೇಳುವ ಓದುಗರಿಗೆಲ್ಲಾ ನಮ್ಮ ಉತ್ತರ... "ಮುಖ್ಯಮಂತ್ರಿಗಳು ಹೇಳಿದ್ದಾರೆ!" ಅಂತ ಮಾತ್ರ.

ಹಾಗಾದರೆ ಮುಖ್ಯಮಂತ್ರಿಗೋಳು ಏನಂತ ಹೇಳಿದ್ದಾರೆ? ಕನ್ನಡ ರಾಜ್ಯೋತ್ಸವದ ಭಾಷಣ ಮಾಡುತ್ತಿದ್ದ ಅವರು, ಕನ್ನಡ ನಮ್ಮ ಆಸ್ತಿ, ಅದನ್ನು ನಾವು ಉಳಿಸಬೇಕು (ಕಡಿಮೆ ಬಳಸಿದರೆ ಉಳಿತಾಯ ಆಗುತ್ತದೆ ಅಂತ ಗಣಕಿಂಡಿಯ ಪವನಜ ಆಗಾಗ್ಗೆ ಉಲ್ಲೇಖಿಸುತ್ತಲೇ ಬಂದಿದ್ದಾರೆ.) ಮತ್ತು ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿ, ಕನ್ನಡಕ್ಕೆ ನಾವು ಯಾವಾಗಲೂ ಒತ್ತು ನೀಡಬೇಕು ಎಂದಿದ್ದರು. ಅದನ್ನೇ ಕಾಯಾ-ವಾಚಾ-ಮನಸಾ-ಪೆನ್ನಾ ಪಾಲಿಸಿದ ನಮ್ಮ ಬ್ಯುರೋ, ಕನ್ನಡವನ್ನು ಒತ್ತಿ ಒತ್ತಿ ಬರೆಯಲು ನಿರ್ಧರಿಸಿದ ಪರಿಣಾಮವಾಗಿ ಮೇಲಿನ ವಾಕ್ಯ ಮೂಡಿಬಂದಿದೆ.

||ನಮ್ಮ ಬರಹವೂ, ಮಾತೂ, ಮನಸ್ಸೂ ಕನ್ನಡವಾಗಿರಲಿ, ಮತ್ತು ನಮ್ಮ ಯೋಚನೆಯೂ ಕನ್ನಡದಲ್ಲೇ ಇರಲಿ||

ಸರ್ವರಿಗೂ ಕನ್ನಡದ ಹಬ್ಬದ ಶುಭಾಶಯಗಳು

ಮೇಯೋರನ್ನೇ ಕತ್ತೆ ಮಾಡಬೇಕೋ, ಕತ್ತೆಯನ್ನೇ ಮೇಯೋರ್ ಮಾಡ್ಬೇಕೋ?

2011-10-04T09:30:00.000+05:30

[ಬೊಗಳೂರು ಮೇಯೋರ ಬ್ಯುರೋದಿಂದ]

ಬೊಗಳೂರು, ಅ.4- ಈ ದೇಶದಲ್ಲಿ ವಂಚನೆ ಮಾಡದವರು, ಧಗಾಕೋರರಲ್ಲದವರು, ಭ್ರಷ್ಟಾಚಾರ ಮಾಡದವರಿಗೆ ಅಧಿಕಾರ, ಹಣ, ಅಂತಸ್ತು ಯಾವುದೂ ಇರುವುದಿಲ್ಲ ಎಂಬುದನ್ನು ಮನಗಂಡ ಹೊರತಾಗಿಯೂ ಬೊಗಳೂರಿನ ಮಂದಿ ವಿಶೇಷವಾದ ಪ್ರಯೋಗವೊಂದನ್ನು ಮಾಡಲು ಹೊರಟಿದ್ದಾರೆ.

ಮುಂಬರುವ ಮಹಾ ಚುನಾವಣೆಗಳನ್ನು ದೃಷ್ಟಿಯಲ್ಲಿಟ್ಟುಕೊಂಡೇ ಈ ಪ್ರಯೋಗವನ್ನು ಮಾಡಲಾಗುತ್ತಿದ್ದು, ಆರಂಭಿಕ ಹಂತದಲ್ಲಿ, ನಗರ ಸಭೆಗಳಿಗೆ ಈ ವ್ಯವಸ್ಥೆ ಮಾಡಲಾಗುತ್ತದೆ ಎಂದು ತಿಳಿದುಬಂದಿದೆ.

ಅದರ ಪ್ರಕಾರ, ಬೊಗಳೂರು ಮಹಾನರಕ ಪಾಲಿಕೆಯ ಮುಂದಿನ ಮೇಯೋರ್ ಸ್ಥಾನಕ್ಕೆ ಅಭ್ಯರ್ಥಿಯನ್ನಾಗಿ ಶ್ರೀಶ್ರೀಮಾನ್‌ಮಾನ್ ಗಾರ್ದಭೇಶ್ ಅವರನ್ನು ನಿಲ್ಲಿಸಲು ನಿರ್ಧರಿಸಲಾಗಿದೆ.

ಗಾರ್ದಭೇಶ್‌ಗೆ ವಂಚನೆ ಮಾಡುವುದು, ಮೋಸ ಮಾಡುವುದು, ಧಗಾ ಎಸಗುವುದು, ಭ್ರಷ್ಟಾಚಾರ ಮಾಡುವುದು, ವಿದೇಶೀ ಬ್ಯಾಂಕುಗಳಲ್ಲಿ ಕಪ್ಪು ಹಣ ಇರಿಸುವುದು, ಓಟು ಬ್ಯಾಂಕ್ ರಾಜಕಾರಣ ಮಾಡುವುದು ಇತ್ಯಾದಿಗಳೆಲ್ಲವೂ ಗೊತ್ತಿಲ್ಲ ಎಂಬುದು ಈ ಮೇಯೋರ್ ಅಭ್ಯರ್ಥನಕ್ಕೆ ಅರ್ಹತೆಯಾಗಿದ್ದರೂ ಒಂದೇ ಒಂದು ಶಂಕೆಯ ಸುಳಿಯೊಂದು ಕೂಡ ಕೇಳಿಬರುತ್ತಿದೆ.

ಅದೇನು ಗೊತ್ತೇ? ಈ ಗಾರ್ದಭ ಮಹಾಶಯರು ಕಸ, ಕಡ್ಡಿ ಇತ್ಯಾದಿಯಾಗಿ ಸಿಕ್ಕಿದ್ದೆಲ್ಲವನ್ನೂ ನುಂಗುವ ಛಾತಿ ಉಳ್ಳವರಾಗಿರುವುದರಿಂದ ಊರಿನ ಖಜಾನೆಯಲ್ಲಿರುವ ಹಣ, ವಿವಿಧ ಕಾಮಗಾರಿಗಳಿಗೆ ಮಂಜೂರಾಣ ಹಣ, ಸಂತ್ರಸ್ತರಿಗೆ ಪರಿಹಾರ ವಿತರಣೆಗಾಗಿ ಮೀಸಲಾಗಿರುವ ಹಣವನ್ನೆಲ್ಲಾ ನುಂಗಿದರೆ ಏನು ಮಾಡುವುದು ಎಂಬ ಒಂದೇ ಒಂದು ಚಿಂತೆಯನ್ನು ಗಾರ್ದಭೇಶ್ ಅವರ ಪಕ್ಷೀಯರು ತೋಡಿಕೊಂಡಿದ್ದು, ಈ ಬಗ್ಗೆ ಅಸತ್ಯಾನ್ವೇಷಿಯ ಸಲಹೆ ಕೇಳಿದ್ದಾರೆ ಮತ್ತು ಗಾರ್ದಭೇಶ್ ಮೇಲೆ ಹದ್ದಿನ ಕಣ್ಣು ಅಲ್ಲದಿದ್ದರೂ, ಕತ್ತೆಯ ಕಣ್ಣನ್ನಾದರೂ ಇರಿಸುವಂತೆ ಕೋರಿಕೊಂಡಿದ್ದಾರೆ.

ಹೀಗಾಗಿಯೇ ಶೀರ್ಷಿಕೆಯಲ್ಲಿನ ಜಿಜ್ಞಾಸೆ ಎಲ್ಲ ಜಾರಕೀಯ ಪಕ್ಷಗಳನ್ನೂ ಕಾಡುತ್ತಿರುವುದು ಸ್ಪಷ್ಟವಾಗಿದೆ.

ಬೊಗಳೆ ಹಾರ್ಟ್ ಬ್ರೇಕ್: ಇಂದಿನಿಂದ ಯುವತಿಯರ ಉಗುರು ಉದ್ದವಾಗಲಿದೆ!

2011-09-27T09:50:00.000+05:30

[ಬೊಗಳೂರು ವಿಶೇಷ ಯುವ Some-ಚೋದನಾ ಬ್ಯುರೋದಿಂದ]

ಬೊಗಳೂರು, ಸೆ.27- ಇಂದಿನಿಂದ ಕಾಲೇಜು ಹುಡುಗಿಯರು ಮತ್ತು ಹುಡುಗರ ಉಗುರುಗಳು ತೀರಾ ಉದ್ದ ಬೆಳೆಯಲಿವೆ ಎಂದು ಬೊಗಳೂರು ಏಕಸದಸ್ಯ ಬ್ಯುರೋದ ಸಮಸ್ತ ಸಿಬ್ಬಂದಿಗಳು ನಿಗೂಢವಾದ ರಹಸ್ಯವೊಂದನ್ನು ಪತ್ತೆ ಹಚ್ಚಿದ್ದಾರೆ.

ಹೀಗಯೇ ತಿರುಗಾಡುತ್ತಿದ್ದಾಗ ಕ್ಯೂಟ್ ಆಗಿರುವ ಎಸ್ಸೆಮ್ಮೆಸ್ಸುಗಳು ಬೊಗಳೂರು ಬ್ಯುರೋದ ವರದ್ದಿಗಾರರ ಇನ್‌ಬಾಕ್ಸ್‌ನಲ್ಲಿಯೂ ಅಪ್ಪಿ ತಪ್ಪಿ ಬಂದು ಬೀಳುತ್ತಿದ್ದವು. ಅವುಗಳನ್ನು ಓದಲಾಗದೆ, ಈ ಎಸ್ಸೆಮ್ಮೆಸ್ಸುಗಳೆಂಬ ನಿರ್ಭಾವುಕ ಸಂದೇಶಗಳ ಹಿಂದಿನ ಭಾವಾರ್ಥವನ್ನು ಅರ್ಥೈಸಿಕೊಳ್ಳಲಾಗದೆ ಚಡಪಡಿಸಿ, ಏನು ಮಾಡೋಣ ಎಂದು ಚಿಂತಾಕ್ರಾಂತವದನರಾಗಿ ಕುಳಿತಿದ್ದಾಗ ಆಗಲೇ ಒಂದು ವರದ್ದಿಯು ಸಿಡಿಲೆರಗಿದಂತೆ ಬಂದು ಬಿದ್ದು ನಮ್ಮ ವರದ್ದಿಗಾರರನ್ನು ಗಾಢ ನಿದ್ರೆಯಿಂದ ಎಬ್ಬಿಸಿತ್ತು.

ಬೇರೆಲ್ಲಾ ಅಗತ್ಯ ವಸ್ತುಗಳ ಬೆಲೆಗಳನ್ನು ಆಗಸದೆತ್ತರಕ್ಕೆ ಏರಿಸುತ್ತಲೇ ಇರುವ ಯುಪಿಎ ಸರಕಾರ ಒಂದಾದರೂ ಆವಶ್ಯ ವಸ್ತುಗಳನ್ನು ಇಳಿಸಬಹುದಲ್ಲಾ ಎಂದು ಆಲೋಚಿಸಿ ಈ ನಿರ್ಧಾರ ಕೈಗೊಂಡಿತ್ತು ಎನ್ನಲಾಗಿದೆ.

ಅವೇನು ಅಂತ ನಮ್ಮ ಯುವ ಓದುಗ ಬಳಗಕ್ಕೆ ಈಗಾಗಲೇ ಕುತೂಹಲ ಮೂಡಿರಲಿಕ್ಕಿಲ್ಲ. ಯಾಕೆಂದರೆ, ಕೆಲವರು ಈಗಾಗಲೇ ರೋದಿಸತೊಡಗಿದ್ದಾರೆ. ಬೆಲೆ ಏರಿಸುತ್ತಲೇ ಜನರನ್ನು ದುಃಖದಲ್ಲಿ ತೇಲಾಡುವಂತೆ ಮಾಡುತ್ತಿದ್ದ ಸರಕಾರ, ಈ ಬಾರಿ ಇಳಿಸೋಣ ಎಂದುಕೊಂಡು, ದಿನವೊಂಕ್ಕೆ ಕಳುಹಿಸಬಹುದಾದ ಗರಿಷ್ಠ ಎಸ್ಎಂಎಸ್‌ಗಳ ಸಂಖ್ಯೆಯನ್ನು ಕೇವಲ 100ಕ್ಕೆ ಸೀಮಿತಗೊಳಿಸಿ ಆದೇಶ ಹೊರಡಿಸಿದೆ. ಇದರಿಂದಾಗಿ ತಮಗೆ ಬಂದ ಎಸ್ಸೆಮ್ಮೆಸ್ಸುಗಳನ್ನು ಫಾರ್ವರ್ಡ್ ಮಾಡುತ್ತಲೇ ಹಲವಾರು ಯುವ ಹೃದಯಗಳನ್ನು ಕಲಕುತ್ತಾ, ಅವರನ್ನು ತತ್ವಜ್ಞಾನಿಗಳಂತೆ ಮಾಡುತ್ತಿದ್ದ, "ಈ ಸಂದೇಶ ನಿಜವಾಗಿರಬಹುದೇ?" ಎಂದೆಲ್ಲಾ ಆಲೋಚನೆಗೀಡಾಗುವಂತೆ ಮಾಡುತ್ತಿದ್ದ ಈ ಸಂದೇಶಗಳು ಇನ್ನು ಕಡಿಮೆ ಬರಬಹುದು ಎಂಬುದೇ ಈ ಯುವ ಜನಾಂಗದ ಗೋಳಾಟಗಳಿಗೆ ಕಾರಣ.

ಇದು ಒಂದೆಡೆಯಾದರೆ, ಯುವಕರು ಮತ್ತು ಯುವತಿಯರ ಉಗುರುಗಳು ಬೆಳೆಯಲಾರಂಭಿಸಿರುವುದನ್ನು ಕೂಡ ಬೊಗಳೆ ರಗಳೆ ಬ್ಯುರೋ ಪತ್ತೆ ಹಚ್ಚಿದೆ.

ಇದುವರೆಗೆ, ಮೊಬೈಲ್ ಫೋನಿನ ಕೀಪ್ಯಾಡುಗಳಲ್ಲಿನ ಅಕ್ಷರಗಳೆಲ್ಲವೂ ಮಾಸಿ ಹೋಗಿ, ಇದ್ಯಾವ ಡಬ್ಬಾ ಮೊಬೈಲ್ ಅಂತ ಗೋಚರಿಸಿರುವುದನ್ನು ನೀವು ಎಂದಾದರೂ ಮನಗಂಡಿರಬಹುದು. ಆದರೆ ಎರಡೂ ಕೈಗಳಿಂದ, ಒಂದು ಕೈಯಿಂದ ಮತ್ತು ಕೆಲವರಂತೂ ಒಂದೇ ಬೆರಳಿನಿಂದ ಎಸ್ಎಂಎಸ್ ಟೈಪ್ ಮಾಡುವ ಪ್ರವೀಣರುಗಳ ಮಹತ್ಸಾಧನೆಯ ಫಲವಿದು. ಇಂಟರ್ನೆಟ್ ಸಂಪರ್ಕವಿಲ್ಲದೆಯೇ ತಮ್ಮ ಪ್ರೀತಿಪಾತ್ರರ ಜೊತೆಗೆ ಸಂಭಾಷಣೆ ಮಾಡಬಲ್ಲ ಕಲೆ ಇವರಿಗೆ ಸಿದ್ಧಿಸಿರುತ್ತದೆ. ಮಸ್ತಕದಲ್ಲಿ ಮೂಡಿದ ಭಾವನೆಗಳನ್ನು ನೇರವಾಗಿಯೇ ಮೊಬೈಲು ಫೋನಿನ ಎಸ್ಎಂಎಸ್‌ನಗಳಗೆ ತುರುಕಿ, ಜಿಮೇಲ್ ಚಾಟಿಂಗಿಗಿಂತಲೂ ವೇಗವಾಗಿ ಟೈಪ್ ಮಾಡಿ ಮಾಡಿ, ಅವರ ಬೆರಳ ತುದಿಗಳೆಲ್ಲವೂ ಸವೆದಷ್ಟೇ ಈ ಕೀಪ್ಯಾಡ್ ಮೇಲಿನ ಅಕ್ಷರಗಳೂ ಸವೆದಿರುವುದನ್ನು ಬೊಗಳೆ ರಗಳೆ ಬ್ಯುರೋ ಕೂಡ ಗಮನಿಸಿದೆ.

ಈಗ ದಿನವೊಂದಕ್ಕೆ ಬರೇ 100 ಎಸ್ಸೆಮ್ಮೆಸ್ಸುಗಳಿಗೆ ಮಾತ್ರವೇ ಅವಕಾಶವಿರುವುದರಿಂದ ದಿನಕ್ಕೆ ಸಾವಿರಗಟ್ಟಲೆ ಸಂದೇಶಗಳನ್ನು ಟೈಪು ಮಾಡುತ್ತಾ ಉಗುರು ಬೆಳೆಯದಂತೆ (ಅಂದರೆ ಕೈಯಲ್ಲಿರುವ ಉಗುರಿಗೆ ಬೆಳೆಯಲೂ ಅವಕಾಶವಿಲ್ಲದಂತೆ!) ಫಾಸ್ಟಾಗಿ ಟೈಪು ಮಾಡುತ್ತಾ, ಎಸ್ಎಂಎಸ್ ಚಾಟ್ ಮಾಡುತ್ತಿರುವವರು ಕಂಗಾಲಾಗಿದ್ದಾರೆ, ರೋದಿಸಲಾರಂಭಿಸಿದ್ದಾರೆ ಮತ್ತು ಇದುವರೆಗೆ ಹಾಸಿಗೆಯಲ್ಲೇ ಆರಾಮವಾಗಿ ಮಲಗಿಕೊಂಡು ರಾತ್ರಿಯಿಡೀ ಟೈಪು ಮಾಡುತ್ತಿದ್ದವರೆಲ್ಲ ನೆಲದ ಮೇಲೆ ಬಿದ್ದು ಹೊರಳಾಡಿ ನರಳಾಡತೊಗಿದ್ದಾರೆ.

ಸರಕಾರದ ಕೊಡುಗೆಯೆಂದರೆ ಇದೇ! ಬೇರೆಲ್ಲಾ ಬೆಲೆಗಳು ಏರಿದಂತೆಯೇ, ಎಸ್ಎಂಎಸ್‌ಗಳ ಸಂಖ್ಯೆಯನ್ನು ಇಳಿಸಿ ನೋಡೋಣ ಎಂದುಕೊಂಡರೆ, ಯುವಜನರ ಉಗುರಿನ ಉದ್ದವೂ ಏರಿಕೆಯಾಗತೊಡಗಿದೆ!

ಬೊಗಳೆಯಲ್ಲಿ ನಾಳೆ ಒಂದು ಹಾರ್ಟ್ ಬ್ರೇಕಿಂಗ್ ಸುದ್ದಿ!

2011-09-26T08:10:00.001+05:30

[ಬೊಗಳೂರು ಜಾಹೀರಾತು ಬ್ಯುರೋದಿಂದ]

ಸರಕಾರದ ಬೆಲೆ ಏರಿಕೆ ಕಾರ್ಯಕ್ರಮದಿಂದ ಮೇಲೇಳಲಾರದೆ, ಇಂದು ಯಾವುದರ ಬೆಲೆ ಏರಿದೆ ಎಂಬ ಆತಂಕದಿಂದಲೇ ಬೆಳಗ್ಗೆ ಎಚ್ಚರವಾದರೂ ಮರಳಿ ಹೊದ್ದು ಮಲಗುತ್ತಿದ್ದ ಬೊಗಳೂರು ಏಕಸದಸ್ಯ ಬ್ಯುರೋದ ಸಮಸ್ತ ಸಿಬ್ಬಂದಿಗಳನ್ನು ಬಡಿದೆಬ್ಬಿಸುವ ಕಾರ್ಯಕ್ರಮವೊಂದು ನಡೆದಿದೆ.

ಇಷ್ಟಕ್ಕೂ ಕುಂಭಕರ್ಣನಿಗಿಂತಲೂ ಮಿಗಿಲಾಗಿ ತೂಕಡಿಸುತ್ತಿದ್ದ ಬೊಗಳೂರು ಬ್ಯುರೋವನ್ನು ಎಚ್ಚರಿಸಲು ಈ ಸರಕಾರ ಮಾಡಿದ ಕ್ರಮವದರೂ ಏನು?

ಅಂತ ತಿಳಿದುಕೊಳ್ಳಿ.... ಮಂಗಳವಾರದ ಸಂಚಿಕೆಯಲ್ಲಿ...

ನಿಮ್ಮ ಬೊಗಳೆ ರಗಳೆ ಪ್ರತಿಗಳನ್ನು ಈಗಲೇ ಕಾಯ್ದಿರಿಸಿಕೊಳ್ಳಿ.

ಇಲ್ಲವಾದರೆ, ಅತ್ಯುತ್ತಮ ವರದ್ದಿಗಳಿರುವ ಬೊಗಳೆ ರಗಳೆ ಪತ್ರಿಕೆಯ ಪ್ರತಿಗಳೆಲ್ಲಾ ರದ್ದಿಗೆ ಸೇರಬಹುದು, ಎಚ್ಚರಿಕೆ!

ಅಣ್ಣಾಗೆ ಯುವಜನರ ಬೆಂಬಲ ಕಟ್ ಮಾಡಲು ಯುಪಿಎ ಮಾಡಿದ್ದೇನು ಗೊತ್ತೇ????

2011-08-24T15:20:00.001+05:30

(ಬೊಗಳೂರು ಸಂಚೋದನಾ ಬ್ಯುರೋದಿಂದ)

ಬೊಗಳೂರು: ಅಣ್ಣಾ ಹಜಾರೆಯವರು ನಡೆಸುತ್ತಿರುವ ಉಪವಾಸ ಸತ್ಯಾಗ್ರಹದಲ್ಲಿ ಪಾಲ್ಗೊಳ್ಳುತ್ತಿರುವುದು ಹೆಚ್ಚಾಗಿ ಯುವ ಜನತೆ. ಆದರೆ, ಏಳೆಂಟು ದಿನಗಳಾದ ಬಳಿಕವಾದರೂ, ಅಣ್ಣಾ ಅವರಿಗಿರುವ ಬೆಂಬಲದ ಸಾಗರ ನಿಲ್ಲಬಹುದೆಂದು ಲೆಕ್ಕಾಚಾರ ಹಾಕಿದ್ದ ಉಪ (upa) ಸರಕಾರಕ್ಕೆ ಭ್ರಮ ನಿರಸನಾಗಿದೆ. ಹೀಗಾಗಿ ಅದಕ್ಕಾಗಿ ಹೊಸ ಹೊಸ ತಂತ್ರಗಳನ್ನು ಹೂಡುತ್ತಿದೆ ಎಂದು ನೂರು ವರ್ಷ ಹಳೆಯ ಪಕ್ಷದ ವಕ್ತಾರ ಎಂತೀವಾರಿ ಅವರು ಬೊಗಳೂರು ಬ್ಯುರೋಗೆ ಮಾತ್ರವೇ ತಿಳಿಸಿದ್ದಾರೆ.

ನಮ್ಮ ದೇಶದ ಮಾನ್ಯ ನಿಧಾನಮಂತ್ರಿಗಳು ಆಗಾಗ್ಗೆ ದಿಢೀರ್ ಆಗಿ ನಿದ್ದೆಯಿಂದ ಏಳುವಂತೆಯೇ, ಬೊಗಳೂರು ಬ್ಯುರೋದ ಸೊಂಪಾದಕರು, ವರದ್ದಿಗಾರರೂ ಕೂಡ ದಿಢೀರ್ ಆಗಿ ನಿದ್ದೆಯಿಂದ ಎದ್ದು ಕುಳಿತಾಗ, ದೇಶಾದ್ಯಂತ ಎಲ್ಲರ ಡಿಕ್ಷನರಿಗಳು 'ರಾಜಕಾರಣಿಗಳು ಎಂದರೆ ಭ್ರಷ್ಟಾಚಾರ' ಎಂಬ ಅರ್ಥವನ್ನೇ ತೋರಿಸುತ್ತಿದ್ದವು. ಇದರ ಹಿಂದಿನ ಕಾರಣದ ಜಾಡು ಹಿಡಿದು ಹೊರಟಾಗ ಹಲವು ಅಂಶಗಳು ಬಯಲಾದವು. ಯುವಕರು, ಕಾಲೇಜಿಗೆ ಹೋಗುವವರು ಎಲ್ಲ ಕಡೆ ಚಕ್ಕರ್ ಹಾಕಿ ಅಣ್ಣಾ ಬಳಗವನ್ನು ಸೇರುತ್ತಿರುವುದನ್ನೇ ಮುಖ್ಯ ಗುರಿಯಾಗಿರಿಸಿ ತನಿಖೆ ಕೈಗೊಳ್ಳಲಾಗಿತ್ತುಯ

ಹೊಸ ಹೊಸ ಅಸ್ತ್ರಗಳನ್ನು ಪ್ರಯೋಗಿಸುತ್ತಿರುವ ಸಾನಿಯಾ ಗಾಂಧಿಯವರ 'ಉಪ' ಸರಕಾರವು, ಇದೀಗ ಮಾಡೆಲ್‌ಗಳನ್ನು ಛೂಬಿಟ್ಟಿದೆ ಎಂದು ಗೊತ್ತಾಗಿದೆ. ಮಾಡೆಲ್ಲುಗಳು ಹೆಚ್ಚಾಗಿ ಮೈಮೇಲೆ ಅರಿವೆಯೂ ಪರಿವೆಯೂ ಇಲ್ಲದೆ, ಜನರನ್ನು ಅದರಲ್ಲೂ ಯುವ ಜನಾಂಗವನ್ನು ಸೆಳೆಯುವ ಸಾಮರ್ಥ್ಯ ಹೊಂದಿದ್ದಾರೆ ಎಂಬುದನ್ನು ಅರಿತುಕೊಂಡಿರುವ ಸರಕಾರವು, ಅವರನ್ನೇ ಕಣಕ್ಕಿಳಿಸಿದರೆ ಹೇಗೆ ಎಂದೆಲ್ಲಾ ಯೋಚಿಸಿ ನಿರ್ಧಾರಕ್ಕೆ ಬಂದಿರುವುದಾಗಿ, ಅಣ್ಣಾ ಹಜಾರೆಯವರನ್ನು "ಕಾಲಿನಿಂದ ತಲೆಯವರೆಗೆ ಭ್ರಷ್ಟ" ಎಂದು ಕರೆದು, ಈಗ ಮೂಲೆಗೆ ಝಾಡಿಸಲ್ಪಟ್ಟಿರುವ ಎಂತಿವಾರಿ, ಬೊಗಳೂರು ರದ್ದಿಗಾರರಿಗೆ ತಿಳಿಸಿದ್ದಾರೆ.

ಇಂಥದ್ದೊಂದು ತಂತ್ರಗಾರಿಕೆಗೆ ತಮ್ಮದೇ ಮಾತುಗಳು, ಪದಪ್ರಯೋಗ, ವಿದ್ವತ್ ಕಾರಣ ಎಂದೂ ಎಂತಿವಾರಿ ಎದೆ ತಟ್ಟಿಕೊಂಡು ಹೇಳಿದ್ದಾರೆ. ಯಾಕೆಂದರೆ, ತಾವು ಹಜಾರೆಯವರನ್ನು "ಟಾಪ್ ಟು ಬಾಟಮ್" ಭ್ರಷ್ಟ ಎಂದಿದ್ದೆ. ಆನಂತರ ಪಕ್ಷವು ಇದನ್ನು ನಿರಾಕರಿಸಿ ಹೇಳಿಕೆ ನೀಡಲೇಬೇಕಾದ ಅನಿವಾರ್ಯತೆ ಬಂದಿತ್ತು. ನಿರಾಕರಿಸುವುದು ಹೇಗೆ? ಹಿಂದಿನ ಹೇಳಿಕೆಗೆ "ಇಲ್ಲ" ಸೇರಿಸಿದರೆ ಆಯಿತು. ಅಂದರೆ ಟಾಪ್ ಇಲ್ಲ, ಬಾಟಮ್ ಇಲ್ಲ, ಮೀನ್ಸ್ ಟಾಪ್‌ಲೆಸ್ ಮತ್ತು ಬಾಟಮ್‌ಲೆಸ್. ಇದುವೇ ಯುಪಿಎಯ ತಂತ್ರಗಾರರಿಗೆ ಹೊಳೆದ ಅಂಶ. ಈ ಕಾರಣದಿಂದ, 'ಅಣ್ಣಾ ಅವರು ಹೇಳಿದಂತೆ ಬಲಿಷ್ಠ ಲೋಕಪಾಲ ಕಾಯಿದೆ ಜಾರಿಗೊಳಿಸದಿದ್ದರೆ, ಟಾಪ್‌ಲೆಸ್-ಬಾಟಂಲೆಸ್ ಆಗಿ ಬೆತ್ತಲೆ ನೃತ್ಯ ಮಾಡುತ್ತೇನೆ' ಎಂದು ಮಾಡೆಲ್ಲುಗಳ ಕೈಯಿಂದ ಮತ್ತು ಬಾಯಿಯಿಂದ ಹೇಳಿಕೆ ಕೊಡಿಸಲಾರಂಭಿಸಿದ್ದಾರೆ!

ಹೇಗಿದ್ದರೂ ಬಿಸಿ ರಕ್ತದ ಯುವಕರು ಈ ಮಾಡೆಲ್ಲುಗಳತ್ತ ಆಕರ್ಷಿತವಾಗಬಹುದು. ಅವರು ಅಣ್ಣಾ ಹಜಾರೆಗೆ ಬೆಂಬಲ ನೀಡುವುದನ್ನು ನಿಲ್ಲಿಸಿ, ಕಠಿಣ ಲೋಕಪಾಲ ಮಸೂದೆಯು ಜಾರಿಯಾಗದಂತೆ ನೋಡಿಕೊಂಡರೆ, ಮುಂದೆ ತಮಗೇ ಒಳಿತು, ಈ ಮಾಡೆಲ್ಲುಗಳ ನಗ್ನ ನೃತ್ಯ ನೋಡಬಹುದಾಗಿದೆ ಎಂದುಕೊಳ್ಳುವರು ಎಂಬುದು ಈ ಸರಕಾರದ ಲೆಕ್ಕಾಚಾರವಾಗಿತ್ತು!

ಆದರೆ, ಯುವಜನತೆಗೆ ಭ್ರಷ್ಟಾಚಾರ ಎಷ್ಟು ರೋಸಿಹೋಗಿದೆಯೆಂದರೆ, ಟಾಪ್‌ಲೆಸ್-ಬಾಟಂಲೆಸ್ ಆಗಿ ಹ್ಯಾಪ್‌ಲೆಸ್ ಆಗಿದ್ದರೂ ಅಲ್ಲೂ ಕೂಡ ಹೋಪ್‌ಲೆಸ್ ಭ್ರಷ್ಟಾಚಾರವೇ ಕಾಣುತ್ತಿದೆ, ಅವರು ಹೋರಾಟವನ್ನೆಂದಿಗೂ ಬಿಡಲಾರರು ಎಂಬ ಅಂಶವಂತೂ ಇವರಿಗೆ ಅರ್ಥವಾಗದಿರುವುದು ಈ ದೇಶದ ದುರಂತ ಎಂದು ಬೊಗಳೂರು ವರದ್ದಿಗಾರರು ನ್ಯೂಸ್‌ನಲ್ಲಿ ತಮ್ಮ ವ್ಯೂಸ್ ಸೇರಿಸಿದ್ದಾರೆ.

||ಅಣ್ಣಾ ಹೋರಾಟಕ್ಕೆ ಜಯವಾಗಲಿ||

ಕಾಂಗ್ರೆಸಿನ 'ಅಡಿಗೆ' ಜನರ ನಡಿಗೆ ಆರಂಭ

2011-06-16T08:05:00.000+05:30

[ಬೊಗಳೂರು ವಿಚಿತ್ರ ಸಂಚೋದನಾ ಬ್ಯುರೋದಿಂದ]

ಬೊಗಳೂರು, ಜೂ.16- "ಕಾಂಗ್ರೆಸ್‌ನಡಿಗೆ" ಜನರ ಬಳಿಗೆ ಎಂಬ ಜನಾಂದೋಲನವನ್ನು ಆರಂಭಿಸಿರುವುದಾಗಿ ಬೊಗಳೆ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷೆಯೂ, ಸದ್ಯಕ್ಕೆ ಆತುರಾತುರವಾಗಿ ಸ್ವಿಜರ್ಲೆಂಡ್ ಪ್ರವಾಸಕ್ಕೆ ಹೋಗಿ, ಬಳಿಕ ಇಟಲಿಗೆ ತೆರಳಿರುವ ರಾಷ್ಟ್ರೀಯ ಸಲಹಾ ಮಂಡಳಿಯ ಅಧ್ಯಕ್ಷೆಯೂ ಆಗಿರುವ ಸುಷ್ಮಾ ಗಾಂಧಿ ಅವರು ಅಪ್ಪಣೆ ಹೊರಡಿಸಿದ್ದಾರೆ.

"ಕಾಂಗ್ರೆಸಿನಡಿಗೆ ಜನರು" ಎಂಬ ಆ ಅರುವತ್ತು ದಿನಗಳ ಜನಾಂದೋಲನವನ್ನು ದೇಶದ ಮೂಲೆ ಮೂಲೆಯಲ್ಲಿ ನಡೆಸುವಂತೆಯೂ, ಅದರ ಮುಂದಿನ ಹಂತವಾಗಿ ವಿದೇಶಗಳ ಮೂಲೆ ಮೂಲೆಯಲ್ಲಿಯೂ ನಡೆಸುವಂತೆ ಕ್ರಮ ಕೈಗೊಳ್ಳಲಾಗಿದೆ.

ಜೂನ್ 4ರಂದು ದೆಹಲಿಯ ರಾಮಲೀಲಾ ಮೈದಾನದಲ್ಲಿ ಉಪವಾಸ ಸತ್ಯಾಗ್ರಹ ನಡೆಸಿ ಮಲಗಿ ನಿದ್ರಿಸುತ್ತಿದ್ದವರೆಲ್ಲರೂ ಕಾಂಗ್ರೆಸ್‌ನಡಿಗೆ ಬಿದ್ದು ಅಪ್ಪಚ್ಚಿಯಾದಾಗಲೇ ಈ ಆಂದೋಲನ ಆರಂಭವಾಗಿದ್ದರೂ, ಅಧಿಕೃತವಾಗಿ ಗುರುವಾರ ಆರಂಭವಾಗಿದೆ ಎಂದು ಮೂಲಗಳು ವರದ್ದಿ ತಂದು ಹಾಕಿವೆ.

ಅಂದು ಶನಿವಾರ ರಾತ್ರಿ ಕಾಂಗ್ರೆಸಿನಡಿಗೆ ಬಿದ್ದವರು ಅಲ್ಲಲ್ಲಿ ಎದ್ದು ಬಿದ್ದು ಆಸ್ಪತ್ರೆಯಲ್ಲಿ ಸೇರಿ ಚಿಕಿತ್ಸೆ ಪಡೆದು ಚೇತರಿಸಿಕೊಳ್ಳುತ್ತಿದ್ದಾರೆ. ಹೀಗಾಗಿ ಸ್ವಲ್ಪ ಸಮಯದ ನಂತರ ಪ್ರಯತ್ನಿಸುವ ಧೋರಣೆ ಅನುಸರಿಸಿರುವ ಪಕ್ಷವು, ಗಾಂಧೀಜಿ ಹೇಳಿಕೊಟ್ಟ ಸತ್ಯಾಗ್ರಹದ ಹಾದಿಯನ್ನೆಲ್ಲಾ ಗಟ್ಟಿಯಾಗಿ ಕಟ್ಟಿಟ್ಟು, ಬೇರಾರೂ ಅದನ್ನು ಮುಟ್ಟದಂತೆ ಸುರಕ್ಷಿತವಾಗಿ ಕಪಾಟಿನಲ್ಲಿ ಭದ್ರವಾಗಿರಿಸಿ, ಕಾಯುತ್ತಾ ಕೂರಲು ನಿರ್ಧರಿಸಿದೆ ಎಂದು ಮೂಲಗಳು ಹೇಳಿಕೆ ನೀಡಿಲ್ಲ.

ಆದರೆ, ಕರ್ನಾಟಕದಲ್ಲಿ ಇತ್ತೀಚೆಗೆ ನಡೆದಿರುವ ಎಲ್ಲ ಉಪಚುನಾವಣೆಗಳಲ್ಲಿ, ಸ್ಥಳೀಯ ಸಂಸ್ಥೆ ಚುನಾವಣೆಗಳಲ್ಲಿ ಕಾಂಗ್ರೆಸ್‌ನೆಡೆಗೆ ಜನರು ಬಡಿಗೆ ತಂದಿದ್ದು ಯಾಕೆ ಎಂಬುದರ ಕುರಿತು ಸಂಚೋದನೆ ನಡೆಸಲು ಬೊಗಳೆ ಬ್ಯುರೋಗೆ ಮೇಲಿನಿಂದ ಅಂದರೆ ಹೈ-ಕ-ಮಂಡೆಯಿಂದ ಆದೇಶ ಬಂದಿದೆ.

Barking News: ಗಾಂಧಿ ಕನ್ನಡಕ ಅಡಗಿಸಿಟ್ಟದ್ದು ಯಾರು ಗೊತ್ತಾ?

2011-06-14T12:21:00.001+05:30

[ಬೊಗಳೂರು ಸಂಚೋದನಾ ಬ್ಯುರೋದಿಂದ]

ಬೊಗಳೂರು, ಜೂ.14- ಬೊಗಳೂರಿನ ಗಾಂಧಿ ಆಶ್ರಮದಿಂದ ಗಾಂಧೀಜಿ ಕನ್ನಡಕಗಳನ್ನು ಕದ್ದಿರುವುದನ್ನು ಬೊಗಳೆ ರಗಳೆಯ ಸಂಚೋದನಾ ಬ್ಯುರೋ ಪತ್ತೆ ಹಚ್ಚಿದೆ. ಮತ್ತು ಅದಕ್ಕೆ ಕಾರಣಗಳನ್ನೂ ವಿವರಿಸಿದೆ.

ದೇಶಾದ್ಯಂತ ಕಣ್ಣು ಮುಚ್ಚಿ ತೆರೆಯುವುದರೊಳಗೆ ಕೋಟ್ಯಂತರ ರೂಪಾಯಿ ಭ್ರಷ್ಟಾಚಾರ ಪ್ರಕರಣಗಳು ನಡೆಯುತ್ತಿವೆ. ಇಂಥದ್ದನ್ನೆಲ್ಲಾ ಗಾಂಧೀಜಿ ಸಾವಿನ ಬಳಿಕವೂ ನೋಡಬಾರದೆಂಬ ಉದ್ದೇಶದಿಂದಾಗಿ ಸರಕಾರದ ಪ್ರತಿನಿಧಿಗಳು ಗಾಂಧೀಜಿ ಕನ್ನಡಕವನ್ನು ಅಡಗಿಸಿಟ್ಟಿದ್ದಾರೆ ಎಂದು ಮೂಲಗಳು ವರದ್ದಿ ತಂದುಹಾಕಿವೆ.

ಭ್ರಷ್ಟಾಚಾರದ ವಿರುದ್ಧ ಅಲ್ಲಲ್ಲಿ, ದೇಶದೆಲ್ಲೆಡೆ, ಬೊಗಳೂರಿನಲ್ಲಿ ಕೂಡ ಅಹಿಂಸಾತ್ಮಕ ಪ್ರತಿಭಟನೆ ನಡೆಸಲಾಗಿದೆ. "ಆ"ಮರಣ ಉಪವಾಸದ ಬದಲಾಗಿ "ಅ"ಮರಣ ನಿರಶನ ನಡೆಸಲು ನಿರ್ಧರಿಸಲಾಗಿತ್ತು. ಆದರೂ, ಅಂಥ ಉಪವಾಸ ಮಾಡುತ್ತಿದ್ದವರ ಮೇಲೆ ಬೊಗಳೂರು ಸರಕಾರವು "ಇದು ಕೇಸರಿ ಕೋಮುವಾದಿಗಳ ಪಡೆ" ಎಂದುಕೊಳ್ಳುತ್ತಾ, ರೈಫಲ್, ಎಕೆ-47, ಲಾಠಿ ಇತ್ಯಾದಿಗಳನ್ನು ಕೊಟ್ಟು ಪೊಲೀಸರ ಪಡೆಯನ್ನೇ ಕಳುಹಿಸಲಾಗಿತ್ತು. ಮಲಗಿ ನಿದ್ರಿಸುತ್ತಿದ್ದ ಮಕ್ಕಳು, ಮುದುಕರು, ಮಹಿಳೆಯರೆನ್ನದೆ, ಎಲ್ಲರೆದುರು ಕೇಂದ್ರದ ಬೊಗಳೂರು ಸರಕಾರವು ತನ್ನ ಪೌರುಷ ಮೆರೆದಿದ್ದದ್ದನ್ನು ಕೂಡ ಗಾಂಧೀಜಿ ಮತ್ತೆ ಮತ್ತೆ ಟೀವಿಗಳಲ್ಲಿ ನೋಡಬಾರದು ಎಂಬ ಕಾರಣಕ್ಕಾಗಿ ಈ ಕನ್ನಡಕವನ್ನು ಅಡಗಿಸಿಡಲಾಗಿದೆ ಎಂದು ಮೂಲಗಳು ವರದ್ದಿ ಮಾಡಿದ್ದನ್ನು ಬೊಗಳೂರು ಬ್ಯುರೋ ಪತ್ತೆ ಹಚ್ಚಿ, ಸಂಚೋದನೆ ಮಾಡಿ ಇಲ್ಲಿ ವರದ್ದಿ ಮಾಡಿದೆ.

ಹೀಗಾಗಿ, ಗಾಂಧೀಜಿ ಕನ್ನಡಕ ಕಳವಿನಲ್ಲಿ ಆರೆಸ್ಸೆಸ್ ಕೈವಾಡವಿದೆ ಎಂದು ಆರೋಪಿಸುವ ಅವಕಾಶವು Digವಿಜಯ್ ಸಿಂಗ್ ಅವರಿಗೆ ತಪ್ಪಿ ಹೋಗಿದೆ ಎಂದು ಮೂಲಗಳು ಹೇಳಿಲ್ಲ. ಆದರೆ, ಇದನ್ನು Digವಿಜಯ್ ಸಿಂಗ್ ಅವರೇ ಅಡಗಿಸಿಟ್ಟಿದ್ದಾರೆ ಮತ್ತು ತಾವೇ ಹಾಕಿಕೊಂಡಿದ್ದಾರೆ ಎಂದು ಕೂಡ ಮೂಲಗಳು ಅಲ್ಲಲ್ಲಿ ವರದ್ದಿ ತಂದು ಸುರಿದಿವೆ!

ಎಲ್ಲರೂ UPAವಾಸ ಮಾಡಿದ್ರೆ ಬೆಲೆ ಇಳಿಕೆ!

2011-06-02T08:46:00.000+05:30

[ಬೊಗಳೂರು ಬೆಲೆ ಏರಿಕೆ ಸಂ-ಚೋದನಾ ಬ್ಯುರೋದಿಂದ]

ಬೊಗಳೂರು, ಜೂ.2- ಭ್ರಷ್ಟಾಚಾರಿಗಳನ್ನು ಮಟ್ಟ ಹಾಕಲು ಕಠಿಣ ಕಾಯ್ದೆ ಜಾರಿಗೆ ಮತ್ತು ವಿದೇಶದಲ್ಲಿ ರಾಶಿ ರಾಶಿಯಾಗಿ ಮೌಂಟ್ ಎವರೆಸ್ಟ್‌ಗಿಂತಲೂ ಎತ್ತರದ ಶಿಖರ ಎಂದು ಪ್ರಸಿದ್ಧಿ ಪಡೆದಿರುವ ಕಪ್ಪು ಹಣದ ಬೆಟ್ಟವನ್ನು ಅಗೆಯಲು ಹಿಂದು-ಮುಂದು ನೋಡುತ್ತಿರುವ ಬೊಗಳೂರು ಕೇಂದ್ರದ ಉಪ (UPA) ಸರಕಾರವು, ಇದೀಗ ದೇಶದ ಬಡತನ ನಿವಾರಣೆ ಹಾಗೂ ಏರುತ್ತಿರುವ ಬೆಲೆಗಳನ್ನು ನಿಯಂತ್ರಿಸಲು ಹೊಸ UPAಯವನ್ನು ಕಂಡುಕೊಂಡಿದೆ.

ಕೇಂದ್ರದ ಎಲ್ಲ ಸಚಿವರು ರಾಮದೇವ ಬಾಬಾ ಅವರ ಕಾಲಿಗೆ ಬಿದ್ದು, ಹೇಗಾದರೂ ಉಪವಾಸ ನಿಲ್ಲಿಸಿ ಅಂತ ಕೇಳಿಕೊಂಡಿರುವುದು ಕೇವಲ ನಾಟಕ ಎಂದು ತಿಳಿದುಬಂದಿದ್ದು, ಬಾಬಾ ರಾಮದೇವ್ ಮತ್ತು ಅಣ್ಣಾ ಹಜಾರೆ ಮುಂತಾದವರಿಗೆ ಬೆಂಬಲಿಗರ ದೊಡ್ಡ ಪಡೆಯೇ ಇದೆ. ಕೋಟಿ ಕೋಟಿ ಜನರು ಅವರು ಕರೆ ಕೊಟ್ಟರೆ ಉಪವಾಸ ಕೂರುತ್ತಾರೆ. ಅವರಿಗೆ ತಿನ್ನಲು ಏನೂ ಬೇಕಾಗಿಲ್ಲ. ಹೀಗಾಗಿ ದೇಶದಲ್ಲಿ ಬದುಕಲು ಅಗತ್ಯವಿರುವ ಅಕ್ಕಿ, ಬೇಳೆ, ಧಾನ್ಯ, ತರಕಾರಿ ಇತ್ಯಾದಿಗಳ ಅಗತ್ಯವೇ ಕಡಿಮೆಯಾಗಿ, ಅದು ಅನಗತ್ಯ ವಸ್ತುವಾಗಿಬಿಡುತ್ತದೆ. ತತ್ಪರಿಣಾಮವಾಗಿ ಅದರ ಬೆಲೆಯೂ ತನ್ನಿಂತಾನೇ ಇಳಿಯುತ್ತದೆ ಎಂದು ಬೊಗಳೂರು ಸರಕಾರವು ನಂಬಿಕೊಂಡು ಕೂತಿರುವುದಾಗಿ ವರದ್ದಿಯಾಗಿದೆ.

ಈಗಾಗಲೇ ದಾಸ್ತಾನು ಕೇಂದ್ರಗಳಲ್ಲಿ ಕೋಟ್ಯಂತರ ರೂಪಾಯಿ ಮೌಲ್ಯದ ಆಹಾರ ಧಾನ್ಯಗಳು ಕೊಳೆಯುತ್ತಿವೆ. ಅದನ್ನು ರಿಲೀಸ್ ಮಾಡಿಬಿಟ್ಟರೆ ಬೆಲೆ ಇಳಿಯಬಹುದು. ಬೆಲೆ ಇಳಿದರೆ ಏನು ತೊಂದರೆ ಎಂಬುದು ಗೊತ್ತೇ? ಬೊಗಳೂರು ದೇಶದಲ್ಲಿರುವವರೆಲ್ಲರೂ ಕಡಿಮೆ ಬೆಲೆಯ ಆಹಾರ ತಿನ್ನುವವರು ಎಂದು ಜಾಗತಿಕ ಮಟ್ಟದಲ್ಲಿ ಅವಮಾನವಾಗುತ್ತದೆ. ಹೀಗಾಗಿ ಹೆಚ್ಚು ಬೆಲೆಯ ಆಹಾರವನ್ನೇ ಅವರು ಸೇವಿಸಬೇಕಾಗುತ್ತದೆ. ಹೀಗಾಗಿ ಬೆಲೆಗಳು ಏರಿಯೇ ಇರುವಂತೆ ನೋಡಿಕೊಳ್ಳಬೇಕಾಗಿದೆ ಎಂದು ನಿರ್ಧರಿಸಿರುವುದಾಗಿ ಮೂಲಗಳು ತಿಳಿಸಿವೆ.

ಇದಲ್ಲದೆ, ಗೋದಾಮುಗಳಲ್ಲಿ ಆಹಾರ ಧಾನ್ಯಗಳನ್ನು ಪೇರಿಸಿಟ್ಟು ಕೃತಕ ಕೊರತೆ ಸೃಷ್ಟಿಸುವುದರಿಂದ ದೇಶದ ಬೆನ್ನೆಲುಬಾಗಿರುವ ರೈತರಿಗೂ ಸಾಕಷ್ಟು ಉಪಕಾರವಾಗುತ್ತದೆ. ಜನರಿಗೆ ಸರಿಯಾಗಿ ವಿತರಣೆ ಮಾಡದೆ ಗೋದಾಮುಗಳಲ್ಲಿ ಹೆಚ್ಚು ಹೆಚ್ಚು ಆಹಾರಗಳನ್ನು ಸೇರಿಸಿದರೆ, ಅವುಗಳು ಕೊಳೆತು ಹೋಗುತ್ತವೆ. ಈ ಕೊಳೆತ ವಸ್ತುಗಳನ್ನೆಲ್ಲಾ ಉತ್ತಮ ಗೊಬ್ಬರವಾಗಿ ಬಳಸಿ, ಮತ್ತಷ್ಟು ಆಹಾರ ಧಾನ್ಯಗಳನ್ನು ಬೆಳೆಯಬಹುದು. ಗೊಬ್ಬರ ಕೊರತೆಯಿಂದ ಬಳಲುತ್ತಿರುವ ರೈತರೂ ಸುಖಿಯಾಗಿರುತ್ತಾರೆ ಎಂದು ಬೊಗಳೂರು ಸರಕಾರದ ಮಂತ್ರಿಗಳೆಲ್ಲರೂ ಗಂಭೀರವಾದ ತುರ್ತು ಸಮಾಲೋಚನೆ, ಗೂಢಾಲೋಚನೆ ಇತ್ಯಾದಿಗಳನ್ನೆಲ್ಲಾ ಕೈಗೊಂಡು ನಿರ್ಧಾರಕ್ಕೆ ಬಂದಿದ್ದಾರೆ ಎಂದು ಮೂಲಗಳು ಹೇಳಿಯೇ ಇಲ್ಲವೆಂಬುದನ್ನು ನಮ್ಮ ವರದ್ದಿಗಾರರು ವರದ್ದಿ ಮಾಡಿಲ್ಲ.

ಬೊಗಳೂರು ವಿಶೇಷ ವರದ್ದಿಗಾರರಾಗಿ ಭಾರರಾಜ್ ಹಂಸಧ್ವಜ!

2011-05-23T09:05:00.000+05:30

[ಬೊಗಳೂರು ನೇಮಕಾತಿ ಬ್ಯುರೋದಿಂದ]

ಬೊಗಳೂರು, ಮೇ 23- ಬೊಗಳೂರಿಗೆ ಶೀಘ್ರದಲ್ಲೇ ಹೊಸ ವರದ್ದಿಗಾರರೊಬ್ಬರ ನೇಮಕವಾಗಲಿದೆ ಎಂದು ನಾವು ಈ ಮೂಲಕ ಘೋಷಿಸಲು ಬಯಸುತ್ತಿದ್ದೇವೆ. ಈ ರೀತಿಯ ಬದಲಾವಣೆಗೆ ಪ್ರಮುಖ ಕಾರಣವೆಂದರೆ ಬೊಗಳೂರು ದೇಶದ ದಕ್ಷಿಣ ಭಾಗದಲ್ಲಿರುವ ಕರ್‌ನಾಟಕ ಎಂಬ ರಾಜ್ಯದಲ್ಲಿ ನಡೆಯುತ್ತಿರುವ ಅರಾಜಕೀಯ ವಿದ್ಯಮಾನಗಳು.

ಹೇಗಿದ್ದರೂ ಬೊಗಳೆ ರಗಳೆ ಪತ್ರಿಕೆಗಿರುವುದು ಏಕ ಸದಸ್ಯ ಬ್ಯುರೋ. ಒಬ್ಬರೇ ವರದ್ದಿ ತರಬೇಕು, ಒಬ್ಬರೇ ಬರೆಯಬೇಕು, ಒಬ್ಬರೇ ತಿದ್ದಬೇಕು, ಒಬ್ಬರೇ ಪುಟಕ್ಕೆ ಹಾಕಬೇಕು, ಒಬ್ಬರೇ ಪ್ರಕಟಿಸಬೇಕು ಮತ್ತು ಕೊನೆಗೆ ಒಬ್ಬರೇ ಓದಬೇಕು! ಹೀಗಾಗಿ, ನಾಟಕ ರಾಜ್ಯದ ರಾಜಭವನದಲ್ಲಿ ಆಡಳಿತ ಪಕ್ಷದ ಶಾಸಕರ ಭೇಟಿಗೆ ಮತ್ತು ಅಧಿವೇಶನ ಕರೆಯುವ ಪ್ರಕ್ರಿಯೆಯನ್ನೆಲ್ಲಾ ಆರಂಭಿಸಲು 'ತೀವ್ರವಾದ ಸಿಬ್ಬಂದಿ ಕೊರತೆ' ಇದೆ ಎಂಬ ಸತ್ಯಾಂಶದ ಹೊರತಾಗಿಯೂ, ಸರಕಾರ ಸರಿ ಇಲ್ಲ, ಇಲ್ಲಿ Cong-stitutional ಬಿಕ್ಕಟ್ಟು ಉದ್ಭವವಾಗಿದೆ, ಹೀಗಾಗಿ ರಾಷ್ಟ್ರಪತಿ ಆಳ್ವಿಕೆ ಜಾರಿಯಾಗಲಿ ಎಂಬ ಒಂದೇ ಒಂದು ಸಾಲಿನ "ವಿಶೇಷ ವರದ್ದಿ"ಯನ್ನು ಕೇಂದ್ರ ಸರಕಾರಕ್ಕೆ ಕಳುಹಿಸಿಕೊಟ್ಟಿರುವ ರಾಜ್ಯಪೌಲ್, ಶ್ರೀಯುತ ಭಾರರಾಜ ಹಂಸಧ್ವಜರನ್ನೇ ಬೊಗಳೂರಿನ ವಿಶೇಷ ವರದ್ದಿಗಾರರಾಗಿ ನೇಮಿಸಲು ಸೊಂಪಾದಕರು ತೀರ್ಮಾನಿಸಿದ್ದಾರೆ.

ಇದರ ಹಿಂದೆ ಇರುವ ಹಲವಾರು ಉದ್ದೇಶಗಳು, ಯಾಕೆ ನೇಮಿಸಲಾಯಿತು ಎಂಬ ಕುರಿತಾದ ನೆಪಗಳು, ಕಾರಣಗಳನ್ನು ಏಕಸದಸ್ಯ ಬ್ಯುರೋದ ಏಕೈಕ ಓದುಗ ಮಹಾಶಯರೆದುರು (ಯಾಕೆಂದರೆ, ಈ ವರದ್ದಿಯನ್ನು ಓದುತ್ತಿರುವುದು ನೀವು ಮಾತ್ರ ಅಲ್ಲವೇ???) ಇಡುವುದು ನಮ್ಮ ಬೊಗಳೂರು ಬೀರುವಿನ ಆದ್ಯ ಕರ್ತವ್ಯ.

ಮೊದಲನೆಯದಾಗಿ, ಸಿಬ್ಬಂದಿ ಕೊರತೆಯಿದ್ದರೂ, ವಿರೋಧ ಪಕ್ಷಗಳ ಮುಖಂಡರಾದ ಸಿ. ಧರಾಮಯ್ಯ, ಡಾಕ್ಟರ್ಜೀಪರ ಮೇಶ್ವರ, ನಿದ್ರೇವೇಗೌಡ, ಕು.ಮರಸ್ವಾಮಿ ಮುಂತಾದವರ ಭೇಟಿಗೆ ಅದು ಹೇಗೋ ಅವಕಾಶಗಳನ್ನೆಲ್ಲಾ ಮಾಡಿಕೊಂಡು, ವಿಶೇಷ ವರದ್ದಿ ತಯಾರಿಸಿ ಕಳುಹಿಸಿರುವ ಅವರ ಕಾರ್ಯನಿಷ್ಠೆಯು ಬೊಗಳೂರು ಸೊಂಪಾದಕರಿಗೆ ನುಂಗಲಾರದ ಇಷ್ಟವಾಗಿದೆ.

ಎರಡನೇಯದು ಎಂದರೆ, ಈ ಮೊದಲು ಕೂಡ ಇಂತಹಾ ವಿಶೇಷ ವರದಿಯನ್ನು ಕಳುಹಿಸಿ, ರಾಜ್ಯದಲ್ಲಿ ಅರಾಜಕತೆಯ ವಾತಾವರಣ ಸೃಷ್ಟಿ ಮಾಡಿದ್ದಾಗಲೂ ಕೇಂದ್ರವು ಇಂಥದ್ದೇ ವರದ್ದಿಯನ್ನು ಕಸದಬುಟ್ಟಿಗೆ ಹಾಕಿತ್ತು. ಆದರೂ ಛಲಬಿಡದ ತ್ರಿವಿಕ್ರಮನಂತೆ, ಅಡಿಗೆ ಬಿದ್ದರೂ ಮೂಗು ಮೇಲೆಯೇ ಮಾಡಿಕೊಳ್ಳುತ್ತಾ, ಉಗಿಸಿಕೊಂಡರೂ ಧೈರ್ಯಗುಂದದೆ, ಈ ಬಾರಿ ಮೇಢಂರನ್ನು ಮೆಚ್ಚಿಸಿಯೇ ಸಿದ್ಧ ಎಂಬ ಕಾರಣಕ್ಕೆ 'ಮರಳಿ ಯತ್ನವ ಮಾಡಿ' ವರದ್ದಿ ಕಳುಹಿಸಿದ್ದಾರೆ.

ಹಳೆಯ ವರದಿಗೇ ಒಂದಿಷ್ಟು ಬಣ್ಣ ಹಚ್ಚಿ, ರೆಕ್ಕೆ ಪುಕ್ಕ ಜೋಡಿಸಿ, 'ಈ ಬಾರಿ ಗುರಿ ಮುಟ್ಟುತ್ತದೋ' ಎಂಬ ಕಾತರದಿಂದ ಚಾತಕ ಪಕ್ಷಿಯಂತೆ ಕುಳಿತ ಹಂಸಧ್ವಜ ಭಾರರಾಜರು, ಈಗ ರಾಜ್ಯದಲ್ಲಿ ಯಾವುದೇ ಸಮಸ್ಯೆಗಳಿಲ್ಲದಿದ್ದರೂ, ಸರಕಾರಕ್ಕೆ ಒಂದಷ್ಟು ಕೆಲಸ ಮಾಡಲು ಅವಕಾಶ ಸಿಕ್ಕಿತು ಎಂದಾಗುವಾಗ, ಮತ್ತದೇ ವರದ್ದಿಯನ್ನು ಕಳುಹಿಸುವ ಅವರ ಛಾತಿಯು ಕೂಡ ಬೊಗಳೂರು ಬ್ಯುರೋದ ಸೊಂಪಾದಕರಿಗೆ ಇಷ್ಟವಾಗಿದೆ ಎಂದು ಈ ಮೂಲಕ ಸ್ಪಷ್ಟಪಡಿಸಲಾಗುತ್ತಿದೆ.

ಪಾಕ್ ಆಟಗಾರ್ತಿಯರು ಸ್ಕರ್ಟ್ ಧರಿಸಲ್ವಂತೆ!

2011-04-28T09:00:00.000+05:30

[ಬೊಗಳೂರು ವಿಶ್ಲೇಷಣಾ ಬ್ಯುರೋದಿಂದ]

ಬೊಗಳೂರು, ಏ.28- ಇದಪ್ಪಾ ಸುದ್ದಿ. ಒಂದು ಸಂಪ್ರದಾಯಶೀಲ ರಾಷ್ಟ್ರವು ಇದಕ್ಕೆ ಹೇಗೆ ಅವಕಾಶ ಕೊಡುತ್ತದೆ? ಎಂಬುದು (ಕ್ಲಿಕ್ ಮಾಡಿ ಹೆಡ್ಡಿಂಗ್ ಮಾತ್ರ ಓದಿ, ಜಾಸ್ತಿ ಓದಿದರೆ ನಿಮ್ಮ ಇಂಟರ್ನೆಟ್ ಡೇಟಾ ವೆಚ್ಚ ಹೆಚ್ಚಾಗಬಹುದು! ಅಂತ ಎಲ್ಲ ಓದುಗರಿಗೆ ಮನವಿ) ಬೊಗಳೆ ರಗಳೆ ಬ್ಯುರೋಗೆ ಅರ್ಥವಾಗದ ಹಿನ್ನೆಲೆಯಲ್ಲಿ ಒಂದು 'ರೀತಿಯ' ವಿಶ್ಲೇಷಣೆಯನ್ನು ನೀಡಲಾಗಿದೆ.

ಮಹಿಳೆಯರು ಪವಿತ್ರರು. ಅವರ ಮೇಲೆ ಕೆಟ್ಟ ದೃಷ್ಟಿ ಬೀಳಬಾರದು ಎಂಬಿತ್ಯಾದಿ ಕಾರಣಗಳಿಗೆ ಬುರ್ಖಾ ಕಡ್ಡಾಯ ಮಾಡುವಷ್ಟು ಕಟ್ಟು ನಿಟ್ಟಿನ ನಿಯಮಾವಳಿ ಇರುವ ಪಾಕಿಸ್ತಾನದಲ್ಲಿ ಇದೀಗ ಈ ಸುದ್ದಿಯನ್ನು ಎಲ್ಲರೂ ಹೇಗೆ ಅರಗಿಸಿಕೊಳ್ಳುತ್ತಾರೆ ಎಂಬುದು ನಂಬಲು ಅಸಾಧ್ಯವಾದ ಸಂಗತಿಯಾಗಿದೆ.

ಪಾಕಿಸ್ತಾನದ ಫೀಮೇಲು ಆಟಗಾರರು ಸ್ಕರ್ಟ್ ಹಾಕದೆಯೇ ಹೇಗೆ ಆಟವಾಡುತ್ತಾರೆ ಮತ್ತು ಇದನ್ನು ಕ್ರೀಡಾ ಅಭಿಮಾನಿಗಳು, ಕಟ್ಟಾ ಸಂಪ್ರದಾಯಸ್ಥ ಪ್ರೇಕ್ಷಕರು ಯಾವ ರೀತಿ ಪರಿಗಣಿಸುತ್ತಾರೆ? ಇಡೀ ಪಾಕಿಸ್ತಾನದಲ್ಲಿ ಕೋಲಾಹಲವೇ ಏರ್ಪಡಬಹುದಲ್ಲವೇ?

ನಮ್ಮ ಭಾರತದಲ್ಲಾದರೆ, ಸೋನಿಯಾ ಮಿರ್ಜಾ ತುಂಡು ಲಂಗ ಹಾಕಿದ್ದಕ್ಕೇ ಫತ್ವಾ ಇತ್ಯಾದಿಗಳನ್ನು ಹೊರಡಿಸಿ, ಆಕೆಗೆ ಬೆದರಿಕೆಯೊಡ್ಡಿ, ಅವಳನ್ನು ಪಾಕಿಸ್ತಾನಕ್ಕೇ ಶೋಯಬ್ ಮಲಿಕ್ ಜತೆ ಓಡಿಸಲಾಗಿದೆ. ಇರಾನ್‌ನ ಫುಟ್ಬಾಲ್ ತಂಡಗಳ ಫೋಟೋಗಳನ್ನು ನೋಡಿ ಅನುಭವ ಇದ್ದವರಿಗೆ, ಯಾವುದೇ ಮಹಿಳಾ ಕ್ರೀಡಾಳುಗಳು ಹೇಗಿರಬೇಕು ಎಂಬುದಕ್ಕೆ ಮಾದರಿ ದೊಹರೆಯುತ್ತದೆ.

ಬಹುತೇಕ ಅಷ್ಟೇ ಸಂಪ್ರದಾಯ ಪಾಲಿಸುವ ಪಾಕಿಸ್ತಾನದಲ್ಲಿ ಸ್ಕರ್ಟ್ ಹಾಕದೆ ಮಹಿಳಾಮಣಿಗಳು ಆಟವಾಡತೊಡಗಿದರೆ, ಅಲ್ಲಿ ಗಲಭೆ, ದಾಂಧಲೆ ಎಲ್ಲ ಭುಗಿಲೆದ್ದು, ಹಿಂಸಾಚಾರವೂ ನಡೆದು, ಕಲ್ಲು ತೂರಾಟ, ಗನ್‌ಗಳ ಸದ್ದು, ಗುಂಡುಗಳ ಸಿಡಿತ, ಬಾಂಬುಗಳ ಮೊರೆತ ಇತ್ಯಾದಿ ಎಲ್ಲವೂ ಆಗಬಹುದಲ್ಲವೇ?

ಈ ಕಾರಣಕ್ಕೆ ಈಗಾಗಲೇ ಪಾಕ್ ಪ್ರಧಾನಿಯೂ ಆಗಿರುವಂತಿರುವ ಐಎಸ್ಐ ಮುಖ್ಯಸ್ಥರಿಗೆ ಬೊಗಳೆ ರಗಳೆ ಬ್ಯುರೋ ಪತ್ರ ಬರೆದು, ದಯವಿಟ್ಟು ನಿಮ್ಮ ಆಟಗಾರ್ತಿಯರಿಗೆ ಕನಿಷ್ಠಪಕ್ಷ ಸ್ಕರ್ಟನ್ನಾದರೂ ಹಾಕಿಕೊಂಡು ಆಟವಾಡಲು ಹೇಳಿ ಎಂದು ಮನವಿ ಮಾಡಲಾಗಿದೆ. ಉತ್ತರಕ್ಕಾಗಿ ನಿರೀಕ್ಷಿಸಲಾಗುತ್ತಿದೆ.

'ಹೃದಯ ವೈಶಾಲ್ಯವಿಲ್ಲ' ಅಂತ ಅಫ್ರಿದಿ ಯಾರಿಗೆ ಹೇಳಿದ್ದು ಗೊತ್ತೇ?

2011-04-05T08:46:00.001+05:30

[ಬೊಗಳೂರು ಕ್ರೀಡಾ ಬ್ಯುರೋದಿಂದ]

ಬೊಗಳೂರು, ಏ.5- ಬೊಗಳೂರು ಅಂದರೆ ಭಾರತ ಅಂದರೆ ಬೊಗಳೂರಿನ ತಂಡವು ವಿಶ್ವಕಪ್ ಗೆದ್ದುಕೊಂಡ ಬಳಿಕ ಎಚ್ಚೆತ್ತುಕೊಂಡ ನಮ್ಮ ಏಕ ಸದಸ್ಯ ಬೀರುವಿನ ಸದಸ್ಯರೆಲ್ಲರೂ, ಪಾತಕಿಸ್ತಾನದ ನಾಯಕ, ಭಾರತದೆದುರು ಆಟವಾಡಿ ಶಹೀದ್ ಆಗಿರುವ ಅಫ್ರಿದಿ ಅವರ ಹೇಳಿಕೆಗಳ ಹಿಂದೆ ಬೀಳಲಾರಂಭಿಸಿದಾಗ, ರೋಚಕ, ರೋಮಾಂಚಕ ಮತ್ತು ಇನ್ನೂ ಏನೇನೋ ಆಗಬಲ್ಲ ರಸವತ್ತಾದ ಸುದ್ದಿಗಳು ಲಭಿಸಿವೆ.

ಅವುಗಳಲ್ಲೆಲ್ಲಾ 'ಭಾರತೀಯರು ವಿಶಾಲ ಹೃದಯಿಗಳಲ್ಲ' ಎಂಬ ಒಂದು ವಾಕ್ಯದ ಬೆನ್ನ ಹಿಂದೆ ಬಿದ್ದು ಬಿದ್ದು ಹೊರಟಾಗ ಅಫ್ರಿದಿ ಮಾತಿನ ಹಿಂದಿನ ನಿಜಾರ್ಥವೇನೆಂಬುದನ್ನು ನಮ್ಮ ವ-ರದ್ದಿಗಾರರು ಪತ್ತೆ ಹಚ್ಚಿದ್ದಾರೆ.

ಶಾಹಿದ್ ಅಫ್ರಿದಿಯ ಈ ಕಳವಳಕಾರಿ, ಆಘಾತ ತುಂಬಿದ, ವೇದನೆ ತುಂಬಿದ ಹೇಳಿಕೆಗಳಿಗೆಲ್ಲ ಕಾರಣವಾಗಿದ್ದೇ ಪೂನಂ ಪಾಂಡೆ ಎಂಬ ಮಹಿಳೆ. ಈ ಅಚ್ಚರಿಯ ಅಂಶವನ್ನು ಅಫ್ರಿದಿ ಸುದ್ದಿಗೋಷ್ಠಿ ಸಂದರ್ಭ ಪಕ್ಕದಲ್ಲೇ ಕಾದು ಕುಳಿತಿದ್ದ ಬೊಗಳೂರು ವರದ್ದಿಗಾರರನ್ನು ಸ್ವಲ್ಪ ಆಚೆಗೆ ಅಂದರೆ ಬಾಗಿಲ ಸಂದಿನಲ್ಲಿ ಕರೆದು ಸ್ವತಃ ಬಯಲುಪಡಿಸಿದ್ದರು.

ಈ ಬಗ್ಗೆ ಒಂದಿಷ್ಟು ವಿವರಿಸುವಿರಾ? ನಾವು ಬೊಗಳೆ ರಗಳೆ ಪತ್ರಿಕೆಯಲ್ಲಿ ಮಾತ್ರವೇ ಎಕ್ಸ್-ಜೂಸಿವ್ ಆಗಿ ಪ್ರಕಟಿಸುತ್ತೇವೆ ಎಂದು ಗುಸುಗುಸು ಪಿಸು ಮಾತಿನಲ್ಲಿ ಹೇಳಿದಾಗ ಅವರು ವಿವರಿಸಿದ್ದು ಹೀಗೆ:

"ಹೌದು ಸ್ವಾಮೀ, ನಿಮಗಾದರೆ, ವಿಶ್ವಕಪ್‌ಗಾಗಿ ಹುಟ್ಟುಡುಗೆಯ ವಿಶ್ವರೂಪ ದರ್ಶನ ಮಾಡಿಸುತ್ತೇವೆ ಎಂದು ಹೇಳುವವರಿದ್ದಾರೆ. ಅದನ್ನೇನೋ ನಾನೂ ಚಿತ್ರ ಡೌನ್‌ಲೋಡ್ ಮಾಡಿಕೊಂಡಿರುವ ಪೂನಂ ಪಾಂಡೆಯೇ ಹೇಳಿದ್ದು. ಹಾಗಾಗಿ ಅಷ್ಟೇನೂ ಪ್ರಚಾರದಲ್ಲಿಲ್ಲದವಳು ಆಕೆ. ಭಾರತೀಯ ನಟೀಮಣಿಯರಲ್ಲಿ ವಿಶಾಲ ಹೃದಯ ಹೊಂದಿರುವ ಒಬ್ಬರಾದರೂ, ಕನಿಷ್ಠ ಪಕ್ಷ ರಾಖೀ ಸಾವಂತ್ ಆದರೂ ನಮಗೊಂದು ಅಂತಹಾ ಆಫರ್ ಮಾಡಬಹುದಿತ್ತಲ್ಲ... ನಿಮ್ಮ ಭಾರತೀಯರಲ್ಲಿ ಹೆಚ್ಚಾಗಿ ಹೃದಯವಿರುವುದು ನಟೀಮಣಿಯರಲ್ಲಿ ಅಂತಾನೇ ಕೇಳಿದ್ದೆ... ಯಾಕೆಂದರೆ, ಅವರೇ ಅಲ್ಲವೇ ಎಲ್ಲವನ್ನೂ ತೆರೆದು ತೋರಿಸುತ್ತೇವೆ, ಹೃದಯವನ್ನು ವಿಶಾಲವಾಗಿ ತೋರಿಸುತ್ತೇವೆ ಎಂದೆಲ್ಲಾ ಘೋಷಿಸಿರುವುದು! ಈಗ ಭಾರತವೇ ವಿಶ್ವಕಪ್ ಗೆದ್ದಿದೆ. ನಮಗಿನ್ನೇನು ಉಳಿದಿದೆ ತೋರಿಸಲು? ಇನ್ನು ತೋರಿಸಿದರೂ ನಮಗೆ ಆಡಲು ಪ್ರೇರಣೆ ದೊರೆಯುವುದು ಯಾವಾಗ? ಮುಂದಿನ ವಿಶ್ವಕಪ್ ಸಂದರ್ಭದಲ್ಲಾದರೂ ಭಾರತೀಯ ನಟಿಯರು ಈ ಬಗ್ಗೆ ಎಚ್ಚರ ವಹಿಸಬೇಕು, ಹೃದಯವನ್ನು ವಿಶಾಲವಾಗಿಸಿಕೊಳ್ಳಬೇಕು!"

ಆಗ ಬೊಗಳೂರು ಬ್ಯುರೋಗೆ ಅರಿವಾಗಿದ್ದು, ಸೆಮಿಫೈನಲಿನಲ್ಲಿ ಸೋತ ಬಳಿಕವೂ ಬಾರದ ಈ ಮಾತು, ಭಾರತವು ವಿಶ್ವಕಪ್ ಗೆದ್ದಾದ ಬಳಿಕ ಇಷ್ಟು ತಡವಾಗಿ ಬಂದದ್ದೇಕೆ ಎಂಬುದರ ಹಿಂದಿನ ತಥ್ಯ. ಭಾರತ ವಿಶ್ವಕಪ್ ಗೆಲ್ಲಲು ಪೂನಂ ಪಾಂಡೆಯೇ ಕಾರಣ ಎಂಬುದು ಅಫ್ರಿದಿ ಬಲವಾದ ನಂಬಿಕೆಯಾಗಿದ್ದು, ತಮಗೂ ಅಂತಹಾ ಹೃದಯ ವೈಶಾಲ್ಯತೆ ತೋರುವವರು ಯಾರಾದರೂ ಇದ್ದಿದ್ದರೆ, ಖಂಡಿತಾ ಗೆದ್ದೇ ಗೆಲ್ಲುತ್ತಿದ್ದೆವು ಎಂಬುದು ಅವನ ಮಾತಿನ ಅರ್ಥವಾಗಿತ್ತಂತೆ. ಇದನ್ನೂ ಅವರೇ ಬೊಗಳೆ ರಗಳೆ ಬ್ಯುರೋ ನಡೆಸಿದ ಮುಚ್ಚಿದ ಬಾಗಿಲ ಸಂದರ್ಶನದಲ್ಲಿ ಹೇಳಿದ್ದರು!

ಬೊಗಳೆ ರಗಳೆಗೆ 5ನೇ ಹುಟ್ಟುಹಬ್ಬ: 1 ಲಕ್ಷ ಒದೆ

2011-04-01T08:12:00.002+05:30

[ಬೊಗಳೂರು ಸೊಂಪಾದಕೀಯ ಬ್ಯುರೋದಿಂದ]

ಆತ್ಮೀಯ ಓದುಗರೇ,
2006ರ ಏಪ್ರಿಲ್ 4ರ ಆ ಶುಭ ಮಂಗಳವಾರ, ಬೊಗಳೆ ರಗಳೆ ಬ್ಯುರೋ ಬಾಗಿಲು ತೆರೆದಾಗ ಭಾರತದಲ್ಲಿ ಚೆನ್ನೈಯಲ್ಲಿ ಸುನಾಮಿ ಎಂಬ ಪದ ಕೇಳಿದ್ದ ಜನರಿಗೆ, ಆಗ ಈ ಥರಹದ ಮತ್ತೊಂದು ಸುನಾಮಿ ಹುಟ್ಟಿಕೊಂಡಿದೆ ಎಂಬ ಪರಿವೆಯೇ ಇರಲಿಲ್ಲ. ಈಗಲೂ ಇಲ್ಲ! ಆ ಒಂದು ಸಾಲಿನ ವ-ರದ್ದಿಗೆ ಒಂದೇ ಒಂದು ಪ್ರತಿಕ್ರಿಯೆ ಬಾರದಿರುವುದೇ ಇದಕ್ಕೆ ಸಾಕ್ಷಿ.

ವಿಷಯಕ್ಕೆ ಬರೋಣ. ಜಗತ್ತಿನಾದ್ಯಂತವಿರುವ ಕೋಟಿ ಕೋಟಿ ಕನ್ನಡಿಗರಲ್ಲಿ, ಈ ಏಕ-ಸದಸ್ಯ ಬೊಗಳೆ ರಗಳೆ ಬ್ಯುರೋದಲ್ಲಿರುವ ಸಿಬ್ಬಂದಿಗಳಷ್ಟೇ ಅಪಾರವಾದ ಓದುಗರ ಸಂಖ್ಯೆಯನ್ನು ಹೊಂದಿರುವ ಈ ಅನಿಯತಕಾಲಿಕವು ನಾಲ್ಕು ವರ್ಷ ಪೂರೈಸಿದಾಗ ಅದು ಹೇಗೆ ಒಂದು ಲಕ್ಷ ಮಂದಿ ಒದೆ ಕೊಟ್ಟರೋ ನಾಕಾಣೆ. ಆದರೂ ಐದನೇ ವರ್ಷಕ್ಕೆ ಕಾಲಿರಿಸುತ್ತಿದೆ ನಮ್ ಬ್ಯುರೋ!

ಮತ್ತು ಇದು ನಮ್ಮ ಬ್ಯುರೋದ ಗಮನಕ್ಕೇ ಬಂದಿರಲಿಲ್ಲ. ಯಾಕೆಂದರೆ ಸ್ಟ್ಯಾಟ್‌ಕೌಂಟರ್ ತೋರಿಸುತ್ತಿದ್ದ ಹೆಚ್ಚಿನ ಸಂಖ್ಯೆ ಸೊನ್ನೆಯೇ ಆಗಿತ್ತು. ಕೊನೆಯಲ್ಲಿ 1 ಇತ್ತು ಎಂಬುದು ಗಮನಕ್ಕೆ ಬಂದಾಗ ಕಾಲ ಮೀರಿ ಹೋಗಿತ್ತು.

ಕಂಪ್ಯೂಟರ್ ಎಂದರೇನೆಂದು ಅರಿವಿಗೆ ಬರುವ ಮುನ್ನವೇ ಈ ಬ್ಲಾಗು ಎಂದರೇನೆಂದು ತಿಳಿಯದೆ, ಬರೀ ಬೊಗಳೆ ಇರಬಹುದು ಎಂದುಕೊಂಡೇ ಇದಕ್ಕೆ ಬೊಗಳೆ ರಗಳೆ ಎಂದೇ ನಾಮಕರಣ ಮಾಡಲಾಗಿತ್ತು. ಜಗತ್ತಿನಾದ್ಯಂತ ಇರುವ ಆಯಾ ಸರ್ವರ್‌ಗಳಿಂದ ಕಾರ್ಯಾಚರಿಸುತ್ತಿರುವ ಈ ನಮ್ಮ ಅಂತರ್ಜಾಲದ ಅಂತರ್ಪಿಶಾಚಿ ಪತ್ರಿಕೆಗೆ ಆರಂಭದಲ್ಲಿ ಇದ್ದದ್ದು ಒಬ್ಬರೇ ಸೊಂಪಾದಕರು, ಒಬ್ಬರೇ ವರದ್ದಿಗಾರರು, ಒಬ್ಬರೇ ಪ್ರಸರಣಧಿಕ್ಕಾರಿ ಮತ್ತು ಒಬ್ಬರೇ ಜಗಜ್ಜಾಹೀರಾತುದಾರರು ಹಾಗೂ ಒಬ್ಬ ಓದುಗ ಮಾತ್ರ. ಆ ಒಬ್ಬ ಓದುಗ ಯಾರೆಂಬ ಕುತೂಹಲವೇ? ಹೇಳುತ್ತೇವೆ ಕೇಳಿ, ಅದುವೇ ಈ ಬೊಗಳೂರು ಬ್ಯುರೋದ ಸಮಸ್ತ ಸಿಬ್ಬಂದಿಯಾಗಿರುವ ಸೊಂಪಾದಕರು! ತಾವು ಬರೆದಿದ್ದನ್ನು ಪ್ರತಿ ದಿನ ತಾವೇ ಓದುತ್ತಿದ್ದರವರು ಮತ್ತು ಓದಬೇಕಾಗಿ ಬರುತ್ತಿತ್ತು!

ಇಂಥದ್ದರಲ್ಲಿ, ಈಗಲೂ ನಮ್ಮ ಬ್ಯುರೋದ ಸಿಬ್ಬಂದಿಗಳ ಸಂಖ್ಯೆಯನ್ನು 1ಕ್ಕಿಂತ ಹೆಚ್ಚಿಸಿಲ್ಲ. ಅಂತೆಯೇ ಓದುಗರ ಸಂಖ್ಯೆಯೂ 1 ದಾಟಿದೆ. ಆದರೆ ಇದು ಒಂದು ಲಕ್ಷ ಎಂಬುದು ನಮ್ಮ ಲಕ್ಷ್ಯಕ್ಕೆ ಈಗ ಬಂದಿರುವುದರಿಂದ ಮತ್ತೊಮ್ಮೆ ನಿಮಗೆ ಧನ್ಯವಾದಗಳು. ಕೆಲವು ದಿನ ನಾಪತ್ತೆಯಾದರೂ ಬಂದು ಒದ್ದು ಹೋಗುವ ಅಂದರೆ ಓದಿ ಹೋಗುವ ನಿಮ್ಮ ತಾಳ್ಮೆಗೆ, ನಮ್ಮ ವರದ್ದಿಗಳನ್ನು ಓದಿ ಮತ್ತು ಓದದೆಯೂ ಅರ್ಥೈಸಿಕೊಳ್ಳುವ ಹಾಗೂ ಅಪಾರ್ಥೈಸಿಕೊಳ್ಳುವ, ನಮ್ಮ ವರದ್ದಿಯಲ್ಲಿರುವ ಟೊಳ್ಳನ್ನೇ ಬಾರ್ಕಿಂಗ್ ನ್ಯೂಸ್ ಎಂದು ಪರಿಗಣಿಸಿ ಓದಿ, ಒಂದಷ್ಟು ಆಣಿಮುತ್ತುಗಳನ್ನು ಉದುರಿಸಿ ಹೋಗುವ, ಈ ವರದ್ದಿಗಳನ್ನು ಓದಿಯೂ ಮತ್ತೊಮ್ಮೆ ಓದಲೆಂದು ಬರುವ ನಿಮಗೆಲ್ಲರಿಗೂ ಮತ್ತೊಮ್ಮೆ ಮೆಣಸ್‌ಕಾರಗಳು.

ಆದರೆ, ಈಗಲೂ ಕೂಡ ಬೊಗಳೆ ರಗಳೆ ಹುಟ್ಟಿಕೊಂಡಿದ್ದು ಏಪ್ರಿಲ್ 1ರಂದು ಎಂದೇ ವಾದಿಸುತ್ತಿದ್ದಾರೆ. ಬೊಗಳೆ ರಗಳೆ ಜನ್ಮ ದಿನ ಏಪ್ರಿಲ್ ಒಂದನೇ ತಾರೀಕೇ ಎಂಬುದು ಅವರ ಮನಸ್ಸಿನಲ್ಲಿ ಇಂದಿಗೂ ಕಾಡುತ್ತಿರುವ ಸಂಗತಿ ಮತ್ತು ಅವರ ವಾದವೂ ಹೌದು. ಹೀಗಾಗಿ, ಇದು ಖಂಡಿತವಾಗಿಯೂ ನಮ್ಮ ದಿನವಲ್ಲ ಎಂದು ಎಂದಿನಂತೆಯೇ ನಾವು ಸ್ಪಷ್ಟೀಕರಣ ನೀಡುತ್ತಿದ್ದೇವೆ.

ಈ ಒದೆಗಳನ್ನು ಕೊಟ್ಟ ಓದುಗರಿಗೆ (ಓದುಗ ಅಂದರೆ ಒದ್ದುಗ ಅಂದರೆ ಒದೆ ಕೊಡುವವ ಅಂತ ನಮ್ಮ ಡಿಕ್ಷನರಿ ಹೇಳುತ್ತದೆ!) ನಿಜಕ್ಕೂ ಕೋಟಿ ಕೋಟಿ ಪ್ರಣಾಮಗಳು ಮತ್ತು ಆನ್‌ಲೈನ್‌ನಲ್ಲೇ ದೊಡ್ಡ ಪಾರ್ಟಿಯನ್ನೂ ಈ ಮೂಲಕ ಇಟ್ಟುಕೊಂಡಿದ್ದೇವೆ. ಎಲ್ಲರೂ ಬಂದು ತಿಂದುಂಡುಹೋಗಬೇಕಾಗಿ ವಿನಂತಿಸುತ್ತಿದ್ದೇವೆ.

ಮೂರ್ಖರ ದಿನಕ್ಕೆ ಬೊಗಳೆಯಲ್ಲಿ ವಿಶೇಷ ವ-ರದ್ದಿ

2011-03-28T09:18:00.000+05:30

ಬೊಗಳೆ ವಿಶೇಷ ಜಗಜ್ಜಾಹೀರಾತು

ಈ ಬಾರಿ ನಿಮ್ಮದೇ ಮೂರ್ಖರ ದಿನಾಚರಣೆ ಪ್ರಯುಕ್ತ ನಮ್ಮ ಬೊಗಳೆ ರಗಳೆ ಸಂಚಿಕೆಯಲ್ಲಿ ವಿಶೇಷ ವರದ್ದಿಯೊಂದು ಪ್ರಕಟವಾಗುವ ಸಾಧ್ಯತೆಗಳು ನಿಚ್ಚಳವಾಗಿದೆ. ಆದುದರಿಂದ ಈಗಲೇ ನಿಮ್ಮ ಪ್ರತಿಗಳನ್ನು ಕಾಯ್ದಿರಿಸಿಕೊಳ್ಳಿ.

ರಶ್ ಆಗುವುದರಿಂದ ಮತ್ತು ಆರ್ಡರ್ ಮಾಡಿದ್ದು ಹೆಚ್ಚಾದರೆ ಪ್ರಿಂಟ್ ಮಾಡಲು ಕಷ್ಟವಾಗುವ ಸಾಧ್ಯತೆಗಳಿರುವುದರಿಂದ ಆದಷ್ಟು ಬೇಗನೇ ಮತ್ತೆ ಮತ್ತೆ ನೀವೆಲ್ಲರೂ ಕಾಲ್ ಮಾಡಿ ಪ್ರತಿಗಳನ್ನು ಕಾಯ್ದಿರಿಸಬಹುದು. ಈ ಆರ್ಡರ್ ಪ್ರತಿಗಳಲ್ಲೇ ನಾವು ಅದನ್ನು ಮುದ್ರಿಸಿಕೊಡುವ ಸಂಚು ರೂಪಿಸುತ್ತಿದ್ದೇವೆ. -ಸಂ

ಬೊಗಳೋದನ್ನು ಕುಡುಕರ ಅರಚಾಟಕ್ಕೆ ಹೋಲಿಸಿದ್ದಕ್ಕೆ ಶ್ವಾನ ಸಂಘ ಕೆಂಡ

2011-03-23T09:00:00.004+05:30

[ಬೊಗಳೂರು ಶ್ವಾನದಯಾ ಸಂಘದ ಬ್ಯುರೋದಿಂದ]

ಬೊಗಳೂರು, ಮಾ.23- ತಮ್ಮನ್ನು ಹೆಂಡದಂಗಡಿ ಬಳಿ ಕುಡುಕರು ಮಾತನಾಡುವಂತೆ ತಾನು ಬೊಗಳುತ್ತಿದ್ದೇನೆ ಎಂಬ ಆರೋಪವನ್ನು ಕೇಳಿ ದಿಢೀರನೇ ಎಚ್ಚೆತ್ತ ಹುಚ್ಚು ಸಂಘದ ಪದಾಧಿಕಾರಿಗಳು, ಈ ಬಗ್ಗೆ ತೀವ್ರ ಪ್ರತಿಭಟನೆ ನಡೆಸಲು ತೀರ್ಮಾನಿಸಿದ್ದು, ತಮಗೆ ಪ್ರತಿಭಟನೆಗೆ ಮಾರ್ಗದರ್ಶನ ಮಾಡಬೇಕು ಎಂದು ವಟವಟಾಳ್ ಗಾನರಾಜ್ ಅವರ ಮೊರೆ ಹೊಕ್ಕಿದೆ ಎಂದು ಮೂಲಗಳು ತಿಳಿಸಿವೆ.

ವಿಕಿಲೀಕ್ಸ್ ಬಹಿರಂಗವಾದಂದಿನಿಂದ ನಾಪತ್ತೆಯಾಗಿದ್ದ ಬೊಗಳೂರಿನ ಏಕೈಕ ಸದಸ್ಯರನ್ನೊಳಗೊಂಡ ಬ್ಯುರೋದ ಸಮಸ್ತ ಸಿಬ್ಬಂದಿಗಳ ಹಗರಣವನ್ನು ವಿಕಿಲೀಕ್ಸ್ ಮೂಲಕವೇ ಬಯಲಿಗೆ ತರುವುದಾಗಿ ಬೆದರಿಕೆಯೊಡ್ಡಿದ ತಕ್ಷಣವೇ ನಾಯಿ ಬೊಗಳುತ್ತಿರುವುದು ಕೇಳಿ ದಿಢೀರನೇ ಎಚ್ಚೆತ್ತ ಸಿಬ್ಬಂದಿ ಈ ಸುದ್ದಿಯ ವಾಸನೆ ಹಿಡಿದು ಮೂಗು ಮುಚ್ಚಿಕೊಂಡು ಹೊಸ ಸ್ಫೋಟಕ ಸುದ್ದಿ ತಂದಿದ್ದಾರೆ ಎಂದು ಬೊಗಳೆ ರಗಳೆ ಬ್ಯುರೋದ ಸೊಂಪಾದಕರುಗಳು ತಿಳಿಸಿದ್ದಾರೆ.

ಈಗಾಗಲೇ ನಿರ್ದಯಿ ಅಮಾನವರು ತಾವೇ ಮಾನವರು ಎಂದುಕೊಳ್ಳುತ್ತಾ, ನಿಷ್ಠೆಗೆ ಹೆಸರಾದ ನಮ್ಮನ್ನು ಪ್ರತಿಯೊಂದಕ್ಕೂ ಹೋಲಿಸಿಕೊಳ್ಳುತ್ತಿದ್ದಾರೆ. ಇದು ನಮ್ಮ ಕುಲಕ್ಕೇ ಅವಮಾನ ಎಂದು ಶ್ವಾನಸಂಘದ ಪದಧಿಕ್ಕಾರಿಗಳು, ಬೊಗಳೂರು ಬ್ಯುರೋ ಎಚ್ಚೆತ್ತುಕೊಂಡಿದೆ ಎಂಬುದನ್ನು ತಿಳಿದಾಕ್ಷಣ ಸುದ್ದಿಗೋಷ್ಠಿ ಕಳೆದು ವಿವರ ನೀಡಿದ್ದಾರೆ.

ಇದಲ್ಲದೆ, ತಮ್ಮ ಸಂಘದಲ್ಲಿ ಯಾವುದೇ ಒಡಕಿಲ್ಲ. ಇಡೀ ಜಗತ್ತಿನಲ್ಲಿ ಇರುವುದು ಎರಡೇ ಎರಡು ಸಂಘಗಳು ಮಾತ್ರ. ಒಂದು ತಮ್ಮ ಶ್ವಾನ ಸಂಘ ಮತ್ತು ತಮ್ಮ ಹೆಸರು ಬಳಸಿಕೊಳ್ಳುತ್ತಿರುವವರು, ಸ್ವಾಮಿನಿಷ್ಠೆ ಎಂಬಿತ್ಯಾದಿ ಪದ ಉಪಯೋಗಿಸುತ್ತಿರುವವರು ಸೇರಿದ ಉಳಿದದ್ದೆಲ್ಲವೂ ಹುಚ್ಚು ಶ್ವಾನ ಸಂಘ ಎಂದು ಸ್ಪಷ್ಟನೆ ನೀಡಿದ ಅವರು, ನಾವು ಬೊಗಳುವುದಕ್ಕೂ ರಾಜಕಾರಣಿಗಳು ಬೊಗಳುವುದಕ್ಕೂ ಹೋಲಿಕೆ ಮಾಡಬಾರದು ಎಂದು ಮಾಧ್ಯಮಗಳಲ್ಲಿ ಮನವಿ ಮಾಡಿಕೊಂಡಿದ್ದಾರೆ.

ಒಂದಲ್ಲ ಒಂದು ದಿನ ಈ ರೀತಿ ಕೆಟ್ಟದಾಗಿ ಬೊಗಳುತ್ತಾ, ಅದು ಶ್ವಾನಗಳ ಬೊಗಳುವಿಕೆ ಎಂದು ಪೋಸು ಕೊಡುತ್ತಿರುವ ಅಮಾನವರ ಅಮಾನವೀಯ ಜನಾಂಗಕ್ಕೆ ಮುಂದಿನ ಜನ್ಮದಲ್ಲಾದರೂ ತಕ್ಕ ಪಾಠ ಕಲಿಸುವುದಾಗಿ ಶ್ವಾನ ಸಂಘದ ಎಲ್ಲ ಪದಧಿಕ್ಕಾರಿಗಳು (ಸಿಂಹಕ್ಕೆ ತಿಳಿಸಬೇಡಿ ಎನ್ನುತ್ತಲೇ) ಘರ್ಜಿಸಿದ್ದಾರೆ! ಮಾತ್ರವಲ್ಲ, ಇನ್ನು ಕರೆಂಟು ಕಂಬ ನೋಡಿದ ತಕ್ಷಣ ಕಾಲೆತ್ತುವವರು ಮಾತ್ರ ನಿಜವಾದ ಶ್ವಾನ ಸಂಘದವರು, ಹೋದಲ್ಲಿ, ಬಿದ್ದಲ್ಲಿ, ಎದ್ದಲ್ಲಿ ಕಾಲೆತ್ತುವವರು ಅಲ್ಲವೇ ಅಲ್ಲ ಎಂಬ ಸಂದೇಶವನ್ನೂ ಶ್ವಾನ ಸಂಘದ ಅಧ್ಯಕ್ಷರು ಬೊಗಳೆ ರಗಳೆ ಮೂಲಕ ಸಮಸ್ತ ಜನತೆಗೆ ಸಂದೇಶ ರವಾನಿಸಿದ್ದಾರೆ.

[ಸೂಚನೆ: ನಾಡಿದ್ದು ಸೋಮವಾರ 28ರಂದು ನಿಮ್ಮೂರಾದ ಬೊಗಳೂರಿನ ಬೊಗಳೆ ರಗಳೆ ಪತ್ರಿಕೆಯಲ್ಲಿ ವಿಶೇಷವಾದ ಘೋಷಣೆ ಇರುತ್ತದೆ - ಸಂ]

ಬೊಗಳೆ: ಸರ್ಕಾರದ ಹೊಸ ನೀತಿ - Drink, don't drive

2011-01-18T09:15:00.000+05:30

[ಬೊಗಳೂರು ಬೆಲೆ ಏರಿಕೆ ರಂಜನಾ ಬ್ಯುರೋದಿಂದ]

ಬೊಗಳೂರು, ಜ.18- ಬಡ ಪ್ರಜೆಗಳು ಚೀಲ ತುಂಬಾ ಹಣದ ನೋಟುಗಳನ್ನು ತೆಗೆದುಕೊಂಡು ಹೋಗಿ ಅಂಗಿಯ ಜೇಬು ತುಂಬಾ ಆಹಾರ ವಸ್ತುಗಳು ದೊರೆಯುವಂತೆ ಮಾಡಿರುವ Unprecedented Price Agenda ಸರಕಾರದ ಆಳ್ವಿಕೆಯಡಿ, ಜನತೆ ಸಂತೃಪ್ತರಾಗಿದ್ದಾರೆ.

ಇದಕ್ಕೆ ಕಾರಣವೇನು ಎಂದು ಪತ್ತೆ ಹಚ್ಚಲು ಬೊಗಳೂರು ಬ್ಯುರೋ ಸಿಬ್ಬಂದಿ ಹೊರಟಾಗ ಹಲವಾರು ದೊಡ್ಡ ದೊಡ್ಡ ಪರ್ವತಗಳು ಎದುರಾದವು ಮತ್ತು ಸಾಕಷ್ಟು ರಾಕೆಟ್‌ಗಳು ಕೂಡ ಆಗಸಕ್ಕೆ ನೆಗೆನೆಗೆದು ಬೀಳುತ್ತಿದ್ದವು.

ಅವುಗಳನ್ನು ವಿಚಾರಿಸಲಾಗಿ, ಅವೆಲ್ಲವೂ ಏರಿದ ಬೆಲೆಗಳ ಪರ್ವತವಾಗಿದ್ದು, ರಾಕೆಟ್‌ನಂತೆ ಆಗಸಕ್ಕೆ ಚಿಮ್ಮುತ್ತಿರುವುದೆಲ್ಲವೂ ಪೆಟ್ರೋಲ್, ಟೊಮೆಟೋ, ಈರುಳ್ಳಿ, ಅಕ್ಕಿ, ಬೇಳೆ, ಗೋಧಿ ಮುಂತಾದ ಬಡ ಜನರ ಅಗತ್ಯ ವಸ್ತುಗಳು ಎಂಬುದು ಪತ್ತೆಯಾಯಿತು.

ಹೀಗಾಗಿ, ಬಡವರ ನಿರ್ಮೂಲನೆಯೇ ತಮ್ಮ ಗುರಿ ಎಂದು ಯುಪಿಎ ಸರಕಾರ ತನ್ನ ಚುನಾವಣಾ ಪ್ರಣಾಳಿಕೆಯಲ್ಲಿ ಘೋಷಿಸಿದ್ದು ಸರಿಯಾಗಿದೆ. ಆ ಪ್ರಣಾಳಿಕೆಯ ಭರವಸೆ ಈಡುರುತ್ತಿದೆ ಎಂಬ ಸಂತಸವೂ ಜನರನ್ನು ಆವರಿಸಿಕೊಂಡಿದೆ. ಇನ್ನು ಮುಂದೆ ಈ ದೇಶದಲ್ಲಿ ಬಡವರೇ ಇರುವುದಿಲ್ಲ; ಎಲ್ಲರೂ ಈರುಳ್ಳಿ ಕೊಳ್ಳುವವರೇ ಆಗಿರುತ್ತಾರೆ!

ಅದಕ್ಕೂ ಮಿಗಿಲಾಗಿ ಸಂತೋಷ ತಂದಿರುವ ಒಂದು ಅಂಶ ನಿಧಾನವಾಗಿ ಬಯಲಿಗೆ ಬಂತು. ಅದೆಂದರೆ, CON-guess ಸರ್ಕಾರವು ಹೊಸ ನೀತಿಯೊಂದನ್ನು ಜಾರಿಗೊಳಿಸಿದೆ. ಅದೆಂದರೆ, Don't drink and drive ಎಂಬ ನೀತಿಗೆ ತಿದ್ದುಪಡಿ ತಂದು, ಅದನ್ನು Drink and don't drive ಎಂದು ಬದಲಾಯಿಸಿರುವುದು.

ಈ ನೀತಿಯ ಜಾರಿಗೆ ಕಾರಣವೂ ಇಲ್ಲದಿಲ್ಲ. ಪೆಟ್ರೋಲ್ ಬೆಲೆಗಿಂತಲೂ ಮದ್ಯವೇ ಇಂದು ಚೀಪಾಗಿ ದೊರೆಯುತ್ತಿದೆ. ಒಂದು ಲೀಟರ್ ಪೆಟ್ರೋಲ್ ಬೆಲೆ 64 ರೂಪಾಯಿ ಇದ್ದರೆ, ಬಿಯರು, ಹೆಂಡ ಮುಂತಾದವುಗಳು ಈ ಹಣದಲ್ಲಿ ಪೀಪಾಯಿಗಟ್ಟಲೆ ದೊರೆಯುತ್ತವೆ! ಹೀಗಾಗಿ ಚೀಪಾಗಿರುವುದನ್ನು ಡ್ರಿಂಕ್ ಮಾಡಿ, ಆದರೆ ಕಾಸ್ಟ್ಲೀ ಆಗಿರುವುದನ್ನು ಡ್ರೈವ್ ಮಾಡಬೇಡಿ ಎಂಬ ಸಂದೇಶವನ್ನು ಒತ್ತಾಯಪೂರ್ವಕವಾಗಿ ಅದು ಜಾರಿಗೊಳಿಸುತ್ತಿದೆ!

ಬೊಗಳೆ ಬ್ರೇಕ್: ಮಾರ್ಕೆಟ್ಟಲ್ಲಿ ನಕಲಿ ಈರುಳ್ಳಿ ಹಾವಳಿ

2011-01-10T14:08:00.002+05:30

[ಬೊಗಳೂರು ಕಣ್ಣೀರುಳ್ಳಿ ತನಿಖಾ ಬ್ಯುರೋದಿಂದ]

ಬೊಗಳೂರು, ಜ.10- ನೂರಿನ್ನೂರು ಗ್ರಾಂ ಈರುಳ್ಳಿ ಖರೀದಿಸಿದವರ ಮನೆಯ ಮೇಲೆ ಆದಾಯ ತೆರಿಗೆ ಇಲಾಖೆ ದಾಳಿ ಹೆಚ್ಚಿಸುತ್ತಿರುವ ಹಿನ್ನೆಲೆಯಲ್ಲಿ ಗಲಿಬಿಲಿಗೊಂಡಿರುವ ಈರುಳ್ಳಿ ದಾಸ್ತಾನುಗಾರರು, ಇದೀಗ ನಕಲಿ ಈರುಳ್ಳಿಗಳನ್ನು ತಯಾರಿಸಿ ಮಾರುಕಟ್ಟೆಗೆ ಇಳಿಸಿರುವುದಾಗಿ ವರದ್ದಿಗಳು ತಿಳಿಸಿವೆ.

ಇತ್ತೀಚೆಗೆ ಬೊಗಳೂರು ಬ್ಯುರೋದ ಏಕೈಕ ಸದಸ್ಯರನೇಕರು ಖರೀದಿಸಿದ ಈರುಳ್ಳಿಗಳನ್ನು ಎಷ್ಟೇ ಕೊಯ್ದರೂ ಕಣ್ಣಲ್ಲಿ ನೀರು ಬರುತ್ತಿರಲಿಲ್ಲ. ಈ ಬಗ್ಗೆ ತನಿಖೆ ನಡೆಸಲಾಗಿ, ವರ್ತಕರು ಮಾರುತ್ತಿದ್ದುದು ನಕಲಿ ಈರುಳ್ಳಿ ಎಂದು ಸ್ಪಷ್ಟಗೊಂಡಿದೆ. ಆದರೆ ಅವರಲ್ಲಿ ಬೆಲೆ ಹೇಳಿದ ನಂತರವಷ್ಟೇ ಕಣ್ಣಲ್ಲಿ ನೀರುಬರುತ್ತಿತ್ತು.

ಈಗ ಉಳ್ಳಾಗಡ್ಡಿ ನಕಲಿ ಎಂಬೊಂದು ಶಂಕೆ ಬರುವುದಕ್ಕೂ ಕಾರಣವಿದೆ. ಉಳ್ಳವರಿಗೆ ಮಾತ್ರವೇ ಆಗಿಬಿಟ್ಟಿರುವ ಉಳ್ಳಾಗಡ್ಡಿಯನ್ನು ರಾಜಕಾರಣಿಗಳ ಮನೆಯಲ್ಲಿ ಗಾಡಿ ಗಾಡಿ ಪ್ರಮಾಣದಲ್ಲಿ ಕೊಂಡು ತಂದು ಮನೆಯಲ್ಲಿ ಕತ್ತರಿಸುತ್ತಿದ್ದಾಗ ಯಾರ ಕಣ್ಣಲ್ಲಿಯೂ ಒಂದಿನಿತೂ ನೀರು ಬರುತ್ತಿರಲಿಲ್ಲ. ಇದಕ್ಕೆ ಕಾರಣವೆಂದರೆ, ಜನ ಸಾಮಾನ್ಯರು ತೆರಿಗೆ ಕಟ್ಟಿದ ಹಣ ಸರಕಾರದ ಖಜಾನೆಯಲ್ಲಿ ಕೊಳೆಯುತ್ತಿದೆ ಎಂಬ ಕಾರಣಕ್ಕೆ ಈ ಮಂತ್ರಿಗಳು, ಮಾಗಧರು, ರಾಜಕಾರಣಿಗಳೆಲ್ಲರೂ ಸಾಕಷ್ಟು ಪ್ರಮಾಣದಲ್ಲಿ ಈರುಳ್ಳಿ ಖರೀದಿಸಿಟ್ಟುಕೊಳ್ಳುತ್ತಿದ್ದರು. ಸಂಸತ್ತಿನಲ್ಲಿ, ಶಾಸನ ಸಭೆಗಳಲ್ಲಿ ಕೂಡ ಬೇಕಾದಷ್ಟು ಬಿಟ್ಟೀರುಳ್ಳಿ ದೊರೆಯುತ್ತಿತ್ತು. ಹೇಗಿದ್ದರೂ Unprecedented Price Agenda ಸರಕಾರವಲ್ಲವೇ! ಈರುಳ್ಳಿ ಏನಾಯಿತು ಎಂಬುದನ್ನು ನೋಡಲು ಕೃಷಿ ಮಂತ್ರಿಗೆ ಪುರುಸೊತ್ತಿರಲಿಲ್ಲ.

ಈ ಎಲ್ಲ ಕಾರಣಕ್ಕಾಗಿ, ರಾಜಕಾರಣಿಗಳು ಇವನ್ನು ತಂದು ಕತ್ತರಿಸಿದಾಗ ಅವರೆಲ್ಲರಿಗೂ ಒಂದಿನಿತೂ ನೀರು ಬರುತ್ತಿರಲಿಲ್ಲ. ಆದರೆ, ಜನ ಸಾಮಾನ್ಯರು ಮಾತ್ರವೇ ಈ ಈರುಳ್ಳಿಯ ಬೆಲೆಯನ್ನು ಕೇಳಿದ ತಕ್ಷಣವೇ ಕಣ್ಣಲ್ಲಿ ನೀರು ಹೊಸಸೂಸುತ್ತಿತ್ತು. ಹೀಗಾಗಿ, ಖಂಡಿತವಾಗಿಯೂ ಇದು ನಕಲಿ ಈರುಳ್ಳಿ ಎಂಬುದು ದೃಢಪಟ್ಟಿದೆ. ಇದು ಜನ ಸಾಮಾನ್ಯರ ಕಣ್ಣಲ್ಲಿ ರಕ್ತ ಕಣ್ಣೀರು ಸುರಿಸುತ್ತಿರುವುದರಿಂದಾಗಿ ಬೊಗಳೂರು ಬ್ಯುರೋ ಇದಕ್ಕೆ ರಕ್ತ ಕಣ್ಣೀರುಳ್ಳಿ ಎಂದೂ ನಾಮಕರಣ ಮಾಡಿ ಉತ್ಸವಾಚರಣೆ ಮಾಡಿದೆ ಎಂದು ತಿಳಿದುಬಂದಿದೆ.

1-1-11ರಂದೇ ಹೊಸ ವರ್ಷ: ದೇಶಾದ್ಯಂತ ಹಾಯ್ ಅಲರ್ಟ್

2010-12-31T08:00:00.002+05:30

ಹೊಸ ವರ್ಷವು ಈ ಬಾರಿ 1-1-11ರಂದೇ ಶುರುವಾಗುವ ಹಿನ್ನೆಲೆಯಲ್ಲಿ ದೇಶಾದ್ಯಂತ ಹಾಯ್ ಅಲರ್ಟ್ ಘೋಷಿಸಲಾಗಿದೆ. ಹತ್ತು ವರ್ಷಗಳ ಹಿಂದೆ ವೈ2ಕೆ ವೈರಸ್ ಬಂದಿದ್ದಾಗ, ಈ ಆನ್‌ಲೈನ್‌ನಲ್ಲಿ ಈ ಹಾಯ್-ಬಾಯ್‌ಗಳ ಜ್ವರವು ನಿಧಾನವಾಗಿತ್ತು. ಇದೀಗ ವೈ2ಕೆ2 ಇರುವಾಗಲಂತೂ, ಎದುರಿಗೆ ಸಿಕ್ಕಾಗ ಮಾತನಾಡಿಸದ ನಾವು ಎಸ್ಎಂಎಸ್ ಮೂಲಕವೋ, ಇ-ಮೇಲ್ ಮೂಲಕವೋ, ಐಎಂ ಮೂಲಕವೋ ಹಾಯ್ ಬಾಯ್ ಎಂದು ಹೇಳುತ್ತೇವೆ. ಎದುರಿಗೆ ಬಂದಾಗ ಇಲ್ಲದಿರುವ ಕಾಳಜಿ, ಪ್ರೀತಿಗಳೆಲ್ಲಾ ತುಂಡು ತುಂಡಾದ ಪದಗಳ hi, Lol, ILU, bzy, cm, h r u. ಎಂಬಿತ್ಯಾದಿಗಳ ಮೂಲಕ ಭರಪೂರ ಹರಿದಾಡುತ್ತಿರುತ್ತವೆ.

ಇದು ಅಸತ್ಯವಲ್ಲದಿದ್ದರೂ ಅಷ್ಟೇ ನಿಜ. ಅಲ್ಲಲ್ಲ, ನಿಜವಾದರೂ ಅಷ್ಟೇ ಸುಳ್ಳಲ್ಲದ ಸಂಗತಿಯಿದು. ಅರ್ಥ ಮಾಡಿಕೊಳ್ಳಿ, ಅಪಾರ್ಥ ಮಾಡಿಕೊಳ್ಳಬೇಡಿ, ಅನರ್ಥವಂತೂ ಮಾಡಿಕೊಳ್ಳಲೇಬೇಡಿ ಎಂಬ ಬೊಗಳೂರಿನ ಏಕಸದಸ್ಯ ಬೊಗಳೆ ರಗಳೆ ಬ್ಯುರೋ ಸಂದೇಶದೊಂದಿಗೆ, ಈ ವರ್ಷದ ನಮ್ಮ ಕಥೆಯನ್ನು ಮುಗಿಸುತ್ತಿದ್ದೇವೆ. ಇನ್ನೇನಿದ್ದರೂ ಎರಡು ಕೋಲುಗಳು ಮಾತ್ರ - ಅದುವೇ 11ರಲ್ಲಿ ಭೇಟಿ.

ಎಲ್ಲ ಓದುಗರಿಗೆ, ಬೊಗಳೂರು ಬಿಟ್ಟೋಡುಗರಿಗೆ, ಓದದವರಿಗೆ, ಶುಭ ಹಾರೈಸಿದವರಿಗೆ, ಹಾರೈಸದವರಿಗೆ ಮತ್ತು ವಿಶೇಷವಾಗಿ ಇಂಟರ್ನೆಟ್‌ನಲ್ಲಿ ಇಲ್ಲದ ವಿಶಾಲ ಪ್ರಪಂಚದಲ್ಲಿ ಹರಡಿಕೊಂಡಿರುವ ಬೊಗಳೆ ರಗಳೆ ಪತ್ರಿಕೆಯ ಅಸಂಖ್ಯಾತ ಮತ್ತು ಅಲ್ಪ ಸಂಖ್ಯಾತರಾದ ಓದುಗರಿಗೆಲ್ಲರಿಗೂ ಹೊಸ ವರ್ಷದ ಶುಭಾಶಯಗಳು.

ನನಸು ಕನಸಾಗದಿರಲಿ. ನೆನಕೆ ನನಸಾಗಲಿ.

ಕೊನೆಯುಸಿರಿನವರೆಗೂ ಪಕ್ಷಾಂತರ: ಬಂಬಂಗಾರಿ ಪ್ರತಿಜ್ಞೆ

2010-12-16T08:50:00.000+05:30

[ಬೊಗಳೂರು ಪಕ್ಷಾಂತರ ಬ್ಯುರೋದಿಂದ]

ಬೊಗಳೂರು, ಡಿ.16- ಈಗ ಯಾವ ಪಕ್ಷದಲ್ಲಿದ್ದೇವೆ ಮತ್ತು ಯಾವ ಪಕ್ಷಕ್ಕೆ ಸೇರುತ್ತಿದ್ದೇವೆ ಎಂಬುದನ್ನೇ ಮರೆತುಬಿಟ್ಟಂತಿರುವ ಮಾನ್ಯ (ಕುಮಾರಸ್ವಾಮಿಯವರು ಯಡಿಯೂರಪ್ಪರನ್ನು, ರೇಣುಕಾಚಾರ್ಯರನ್ನು, ಈಶ್ವರಪ್ಪರನ್ನು ನಿಂದಿಸುವುದು ಹೇಗೆ!) ಬಂಬಂಗಾರಪ್ಪನವರು, ಪಕ್ಷಗಳಿಂದ ಪಕ್ಷಕ್ಕೆ ಜಿಗಿಯುತ್ತಲೇ ಪ್ರಸಿದ್ಧರಾಗಿದ್ದು, ನಿನ್ನೆ ನಿನ್ನೆಯಷ್ಟೇ ಯಾವುದೋ ಪಕ್ಷದಿಂದ ಮಗದೊಮ್ಮೆ ಹೊರಬಂದು, ಬೇರೆ ಯಾವುದೋ ಪಕ್ಷಕ್ಕೆ ಸೇರಿರುವುದನ್ನು ಸಮರ್ಥಿಸಿಕೊಂಡಿದ್ದಾರೆ.

ಮಾಜಿ ನಿಧಾನಿಗಳಾದ ವೇದೇಗೌಡರಿಗೆ ಮತ್ತು ತನಗೆ ಬಹುತೇಕ ಹೆಚ್ಚೂಕಮ್ಮಿ ಒಂದೇ ರೀತಿಯ ವಯಸ್ಸಾಗಿದೆ. ಅವರ ಮಕ್ಕಳೂ ನಮ್ಮ ಮಕ್ಕಳಿಗೆ ಸಮಾನವೇ. ಆದರೆ ಅಲ್ಲಿ ಅಪ್ಪ-ಮಕ್ಕಳು ಒಂದೇ ಪಕ್ಷದಲ್ಲಿದ್ದಾರೆ. ನಾವು ಈಗಷ್ಟೇ ಹೊರಬಂದಿರುವ ಕೈಪಕ್ಷದಲ್ಲಿ ಅಪ್ಪ-ಮಕ್ಕಳು ಬೇರೆ ಬೇರೆಯಾಗಿರಬೇಕಾದ ಅನಿವಾರ್ಯತೆ ಎದುರಾಗಿತ್ತು ಎಂದು ಅವರು ಬೊಗಳೆ ರಗಳೆ ಕಚೇರಿಯಲ್ಲಿ ನಡೆಸಿದ ರದ್ದಿಗೋಷ್ಠಿಯಲ್ಲಿ ಸ್ಪಷ್ಟಪಡಿಸಿದ್ದಾರೆ.

ಜೀವನದಲ್ಲಿ ಒಮ್ಮೆಯಾದರೂ ಜೆಡಿಎಸ್ ಪಕ್ಷ ಸೇರಬೇಕೆಂಬುದು ತನ್ನ ಮಹದಾಕಾಂಕ್ಷೆಯಾಗಿತ್ತು ಎಂದ ಅವರು, ಇನ್ನು ಉಳಿದ ಜೀವನದಲ್ಲಿ ಒಮ್ಮೆಯಾದರೂ ಕಮ್ಯೂನಿಷ್ಠರೊಂದಿಗೆ ಸೇರುವುದು ನನ್ನ ಕನಸಾಗಿದೆ. ಅದು ಕನಸಾಗಿಯೇ ಉಳಿಯಲು ಬಿಡುವುದಿಲ್ಲ ಎಂದರು.

ತೆನೆ ಹೊತ್ತ ಮಹಿಳೆಯ ಕೈಯನ್ನು ಯಾವಾಗ ಬಿಡುತ್ತೀರಿ ಎಂಬ ಪ್ರಶ್ನೆಗೆ ಉತ್ತರಿಸಲು ತಡಕಾಡುತ್ತಲೇ ಹರ್ಷ ವ್ಯಕ್ತಪಡಿಸಿದ ಅವರು, ಇವೆಲ್ಲವೂ ತನ್ನ ಕೈಯಲ್ಲಿರುವುದಿಲ್ಲ, 'ದೇವ'ರ ಹಾಗೂ ದೇವೇಗೌಡರ ಕೈಯಲ್ಲಿದೆ ಎಂದೂ ನುಡಿದರು ಅವರು.

ನೀವು ಆವಾಗಾವಾಗ ಮತ್ತು ಆಗಾಗ್ಗೆ, ಪದೇ ಪದೇ ಪಕ್ಷಗಳ ಒಳಗೆ-ಹೊರಗೆ ಹೋಗಿ ಬರುತ್ತಲೇ ಇರುತ್ತೀರಲ್ಲಾ? ಯಾಕೆ? ನಿಮ್ಮನ್ನು ಪಕ್ಷಾಂತರಿ ಅಂತ ಕರೆಯಬಾರದೇಕೆ ಎಂದು ಬೊಗಳೂರಿನ ಅಸತ್ಯಾನ್ವೇಷಿಗಳು ಕೇಳಿದ ಪ್ರಶ್ನೆಗೆ ತಡವರಿಸಗದೆ ಉತ್ತರಿಸಿದ ಅವರು, "ಥೂ ನಿಮ್ಮ... ಏನ್ ಪ್ರಶ್ನೆ ಅಂತ ಕೇಳ್ತೀರಾ... ಅಷ್ಟೂ ಗೊತ್ತಾಗಲ್ವೇ? ನಮ್ಮ ರಾಜ್ಯದಲ್ಲಿ, ಕೇಂದ್ರದಲ್ಲಿ ಆಗಾಗ್ಗೆ ಬೇರೆ ಬೇರೆ ಪಕ್ಷಗಳು ಅಧಿಕಾರಕ್ಕೆ ಬರುವುದಿಲ್ಲವೇ? ಅದು ಹೇಗೆ? ನಮ್ಮ ಮತದಾರರು ಪಕ್ಷಾಂತರಿಗಳು ಆಗುವುದರಿಂದಾಗಿ. ಮತದಾರರೇ ಪಕ್ಷ ಬದಲಿಸಿ ಬೇರೆ ಪಕ್ಷಕ್ಕೆ ಹಾರುತ್ತಾರೆ, ಓಟು ಕೊಡುತ್ತಾರೆ ಎಂದಾದರೆ, ಪ್ರಜೆಗಳೇ ಪ್ರಭುಗಳು ಎಂಬ ನಾಣ್ಣುಡಿಗಾದರೂ ಬೆಲೆ ಬೇಡವೇ? ಹೀಗಾಗಿ ಪ್ರಜೆಗಳ ಥರಾನೇ ನಾನೂ ಕೂಡ ಬೇರೆ ಪಕ್ಷಕ್ಕೆ ಸೇರಿಕೊಂಡಿದ್ದೇನೆ" ಎಂದು ತತ್ವಜ್ಞಾನಿಯಂತೆ ತತ್ತರಿಸುತ್ತಾ ಉತ್ತರಿಸಿದರು.

ಇದೇ ವೇಳೆ ಭೀಷ್ಮ ಪ್ರತಿಜ್ಞೆಯೊಂದನ್ನೂ ಮಾಡಲು ನಿರ್ಧರಿಸಿದ ಬಂಬಂಗಾರಪ್ಪ ಅವರು, ಕೊನೆಯುಸಿರಿರುವವರೆಗೂ ಈ ಪಕ್ಷಾಂತರವನ್ನು ಬಿಡುವುದಿಲ್ಲ ಎಂದೂ ಈ ಸಂದರ್ಭದಲ್ಲಿ ಅವರು ಘೋಷಿಸಿದರು.

ಬೊಗಳೆ ಬಯಲಿಗೆಳೆದ ಸತ್ಯ: ಮಾಧ್ಯಮಗಳ ಬೌದ್ಧಿಕ ದಿವಾಳಿತನ!

2010-11-29T10:09:00.000+05:30

(ಬೊಗಳೂರು ಜಾಗೋ ಗ್ರಾಹಕ್ ಜಾಗೋ ಬ್ಯುರೋದಿಂದ)

ಬೊಗಳೂರು, ನ.29- ಮುಂಬಯಿಯಲ್ಲಿ ಭಯೋತ್ಪಾದಕ ಕೃತ್ಯ ನಡೆದು ಸಾಕ್ಷ್ಯಾಧಾರ ಸಮೇತ ಉಗ್ರಗಾಮಿ ಸಿಕ್ಕಿಬಿದ್ದು 730ಕ್ಕೂ ಹೆಚ್ಚು ದಿನಗಳು ಕಳೆದು ಹೋದ ಸಂದರ್ಭದಲ್ಲಿ ನಡೆದ ಎರಡನೇ ವರ್ಷಾಚರಣೆಯಲ್ಲಿ ಮಾಧ್ಯಮಗಳ (ಬೊಗಳೆ ರಗಳೆ ಎಂಬ ಕುಖ್ಯಾತ ಪತ್ರಿಕೆಯ ಹೊರತಾಗಿ), ಟಿವಿ ಚಾನೆಲ್‌ಗಳು ಮತ್ತು ಅಂತರ್ಪಿಶಾಚಿ (internet) ಮಾಧ್ಯಮಗಳಲ್ಲಿ ಬಂದಿರುವ ವರದಿಗಳು ಪುತ್ರಿಕೋದ್ಯಮದ ವ್ಯಕ್ತಿನಿಷ್ಠೆಯನ್ನೇ ಅಲುಗಾಡಿಸಿ ವೃತ್ತಿನಿಷ್ಠೆಯನ್ನು ಮೆರೆದ ಪ್ರಕರಣವನ್ನು ಬೊಗಳೂರು ಬ್ಯುರೋ ಮಾತ್ರ ಕಂಡುಕೊಂಡಿದೆ.

ಬುರಖಾದತ್, ವೀರ್ ಸಾಂಘ್ವಿ ಅವರುಗಳೆಲ್ಲಾ ನೀರಾ ರಾಡಿಯಾ ಜೊತೆ ಸೇರಿಕೊಂಡು ಮೀಡಿಯಾವನ್ನು ರಾಡಿಯೆಬ್ಬಿಸಿದ ಬೆನ್ನಿಗೇ, 26/11 ವರದಿಗಾರಿಕೆಯಲ್ಲಿಯೂ ಎಲ್ಲ ಪತ್ರಿಕೆಗಳೂ, ಎಲ್ಲ ಮಾಧ್ಯಮಗಳೂ, ಎಲ್ಲ ಎಲ್ಲವುಗಳೂ ರಾಡಿಯೆಬ್ಬಿಸಿ ಪುತ್ರಿಕೋದ್ಯಮದ ಮುಖಕ್ಕೆ ಮಸಿ ಬಳಿದಿವೆ.

ಕಳೆದೊಂದು ತಿಂಗಳಿಂದ ಭರ್ಜರಿ ನಿದ್ರೆ ಮಾಡುತ್ತಿದ್ದ ಬೊಗಳೂರು ಬ್ಯುರೋದವರಿಗೆ ನಿದ್ದೆಯಿಂದೆದ್ದೇಳಲು ಇದೊಂದು ಅಂಶವಷ್ಟೇ ಸಾಕಾಗಿತ್ತು. ಪುತ್ರಿಕೋದ್ಯಮ ಮತ್ತು ಪುತ್ರಕೋದ್ಯಮವು ಗಬ್ಬೆದ್ದು ಹೋಗುತ್ತಿರುವ ಸಂದರ್ಭದಲ್ಲಿ ಮಹಾ ಮಹಾನ್ ಹೆಸರು ಕಟ್ಟಿಕೊಂಡಿದ್ದ, ನೂರಾರು ವರ್ಷಗಳಿಂದಲೂ ಚಾಲ್ತಿಯಲ್ಲಿರುವ ಮಾಧ್ಯಮಗಳು 26/11ರ ವರದಿಯಲ್ಲಿ ಎಡವಿದ್ದಾದರೂ ಏನು? ಯಾಕೆ ಎಂದು ಬೊಗಳೂರು ಓದುಗರಿಗೆ ಖಂಡಿತಾ ಈಗ ಅಚ್ಚರಿ ಮೂಡಿಸಬಹುದಲ್ಲವೇ?

ಹಾಗಿದ್ದರೆ, ಪುತ್ರಿಕಾ ಮಾಧ್ಯ-ಮಗಳಲ್ಲಿ ಪ್ರಕಟವಾಗಿರುವ ಮರುದಿನದ ವ-ರದ್ದಿಗಳ ಶೀರ್ಷಿಕೆಗಳನ್ನೇ ನೋಡಿ:

* ನಾವು ಶತ್ರುಗಳ (ಪಾಕಿಸ್ತಾನ)ದ ತಂತ್ರಗಳಿಗೆ ಎಂದಿಗೂ ಮಣಿಯುವುದಿಲ್ಲ: ಮನಮೋಹಕ ಸಿಂಗ್ (ನಿಧಾನಿ)
** ಮುಂಬಯಿ ದಾಳಿ ಖಂಡನೀಯ, ಪಾಕಿಸ್ತಾನವು ಭಯೋತ್ಪಾದನೆಯ ಉತ್ಪಾದನಾ ಘಟಕಗಳನ್ನು ಮುಚ್ಚಬೇಕು: ಸೇಮ್ ಕೃಷ್ಣ (ವಿದೇಶದ ಸಚಿವ)
*** ನಾವು ತಪ್ಪಿತಸ್ಥರನ್ನು ಹಿಡಿದು ಗಂಭೀರಾತಿಗಂಭೀರವಾಗಿ ಶಿಕ್ಷಿಸುತ್ತೇವೆ - ಪೀಚಿ ದಂಬರಂ (ಮನೆ ಸಚಿವ)
**** ಪಾತಕಿಸ್ತಾನವು ತನ್ನ ಭರವಸೆ ಈಡೇರಿಸಲೇಬೇಕು: ಪೀಚಿ ದಂಬರಂ (ಗೃಹದೊಳಗೆ ಸಚಿವ)
***** ಟೆರರ್ ನೆಟ್ವರ್ಕ್ ನಿರ್ಮೂಲಗೊಳಿಸದ ಹೊರತು ಪಾಕಿಸ್ತಾನದೊಂದಿಗೆ ಮಾತುಕತೆಯಿಲ್ಲ : ಮನಮೋಹಕ ಸಿಂಗ್ (ನಿಧಾನಿಯೇ ಪ್ರಧಾನಿ)
****** ನಮ್ಮ ನೆಲದಲ್ಲಿ ಭಯೋತ್ಪಾದನೆ ನೆಲೆಯೂರಲು ಬಿಡುವುದಿಲ್ಲ: ಸಾನಿಯಾ ಗಾಂಧಿ (ಉಪ (=UPA) ಅಧ್ಯಕ್ಷರು)
******* (ಅಡ್ಡ)ಕಸಬಿಗೆ ಗಲ್ಲು ಶಿಕ್ಷೆ ವಿಧಿಸಿ: ಮುಂಬೈಯಲ್ಲಿ ದಾಳಿಯಲ್ಲಿ ಹುತಾತ್ಮರಾದ ಧೀರ ಯೋಧರ ಕುಟುಂಬಿಕರು
******** ಭಯೋತ್ಪಾದನೆ ತಡೆಗೆ ನಾವು ಬದ್ಧ, ಭಾರತಕ್ಕೆ ಸಹಕರಿಸುತ್ತೇವೆ: ಪಾತಕಿಸ್ತಾನ
********* ಮುಂಬೈ ದಾಳಿಯಲ್ಲಿ ಕೈವಾಡವಿರುವ ಬಗ್ಗೆ ಇನ್ನೂ ಸಾಕ್ಷಿಗಳನ್ನು ಕೊಡಿ: ಪಾತಕಿಸ್ತಾನ
********** ಪಾಕಿಗೆ ಮತ್ತೊಂದು ಲಾರಿಯಲ್ಲಿ ದೋಸೆ (Dossier) ಕಳುಹಿಸುತ್ತೇವೆ- ಸೇಮ್ ಕೃಷ್ಣ (ವಿದೇಶದ ಮಂತ್ರಿ)

ಇವೆಲ್ಲವೂ ಸರಿಯೇ ಇದೆಯಲ್ಲಾ... ಇದರಲ್ಲೇನು ಪುತ್ರಿಕೋದ್ಯಮದ ಮಾನ ಮರ್ಯಾದೆ ಹರಾಜ್ಆಯ್ತು ಅಥವಾ ಹಜಾರ್ಆಯ್ತು ಅಂತ ನೀವೆಲ್ಲಾ ತಲೆಕೆಡಿಸಿಕೊಂಡಿದ್ದರೆ, ನಮ್ಮ ವರದ್ದಿಗಾರರೂ, ಸೊಂಪಾದಕರೂ ಮತ್ತು ಓದುಗರೂ ಆಗಿರುವ ಅಸತ್ಯಾನ್ವೇಷಿಗಳು ನೀಡಿರುವ ಅಂತಿಮ ಟಿಪ್ಪಣಿ, ಸ್ಪಷ್ಟನೆ ಇಲ್ಲಿದೆ.

ಅಸತ್ಯಾನ್ವೇಷಿ ಸ್ಪಷ್ಟನೆ, ವಿವರಣೆ:
"ಸ್ವಾಮೀ, ಈ ಮಾಧ್ಯಮಗಳೆಲ್ಲವೂ ಬೊಗಳೂರು ಸೊಂಪಾದಕರನ್ನು ಮಂಗ ಮಾಡಿವೆ. ಮತ್ತು ತಮ್ಮ ಓದುಗರನ್ನೂ 3ಖ ಆಗಿಸಿವೆ. ಇವೆಲ್ಲಾ ಸುದ್ದಿಗಳು 2008ರಲ್ಲಿ ದಾಳಿ ನಡೆದ ಬಳಿಕ ಪ್ರಕಟವಾಗುತ್ತಿದ್ದ ವರದಿಗಳು. ಮತ್ತು 2009ರಲ್ಲಿ 365ನೇ ದಿನಾಚರಣೆಯ ಮರುದಿನವೂ ಇದೇ ಸುದ್ದಿಗಳು ಪತ್ರಿಕೆಗಳು ಪ್ರಕಟವಾಗಿದ್ದವು. ಅವುಗಳನ್ನೇ ಹಿಡಿದು ಕಾಪಿ-ಪೇಸ್ಟ್ ಮಾಡಿ, ಪತ್ರಿಕೆಗಳು ಪುಟ ಭರ್ತಿ ಮಾಡಿದ್ದರೆ, ಟೀವಿ ಚಾನೆಲ್‌ಗಳು ಅದೇ ಮೊಂಬತ್ತಿ ಉರಿಸುವ, ಪುಷ್ಪಗುಚ್ಛವಿರಿಸಿ ಕೈಮುಗಿಯುವ ಚಿತ್ರಗಳನ್ನು ತೋರಿಸಿವೆ. ಎಲ್ಲವೂ ಆವತ್ತಿನದ್ದೇ. ಇದೆಲ್ಲವೂ ಹಣ ಕೊಟ್ಟು ಪತ್ರಿಕೆ ಓದುವ ಓದುಗರಿಗೆ ಮಾಡಿದ ವಂಚನೆ ಸ್ವಾಮೀ. ಇನ್ನೂ ಅರ್ಥವಾಗಲಿಲ್ಲವೇ? ಅಂದು ಎಲ್ಲ ವರದ್ದಿಗಾರರು ರಜೆಯಲ್ಲಿದ್ದುದರಿಂದ, ಪ್ರತಿವರ್ಷವೂ ಇದೇ ಮಾತು ಬಂದೇಬರುತ್ತದೆ ಎಂಬುದು ಗ್ಯಾರಂಟಿಯಾಗಿದ್ದುದರಿಂದ, ಇದನ್ನೇ ಕಾಪಿ ಪೇಸ್ಟ್ ಮಾಡಿದ್ದಾರೆ. ಇನ್ನೂ ಹಲವಾರು ವರ್ಷ ಇದೇ ಮುಂದುವರಿಯುತ್ತದೆ!"

ಮಾಧ್ಯಮಗಳ ಸುದ್ದಿ ಶೂನ್ಯತೆ: ವಂಚನೆ ಬಯಲಿಗೆಳೆದ ಬೊಗಳೆ

2010-11-27T15:47:00.002+05:30

(ಬೊಗಳೂರು ಜಾಹೀರಾತು ಬ್ಯುರೋದಿಂದ)

ಬೊಗಳೂರು, ನ.27- ಸುದೀರ್ಘ ಕಾಲದಿಂದ ಬೊಗಳೆ ರಗಳೆ ಬ್ಯುರೋ ಮತ್ತೊಂದು ಬಾರಿ ನಿದ್ದೆಯಿಂದ ಎದ್ದೇಳಲು ಬಲವಾದ ಕಾರಣವೊಂದು ಸಿಕ್ಕಿದೆ.

ಈ ಕಾರಣವೇನು ಮತ್ತು ಏನಲ್ಲ ಎಂಬುದನ್ನು ತಿಳಿಯಲು ಬೊಗಳೆ ರಗಳೆಯ ಸೋಮವಾರದ ಸಂಚಿಕೆಯಲ್ಲಿ ವೀಕ್ಷಿಸಿ.

ಸುದ್ದಿ ಮಾಡುವವರೇ ಸುದ್ದಿಯಾಗುತ್ತಿರುವ ಈ ದಿನಗಳಲ್ಲಿ, ಯಾವುದೇ ಮಾಧ್ಯ-ಮಗಳೂ ವರದ್ದಿ ಮಾಡದ, ಪುತ್ರಿಕೋದ್ಯಮವೇ ಕಂಡು ಕೇಳರಿಯದ ವಿ-ಶೇಷ ವರದ್ದಿಯೊಂದನ್ನು ನಿಮ್ಮ ಮುಂದೆ ತಂದು ಸುರಿಯಲಾಗುತ್ತದೆ.

ನಿಮ್ಮ ಬೊಗಳೆ ಪ್ರತಿಗಳನ್ನು ಇಂದೇ ಕಾದಿರಿಸಿ.

ಸಂಪುಟ ವಿಸ್ತರಣೆ ಮಾಡಿ: ಯಡ್ಡಿಗೆ ರೆಸಾರ್ಟ್‌ಗಳ ಆಗ್ರಹ

2010-11-03T12:12:00.000+05:30

[ಬೊಗಳೂರು ಸಂಪುಟ ವಿಸರ್ಜನಾ... ಅಲ್ಲಲ್ಲ ವಿಸ್ತರಣಾ ಬ್ಯುರೋದಿಂದ]

ಬೊಗಳೂರು, ನ.3- ಈಗಾಗಲೇ ಸಂಪುಟ ವಿಸ್ತರಣೆ ಎಂಬ ಎರಡು ಶಬ್ಧಗಳು ಕೇಳಿದ ತಕ್ಷಣವೇ ಬಿಜೆಪಿ ಶಾಸಕರೆಲ್ಲರೂ ಪಟಾಕಿಗಳಂತೆ ಸಿಡಿಯುವ ಮೂಲಕ ದೀಪಾವಳಿಗೆ ಮುನ್ನವೇ ದೀಪಾವಳಿ ಆಚರಿಸಿ, ತಮಿಳುನಾಡು, ಗೋವಾ, ಕೊಚ್ಚಿ ಮುಂತಾದೆಡೆ ರೆಸಾರ್ಟ್‌ಗಳಲ್ಲಿ ಅವಿತುಕೊಳ್ಳುವ ಪ್ರಕ್ರಿಯೆಯು ನಿತ್ಯದ ಕಾಯಕವಾಗಿಬಿಟ್ಟಿರುವುದರಿಂದ, ಇದೀಗ ಸಂಪುಟ ವಿಸ್ತರಣೆ ಮುಂದೂಡಿರುವ ಮುಖ್ಯಮಂತ್ರಿ ಯಡಿಯೂರಪ್ಪ ಮೇಲೆ ದೇಶದ ವಿವಿಧೆಡೆಗಳ ರೆಸಾರ್ಟ್‌ಗಳು ಕೆಂಗಣ್ಣು ಬೀರುತ್ತಿವೆ.

ಇದು ವಿವಿಧ ರಾಜ್ಯಗಳ ಪ್ರವಾಸೋದ್ಯಮ ಕ್ಷೇತ್ರಕ್ಕೆ ಬೀಳುವ ದೊಡ್ಡ ಹೊಡೆತವೆಂದು ಪ್ರತಿಪಾದಿಸಿರುವ ಈ ರೆಸಾರ್ಟ್ ಮಾಲೀಕರು, ತಕ್ಷಣವೇ ಸಂಪುಟ ವಿಸ್ತರಣೆ ಮಾಡುವಂತೆಯೂ, ಆಗಾಗ್ಗೆ ಸಂಪುಟ ವಿಸ್ತರಣೆ ಘೋಷಣೆ ಮಾಡುವಂತೆಯೂ ಆಗ್ರಹಿಸಿದ್ದಾರೆ.

ಈ ಕುರಿತು ಏಕಸದಸ್ಯ ಬೊಗಳೆ ಬ್ಯುರೋದ ಸಮಸ್ತ ಸಿಬ್ಬಂದಿಗಳಿಗೆ ಪತ್ರ ಬರೆದಿರುವ ರೆಸಾರ್ಟ್ ಮಾಲೀಕರು, ತಾವಾದರೂ ತಮ್ಮ ಇಲ್ಲದ ಪ್ರಭಾವ ಬೀರಿ, ಮುಖ್ಯಮಂತ್ರಿ ತಲೆಯೊಳಗೆ ಸಂಪುಟ ವಿಸ್ತರಣೆಯ ಹುಳವನ್ನು ಬಿಡುವಂತೆ ತಾಕೀತು ಮಾಡಿದ್ದಾರೆ.

[ಬೊಗಳೂರ ಸಕಲ ಓದುಗರಿಗೂ ದೀಪಾವಳಿ ಹಬ್ಬದ ಶುಭಾಶಯಗಳು. ನೀವು ಪಟಾಕಿ ಹಚ್ಚಿದಾಗ ಠುಸ್ ಆದವುಗಳೆಷ್ಟು ಎಂಬುದನ್ನು ನಮ್ಮೊಂದಿಗೆ ಹಂಚಿಕೊಳ್ಳಿ...]

ಈಗ ದೀಪಾವಳಿ ಹಬ್ಬಕ್ಕೆ ನಮ್ಮ ವಿಶೇಷ ಕೊಡುಗೆಗಳೂ ಇವೆ. ನಮ್ಮಲ್ಲಿ ಬರುವ ಶಾಸಕರಿಗೆ ವಿಶೇಷ ರಿಯಾಯಿತಿಯನ್ನೂ ನೀಡುತ್ತೇವೆ. ಅವರು ನಮ್ಮ ರೆಸಾರ್ಟ್‌ನಲ್ಲಿ ಉಳಿದುಕೊಂಡರೆ ಅವರಿಗೆ ಉಚಿತವಾಗಿ ಆಹಾರ ಒದಗಿಸಲಾಗುವುದು ಎಂದು ಮಾಲೀಕರು ಬೊಗಳೂರಿಗೆ ಬಂದು ನಡೆಸಿದ ರದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ಆದರೆ ಇಲ್ಲಿಯೂ ಸ್ಟಾರ್ ಮಾರ್ಕ್ ಉಳ್ಳ ಷರತ್ತುಗಳು ಅನ್ವಯವಾಗುತ್ತವೆ. ನಮ್ಮಿಂದ ಬಾಟಲಿಗಳನ್ನು ಪೂರೈಸುವುದು ಅಸಾಧ್ಯವಾದ ಕೆಲಸ ಎಂದು ಎಲ್ಲ ರಾಜ್ಯಗಳ ರೆಸಾರ್ಟ್ ಮಾಲೀಕರು ಒಗ್ಗಟ್ಟಾಗಿ ಘೋಷಿಸಿದ್ದಾರೆ.

ಬೊಗಳೆ ಬ್ಯುರೋಗೂ ರೆಸಾರ್ಟ್ ವರದ್ದಿಗಾರ ನೇಮಕ!

2010-10-26T08:46:00.000+05:30

[ಬೊಗಳೂರು ರೆಸಾರ್ಟ್ ವರದ್ದಿಗಾರಿಕೆ ಬ್ಯುರೋದಿಂದ]

ಬೊಗಳೂರು, ಅ.25- ಕರುನಾಟಕದಲ್ಲಿ ಸಾಕಷ್ಟು ನಾಟಕಗಳು ನಡೆಯುತ್ತಿರುವಂತೆಯೇ, 224 ಮಂದಿ ಶೋಷಕರಿರುವ ಆ ರಾಜ್ಯದ ಶೋಷಕರೆಲ್ಲರೂ ಇತ್ತೀಚೆಗೆ ರೆಸಾರ್ಟ್‌ನ ಈಜುಕೊಳಗಳಲ್ಲಿ ಮುಳುಗೇಳುತ್ತಿರುವುದು ಮತ್ತು ಅಲ್ಲಿಗೇ ಅಂಟಿಕೊಂಡಿರುವುದರಿಂದಾಗಿ, ಬೊಗಳೆ ರಗಳೆ ಏಕ ಸದಸ್ಯ ಬ್ಯುರೋದಲ್ಲಿ ಒಬ್ಬ ಪತ್ರಕರ್ತರನ್ನು ರೆಸಾರ್ಟ್ ಬೀಟ್‌ಗೇ ಹಾಕಬೇಕಾದ ಅನಿವಾರ್ಯತೆಗೆ ಬೊಗಳೆ ರಗಳೆ ಬ್ಯುರೋ ಸಿಲುಕಿದೆ.

ಬೆಳಿಗ್ಗೆ ಎದ್ದ ತಕ್ಷಣವೇ ರೆಸಾರ್ಟಿಗೆ ಹೋಗುವುದೇ ಈ ವರದ್ದಿಗಾರರ ಕೆಲಸ. ಹೀಗಾಗಿ ಅವರಿಗೆ ರೆಸಾರ್ಟ್ ರದ್ದಿಗಾರ ಎಂಬ ವಿಶೇಷ ಡೆಸಿಗ್ನೇಷನ್ ನೀಡಲಾಗಿದ್ದು, ರೆಸಾರ್ಟಿನಲ್ಲಿ ಹೇಗೆ ಈಜಬೇಕು, ಅಲ್ಲಿ ಯಾವ ಥರದ ಆಹಾರ ತಿನ್ನಬೇಕು, ಅಲ್ಲಿ ಫೋನ್ ಬಳಕೆ ಮಾಡಬೇಕೇ ಬೇಡವೇ, ಸಾಧ್ಯವಾಗದಿದ್ದರೆ ಹೇಗೆ ಎಂದೆಲ್ಲಾ ತರಬೇತಿ ನೀಡಿ ಕಳುಹಿಸಲಾಗುತ್ತಿದೆ ಎಂದು ಸೊಂಪಾದ-ಕರುಗಳು ಹೇಳಿದ್ದಾರೆ.

ತಮಗೆ ಮಾತ್ರ ರಾಜಕೀಯ ಮಾಡಲು ಗೊತ್ತಿರುವುದು ಎಂದು ಕೈಗಳು, ತೆನೆ ಹೊತ್ತ ಮಹಿಳೆಯರು ತಿಳಿದುಕೊಂಡಿದ್ದರೆ, ನಮಗೂ ರಾಜಕೀಯ ಬರುತ್ತದೆ ಎಂದು ಕಮಲ ತೋರಿಸಿಕೊಟ್ಟಿದ್ದಾಳೆ. ಹೀಗಾಗಿ ಎಲ್ಲರೂ ಪರಸ್ಪರ ಪತರಗುಟ್ಟತೊಡಗಿದ್ದಾರೆ ಎಂದು ಅರಾಜಕೀಯ ವರದ್ದಿಗಾರರು ರೆಸಾರ್ಟಿನಿಂದ ಮೊದಲ ವರದ್ದಿ ಕಳುಹಿಸಿದ್ದಾರೆ.

ಎಲ್ಲ ಪಕ್ಷಗಳಲ್ಲೂ ಹೂವಿನಿಂದ ಹೂವಿಗೆ ಹಾರುವ ದುಂಬಿಗಳದ್ದೇ ಕಾರುಬಾರು. ಅಲ್ಲಿ ಜೇನು ಮುಗಿದ ತಕ್ಷಣ ಮರಳಿ ಹಿಂದಿದ್ದ ಹೂವಿಗೋ, ಬೇರೊಂದು ಹೂವಿಗೋ ಹಾರಾಟ ಮುಂದುವರಿಸುತ್ತವೆ. ಆದರೆ ಆನೆ ಕದ್ದರೂ ಕಳ್ಳ, ಅಡಿಕೆ ಕದ್ದರೂ ಕಳ್ಳನೇ ಆಗಿರುವುದರಿಂದ ಎಲ್ಲ ಪಕ್ಷಗಳಲ್ಲಿರುವ ಶೋಷಕರಲ್ಲಿ ನಿಜವಾದ ಶಾಸಕರು ಯಾರು ಎಂಬುದನ್ನು ಪತ್ತೆ ಹಚ್ಚುವುದು ಭಾರೀ ತ್ರಾಸದಾಯಕ ಕೆಲಸ ಎಂದಿದ್ದಾರೆ ರೆಸಾರ್ಟು ಬಾತ್ಮೀದಾರರು.

ಪಕ್ಷಕ್ಕೇ ಕೈಮುಗಿದು ಆಚೆ ಹೋದ, ಕಮಲದ ಕೈ ಹಿಡಿದ ಮತ್ತು ಈ ರೀತಿ ಮಾಡಿ ಹಸ್ತವನ್ನೇ ಕತ್ತರಿಸಿದವರ ಕೈ ಕತ್ತರಿಸುತ್ತೇವೆ ಎಂದು ಈಗಾಗಲೇ ಮಹಿಳೆಯ ತಲೆಯಲ್ಲಿದ್ದ ತೆನೆ ಕತ್ತರಿಸಿ ಅಭ್ಯಾಸವಿದ್ದ ಆರ್. ವಿದೇಶಪಾಂಡೆಯವರು ಘೋಷಿಸಿದ್ದಾರೆ.

ಒಟ್ಟಿನಲ್ಲಿ ಹೆಂಡ ಕುಡಿದ ಕೋತಿಗಳಂತೆ ಆಡುವವರ ಬಾಲ ಕತ್ತರಿಸಲು ಜನತೆ ಸಿದ್ಧತೆ ಮಾಡಿದ್ದಾರೆ. ಸುಮ್ನೇ ಕೈ, ಕಾಲು, ಅದೂ, ಇದು ಕತ್ತರಿಸಿ ಅಂತೆಲ್ಲಾ ಹೇಳುತ್ತಾ ರಾಜ್ಯದ ಜನತೆಗೆ ಬಿಟ್ಟಿ ಮನರಂಜನೆ ಕೊಡುವ ಬದಲು, ಒಂದೇ ಏಟಿಗೆ ಶೋಷಕತ್ವವನ್ನೇ ಕತ್ತರಿಸಿದರೆ ಹೇಗೆ ಎಂಬ ವಿಧ್ವಂಸಕಾರಿ, ಪ್ರಳಯಾಂತಕ, ತಲೆ ಹೋಗುವ ಸಲಹೆಯನ್ನು ಕೂಡ, ರೆಸಾರ್ಟಿನಲ್ಲೇ ಉಳಿದುಕೊಂಡು ವಿಶ್ಲೇಷಕರಾಗಿ ಪರಿವರ್ತನೆಗೊಂಡಿರುವ ನಮ್ಮ ರದ್ದಿಗಾರರು ತಿಳಿಸಿದ್ದಾರೆ.

ಬೊಗಳೆ: ತಲೆ ಎಣಿಕೆಗೆ ಪರದಾಡಿದ ಸಿಬ್ಬಂದಿ!

2010-10-19T11:26:00.000+05:30

[ತಲೆ ಸರಿ ಇಲ್ಲದ ಬ್ಯುರೋದಿಂದ]

ಬೊಗಳೂರು,ಅ.19- ರಾಜ್ಯ ರಾಜಕೀಯದ ಕೆಸರಲ್ಲಿ ಮುಳುಗಿಯೇ ಇರುವ ಬೊಗಳೆ ರಗಳೆ ಬ್ಯುರೋ ಸಿಬ್ಬಂದಿ ದಿಢೀರ್ ಆಗಿ ತಲೆಮರೆಸಿಕೊಂಡಂತೆ ಕೊಂಡರೂ ಆಗಾಗ್ಗೆ ಕೆಸರಿನೊಳಗಿನಿಂದಲೇ ತಲೆ ಎತ್ತುತ್ತಿರುವುದರ ಹಿನ್ನೆಲೆಯನ್ನು ಸ್ವತಃ ಏಕಸದಸ್ಯ ಬ್ಯುರೋದ ಸಿಬ್ಬಂದಿಗಳೇ ಪತ್ತೆ ಹಚ್ಚಿದ ಘಟನೆಯೊಂದು ತಡವಾಗಿ ವರದ್ದಿಯಾಗಿದೆ.

ರಾಜ್ಯ ರಾಜಕಾರಣದಲ್ಲಿ ಕೋಟಿ ಕೋಟಿಗಳ ವ್ಯವಹಾರವೇ ನಡೆಯುತ್ತಿರುವುರದಿಂದಾಗಿ ಲಕ್ಷಕ್ಕೆ ಲಕ್ಷ್ಯವೇ ಇಲ್ಲ, ಸಾವಿರದ ಸರದಾರರೇ ಇಲ್ಲವೆಂಬಂತಹಾ ಪರಿಸ್ಥಿತಿ ಉದ್ಭವವಾಗಿದೆ. ಇದರ ನಡುವೆ, ಈ ಕೋಟಿ ಕೋಟಿ ವ್ಯವಹಾರಗಳಲ್ಲಿ ಯಾವ ಕುರಿಗಳು ಯಾರಿಗೆ ವ್ಯಾಪಾರವಾಗುತ್ತಿವೆ ಎಂಬುದನ್ನು ಲೆಕ್ಕಾಚಾರ ಹಾಕಲು ನಿಧಾನಸಭೆಯಲ್ಲಿ ಸಭೆಯ ಅದಕ್ಷರು ಕುರಿಗಳ ತಲೆ ಎಣಿಕೆಗೆ ಸೂಚಿಸಿದ್ದರು.

ಯುಪಿಎ ನೇತೃತ್ವದ ಸರಕಾರದ ರಾಜ್ಯಪಾಲರೂ ಕೂಡ, ಮೊದಲನೇ ವ್ಯಾಪಾರ ವಹಿವಾಟುಗಳು ಸರಿಯಾಗಿ ನಡೆದಿಲ್ಲ, ಎರಡನೇ ಬಾರಿ ಸರಿಯಾಗಿ ಲೆಕ್ಕಾಚಾರ ಮಾಡಿ ತೋರಿಸಿ ಎಂದು ಮಾನ್ಯ ಅಮುಖ್ಯಮಂತ್ರಿಗಳಿಗೆ ಸಲಹೆ ಕೊಟ್ಟು, ಸೆನ್ಸೆಕ್ಸ್ ಸೂಚ್ಯಂಕವು 10 ಕೋಟಿಯಿಂದ 25 ಕೋಟಿಗೆ ದಿಢೀರ್ ಏರಿಕೆಯಾಗಲು ಕಾರಣರಾಗಿದ್ದರು.

ಅದು 50 ಕೋಟಿಗೆ ತಲುಪಿತ್ತು, ಈ ಸೆನ್ಸೆಕ್ಸ್ ಸೂಚ್ಯಂಕದ ಹಿಂದೆ "ಸ್ಥಾಪಿತ" ಹಿತಾಸಕ್ತಿಗಳ ಕೈವಾಡವಿದೆ ಎಂದು ನಿದ್ದೆರಾಮಯ್ಯನವರು ಕೂಡ ಆರೋಪಿಸುತ್ತಲೇ ಬಂದಿದ್ದಾರೆ. ಅದಿರಲಿ, ಮೊನ್ನೆ ಮೊನ್ನೆ ಮಾರುಕಟ್ಟೆಯ ಹರಾಜು ಪ್ರಕ್ರಿಯೆ ವೇಳೆ, ತಲೆಗಳನ್ನು ಎಣಿಸುವಾಗ, ಸಾಕಷ್ಟು ಬಾರಿ ಎಣಿಸಿದರೂ ಆಗಾಗ್ಗೆ ಲೆಕ್ಕ ತಪ್ಪುತ್ತಲೇ ಇತ್ತು ಎಂಬುದನ್ನು ನಮ್ಮ ವರದ್ದಿಗಾರರು ಕಂಡುಕೊಂಡಿದ್ದಾರೆ.

ತಾಂತ್ರಿಕವಾಗಿ ಮುಂದುವರಿದ ಈ ಯುಗದಲ್ಲಿಯೂ ಈ ರೀತಿ ತಪ್ಪುಗಳಾಗುತ್ತವೆಯೇ ಎಂದು ಜನ ಸಾಮಾನ್ಯರು ಬೆರಳನ್ನು ಮೂಗಿನೊಳಗೆ ಹಾಕಿ ಗಣಿಗಾರಿಕೆ ನಡೆಸುತ್ತಾ ಅಚ್ಚರಿಪಡುತ್ತಿರುವಂತೆಯೇ, ಲೆಕ್ಕ ತಪ್ಪಲು ಕಾರಣವನ್ನು ಬೊಗಳೆ ರಗಳೆ ಏಕಸದಸ್ಯ ಬ್ಯುರೋದ ಸಮಸ್ತ ಸಿಬ್ಬಂದಿಗಳ ಮುಖ್ಯಸ್ಥ ಅನ್ವೇಷಿ ಪತ್ತೆ ಹಚ್ಚಿದ್ದಾರೆ.

ಅವರ ಪ್ರಕಾರ, ಲೆಕ್ಕ ತಪ್ಪಲು ಕಾರಣಗಳು ಹಲವು. ಅವುಗಳನ್ನು ಈ ಕೆಳಗೆ ಪಟ್ಟಿ ಮಾಡಲಾಗಿದೆ:
1. ನಾವು ಆರಿಸಿ ಕಳುಹಿಸಿದ ಕೆಲವರಿಗೆ ತಲೆಯೇ ಇರಲಿಲ್ಲ.
2. ಇನ್ನು ಕೆಲವರು ಕೋಟಿ ಕೋಟಿ ತೆಗೆದುಕೊಂಡಾಗ ತಲೆ 'ಮರೆಸಿ'ಕೊಂಡಿದ್ದರು.
3. ಮತ್ತೆ ಕೆಲವರಿಗೆ ಸಾಕ್ಷಿ ಪ್ರಜ್ಞೆ ಕಾಡಿ, ಮತದಾರರ ಎದುರು ತಲೆ ಎತ್ತುವುದು ಹೇಗೆ ಎಂಬ ಚಿಂತೆಯಿಂದಾಗಿ, ತಲೆ ತಗ್ಗಿಸಿ ಕುಳಿತಿದ್ದರು.
4. ಇನ್ನು ಕೆಲವರ ತಲೆ ಕಂಡರೂ, ಅದಕ್ಕೆ ಬಡಿದು ನೋಡಿದಾಗ ಟಣ್ ಟಣ್ ಅಂತ ಧ್ವನಿ ಹೊರಟು, ಒಳಗೆ ಪೊಳ್ಳು ಎಂಬುದು ಸಾಬೀತಾದ ಕಾರಣ, ಈ ತಲೆಗಳನ್ನು ರಿಜೆಕ್ಟ್ ಮಾಡಲಾಯಿತು.
5. ಮತ್ತೆ ಕೆಲವರ ತಲೆ ಸರಿ ಇಲ್ಲದ ಕಾರಣದಿಂದಾಗಿ ಅದು ಲೆಕ್ಕಕ್ಕೇ ಸಿಕ್ಕಿರಲಿಲ್ಲ.
6. ಮತ್ತೆ ಕೆಲವರ ಬೋಳು ತಲೆಯನ್ನು ಬಿಚ್ಚಿ ನೋಡಿದಾಗ, ಅಲ್ಲಿ ಬರೇ ಕಲ್ಲು ಮಣ್ಣು, ಹುಲ್ಲು, ಸಗಣಿಯೇ ತುಂಬಿದ್ದ ಕಾರಣ, ಅವುಗಳೂ ಲೆಕ್ಕದಿಂದ ತಿರಸ್ಕೃತವಾದವು.

ಈ ಕಾರಣದಿಂದಾಗಿಯೇ ಲೆಕ್ಕ ತಪ್ಪಿತು, ವಿಶ್ವಾಸಮತ ಸಾಬೀತಾಗದಿದ್ದರೂ, ಅವಿಶ್ವಾಸ ಮತವಂತೂ ಸಾಬೀತಾಯಿತು ಎಂದು ಮೂಲಗಳು ವರದ್ದಿ ತಂದು ಸುರಿದಿವೆ.

ವಿಧಾನಸೌಧ ಕೆಡವಿ ರೆಸಾರ್ಟ್ ಕಟ್ಟಿಸಲು ಚಿಂತನೆ!

2010-10-11T10:00:00.002+05:30

(ಬೊಗಳೂರು ಅರಾಜಕೀಯ ಬ್ಯುರೋದಿಂದ)

ಬೊಗಳೂರು, ಅ.11- ಕರ್‌ನಾಟಕದ ರೆಸಾರ್ಟ್ ರಾಜಕಾರಣ ಹೊಸ ತಿರುವು ಪಡೆದುಕೊಂಡಿದ್ದು, ತಮಗೆ ವಿಧಾನಸಭೆಯೇ ಬೇಡ ಎಂದು ಎಲ್ಲ ಶಾಸಕರೂ ಪಕ್ಷಾತೀತವಾಗಿ ಪ್ರತಿಭಟನೆ ಮಾಡಲಾರಂಭಿಸಿದ್ದಾರೆ ಎಂದು ತಿಳಿದುಬಂದಿದೆ.

ಬೊಗಳೂರು ವಿಶೇಷ ತನಿಖಾ ತಂಡವು ಮಾಟ ಮಂತ್ರ ಬ್ಯೂರೋದ ಸಹಾಯ ಪಡೆದು ವಿಧಾನಸಭೆಯನ್ನು ಪರಿಶೀಲಿಸಲಾಗಿ, ವಿಧಾನಸಭೆಯ ಸುತ್ತಲೂ ಕೆಂಪು ಕೆಂಪು ರಕ್ತ, ಕುಂಕುಮ, ನಿಂಬೆಹಣ್ಣು, ಗೊಂಬೆ, ಆರ್ಯಭಟ ಉಪಗ್ರಹವನ್ನು ಹೋಲುತ್ತಿರುವಂತೆ ನಿಂಬೆ ಹಣ್ಣಿಗೆ ಮೊಳೆ ಚುಚ್ಚಿ ಮಾಡಿದ ತಂತ್ರಗಳು... ಇವುಗಳೆಲ್ಲವೂ ವಿಧಾನಸಭವನ್ನು ನಿರ್ನಾಮ ಮಾಡುವ ಸಂಚು ಎಂದು ಪತ್ತೆ ಹಚ್ಚಲಾಗಿದೆ.

ಇತ್ತೀಚೆಗೆ ಬೆಂಗಳೂರಿನ ಹೊರವಲಯ, ಗೋವಾ, ಪುಣೆ, ಕೊಚ್ಚಿ ಇತ್ಯಾದಿಗಳೇ ಶಾಸಕರನ್ನು ಹೆಚ್ಚಾಗಿ ಸೆಳೆಯುತ್ತಿರುವುದರಿಂದ, ಬೆಂಗಳೂರಿನಲ್ಲಿ ವಿಧಾನಸೌಧವನ್ನು ಒಡೆದು ಅಲ್ಲಿ ರೆಸಾರ್ಟ್ ಕಟ್ಟಿಸಬೇಕು, ಸಂಪುಟ ಸಭೆ, ವಿಧಾನಸಭೆ ಅಧಿವೇಶನ ಎಲ್ಲವೂ ಈ ರೆಸಾರ್ಟ್‌ಗಳಲ್ಲೇ ನಡೆಯಬೇಕು ಎಂದು ಶಾಸ-ಕರುಗಳೆಲ್ಲರೂ ಬೊಗಳೂರು ಬ್ಯುರೋದ ಮೂಲಕ ಒತ್ತಾಯಿಸಿದ್ದಾರೆ.

ಈ ಮಧ್ಯೆ, ಮತ್ತೊಂದು ಮೂಲವೊಂದು ಹೊಸ ಐಡಿಯಾವನ್ನು ಕೊಟ್ಟಿದ್ದು, ಅಷ್ಟೆಲ್ಲಾ ಐಷಾರಾಮಿ ರೆಸಾರ್ಟ್‌ಗಳನ್ನು ಕಟ್ಟಿಸಲು ಸಾಕಷ್ಟು ದುಡ್ಡು ಬೇಕಾಗುತ್ತದೆ. ಈಗಾಗಲೇ ರೆಸಾರ್ಟ್‌ಗಳಿಗೆ ತಿರುಗಾಡಲು ವಿಮಾನದ ಖರ್ಚು, ರೆಸಾರ್ಟ್ ಖರ್ಚು ಎಂದೆಲ್ಲಾ ರಾಜ್ಯದ ಖಜಾನೆ ಖಾಲಿಯಾಗಿದೆ. ಇನ್ನು ಕೊಡಲು ಜನರ ಬಳಿ ಹಣವೂ ಇಲ್ಲ. ಹೀಗಾಗಿ, ಗೋವಾವನ್ನೇ ಅಥವಾ ಪುಣೆಯ ಲೋನಾವಲದಲ್ಲಿರುವ ಆಂಬಿವ್ಯಾಲಿ ರೆಸಾರ್ಟ್ ಅನ್ನೇ ಬೆಂಗಳೂರಿನಲ್ಲಿ ತಂದು ಇಟ್ಟರೆ ಎಲ್ಲ ಸಮಸ್ಯೆಗಳೂ ಪರಿಹಾರವಾದಂತೆಯೇ ಎಂಬ ಅಮೂಲ್ಯ ಸಲಹೆ ನೀಡಿದ್ದಾರೆ.

ಈ ಸಲಹೆಯ ಪರಿಶೀಲನೆಗೆ ಮುಖ್ಯಕಂತ್ರಿಗಳು ಬೊಗಳೂರು ಏಕ ಸದಸ್ಯ ಬ್ಯುರೋದ ಸಮಸ್ಯರನ್ನೊಳಗೊಂಡ ಒಂದು ಸಮಿತಿಯನ್ನು ರಚಿಸಿದ್ದು, ಸಮಿತಿಯ ಸದಸ್ಯರಿಗೆ ತಲಾ ಕೋಟಿ ಕೋಟಿ ಕೊಡಲಾಗುತ್ತಿದೆಯಾದರೂ, 'ಕುದುರೆ ವ್ಯಾಪಾರ'ವೇನೂ ನಡೆಯಲಿಲ್ಲ ಎನ್ನುತ್ತಾ, ಈ ಸಮಿತಿ ಸದಸ್ಯತ್ವವನ್ನು ಒಪ್ಪಿಕೊಳ್ಳಲಾಗಿದೆ ಎಂದು ಸೊಂಪಾದ-ಕರುಗಳು ಸ್ಪಷ್ಟಪಡಿಸಿದ್ದಾರೆ.

ಈ ನಡುವೆ, ಇತ್ತೀಚೆಗೆ ಬಂದಿರುವ ವರದ್ದಿಗಳ ಪ್ರಕಾರ, ದೇಶದ ಎಲ್ಲ ರೆಸಾರ್ಟ್‌ಗಳು 'ರೆಸಾರ್ಟ್ ರಾಜಕೀಯ ಪ್ಯಾಕೇಜ್'ಗಳನ್ನು ರಾಜಕೀಯ ಪಕ್ಷಗಳ ಮುಖಂಡರಿಗೆ ನೀಡುತ್ತಿದ್ದು, ಭರ್ಜರಿ ಡಿಸ್ಕೌಂಟ್, ಹಬ್ಬದುಡುಗೊರೆ ಇತ್ಯಾದಿಗಳಿವೆ ಎಂದು ನಮ್ಮ ಜಾಹೀರಾತುದಾರ ಬಾತ್‌ಮೀದಾರರು ಹೇಳಿದ್ದಾರೆ.

ಬೊಗಳೂರು ವಿಶೇಷ ವರದ್ದಿ ಬರಲಿದೆ!

2010-10-09T12:45:00.002+05:30

ಎಲ್ಲ ಶಾಸಕರೂ ಪಕ್ಷಾತೀತವಾಗಿ ಒಂದು ನಿರ್ಧಾರಕ್ಕೆ ಬಂದಿದ್ದಾರೆ ಎಂಬುದು ನಿಮಗೆ ಗೊತ್ತೇ? ಬೊಗಳೂರಿಗೆ, ಬೊಗಳೆ ರಗಳೆ ಬ್ಯುರೋಗೆ ಗೊತ್ತು! ಅದೇನು ಗೊತ್ತೇ? ಸೋಮವಾರದ ಸಂಚಿಕೆಗಾಗಿ ನಿರೀಕ್ಷಿಸಬೇಡಿ, ನಿರೀಕ್ಷಿಸದೇ ನಿರಾಶರಾಗಬೇಡಿ!

ದಕ್ಷಿಣದಲ್ಲಿ ಕಾಲ್ ಸೆಂಟರ್: ಕಾಶ್ಮೀರದಲ್ಲಿ ಕಲ್ಲು ಸೆಂಟರ್ ಬೂಮ್!

2010-09-15T08:09:00.000+05:30

(ಬೊಗಳೂರು ಕಲ್ಲೇಟಿನಿಂದ ಎಚ್ಚೆತ್ತುಕೊಂಡ ಬ್ಯುರೋದಿಂದ)

ಬೊಗಳೂರು, ಸೆ.15- ದಕ್ಷಿಣ ಭಾರತ ಮತ್ತು ದೇಶ ವಿದೇಶಗಳಿಂದಲೂ ಜಮ್ಮು ಮತ್ತು ಕಾಶ್ಮೀರಕ್ಕೆ ಕಲ್ಲುಗಳು ಸರಬರಾಜಾಗುತ್ತಿವುದರಿಂದ ಕಾಶ್ಮೀರದ ವಾಣಿಜ್ಯೋದ್ಯಮ ಮತ್ತು ಪ್ರವಾಸೋದ್ಯಮ ಬೆಳೆಯುತ್ತಿದ್ದು ಉತ್ತಮ ಬೆಳವಣಿಗೆಯಾಗಿದೆ ಎಂದು ಕೇಂದ್ರದ ಉಪ (UPA) ಸರಕಾರದ ನಿಧಾನಿಗಳು ಘೋಷಿಸಿದ್ದಾರೆ.

ಕಲ್ಲುಗಳು ಹೆಚ್ಚು ಹೆಚ್ಚಾಗಿ ಬಂದು ಬೀಳುತ್ತಿರುವುದರಿಂದ, ಈ ಕಲ್ಲುಗಳ ಮಾ(ತೂ)ರಾಟದಿಂದ ಜನರ ಜೀವನ ಮಟ್ಟ ಸುಧಾರಿಸಿದೆ. ಅವರು ಬಾಂಬ್, ಗುಂಡಿನ ದಾಳಿಗಳನ್ನೆಲ್ಲಾ ಬದಿಗಿಟ್ಟು, ಕಲ್ಲಿನ ಉದ್ಯಮ ಆರಂಭಿಸಿರುವುದು ಹೊಸ ಶಕೆಗೆನಾಂದಿ ಎಂದು ವರದ್ದಿಗಾರರೊಂದಿಗೆ ಮಾತನಾಡುತ್ತಿದ್ದ ಉಪ ನಿಧಾನಿ ಹೇಳಿದರು.

ಕಾಶ್ಮೀರದಲ್ಲಿ ನಡೆಯುತ್ತಿರುವ ಗಲಭೆ, ಹಿಂಸಾಚಾರಗಳಲ್ಲಿ ಪಾತಕಿಸ್ತಾನದ ಕೈವಾಡವಿರುವುದು ಸಾಧ್ಯವೇ ಇಲ್ಲ, ನಾವು ಆಗಾಗ್ಗೆ ಪಾತಕಿಸ್ತಾನದ ಬಳಿಗೆ ಹೋಗಿ ಮಾತುಕತೆ ನಡೆಸಿ ಬರುತ್ತಿದ್ದೇವೆ. ಅಲ್ಲಿ ಯಾವತ್ತೂ ತಲೆ ಎತ್ತದೆ, ಇಲ್ಲಿ ಬಂದಾಗಲೂ ತಲೆ ತಗ್ಗಿಸಿಯೇ ಇರುತ್ತೇವೆ. ನಾವು ಇಷ್ಟು ದಯನೀಯ ಮತ್ತು ವಿಧೇಯ ದೃಷ್ಟಿಕೋನ ಹೊಂದಿರುವಾಗ ಪಾತಕಿಸ್ತಾನೀಯರು ನಮ್ಮ ಮೇಲೆ ಆಕ್ರೋಶಗೊಳ್ಳುವುದಾದರೂ ಹೇಗೆ ಸಾಧ್ಯ ಎಂದವರು ಪ್ರಶ್ನಿಸಿದ್ದಾರೆ.

ಇದೀಗ ಕಾಶ್ಮೀರದಲ್ಲಿ ಲೋಡುಗಟ್ಟಲೆ ಕಲ್ಲುಗಳು ಬಂದು ಬೀಳುತ್ತಿವೆ. ಹೀಗಾಗಿ ಅಲ್ಲಿ ಹಿಮಪಾತ ಜೋರಾಗಿ, ಮಳೆ ಸುರಿದು ಪ್ರವಾಹ ಬರುವುದೆಲ್ಲಾ ಸಾಧ್ಯವಾಗದ ಮಾತು. ಯಾಕೆಂದರೆ ಹಳ್ಳ ದಿಣ್ಣೆಗಳೆಲ್ಲವೂ ಈಗಾಗಲೇ ಕಲ್ಲುಗಳಿಂದ ತುಂಬಿ ಹೋಗಿದ್ದು, ನೀರು ಕೂಡ ಕಾಶ್ಮೀರದಿಂದ ಮಳೆಯ ಕೊರತೆಯಿಂದ ಬಳಲುತ್ತಿರುವ ಭಾರತದ ಕೆಳ ಭಾಗಕ್ಕೆ ಸರಾಗವಾಗಿ ಹರಿಯುತ್ತದೆ. ಇದು ಬಹೂಪಯೋಗಿ ಯೋಜನೆ ಎಂದವರು ಘೋಷಿಸಿದ್ದಾರೆ.

ಅಂತೆಯೇ, ಗೀಲಾನಿ ಕರೆ ನೀಡಿರುವಂತೆ ಹಗಲು ಕಲ್ಲು ಹೊಡೆದು, ರಾತ್ರಿ ಕೆಲಸ ಮಾಡುವುದು ಹೆಚ್ಚಾಗಿರುವುದರಿಂದಾಗಿ ಜನಸಂಖ್ಯೆಯೂ ನಿಯಂತ್ರಣದಲ್ಲಿರುತ್ತದೆ. ಭಾರತದ ಶಿರೋಭಾಗವು ಜನಸಂಖ್ಯಾ ಸ್ಫೋಟದಿಂದಾಗಿ ಹೆಚ್ಚು ಭಾರವಾಗಿ, ಒಂದು ಭಾಗಕ್ಕೆ (ಬಲಭಾಗ -ಪಾಕಿಸ್ತಾನ ಅಥವಾ ಎಡಭಾಗ - ಚೀನಾದತ್ತ) ವಾಲುವುದಕ್ಕೂ ಕಾರಣವಾಗುತ್ತಿತ್ತು. ಇದೀಗ ಈ ವಾಲುವಿಕೆಯ ಸಮಸ್ಯೆಗೆ ಆಟೋಮ್ಯಾಟಿಕ್ ಪರಿಹಾರ ದೊರೆತಿದೆ ಎಂದು ಎಂದಿರನ್ (ತಮಿಳಿನಲ್ಲಿ ರಜನಿಕಾಂತ್ ಅವರ ಹೊಸ ಚಿತ್ರ ರೋಬೋಟ್ ಎಂದರ್ಥ) ಖ್ಯಾತಿಯ ಮಾನ್ಯ ಮನಮೋಹಕ ಸಿಂಗರು ತಿಳಿಸಿದ್ದಾರೆ.

ಕೇಂದ್ರದಲ್ಲಿ ಸರಕಾರ ಸ್ಥಗಿತವಾಗಿದೆ, ಸರಕಾರ ಇದೆಯೇ ಇಲ್ಲವೇ ಎಂಬುದೇ ತಿಳಿಯುತ್ತಿಲ್ಲ ಎಂಬ ಪ್ರತಿಪಕ್ಷಗಳ ಕೂಗಿಗೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿರುವ ಅವರು, ಕಳೆದ ಆರು ವರ್ಷದಿಂದ ಆ ಕುರ್ಚಿಯ ಮೇಲೆ ಕೂತಿದ್ದೇವೆ. ನಿಮಗೇನೂ ಕಾಣಿಸುತ್ತಿಲ್ಲವೇ ಎಂದು ಪ್ರಶ್ನಿಸಿದರು.

ಅಷ್ಟು ಮಾತ್ರವಲ್ಲದೆ, ಕಾಶ್ಮೀರದಲ್ಲಿ ಉದ್ಯೋಗಾವಕಾಶಗಳೂ ಹೆಚ್ಚುತ್ತಿವೆ. ಯುವಕರೆಲ್ಲಾ ಕಲ್ಲು ಹೊಡೆಯುವ ಉದ್ಯೋಗಕ್ಕೇ ಜೋತು ಬೀಳುತ್ತಿದ್ದಾರೆ. ದಕ್ಷಿಣ ಭಾರತದಲ್ಲಿ ಕಾಲ್ ಸೆಂಟರ್‌ಗಳ ಉದ್ಯೋಗದ ಬೂಮ್ ಆಗಿರುವಂತೆಯೇ ಉತ್ತರದಲ್ಲಿ ಕಲ್ಲು ಸೆಂಟರ್‌ಗಳು ಹೆಚ್ಚಾಗುತ್ತಿದೆ ಎಂದು ನಿಧಾನಿಗಳು ಹರ್ಷ ವ್ಯಕ್ತಪಡಿಸಿದರು.

ನಕ್ಸಲರ ಅಟ್ಟಹಾಸ, ಕಾಶ್ಮೀರದಲ್ಲಿ ಪ್ರತ್ಯೇಕತಾವಾದಿಗಳ ದಾಂಧಲೆ, ದೇಶದ ಎಲ್ಲೆಡೆ ಭಯೋತ್ಪಾದಕರ ಹಾವಳಿ ಮುಂತಾದ ಆಂತರಿಕ ಭದ್ರತೆಗೆ ಸಂಬಂಧ ಪಟ್ಟ ವಿಷಯಗಳಲ್ಲಿ ನೀವೇಕೆ ಮೂಗು ತೂರಿಸುತ್ತಿಲ್ಲ, ಮೌನವಾಗಿದ್ದೀರಲ್ಲಾ ಎಂದು ಬೊಗಳೆ ಬ್ಯುರೋ ವರದ್ದಿಗಾರರು ಕೇಳಿದಾಗ, ಯಂತ್ರಮಾನವರಂತೆ ಒಂದು ಕೈ ಮಾತ್ರ ಆಡಿಸುತ್ತಾ ಉತ್ತರಿಸಿದ ನಿಧಾನಿಗಳು, ಬೆಚ್ಚಿ ಬಿದ್ದಂತೆ ಈ ಕೆಳಗಿನಂತೆ ಉತ್ತರಿಸಿದರು:

"ಏನು? ಮೂಗು ತೂರಿಸುತ್ತಿಲ್ಲವೇ? ನಮ್ಮ ಮನೆ ಸಚಿವರಾಗಿರುವ ಪೀಚಿ ದಂಬರಂ ಅವರು ಆಗಾಗ್ಗೆ ಹೇಳಿಕೆ ಕೊಡುತ್ತಿದ್ದಾರೆ. ಅವರಿಗೆ ಹೇಳಿಕೆ ನೀಡಲು ನಮ್ಮ ಅಧಿನಾಯಕಿ ಕೂಡ ಆಗಾಗ್ಗೆ ಸೂಚನೆ ನೀಡುತ್ತಿರುತ್ತಾರೆ. ಅವರ ಮೂಗು ಸಣ್ಣದಿರುವುದರಿಂದ ಅವರು ಮೂಗು ತೂರಿಸುತ್ತಿರುವುದು ನಿಮಗೆ ಕಾಣಿಸುತ್ತಿಲ್ಲ ಅಷ್ಟೇ. ಒಮ್ಮೆ ಸೂಕ್ಷ್ಮದರ್ಶಕ ಯಂತ್ರ (ಮೈಕ್ರೋಸ್ಕೋಪ್) ಬಳಸಿ ನೋಡಿ" ಎಂದು ಬೊಗಳೆ ಬ್ಯುರೋದವರಿಗೇ ಉಪದೇಶ ನೀಡಿದರು.

(ಹಲವು ದಿನಗಳಿಂದ ಕಲ್ಲೇಟಿನಿಂದ ತಲೆಮರೆಸಿಕೊಳ್ಳಬೇಕಾದ ಬೊಗಳೂರು ಏಕಸದಸ್ಯ ಬ್ಯುರೋದ ಸದಸ್ಯರು, ದಿಢೀರ್ ಆಗಿ ತಲೆಗೇ ಏಟು ಬಿದ್ದಿದ್ದರಿಂದ ಎಚ್ಚೆತ್ತುಕೊಂಡು ಈ ವರದ್ದಿ ಕಳುಹಿಸಿದ್ದಾರೆ. -ಸಂ)

ಸಗಣಿಗಾರಿಕೆ ಅಕ್ರಮಗೊಳಿಸಲು ಆಗ್ರಹ

2010-08-03T08:48:00.000+05:30

(ಬೊಗಳೂರು ರದ್ದಿ ಸಹೋದರರ ಬ್ಯುರೋದಿಂದ)

ಬೊಗಳೂರು, ಜು. 02- ಬಳ್ಳಾರಿ ಗಣಿಗಾರಿಕೆಗೆ ಸಂಬಂಧಿಸಿದಂತೆ ಕಳೆದ ಅರುವತ್ತು ವರ್ಷಗಳಿಂದ ತೀವ್ರವಾಗಿ ಭೂಮಿ ಕೊರೆದು ಕೊರೆದು ದುಡ್ಡು ಮಾಡಿಕೊಂಡವರೆಲ್ಲಾ ಇದೀಗ ಪರಸ್ಪರ ಸಗಣಿ ಎರಚಾಡುತ್ತಿರುವ ಹಿನ್ನೆಲೆಯಲ್ಲಿ ಸಗಣಿಗಾರಿಕೆಯನ್ನು ಅಕ್ರಮಗೊಳಿಸಬೇಕು ಎಂದು ಬೊಗಳೂರು ಜನತೆ ಆಗ್ರಹಪಡಿಸಿದ್ದಾರೆ.

ಅವರು ಕಾಲಿನಲ್ಲಿ ನಡೆದು ನಡೆದು ಚಪ್ಪಲಿ ಸವೆಸಿದ್ದಕ್ಕೆ ಇವರು ತಲೆ ಬೋಳಿಸಿಕೊಂಡಿದ್ದಾರೆ. ಅವರು ಸಾಧನಾ ಸಮಾವೇಶ ಮಾಡಿದರೆ, ಇವರು ವೇದನಾ ಸಮಾವೇಶ ಮಾಡುತ್ತಾರೆ. ಅವರು ಉಗಿದದ್ದಕ್ಕೆ ಇವರು ನಾಲಿಗೆಯನ್ನೇ ಸಡಿಲಬಿಟ್ಟಿದ್ದಾರೆ. ಅವರು ತೊಡೆ ತಟ್ಟಿದ್ದಕ್ಕೆ ಇವರು ತೋಳು ತಟ್ಟುತ್ತಿದ್ದಾರೆ. ಹೀಗಿರುವಾಗ ರಾಜ್ಯದ ಅರಾಜಕೀಯ ಪರಿಸ್ಥಿತಿಯೇ ಅಲ್ಲೋಲಕಲ್ಲೋಲವಾಗುತ್ತಿರುವುದರಿಂದಾಗಿ ಎಚ್ಚೆತ್ತ ಜನರು ಈ ಪ್ರಯತ್ನಕ್ಕೆ ಕೈಹಚ್ಚಿದ್ದಾರೆ ಎಂದು ಯಾವುದೇ ಮೂಲಗಳು ತಿಳಿಸದಿದ್ದರೂ ಬೊಗಳೂರು ಪತ್ರಿಕೆ ವರದ್ದಿ ಮಾಡಿದೆ.

ನಡೆದು ನಡೆದು ಕಾಲು ನೋವಾದಾಗ ಮತ್ತು ಬೊಜ್ಜು ಕರಗಿಸಿಕೊಳ್ಳುವ ನಿಟ್ಟಿನಲ್ಲಿ ಮಾತ್ರವೇ ಅಲ್ಲದೆ ಕರ್ನಾಟಕದ ಜಾನಪದ ಕಲೆಗಳನ್ನು ಇಡೀ ಲೋಕಮುಖಕ್ಕೆ ತೋರ್ಪಡಿಸಿಕೊಳ್ಳುವ ಪ್ರಯತ್ನವಾಗಿ ಈ ಆಪಾದಮಸ್ತಕ ಯಾತ್ರೆಯನ್ನು ಮಾಡಲಾಗುತ್ತಿದೆ ಎಂದು ಕೂಡ ಒಂದು ಕಡೆಯ ಮೂಲಗಳು ನಮ್ಮ ರದ್ದಿಗಾರರಿಗೆ ತಿಳಿಸಿದ್ದಾರೆ.

ಆದರೆ, ಇದರಿಂದಾಗಿ ಕರ್ನಾಟಕದ ಅರಾಜಕೀಯ ಸಂಸ್ಕೃತಿಯೇ ಲೋಕದಲ್ಲಿ ಬಟಾಬಯಲಾಗಿದೆ. ಹೀಗಾಗಿ ಇನ್‌ಕ್ರೆಡಿಬಲ್ ಕರ್ನಾಟಕ ಎಂಬ ಜಾಹೀರಾತನ್ನು ವಿದೇಶದಲ್ಲೆಲ್ಲಾ ಹಾಕಲು ನೆರವಾಗುತ್ತದೆ ಎಂದು ಕೂಡ ಆ ಕಡೆಯವರು ಸಮರ್ಥಿಸಿಕೊಂಡಿದ್ದಾರೆ.

ಈ ಕಡೆಯವರು ಮಾತನಾಡಿ, ರಾಜ್ಯದಲ್ಲಿ ಹಬ್ಬಿಕೊಂಡಿರುವ ಗಿಡವನ್ನು ಬೇರು ಸಹಿತ ಕಿತ್ತು ಹಾಕುತ್ತೇವೆ ಎಂದಿದ್ದರೆ, ಆ ಕಡೆಯವರು ನಾವು ಬುಡವನ್ನೇ ಅಲುಗಾಡಿಸಿ ಉದುರಿಸುತ್ತೇವೆ ಎಂದಿದ್ದಾರೆ. ಇಲ್ಲಿಗೀ ಕಥೆ ಮುಗಿಯಲಿಲ್ಲ. ಮುಂದುವರಿಯುತ್ತಿದೆ.

ಓರೆಯಾಗಿ ವಾಲಿದ ಭೂಮಿ: ಬೊಗಳೂರಿನಲ್ಲಿ ಆತ್ಮಹತ್ಯೆ ಹೆಚ್ಚಳ!

2010-06-24T08:41:00.004+05:30

[ಬೊಗಳೂರು ಹೃದಯಭಗ್ನ ಬ್ಯುರೋದಿಂದ]

ಬೊಗಳೂರು, ಜೂ.24- ಬೊಗಳೂರಿನ ಒಂದು ಭಾಗದಲ್ಲೇ ಭೂಬ್ಸ್‌ಕಂಪನ ಆಗಿರುವುದರಿಂದಾಗಿ, ಇಡೀ ಜಗತ್ತೇ ಮತ್ತೊಂದಿಷ್ಟು ಡಿಗ್ರಿ ಓರೆಯಾಗಿ ವಾಲಿರುವ ಸಂಗತಿ ಬೆಳಕಿಗೆ ಬಂದ ತಕ್ಷಣವೇ, ಇಂದೇನು Barking News? ಅಂತ ಮೂಗಿನ ಮೇಲೆ ಬೆರಳಿಟ್ಟ ಬೊಗಳೆ ರಗಳೆ ಬ್ಯುರೋಗೆ ಕೊನೆಗೂ ಹಾರ್ಟು ಬ್ರೇಕಿಂಗ್ ಸುದ್ದಿ ಸಿಕ್ಕಿದೆ ಎಂದು ಪ್ರತಿಸ್ಪರ್ಧಿ ಪತ್ರಿಕೆಗಳಾದ ಟೈಮ್ಸ್ ಆಫ್ ಬೊಗಳೂರು ಮುಂತಾದವುಗಳಲ್ಲಿ ವರದ್ದಿಯಾಗಿದೆ.

ಈ ರೀತಿ ಭೂಮಿ ಓರೆಯಾಗುವುದಕ್ಕೆ ಕಾರಣವೆಂದರೆ ಬೊಗಳೂರಿನ ಜನಸಂಖ್ಯೆಯಲ್ಲಿ ದಿಢೀರ್ ಕುಸಿತ ಕಂಡುಬಂದಿರುವುದು. ಈ ಸುಳಿವು ಸಿಕ್ಕ ತಕ್ಷಣವೇ ಬೊಗಳೂರು ಏಕಸದಸ್ಯ ಬ್ಯುರೋದ ಸರ್ವ ಸದಸ್ಯರೂ ಕ್ಷಿಪ್ರ ಸಮೀಕ್ಷೆಯೊಂದನ್ನು ನಡೆಸಿ, ಯುವ ಜನಾಂಗದ ಅದರಲ್ಲೂ ಯುವಕರ ಸಂಖ್ಯೆಯಲ್ಲಿ ಭಾರೀ ಕುಸಿತ ಕಂಡುಬಂದಿದೆ ಎಂದು ತಿಳಿದುಕೊಳ್ಳಲಾಯಿತು.

ಹೀಗೆ ಸಮೀಕ್ಷೆ ಮಾಡಲು ತೆರಳಿದಾಗ ಶಾಲಾ-ಕಾಲೇಜುಗಳು ಮುಂತಾದೆಡೆ, ಪಾರ್ಕುಗಳಲ್ಲಿ, ಬೀಚುಗಳಲ್ಲಿ ಇತ್ಯಾದಿ ಕಡೆಗಳಲ್ಲಿ ಸಾಕಷ್ಟು ಹಗ್ಗಗಳು, ನೇಣುಗಳು, ಟಿಕ್-20ಗಳು, ಫಾಲಿಡಾಲುಗಳು, ಫೆರಡಾನ್‌ಗಳು ಮುಂತಾದ ಬಾಟಲಿಗಳು ಪತ್ತೆಯಾಗಿವೆ. ಹೀಗಾಗಿ ಇದು ಖಂಡಿತಾ ಆತ್ಮಹತ್ಯೆಗಳ ಪರಿಣಾಮ ಎಂಬುದನ್ನು ಕಂಡುಕೊಳ್ಳಲಾಯಿತು.

ಎಲ್ಲಾದಕ್ಕೂ ಒಂದು ಕಾರಣವಿದ್ದೇ ಇರುತ್ತದೆ ಎಂಬ ಲೋಕ ನಿಯಮವನ್ನು ಪರಿಗಣನೆಗೆ ತೆಗೆದುಕೊಂಡು ಮತ್ತು ಪ್ರತಿಯೊಂದು ಕ್ರಿಯೆಗೂ ಪ್ರತಿಕ್ರಿಯೆಯೊಂದು ಇರುತ್ತದೆಂಬ ಓಲ್ಡ್‌ಟನ್ ನಿಯಮವನ್ನೂ ಪರಿಗಣನೆಗೆ ತೆಗೆದುಕೊಂಡು, ಅದನ್ನು ನಂಬಿ ತನಿಖೆ ಮುಂದುವರಿಸಿದಾಗ ಕಾಲಿಗೆ ಎಡತಾಕಿದ್ದು ಈ ಸುದ್ದಿ. ಮಾದಕ ನಟಿ ನಮಿತಾ ಇನ್ನು ಸೆಕ್ಸೀ ಪಾತ್ರಗಳಲ್ಲಿ ನಟಿಸೋದಿಲ್ಲವೆಂಬ ಸುದ್ದಿ ಈ ಯುವಜನಾಂಗದ ಹೃದಯಕ್ಕೆ ಕೊಳ್ಳಿ ಇಕ್ಕಿದ್ದು, ಕೆಲವರ ಹೃದಯವೇ ಒಡೆದು ಚೂರು ಚೂರಾಗಿದೆ. ಆ ಚೂರುಗಳನ್ನು ಗೂಗಲ್‌ನಲ್ಲಿ ಹುಡುಕಿದರೂ ಪತ್ತೆ ಹಚ್ಚಿ ಜೋಡಿಸಲಾಗುತ್ತಿಲ್ಲ ಎಂಬುದನ್ನು ಅನ್ವೇಷಿ ನೇತೃತ್ವದ ಬ್ಯುರೋ ತಪಾಸಣೆ ಮಾಡಿ ವಲ್ಲಿ ವರದ್ದಿ ತಂದು ಸುರಿದಿದೆ.

ಟಾಯ್ಲೆಟ್ ಪೇಪರ್ ಕೊರತೆ ನೀಗಿಸಲು ಪಾಕಿಗೆ ಸಾಕ್ಷ್ಯಾಧಾರ!

2010-06-22T08:28:00.002+05:30

[ಬೊಗಳೂರು Dossier ಬ್ಯುರೋದಿಂದ]

ಬೊಗಳೂರು, ಜೂ.21- ಪಾಕಿಸ್ತಾನಕ್ಕೆ ಭಾರತವು ಪದೇ ಪದೇ ಇಂಗ್ಲಿಷಿನಲ್ಲಿ ದೋಸೆಗಳು ಎಂದು ಕರೆಯಲಾಗುತ್ತಿರುವ ಸಾಕ್ಷ್ಯಾಧಾರ ದಾಖಲೆ ಪತ್ರಗಳನ್ನು ಕಳುಹಿಸುತ್ತಿರುವುದಕ್ಕೆ ಹಾಗೂ ಅದು ಕೂಡ ಪದೇ ಪದೇ "ಇದು ಸಾಲುತ್ತಿಲ್ಲ, ಇದು ಸಾಲುತ್ತಿಲ್ಲ" ಎಂದೆಲ್ಲಾ ಬೊಬ್ಬೆ ಹೊಡೆಯುತ್ತಿರುವುದಕ್ಕೆ ಕಾರಣವೇನೆಂಬುದನ್ನು ಪತ್ತೆ ಹಚ್ಚಲಾಗಿದೆ.

ಪಾತಕಿಸ್ತಾನದಲ್ಲಿ ಉಗ್ರಗಾಮಿ ಜನಾಂಗೀಯರ ಹಾವಳಿ ಹೆಚ್ಚಾಗಿರುವುದರಿಂದ ಅಲ್ಲಿ ಮನುಷ್ಯ ಜನಾಂಗೀಯರನ್ನು ಹುಡುಕುವುದೇ ಕಷ್ಟವಾಗಿಬಿಟ್ಟಿದೆ. ಅಲ್ಲಿರುವವರೆಲ್ಲರೂ ಶಿಲಾಯುಗದ ಜೀವನ ನಡೆಸುತ್ತಿದ್ದಾರೆ. ಹೀಗಾಗಿ ಅವರಿಗೆ ನಿಸರ್ಗದ ಕರೆ ಬರುವುದು ಕೂಡ ಹೆಚ್ಚಾಗುತ್ತಿದೆ. ಪರಿಸರ ಪರಿಶುದ್ಧತೆಗಾಗಿ ನೀರಿನ ಕೊರತೆಯೂ ಇದೆ. ಹೀಗಾಗಿ ಅವರಿಗೆಲ್ಲರಿಗೂ ಟಾಯ್ಲೆಟ್ ಪೇಪರುಗಳು ಲೋಡುಗಟ್ಟಲೆ ಭಾರೀ ಪ್ರಮಾಣದಲ್ಲಿ ಬೇಕಾಗಿದೆ ಎಂಬುದನ್ನು ಪ್ರಾಥಮಿಕ ತನಿಖೆಯಲ್ಲಿ ಕಂಡುಕೊಳ್ಳಲಾಗಿದೆ.

ಪ್ರಾಥಮಿಕದ ಬಳಿಕ ದ್ವಿತೀಯ ಹಂತದ ತನಿಖೆ ಕೈಗೊಳ್ಳಲಾಯಿತು. ಈ ಟಾಯ್ಲೆಟ್ ಪೇಪರ್ ಕೊರತೆಗೂ, ಭಾರತವು ರಾಶಿ ರಾಶಿ ದಾಖಲೆ ಪತ್ರಗಳನ್ನು ಕಳುಹಿಸುತ್ತಿರುವುದಕ್ಕೂ ಏನಾದರೂ ಸಂಬಂಧವಿದೆಯೇ ಎಂಬುದು ಈ ತನಿಖೆಯ ಹಿಂದಿನ ಉದ್ದೇಶವಾಗಿತ್ತು. ಹೌದು! ಸಂಬಂಧ ಇದೆ ಎಂಬುದು ಬ್ರೇಕ್ ಆಗಿರುವ ಸುದ್ದಿ ಮತ್ತು ರದ್ದಿಯೂ ಹೌದು.

ಭಾರತಕ್ಕೆ ಕನಿಕರ ಯಾವಾಗಲೂ ಜಾಸ್ತಿಯೇ. ಪಾಕಿಸ್ತಾನವು ಕಳೆದ ಹಲವಾರು ವರ್ಷಗಳಿಂದ ಮತ್ತು ಅದಕ್ಕೂ ಮೊದಲಿನಿಂದಲೇ, "ಸಾಕ್ಷ್ಯಾಧಾರ ಕೊಡಿ ಕೊಡಿ" ಅಂತ ಕೇಳುತ್ತಲೇ ಇದೆ... ಪಾಪ, ಅಲ್ಲಿನ ಪರಿಸ್ಥಿತಿಯನ್ನೂ ಅರ್ಥ ಮಾಡಿಕೊಳ್ಳಬೇಕು. ಅಲ್ಲಿಗೆ ಕಳುಹಿಸಿದ ದಾಖಲೆಗಳು ಹೇಗೂ ಟಾಯ್ಲೆಟ್ ಪೇಪರ್ ರೂಪದಲ್ಲೇ ಬಳಕೆಯಾಗುತ್ತಿವೆ. ಹೀಗಾಗಿ ಅದು ಕೇಳುತ್ತಲೇ ಇರುವಾಗ, ನಾವು ಕೂಡ ಕೊಡುತ್ತಲೇ ಇರೋಣ ಎಂಬ ಮಾನವೀಯ ದೃಷ್ಟಿಕೋನದಿಂದಾಗಿ ಈ ದಾಖಲೆ ವರದ್ದಿಗಳನ್ನು ಕಳುಹಿಸಲಾಗುತ್ತಿದೆ ಎಂದು ಬೊಗಳೆ ರಗಳೆ ಬ್ಯುರೋ ಪತ್ತೆ ಹಚ್ಚಿ ಬಿಟ್ಟಿದೆ.

ಮುಂಬೈ ಮೇಲೆ ದಾಳಿ ಮಾಡಿದ ಮತ್ತು ಈಗಲೂ ದೇಶಾದ್ಯಂತ ಅಲ್ಲಲ್ಲಿ ವಿಧ್ವಂಸಕ ಕೃತ್ಯಗಳನ್ನು ಮಾಡುತ್ತಲೇ ಇರುವವರ ಮೇಲೆ ಕ್ರಮ ಕೈಗೊಳ್ಳುವಂತೆ ಪಾಕಿಸ್ತಾನದ ಮೇಲೆ ಒತ್ತಡ ಹೇರಲು ವಿಫಲವಾದರೂ, ಅಲ್ಲಿಗೆ ರಾಶಿರಾಶಿಗಟ್ಟಲೆ ಲಾರಿಗಳಲ್ಲಿ, ರೈಲುಗಳಲ್ಲಿ ಕಳುಹಿಸುತ್ತಿರುವ ದಾಖಲೆಯ ದೋಸೆಯರ್(dossier)ಗಳನ್ನು ಹೇರಿ ಹೇರಿ ಒಂದಿಷ್ಟು ಒತ್ತಡ ಹೇರಬಹುದು ಎಂಬುದು ನಮ್ಮವರ ಲೆಕ್ಕಾಚಾರವಾಗಿತ್ತು ಎಂದು ನಮ್ಮ ಬಲ್ಲ ಮೂಲಗಳು ತಿಳಿಸಿವೆ.

ಶಾಲೆಯ ಭಯ: ಎವರೆಸ್ಟ್ ಹುಡುಗ್ರ ಎವರ್ ರೆಸ್ಟ್!

2010-06-17T08:55:00.000+05:30

[ಬೊಗಳೂರು ತನಿಖಾನ್ವೇಷಣಾ ಬ್ಯುರೋದಿಂದ]

ಬೊಗಳೂರು, ಜೂ.17- ಬೊಗಳೂರಿನ ಶಾಲೆಗಳಿಂದ ಮಕ್ಕಳು ಇತ್ತೀಚೆಗೆ ನಾಪತ್ತೆಯಾಗುತ್ತಿರುವ ಪ್ರಕರಣಗಳು ಹೆಚ್ಚಾಗತೊಡಗಿದ್ದು, ಶಾಲೆಗಳಲ್ಲಿ ಹಾಜರಾತಿ ತೀರಾ ಕುಸಿದುಬಿದ್ದಿರುವುದು ಸರಕಾರದ ಆತಂಕಕ್ಕೆ ಕಾರಣವಾಗಿದೆ. ಈ ಕುರಿತು ರಾಜ್ಯದ ಸರ್ವರನ್ನೂ ಶಿಕ್ಷಿಸುವ ಅಭಿಯಾನದ ಹೊಣೆ ಹೊತ್ತ ಶಿಕ್ಷಣ ಸಚಿವರು, ಬೊಗಳೂರು ಬ್ಯುರೋ ಸಂಪರ್ಕಿಸಿ ಮಾಹಿತಿ ನೀಡಿದ್ದಾರಲ್ಲದೆ, ತನಿಖೆಯನ್ನೂ ನಡೆಸುವಂತೆ ಆದೇಶಿಸಿದ್ದಾರೆ.

ಈ ಕುರಿತು ತನಿಖೆ ನಡೆಸಲು ಕನಿಷ್ಠ 26 ವರ್ಷಗಳಾದರೂ ಬೇಕು, ಅದಕ್ಕಿಂತ ಮೊದಲು ಬಾಲಕರು ನಾಪತ್ತೆಯಾಗಲು ಕಾರಣರಾದವರನ್ನು ಬಂಧಿಸಿದ ನಾಟಕವಾಡಿ, ಬಿಡುಗಡೆಗೊಳಿಸಿ ವಿಮಾನದಲ್ಲಿ ವಿದೇಶಕ್ಕೆ ಕಳುಹಿಸಿಕೊಡಬೇಕು... ಇತ್ಯಾದಿ ಫಾರ್ಮಾಲಿಟಿಗಳೆಲ್ಲಾ ಇವೆಯಲ್ಲಾ, ಅದೆಲ್ಲಾ ಆದ ಮೇಲೆ ನಾವು ತನಿಖೆ ಶುರು ಮಾಡುತ್ತೇವೆ ಎಂದು ಸರಕಾರಕ್ಕೆ ಭರವಸೆ ನೀಡಲಾಗಿದೆ.

ಇದಕ್ಕೆ ಸಚಿವರು ಒಪ್ಪಿದ ಬಳಿಕ ತನಿಖೆಯನ್ನು ತೀವ್ರಗತಿಯಲ್ಲೇ ಮುಂದುವರಿಸಲಾಯಿತು. ಹೀಗಾಗಿ ತಲೆಗೆ ಹೆಲ್ಮೆಟ್, ಬೆನ್ನಿಗೆ ಬಲುದೊಡ್ಡ ಗನ್ನಿ ಬ್ಯಾಗ್, ಅದರೊಳಗೆ ಪುಸ್ತಕಗಳ ರಾಶಿ, ಕೈಯಲ್ಲೊಂದು ಉದ್ದದ ಅಜ್ಜನ ಕೋಲಿನಂತಹ ಕೊಡೆ, ಓದಿ ಓದಿ ಹಾಳಾದ ಕಣ್ಣಿಗೆ ದಪ್ಪ ಗಾಜಿನ ಕನ್ನಡಕ, ಕಾಲಿಗೆ ಕರಿಬೂಟು, ಕೈಗೆ ಕೈಗವುಸು ಇತ್ಯಾದಿಗಳನ್ನೆಲ್ಲಾ ಧರಿಸಿಕೊಂಡು ನಮ್ಮ ಅನ್ವೇಷಣೆಯನ್ನು ಆರಂಭಿಸಲಾಯಿತು.

ಕನ್ಯಾಕುಮಾರಿಯಿಂದ ಅಭಿಯಾನ ಆರಂಭಿಸಿದ ಏಕಸದಸ್ಯ ಬ್ಯುರೋದ ಸಮಸ್ತ ಸಿಬ್ಬಂದಿಗಳೂ, ಮೇಲೆ ಮೇಲೆ ಇಂಚಿಂಚಾಗಿ ಶೋಧಿಸುತ್ತಾ ಹೊರಟು, "ಮದ್ಯ"ಪ್ರದೇಶದಲ್ಲಿ ಪೆಟ್ರೋಲ್ ಹಾಕಿಸಿಕೊಂಡು, ಅಲ್ಲಿಂದ ಮೇಲೇಳುತ್ತಿದ್ದ ಅನಿಲದ ವಾಸನೆಯನ್ನು ಆಘ್ರಾಣಿಸುತ್ತಾ, ಮುಂದುವರಿಯಲಾಯಿತು.

ಮೇಲಮೇಲಕ್ಕೆ ಹೋಗಿ ಹೋಗಿ ತಲುಪಿದ್ದು ಎವರೆಸ್ಟ್ ಶಿಖರದ ತುತ್ತ.... ತುದಿಗೆ ಖಂಡಿತಾ ಅಲ್ಲ, ಅದರ ಬುಟ್ಟ-ಬುಡಕ್ಕೆ! ಅಲ್ಲಿ ಹೋಗಿ ಆಯಾಸದಿಂದ ಬಿದ್ದವರು ಮೇಲಕ್ಕೆ ನೋಡಿದಾಗ... ಕಂಡಿದ್ದೇನು...! ಎಲ್ಲ ಮಕ್ಕಳೂ ಅದರ ತುತ್ತ ತುದಿಯಲ್ಲಿದ್ದಾರೆ!

ಕೂಡಲೇ ನಾವು ಕೂಡ ಮೇಲೇರಲು ಪ್ರಯತ್ನಿಸಿ ಪ್ರಯತ್ನಿಸಿ ವಿಫಲವಾದಾಗ, ಅಲ್ಲಿಂದಲೇ ಸಂದರ್ಶನಕ್ಕೆ ಕೋರಿಕೊಳ್ಳಲಾಯಿತು. ಬೇಗ ಮರಳಿ ಬನ್ನೀ, ನಿಮ್ಮನ್ನು ಎಲ್ಲರೂ ಕೇಳುತ್ತಿದ್ದಾರೆ ಎಂದು ಅವರಿಗೆ ಹೇಳಲಾಯಿತು.

ಅದಕ್ಕೆ, ಈಗಾಗಲೇ 13 ವಯಸ್ಸಿನಲ್ಲೇ ಎವರೆಸ್ಟ್‌ನಲ್ಲಿ ಏರಿ, ಇತಿಹಾಸ ಸೃಷ್ಟಿಸಿದ ಬಾಲಕರೆಲ್ಲರೂ, "ನಾವು ಖಂಡಿತಾ ಬರೋದಿಲ್ಲ, ಇಲ್ಲಾದರೆ ನಮಗೆ ಹೋಂ ವರ್ಕ್ ಒತ್ತಡ ಇಲ್ಲ, ಶಾಲೆಗೆ ಹೋಗಲೇಬೇಕಿಲ್ಲ, ಮಣಭಾರದ ಸ್ಕೂಲ್ ಬ್ಯಾಗ್ ಹೊರಬೇಕಿಲ್ಲ. ಮನೆಗೆ ಬಂದ ತಕ್ಷಣ ಟ್ಯೂಷನ್ ಕ್ಲಾಸಿಗೆ, ಸಂಗೀತ ಕ್ಲಾಸಿಗೆ, ನಾಟ್ಯ ಕ್ಲಾಸಿಗೆ, ಇಂಡಿಯನ್ ಐಡಲ್ ಕ್ಲಾಸಿಗೆ ಅಥವಾ ರಿಯಾಲಿಟಿ ಶೋಗಳಿಗೆ, ಲೈವ್ ಶೋಗಳಿಗೆ ಹೋಗು ಎಂಬ ಒತ್ತಡ ಇರಲ್ಲ. ನಾವು ಇಲ್ಲೇ ಆರಾಮವಾಗಿದ್ದೇವೆ. ಚೆಂಡಾಟ ಆಡಿಕೊಂಡು ಎವರೆಸ್ಟ್‌ನಲ್ಲಿಯೇ ಎವರ್ ರೆಸ್ಟ್ ತೆಗೆದುಕೊಳ್ಳಲು ನಿರ್ಧರಿಸಿದ್ದೇವೆ" ಎಂದುಬಿಟ್ಟರು.

ಇಲ್ಲೇ ಇದ್ದರೆ, ಜಗತ್ತಿನಲ್ಲಿ, ನಮ್ಮ ಭಾರತದಲ್ಲಿ ಏನೆಲ್ಲಾ ಆಗುತ್ತದೆ ಎಂಬುದನ್ನು ಒಂದಿಷ್ಟು ಬಗ್ಗಿ ನೋಡಿಬಿಟ್ಟರೆ ಎಲ್ಲವೂ ತಿಳಿಯುತ್ತದೆ ಎಂದು ಆ ಎವರೆಸ್ಟ್ ಏರಿದ ಅತಿ ಕಿರಿಯನೆಂಬ ಸಾಧನೆ ಮಾಡಿದ ಮಗು ಹೇಳಿದ ತಕ್ಷಣವೇ, ಅಲ್ಲಿಂದ ಧಢಾರನೆ ಬಿದ್ದ ಬೊಗಳೆ ರಗಳೆ ಬ್ಯುರೋದ ಸಮಸ್ತ ಸಿಬ್ಬಂದಿಗಳು ಎದ್ದದ್ದು ಬೊಗಳೂರಿನಲ್ಲಿಯೇ! ಮತ್ತು ಆ ಮಕ್ಕಳಿಗೆ ಎವರೆಸ್ಟ್ ಏರುವುದನ್ನೇ ನಿಷೇಧಿಸಿರುವ ಚೀನಾ ಸರಕಾರದ ನಿರ್ಧಾರದಲ್ಲಿ ಬೊಗಳೆ ರಗಳೆ ಬ್ಯುರೋದ ಕೈವಾಡವಿಲ್ಲ ಎಂಬುದನ್ನು ತಿಳಿಹೇಳುವಲ್ಲಿ ಸಾಕುಬೇಕಾಯಿತು!

ನೆರೆ ಬಂದಿದ್ದೆಲ್ಲಿಂದ?: ತನಿಖೆಗೆ ಕೇಡೀಶಿ ಆಗ್ರಹ!

2010-06-15T14:41:00.000+05:30

(ಬೊಗಳೂರು ನೆರೆ ಪ್ರವಾಹ ಬ್ಯುರೋದಿಂದ)

ಬೊಗಳೂರು, ಜೂ.15- ಬೊಗಳೂರು ಇರುವ ರಾಜ್ಯವು ಹಿಂದೆಂದೂ ಕಂಡು ಕೇಳರಿಯದ ನೆರೆ ಪ್ರವಾಹದ ಸಂದರ್ಭದಲ್ಲಿ ಆಡಳಿತಾರೂಢ ಬಿಜೆಪಿ ಪಕ್ಷದೊಳಗೆ ಭಿನ್ನಮತ ಹೊಗೆಯಾಡಿ, ಹೊಗೆಯಾಡಿ, ಗಣಿಧಣಿಗಳು ಒಬ್ಬ ಮಹಿಳಾ ಮಂತ್ರಿಯನ್ನು ತೆಗೆದುಹಾಕಲು ಮಾಡಿದ ಪ್ರಯತ್ನವಿದೆಂದು ತಿಳಿದು ಎಲ್ಲವೂ ಶಮನವಾಗಿದೆ ಎಂದು ಅಂದುಕೊಳ್ಳುತ್ತಿರುವಾಗ, ಅದೇ ನೆರೆ ಪ್ರವಾಹದ ಕೊಚ್ಚೆಯಲ್ಲಿ ವಿರೋಧ ಪಕ್ಷ ಕಾಂ-ಗೆಸ್ ಕೂಡ ಸಿಲುಕಿಬಿಟ್ಟಿದೆ.

ನೆರೆ ಪರಿಹಾರಕ್ಕಾಗಿ ಜನರಿಂದ ಸಂಗ್ರಹಿಸಿ ಹಣವನ್ನು ಗುಳುಂ ಅಂತ ಸದ್ದು ಬಾರದಂತೆಯೇ ನುಂಗಿರುವ ಆರೋಪಗಳು ನೂರಿಪ್ಪತ್ತೈದು ವರ್ಷ ಇತಿಹಾಸವಿರುವ ಪಕ್ಷವನ್ನು ಅಲುಗಾಡಿಸುತ್ತಿದ್ದು, ಈ ಬಗ್ಗೆ Conಗೆಟ್ಟಿರುವ ಪಕ್ಷದ ಮುಖ್ಯಸ್ಥರು ಇದೀಗ ಈ ಬಗ್ಗೆ ತನಿಖೆಯಾಗಲಿ ಎಂದು ಬೊಗಳೂರು ಬ್ಯುರೋಗೆ ಫೋನ್ ಮಾಡಿ ಒತ್ತಾಯಿಸಿದ್ದಾರೆ.

ಕೇಡೀಶಿ ಮತ್ತು ಡೇಶೀಪಿ ನಡುವಣ ಕಲಹದಿಂದಾಗಿಯೇ ಈ ಹಣ ದುರುಪಯೋಗ ಆಗಿದೆ ಎಂಬ ಮಾತುಗಳು ಕೇಳಿಬಂದಿದ್ದರಿಂದ ಬೊಗಳೂರು ಏಕಸದಸ್ಯ ಬ್ಯುರೋದ ಸರ್ವ ಸದಸ್ಯರೂ ಕಿವಿ ನಿಮಿರಿಸಿ ಈ ಫೋನ್ ಕರೆಗೆ ಓಗೊಟ್ಟಿದ್ದರು.

ಡೇಶೀಪಿ ಅವರು ಫೋನ್ ಮಾಡುತ್ತಾ, ಹಣ ಸಂಗ್ರಹಿಸಿದ್ದು ನಿಜ, ನಾವು ಜನರಿಂದ ಸಂಗ್ರಹಿಸಿದಹಣವನ್ನು (ನಮ್ಮ) ಜನರಿಗೇ ಕೊಟ್ಟಿದ್ದೇವೆ. ಅದರಲ್ಲೇನು ತಪ್ಪಿದೆ ಎಂದು ಕೇಳಿದರಲ್ಲದೆ, ಹಣ ದುರುಪಯೋಗವಾಗಿದ್ದು ಬಯಲಾಗಿದ್ದು ಹೇಗೆ ಎಂದು ತನಿಖೆ ಮಾಡಿಸುವಂತೆ ಹೈಕಮಂಗ್ ಜೊತೆ ಆಗ್ರಹಿಸುವುದಾಗಿ ಹೇಳಿದರು.

ಅವರ ಫೋನ್ ಕರೆಯನ್ನು ಕಿವಿಯಾಚೆ ಹಿಡಿದು, ಡೇಕೀಶಿ ಕರೆಯನ್ನು ಕೈಗೆತ್ತಿಕೊಳ್ಳಲಾಯಿತು. ಅವರು ಹೇಳಿದ್ದು: ನಮ್ಮಲ್ಲಿ ಹಣ ಸಂಗ್ರಹ ಮುಂಚಿನಿಂದಲೇ ಆಗುತ್ತಿತ್ತು. ಆದರೆ, ಹಣ ಸಂಗ್ರಹವಾದ ನಂತರ ಈ ನೆರೆ ಬಂದದ್ದು ಎಲ್ಲಿಂದ ಮತ್ತು ಅದು ಹೇಗೆ ಎಂಬುದೇ ತನಿಖೆಯಾಗಬೇಕು!

'ಕಂತ್ರಿ' ಎಂದು ಅವಮಾನ: ಡಾಗ್ ಸಂಘ ಪ್ರತಿಭಟನೆ

2010-06-07T08:14:00.001+05:30

(ಬೊಗಳೂರು ಗುಂಡುಹಾಕುವ ಬ್ಯುರೋದಿಂದ)

ಬೊಗಳೂರು, ಜೂ.7- ಅಂತಾರಾಷ್ಟ್ರೀಯ ಮಟ್ಟದಲ್ಲಿ ತಾವು ಸಿದ್ಧಿ-ಪ್ರಸಿದ್ಧಿ ಗಳಿಸುತ್ತಿರುವಾಗ, ಹೆಸರಿಗೆ ಒಂದಿಷ್ಟು ಮಸಿ ಬಳಿಯಲು ಪ್ರಯತ್ನಿಸುತ್ತಿರುವ ಬೆಂಗಳೂರು ಡಿಜಿಪಿ ಅಜಯ್ ಕುಮಾರ್ ಸಿಂಗ್ ಅವರ ವರ್ತನೆಯನ್ನು ಖಂಡಿಸಿರುವ ಬೊಗಳೂರಿನ ನಾಯಿಗಳು, ಮರ್ಯಾದೆ ಮಣ್ಣುಪಾಲಾಯ್ತು ಎಂದು ಗುಲ್ಲೆಬ್ಬಿಸಿವೆ.

ಪೊಲೀಸರು, ಕೇಂದ್ರ ಗೃಹ ಸಚಿವರು, ರಾಜ್ಯದ ಮಂತ್ರಿಗಳು, ಮುಖ್ಯಮಂತ್ರಿಗಳೆಲ್ಲರೂ, ಶ್ರೀಶ್ರೀ ಅವರ ಮೇಲೆ ದಾಳಿ ಉದ್ದೇಶವಾಗಿರಲಿಲ್ಲ ಎಂದು ಒತ್ತಿ ಒತ್ತಿ ಹೇಳುತ್ತಿರುವಂತೆಯೇ, ಇಲ್ಲ, ಇಲ್ಲ, ಇದು ತನ್ನ ಮೇಲೆಯೇ ದಾಳಿ ನಡೆದದ್ದು ಎಂದು ಗುರೂಜಿವರ್ಯರು ಹೇಳುತ್ತಲೇ ಬಂದಿದ್ದರು. ಇದೀಗ ಪೊಲೀಸರು ತನಿಖೆ, ಪ್ರಯೋಗಾಲಯ, ಎಂದೆಲ್ಲಾ ಸುತ್ತಾಡಿ, ಒಂದಷ್ಟು ಗುಂಡುಗಳನ್ನು ಪತ್ತೆ ಹಚ್ಚಿ ತಾಳೆ ನೋಡಿ, ಇದು ನಾಯಿಗಳಿಗೆ ಹಾರಿಸಲಾದ ಗುಂಡು, ತಪ್ಪಾಗಿ ಶ್ರೀಶ್ರೀಗಳ ಅನುಯಾಯಿ ಮೇಲೆ ಬಿದ್ದಿದೆ ಎಂದು ಸಂಚೋದನೆ ಮಾಡಿ ಹೇಳಿದ್ದರು.

ಈ ಕುರಿತು ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಡಿಜಿಪಿ ಅಜಯ್ ಕುಮಾರ್ ಸಿಂಗ್ ಅವರು, ಬರೇ ನಾಯಿಗಳನ್ನು ಓಡಿಸಲು ಹಾರಿಸಿದ ಗುಂಡಾಗಿತ್ತದು ಎಂದು ಹೇಳಿದ್ದರೆ ನಾವು ತೆಪ್ಪಗಿರುತ್ತಿದ್ದೆವು, ಆದರೆ ಅವರು ಅದಕ್ಕೆ ಸೇರಿಸಿದ ಇನ್ನೊಂದು ಪದ 'ಕಂತ್ರಿ' ನಾಯಿ ಅಂತ. ಇದನ್ನೆಂದಿಗೂ ಸಹಿಸುವುದು ಸಾಧ್ಯವಿಲ್ಲ ಎಂದಿರುವ ನಾಯಿಗಳ ಸಂಘದ ಅಧ್ಯಕ್ಷ ಶ್ವಾನ ಕುಮಾರ್ ಅವರು, ಇದನ್ನು ಸಹಿಸುವುದು ತುಂಬಾ ಕಷ್ಟವಾಗುತ್ತಿದೆ, ನಮಗೆ ಬೊಗಳದೇ ಇರಲು ಆಗುತ್ತಲೇ ಇಲ್ಲ ಎಂದು ಅಲವತ್ತುಕೊಂಡಿದ್ದಾರೆ.

ಆದರೆ, ಅಂತಾರಾಷ್ಟ್ರೀಯ ಮಾಧ್ಯಮಗಳಿಗೆ, ತಮ್ಮ ಹೇಳಿಕೆಯನ್ನು ಭಾಷಾಂತರಿಸಿ ಇಂಗ್ಲಿಷಿನಲ್ಲಿ ಹೇಳುವಾಗ, ಸರಿಯಾಗಿಯೇ Country ನಾಯಿಗಳು ಅಂತ ಉಚ್ಚರಿಸಿದ್ದಾರೆ. ಇದು ನಮ್ಮ ದೇಶಭಕ್ತಿಯ ಸೂಚಕವೂ ಹೌದು. ಆದರೆ, ಸ್ಥಳೀಯ ಭಾಷೆಯಲ್ಲಿ, ಅಚ್ಚಕನ್ನಡದ ಪತ್ರಿಕೆಗಳವರಿಗೆ ಮಾಹಿತಿ ನೀಡುವಾಗ, ಕಂತ್ರಿ ಎಂಬ ಪದ ಪ್ರಯೋಗಿಸಿದ್ದರು ಎಂದು ಅವರು ದೂರಿದ್ದಾರೆ.

ಈ ಮಧ್ಯೆ, ಆಶ್ರಮದ ಪಕ್ಕದಲ್ಲಿದ್ದ ಫಾರ್ಮ್ ಹೌಸ್ ಮಾಲೀಕರು ನೀಡಿದ ಸ್ಪಷ್ಟನೆಗೂ ಈ ನಾಯಿಗಳು ಕಿಡಿ ಕಾರಿವೆ. "ತಾವು ಯಾರನ್ನೂ ಗುರಿಯಾಗಿರಿಸಿ ಗುಂಡಿನ ದಾಳಿ ನಡೆಸಿರಲಿಲ್ಲ" ಎಂದವರು ಒಂದು ಕಡೆ ಹೇಳಿದ್ದರು. ಇದನ್ನು ಖಂಡಿಸಿರುವ ಶ್ವಾನ್ ಕುಮಾರ್, ಇಲ್ಲ, ಇಲ್ಲ, ಖಂಡಿತಾ ಇದನ್ನು ನಮ್ಮನ್ನು ಗುರಿಯಾಗಿರಿಸಿಕೊಂಡು ಮಾಡಿದ ದಾಳಿ, ನಮಗೆ ರಕ್ಷಣೆ ಇಲ್ಲ, ಬೆಂಗಳೂರಲ್ಲಿ ಎಲ್ಲಿ ಹೋದರೂ ನಮಗೆ ಬಾಲ ಅಲ್ಲಾಡಿಸುವುದಕ್ಕೂ ಜಾಗ ಸಿಗುತ್ತಿಲ್ಲ. ಹೀಗಾಗಿ, ಖಂಡಿತಾ ಇದು ನಮ್ಮ ವಿರುದ್ಧ ಮಾಡಿರುವ ಸಂಚು ಎಂದು ಆರೋಪಿಸಿವೆ.

ಕುರಿ ಮೇಲೆ ನಮ್ಮ ಸಮುದಾಯದವರು ದಾಳಿ ಮಾಡಿದ್ದು ನಿಜ ಎಂಬುದನ್ನು ಒಪ್ಪಿಕೊಂಡ ಅವರು, ಹೀಗಿರುವಾಗ, ಅವರು ಬರೇ ಗಾಳಿಯಲ್ಲಿ ಗುಂಡು ಹಾಕುವುದು ಹೇಗೆ ಸಾಧ್ಯ? ಖಂಡಿತಾ ಈ ಹೇಳಿಕೆ ನೀಡುತ್ತಿರುವಾಗ ಅವರು ಗುಂಡು ಹಾಕಿರಲೇ ಬೇಕು. ನಮ್ಮನ್ನೇ ಗುರಿಯಾಗಿರಿಸಿಯೇ ಅವರು ಗುಂಡು ಹಾಕಿದ್ದು ಎಂದು ಆರೋಪಿಸಿದ್ದಾರೆ. ಈ ಬಗ್ಗೆ, ಆ ಬುಲೆಟ್ ನಮ್ಮನ್ನೇ ಗುರಿಯಾಗಿರಿಸಿ ಹೊರಬಂದಿರುವುದೇ ಅಲ್ಲವೇ ಎಂಬುದನ್ನು ತನಿಖೆ ನಡೆಸಲು ಐತಲಕಡಿ ಖ್ಯಾತಿಯ ಬುಲೆಟ್ ಪ್ರಕಾಶ್ ಅವರ ಮೊರೆ ಹೋಗುವುದಾಗಿಯೂ ಅವರು ಹೇಳಿದ್ದಾರೆ.

ಇದರೊಂದಿಗೆ, ಸಮೀಪದ ಫಾರ್ಮ್‌ಹೌಸ್ ಮಾಲೀಕರು ಕತ್ತಲಲ್ಲಿಯೇ ಗುಂಡು ಹಾಕಿದ್ದರೇ ಎಂಬುದರ ಕುರಿತೂ ತನಿಖೆ ನಡೆಸಬೇಕೆಂದು ಕೊಟ್ಟ ಕೊನೆಗೆ ಬೊಗಳೂರಿನ ಅಸತ್ಯಾನ್ವೇಷಿ ನೇತೃತ್ವದ ಏಕ ಸದಸ್ಯ ಬ್ಯುರೋದ ಸಮಸ್ತ ಸಿಬ್ಬಂದಿಗಳು ಆಗ್ರಹಿಸತೊಡಗಿದ್ದಾರೆ.

ಬೊಗಳೆ ಬ್ರೇಕ್: 'ಆಮ್' ಆದ್ಮೀಯಾದ ಮನಮೋಹಕ ಸಿಂಗ್

2010-05-27T12:49:00.002+05:30

(ಬೊಗಳೂರು ಪ್ರತಿ-ಭಟನಾ ಬ್ಯುರೋದಿಂದ)

ಬೊಗಳೂರು, ಮೇ 27- ಮನಮೋಹಕ ಸಿಂಗ್ ಅವರು ಯುಪಿಎ ಎರಡನೇ ಅವಧಿಯಲ್ಲಿ ಪ್ರಧಾನಿಯಾಗಿ ಒಂದು ವರ್ಷ ಕಳೆದಿದ್ದರೂ, ಚುನಾವಣಾ ಪ್ರಣಾಳಶಿಶುವಿನ ಬಿಡುಗಡೆ ವೇಳೆ ಮಾಡಿದ ವಾಗ್ದಾನದಲ್ಲಿ ಈಡೇರಿದ್ದೇನೂ ಕೇಳಿಬರುತ್ತಿಲ್ಲವಲ್ಲ ಎಂದು ಬೊಗಳೂರು ಮುಂದೆ ಪ್ರತಿಭಟನಾಕಾರರು ಜಮಾಯಿಸಿದಾಗ ಎಚ್ಚೆತ್ತ ಬೊಗಳೂರು ಸಿಬ್ಬಂದಿ, ಇದೀಗ ಈ ಪ್ರತಿಭಟನಾಕಾರರ ಬಾಯಿ ಮುಚ್ಚಿಸಲು ಅಸ್ತ್ರವೊಂದನ್ನು ಪತ್ತೆ ಹಚ್ಚಿದೆ.

ಬೆಲೆ ಏರಿಕೆ, ಎಷ್ಟೇ ಏರಿದರೂ ಬೆಲೆ ಇಳಿಯದ ಆಹಾರ ಪದಾರ್ಥಗಳು, ತರಕಾರಿಗಳು ಜನಸಾಮಾನ್ಯನಿಗೆ ತ್ರಾಸ ಕೊಡುತ್ತಿರುವ ಕುರಿತು ಇದ್ದೂ ಇಲ್ಲದಂತಿರುವ ವಿರೋಧ ಪಕ್ಷಗಳು ತಗಾದೆ ತೆಗೆದ ತಕ್ಷಣ, ಅವುಗಳ ಬಾಯಿ ಮುಚ್ಚಿಸಲಿಕ್ಕಾಗಿ ಒಂದಲ್ಲ ಒಂದು ಹೊಸ ಇಶ್ಯೂಗಳನ್ನು ಎಳೆದುಹಾಕಿಕೊಳ್ಳುತ್ತಾ, ರಕ್ಷಣಾ ಕವಚ ಸೃಷ್ಟಿಸಿಕೊಳ್ಳುತ್ತಾ, ಪ್ರತಿಪಕ್ಷಗಳ ಅಸ್ತಿತ್ವದ ಮೇಲೆಯೇ ಪ್ರಶ್ನಾರ್ಥಕ ಚಿಹ್ನೆ ಹಾಕಿರುವ ಮನಮೋಹಕ ಸಿಂಗ ಸರಕಾರದ ನೀತಿಯನ್ನೇ ಬೊಗಳೂರು ಬ್ಯುರೋ ಕೂಡ ಅನುಸರಿಸಿತು ಎಂದು ಹೇಳಲು ಯಾವುದೇ ದಾಕ್ಷಿಣ್ಯ ಇಲ್ಲವೆಂದೂ ಸ್ಪಷ್ಟಪಡಿಸಲಾಗುತ್ತಿದೆ.

ಕಾರಣವೆಂದರೆ, ಬೆಲೆ ಏರಿಕೆ ಬಗ್ಗೆ ಪ್ರತಿಪಕ್ಷಗಳು ಕೂಗಾಡತೊಡಗಿದಾಗ, ದಿಢೀರನೇ ಟೆಲಿಫೋನ್ ಕದ್ದಾಲಿಕೆ ವಿಷಯ ಹೊರ ಹಾಕಿ, ಅದರ ಬಗ್ಗೆ ಕೂಗಾಡುವಂತೆ ಮಾಡಲಾಗಿತ್ತು. ನಂತರ ದಿಢೀರನೇ ಅಣ್ವಸ್ತ್ರ ಮಸೂದೆಯ ಬತ್ತಳಿಕೆಯನ್ನು ಹೊರಗೆಳೆಯಲಾಯಿತು. ನಡುವೆಯೇ ಪುಣೆ ಸ್ಫೋಟ, ದಾಂತೇವಾಡ ನಕ್ಸಲರ ಅಟ್ಟಹಾಸ, ನಂತರ ಪಾಕಿಸ್ತಾನದ ತಗಾದೆ, ಹಫೀಜ್ ಸಯೀದ್ ಖುಲಾಸೆಯಿಂದಾಗಿ ನಮಗೆ ನಿರಾಶೆ ಮಾತ್ರ ಆಗಿದೆ ಎಂಬ ಹೇಳಿಕೆ, 2G ಸ್ಪೆಕ್ಟ್ರಮ್ ಹಗರಣ, ಫೋನ್ ಟ್ಯಾಪಿಂಗ್, ಶಶಿ ತರೂರ್ ರಾದ್ಧಾಂತ, ಐಪಿಎಲ್ ಮೋದಿ ವಿವಾದ, ಖಂಡನಾ ನಿರ್ಣಯದಿಂದ ಪಾರಾಗಲು ಮಾಯಾವತಿಯ ಖರೀದಿ, ಕಸಬ್ ಮರಣದಂಡನೆ ವಿವಾದ, ಎಲ್ಲವನ್ನೂ ಹೊರಗೆಳೆದುಕೊಂಡು, ಯಾವುದರ ಬಗ್ಗೆ ಪ್ರತಿಭಟನೆ ಮಾಡುವುದು, ಕೂಗಾಡುವುದು ಎಂದು ಪ್ರತಿಪಕ್ಷಗಳಿಗೇ ಗೊಂದಲ ಮೂಡಿಸುವಲ್ಲಿ ಯಶಸ್ವಿಯಾಗಿ ಪಾರಾಗಿರುವ ಯುಪಿಎ ತಂತ್ರವು ಬೊಗಳೂರಿಗೆ ಕೂಡ ಇಲ್ಲಿ ವರದಾನವಾಗಿ ಪರಿಣಮಿಸಿದೆ.

ಅದೇನೆಂದರೆ, ಮನಮೋಹಕ ಸಿಂಗರ ಪಕ್ಷವು ಪ್ರಣಾಳಿಕೆಯಲ್ಲಿದ್ದ ಒಂದೇ ಒಂದೇ ಭರವಸೆಯನ್ನೂ ಈಡೇರಿಸಿಲ್ಲ ಎಂದು ಒಣಮೋರೆ ಹೊತ್ತು ಹೇಳಿದಾಗ, ಈಗಾಗಲೇ Unprecedented Price-Rise Agenda ಸರಕಾರದಿಂದ ಈಗಾಗಲೇ ಸಾಕಷ್ಟು ನಿಧಿ ಪಡೆದುಕೊಂಡಿರುವ ಬೊಗಳೂರು ಬ್ಯುರೋ, ಯುಪಿಎ ರಕ್ಷಣೆಗೆ ಗುರಾಣಿ ಹಿಡಿದು ಹೊರಟಿತು.

ಏನ್ರೀ, ನೀವೇನೇನೆಲ್ಲಾ ಬಾಯಿಗೆ ಬಂದಾಗೆ ಹೇಳ್ತೀರಲ್ಲಾ.... Con-guess ಸರಕಾರವು ಆಮ್ ಆದ್ಮೀ ಆಮ್ ಆದ್ಮೀ ಅಂತೆಲ್ಲಾ ಪ್ರಣಾಳಿಕೆಯಲ್ಲಿ ಹೇಳ್ತಾ ಇರಲಿಲ್ವಾ... ಅದನ್ನು ಈಡೇರಿಸಿದ್ದಾರೆ ನೋಡಿ.... ಈಗಾಗ್ಲೇ ತಮ್ಮ ಆತ್ಮೀಯ ಮಿತ್ರರಾಷ್ಟ್ರವಾಗಿರುವ ಪಾತಕಿಸ್ತಾನದ ಪ್ರಧಾನ ಮಂತ್ರಿಗೆ ಅವರು ಆಮ್ ಕಳುಹಿಸಿಕೊಟ್ಟಿದ್ದಾರೆ. ಅವರನ್ನೂ ಜೊತೆಗೆ ತಮ್ಮನ್ನೂ ಕೂಡ ಆಮ್ ಆದ್ಮೀ ಎಂದು ಪರಿಗಣಿಸಿಕೊಂಡು ಈ ಕೃತ್ಯ ಎಸಗಿದ್ದಾರೆ. ಹೀಗಾಗಿ ಅದೇನೋ ಆಮ್ ಆದ್ಮೀ ಎಂದು ಉಲ್ಲೇಖಿಸಿದ್ದಾರಲ್ಲಾ... ಅದನ್ನು ಈಡೇರಿಸಿದ್ದಾರೆ ಕಣ್ರೀ... ನೋಡಿ ಇಲ್ಲಿ ಎಂದು ಕಿರುಚಾಡಿದ ತಕ್ಷಣ, ನಮ್ಮ ಪ್ರತಿಪಕ್ಷಗಳಂತೆಯೇ ಗೊಂದಲದಲ್ಲಿ ಬಿದ್ದ ಪ್ರತಿಭಟನಾಕಾರರು, ಸದ್ದಿಲ್ಲದೆ ಅಲ್ಲಿಂದ ಕಾಲ್ಕಿತ್ತರು. ಇನ್ನು ನಾಲ್ಕು ದಿನ ಸುಮ್ಮನಿದ್ದು, ಪ್ರತಿಭಟನೆಗೆ ಬೇರೇನಾದರೂ ವಿಷಯ ಹುಡುಕೋಣ, ಅದುವರೆಗೆ ಪ್ರತಿಭಟನೆ ರದ್ದು ಎಂದು ಘೋಷಿಸುತ್ತಿರುವುದು ಕೇಳುತ್ತಿತ್ತು.

ಪಟ್ಟಿಯಿಂದ ಹೆಸರು ಡಿಲೀಟ್: ಕಪಿಸೈನ್ಯ ಪ್ರತಿಭಟನೆ!

2010-05-25T15:09:00.001+05:30

(ಬೊಗಳೂರು, ಕಪಿಸೇನಾ ಬ್ಯುರೋದಿಂದ)

ಹಲವು ದಿನಗಳಿಂದ ಗಡದ್ದಾಗಿ ನಿದ್ದೆ ಮಾಡುತ್ತಿದ್ದ ಬೊಗಳೆ ಬ್ಯುರೋ, ಮಂಗಳೂರಿನಲ್ಲಿ ಮನೆ ಪಕ್ಕದಲ್ಲೇ ವಿಮಾನ ಬಿದ್ದರೂ ಎಚ್ಚರವಾಗದಿದ್ದಾಗ ವೇದೇಗೌಡ್ರು ಬಂದು, ರಾಮಾಯಣದ ಕಥೆ ಕೇಳಿದಾಗ ಬೆಚ್ಚಿ ಬಿದ್ದು ಎದ್ದು ಈ ವರದಿ ಪ್ರಕಟಿಸಿದೆ.

ಅರೆ, ಬೊಗಳೆ ಬ್ಯುರೋ ಇಲ್ಲದಿದ್ದರೂ ಜಗತ್ತಿನಲ್ಲಿ ಇಷ್ಟೆಲ್ಲಾ ವಿದ್ಯಮಾನಗಳು ಘಟಿಸಿದ್ದಾದರೂ ಹೇಗೆ ಎಂದು ಮೂಗಿನ ಮೇಲೆ ಬೆರಳು ಇರಿಸುತ್ತಿರುವಂತೆಯೇ, ರಾಮ, ರಾವಣ, ಸೀತೆ, ಹನುಮಂತ, ವಿಭೀಷಣ, ಲಕ್ಷ್ಮಣ ಎಂಬೆಲ್ಲಾ ಅಮೂಲ್ಯ ಪದಗಳು ನಮ್ಮ 'ಜಾರ'ಕಾರಣಿಗಳ ಬಾಯಿಂದ ಪಟಪಟನೆ ಉದುರುತ್ತಿರುವುದನ್ನು ನೋಡಿ, ರಾವಣರಾಜ್ಯದಲ್ಲಿ ನಿದ್ದೆ ಮಾಡಿದ್ದ ನಾವು, ರಾಮರಾಜ್ಯದಲ್ಲಿ ಎದ್ದೆವೇ ಎಂದುಕೊಂಡು ಮತ್ತೊಂದು ಕೈಯ ಬೆರಳನ್ನೂ ಮೂಗಿನ ಮೇಲೆ ಇರಿಸಲಾಯಿತು!

ಇದೇ ಸಂದರ್ಭದಲ್ಲಿ ಕಿಟಕಿಯಿಂದ ಹೊರಗೆ ನೋಡಿದಾಗ, ಕಪಿಸೈನ್ಯವು ತೀವ್ರ ಪ್ರತಿಭಟನೆ ಮಾಡುತ್ತಿರುವುದು ಕಂಡುಬಂದಿತು. ಇದಕ್ಕೆ ಕಾರಣವೇನು, ಯಾರ ವಿರುದ್ಧ ಪ್ರತಿಭಟನೆ, ಯಾಕಾಗಿ ಈ ಅಪ್ರತಿಭ ಪ್ರತಿಭಟನೆ ಎಂದೆಲ್ಲಾ ವಿಚಾರಿಸಲು ಬೊಗಳೂರು ಬ್ಯುರೋ ಕ್ಯಾಮರಾ ಹೆಗಲಿಗೇರಿಸಿಕೊಂಡು, ಒಡೆದ ಮೈಕ್ ಹಿಡಿದು ಅತ್ತ ಕಡೆ ತೆರಳಿತು.

ಮೈಕ್ ನೋಡಿದ ತಕ್ಷಣವೇ ಮಂಗವೊಂದು ಹಾರಿ, ಅದನ್ನು ಕಿತ್ತುಕೊಳ್ಳಲು ನೋಡಿತು. ತಕ್ಷಣವೇ ಬೊಗಳೂರಿನ ಅನ್ವೇಷಿ ನೇತೃತ್ವದ ಬ್ಯುರೋ ಎಂದು ತಿಳಿದಾಗ, "ಓ... ಇದು ನಮ್ಮವರೇ" ಎಂದುಕೊಂಡ ಆ ಕಪಿಯು, ಸಾರಿ ಸಾರಿ, ನಾನು ನಿಮ್ ಕೈಯಲ್ಲಿರೋದು ಬಾಳೆಹಣ್ಣೋ ಎಂದುಕೊಂಡು ಕಿತ್ತುಕೊಂಡೆ ಎಂದು ಸಮಜಾಯಿಷಿ ನೀಡಿತು.

ಆ ಮಂಗವನ್ನೇ ಕೈಯಲ್ಲಿ ಹಿಡಿದು ಮಾತನಾಡಲು ನಿರ್ಧರಿಸಲಾಯಿತು. ಯಾಕಾಗಿ ಈ ಪ್ರತಿಭಟನೆ ಎಂದು ಕೇಳಿದ ತಕ್ಷಣವೇ ಕಿರುಚಲು ಆರಂಭಿಸಿದ ಅದು ಹೇಳಿದ್ದು, "ರಾಮ, ರಾವಣರೆಲ್ಲ ಈ ಯುಗಕ್ಕೆ ಅಪಥ್ಯ. ಈಗಿನ ಕರ್ನಾಟಕದ ರಾಜಕೀಯ ಪರಿಸ್ಥಿತಿ ಗಮನಿಸಿದರೆ ರಾಮ, ರಾವಣ, ಸೀತೆ, ಲಕ್ಷ್ಮಣ ಮುಂತಾದವರು ಇತ್ತಕಡೆ ತಲೆ ಹಾಕಲೂ ಮಲಗುವುದಿಲ್ಲ ಎಂದು ನಮ್ಮಲ್ಲಿ ಹೇಳಿದ್ದಾರೆ. ಈಗೇನಿದ್ದರೂ ನಮ್ಮದೇ ಸಾಮ್ರಾಜ್ಯ. ಇಲ್ಲಿಯೂ ಕೂಡ ನಮ್ಮವರೇ ತುಂಬಿಕೊಂಡಿದ್ದಾರೆ. ಹೀಗಾಗಿ ಈ ಜಾರಕಾರಣಿಗಳ ಬಾಯಲ್ಲಿ, ರಾಮ, ರಾವಣ, ಸೀತೆ ಹೆಸರಿನ ಬದಲಿಗೆ ಕಪಿ ಸೈನ್ಯದ ಹೆಸರೇ ಬರಬೇಕಿತ್ತು. ನಮ್ಮನ್ನು ಉಲ್ಲೇಖಿಸದೇ ಇರುವುದು ನಮ್ಮ ಧಾರ್ಮಿಕ ಭಾವನೆಗಳಿಗೆ ಧಕ್ಕೆ ತಂದಿದೆ. ಇದಕ್ಕಾಗಿಯೇ ಅಪ್ರತಿಭರಾಗಿ ನಾವು ಈ ಪ್ರತಿಭಟನೆ ಮಾಡುತ್ತಿದ್ದೇವೆ" ಎಂದು ಹೇಳಿ ಛಂಗನೆ ನೆಗೆದು ಓಡಿತು.

ಭೂಕಂಪ ಹೆಸರಿಗೆ ಬೂಬ್‌ಕ್ವೇಕ್ ಕಾರಣ!

2010-04-28T12:01:00.001+05:30

[ಬೊಗಳೂರು ಭೂಕ್ವೇಕ್ ಬ್ಯುರೋದಿಂದ]

ಬೊಗಳೂರು, ಏ.28- ಅಲ್ಲಲ್ಲಿ ಭೂಕಂಪವಾಗುತ್ತಿರುವುದಕ್ಕೆ ಬಿಚ್ಚೋಲೆ ಗೌರಮ್ಮಗಳೇ ಕಾರಣ ಎಂದು ಇರಾನ್ ಧರ್ಮಗುರು ನೀಡಿದ್ದ ಹೇಳಿಕೆಯ ಹಿಂದೆ ಸತ್ಯಾಂಶವಿದ್ದುದು ಅಲ್ಲಲ್ಲಿ ಪತ್ತೆಯಾಗಿದೆ.

ಬಿಡದಿಯ ನಿತ್ಯಾನಂದ ಆಶ್ರಮ ಕಂಪಿಸುತ್ತಿರುವುದರ ಹಿಂದೆ ಈ ಕಾರಣದ ಜೊತೆಗೆ ಮತ್ತೂ ಹಲವಾರು ಕಾರಣಗಳಿರುವುದು ಗೊತ್ತಾಗಿರುವಂತೆಯೇ, ಈ ರೀತಿಯ ಭೂಕಂಪ ಆಗುವ ಸಾಧ್ಯತೆಗಳು ಎಲ್ಲೆಲ್ಲಿವೆ ಎಂಬುದನ್ನು ಪತ್ತೆ ಹಚ್ಚುವ ಕಾರ್ಯವನ್ನು ಯೂನೀಕ್ ಐಡೆಂಟಿಟಿ ಕಾರ್ಯಕ್ರಮ ಮಾದರಿಯಲ್ಲೇ ನಡೆಸಲು ವಿಪ್ರೋಸಿಸ್ ಮುಖ್ಯಸ್ಥರಾದ ಮೂರ್ತೇಕಣಿ ಅವರಿಗೆ ವಹಿಸಲಾಗಿದೆ ಎಂದು ಬಲ್ಲದ ಮೂಲಗಳು ತಿಳಿಸಿವೆ.

ಅವರು ಈಗಾಗಲೇ ಕೆಲಸ ಆರಂಭಿಸಿದ್ದು, ಇತ್ತೀಚೆಗಂತೂ ಬೆಂಗಳೂರಿನ ಎಂ.ಜಿ.ರೋಡ್ ಸಿಕ್ಕಾಪಟ್ಟೆ ನಡುಗಲಾರಂಭಿಸಿರುವುದು ಅವರಿಗೆ ಅಚ್ಚರಿ ಮೂಡಿಸಿಲ್ಲವಾದರೂ, ಕುತೂಹಲ ಮೂಡಿಸಿತ್ತು ಎಂದು ತಿಳಿದುಬಂದಿದೆ.

ಇದರ ನಡುವೆ, ಗಾಂಧಿನಗರದ ಗಲ್ಲಿಗಲ್ಲಿಗಳು ಮಾತ್ರವಲ್ಲದೆ, ಕಾಲೇಜು ಪರಿಸರಗಳಲ್ಲಿಯೂ ಭೂಕಂಪನವಾಗುತ್ತಿರುವುದು ಮತ್ತು ಕಂಪನವಾಗುವ ಸಾಧ್ಯತೆಗಳು ದಟ್ಟವಾಗಿ ಗೋಚರಿಸಿರುವುದಾಗಿ ಮೂಲಗಳು ವರದ್ದಿ ಮಾಡಿವೆ.

ಭೂಕಂಪನ ಕಾರಣ ಪತ್ತೆ ಹಚ್ಚಿದ್ದಕ್ಕಾಗಿ ಬೂಬ್‌ಕ್ವೇಕ್ ಪ್ರತಿಭಟನೆ ನಡೆಸಲಾಗಿದೆ ಎಂಬುದು ನಿಜವಾದರೂ, ಅದೇ ದಿನ ತೈವಾನ್‌ನಲ್ಲಿ ಸಂಭವಿಸಿದ ಭೂಕಂಪಕ್ಕೂ, ತಮಗೂ ಸಂಬಂಧವಿಲ್ಲ ಎಂದು ಬೂಬ್‌ಕ್ವೇಕ್ ಆಯೋಜಕರು ಬೊಗಳೂರು ವರದ್ದಿಗಾರರಿಗೆ ಸ್ಪಷ್ಟಪಡಿಸಿದ್ದಾರೆ.

ಈ ರೀತಿ ಸ್ಪಷ್ಟನೆ ನೀಡುತ್ತಿರುವಾಗಲೇ ವರದ್ದಿಗಾರರ ಗುಂಡಿಗೆ ಢವಢವನೆ ಜೋರಾಗಿಬಡಿದುಕೊಂಡ ಕಾರಣ, ಕೆಳಗಿದ್ದ ನೆಲ ಸ್ವಲ್ಪಸ್ವಲ್ಪವೇ ಅದುರತೊಡಗಿತ್ತು ಎಂದು ಲೈವ್ ವರದಿಯಲ್ಲಿ ತಿಳಿಸಲಾಗಿದೆ. ಈ ಹಿನ್ನೆಲೆಯಲ್ಲಿ, ಕಾಲೇಜಿನ ಪರಿಸರಗಳಲ್ಲಿ ಅಲ್ಲಲ್ಲಿ ಭೂಕುಸಿತ ಸಂಭವಿಸಿರುವುದು, ರಸ್ತೆಗಳು ಮಣ್ಣೆದ್ದುಹೋಗಿರುವುದಕ್ಕೂ ಸಂಬಂಧವಿರಬೇಕೆಂದು ಶಂಕಿಸಲಾಗುತ್ತಿದೆ.

ಈ ನಡುವೆ, ಬೊಗಳೂರು ಸಂಚೋದಕರ ಪಡೆಯೊಂದು ಭೂಕಂಪ ಹೆಸರು ಬರಲು ಕಾರಣವಾಗಿದ್ದೇ ಈ ಬೂಬ್ ಕ್ವೇಕ್ ಅಂತ ವಾದಿಸಲು ತೊಡಗಿದೆ. ಅದು ಭೂಬ್‌ಕ್ವೇಕ್ ಆಗಿದ್ದು, ಕಾಲಾನುಕ್ರಮದಲ್ಲಿ ಬಾಯಿಂದ ಬಾಯಿಗೆ ಹರಡಿ, ಜರಡಿಯಲ್ಲಿ ಸಾರಿಸಿದಂತಾಗಿ, ಕೊನೆಗೆ ಭೂ-ಕ್ವೇಕ್ ಮಾತ್ರ ಉಳಿದುಕೊಂಡಿತ್ತು. ಆ 'ಭೂ' ಶಬ್ದವು ಭಾಷಾಂತರಗೊಂಡು ಅರ್ಥ್ ಆಗಿ, ಅರ್ಥ್ ಕ್ವೇಕ್ ಅಂತ ಪ್ರಸಿದ್ಧಿಯಾಯಿತು ಎಂದು ಒಣವಾದವನ್ನು ಮಂಡಿಸಿದೆ.

ಬೆಲೆ ಕುಸಿತಕ್ಕೆ ಆದೇಶ, ಕುಸಿದದ್ದು ಗಡ್ಕರಿ!

2010-04-22T17:43:00.002+05:30

(ಬೊಗಳೂರು ಬೆಲೆ ಏರಿಕೆ ಸ್ಪಷ್ಟನೆ ಬ್ಯುರೋದಿಂದ)

ಬೊಗಳೂರು, ಏ.22- ಏರುತ್ತಿರುವ ಬೆಲೆಗಳನ್ನು ಇಳಿಸಲೇಬೇಕು ಎಂದು ಹೋರಾಟ ಮಾಡುತ್ತಿದ್ದ ಬಿಜೆಪಿ, ಕೇಂದ್ರದ ಬೆಲೆ ಏರಿಕೆ ಸರಕಾರದ ವಿರುದ್ಧ ಪ್ರತಿಭಟನೆ ಮಾಡಿದ ಸಂದರ್ಭದ ಘಟನೆಗೆ ಸ್ಪಷ್ಟನೆಗಳ ಮಹಾಪೂರವೇ ಹರಿದುಬರುತ್ತಿದೆ.

ಒಂದೆಡೆ, ನೀವು ಬೆಲೆ ಕುಸಿತ ಮಾಡದಿದ್ದರೆ, ನಾನೇ ಕುಸಿದುಬೀಳುತ್ತೇನೆ ಎಂದು ಗಡ್ಕರಿ ಹೆದರಿಸಿ ಮಾಡಿಯೂ ತೋರಿಸಿದ್ದರು ಎಂದು ಒಂದು ಮೂಲವು ವರದ್ದಿ ತಂದು ಸುರಿದಿದ್ದರೆ, ಮತ್ತೊಂದು ರದ್ದಿ ಮೂಲದ ಪ್ರಕಾರ, ಆಕಾಶದಲ್ಲಿ ಹೋಗುತ್ತಿದ್ದ ಜೀವನಾವಶ್ಯಕ ವಸ್ತುಗಳ ಬೆಲೆಯನ್ನು ನೋಡಿಯೇ, ಗಡ್ಕರಿ ತಲೆ ತಿರುಗಿ ತಿರು ತಿರುಗಿ, ತಿರುವು ಮುರುವಾಗಿ ಬಿದ್ದರು!

ಇನ್ನೊಂದು ಸ್ಪಷ್ಟನೆ ತಿಳಿಸಿರುವಂತೆ, ಅಲ್ಲಿ ಲಕ್ಷಾಂತರ ಮಂದಿ ಹರಿದುಬಂದಿದ್ದರಿಂದಾಗಿ, ದೆಹಲಿಯ ಆ ಭಾಗದ ಮೇಲೆ ಭಾರ ಹೆಚ್ಚಾಯಿತು. ಹೀಗಾಗಿ ಭೂಮಿಯೇ ಒಂದಿಷ್ಟು ವಾಲಿದ ಪರಿಣಾಮವಾಗಿ ವೇದಿಕೆಯೂ ಅಲುಗಾಡಿದ ಅನುಭವವಾಯಿತು ಗಡ್ಕರಿ ಅವರಿಗೆ. ಹೀಗಾಗಿ ಅವರು ಸಾವರಿಸಿಕೊಳ್ಳುವಷ್ಟರಲ್ಲಿ ತತ್ತರಿಸಿ ಬಿದ್ದಿದ್ದರು ಎನ್ನುತ್ತವೆ ಏನೂ ತಿಳಿಯದ ಮೂಲಗಳು.

ತೀವ್ರ ಬಿಸಿಲೆಂಬುದು ಜನಸಾಗರಕ್ಕೆ ತಿಳಿಸಿದ ಕಾರಣವಾದರೂ, ಅಷ್ಟೊಂದು ಜನ ಸಾಗರವೇ ಇರುವಾಗ, ಈ ತಂಪು ತಂಪು ಸಾಗರದಲ್ಲಿ ಬಿಸಿಲಿನ ಝಳವಾದರೂ ಎಷ್ಟರಮಟ್ಟಿಗೆ ಪರಿಣಾಮ ಬೀರಬಹುದು? ಸಾಗರದಲ್ಲಿ ತಂಪು ನೀರೇ ಅಲ್ಲವೇ ಇರುವುದು? ಸಾಗರದ ಬೀಚುಗಳಿಗೆ ಹೋಗುವುದು ಕೂಡ ವಾಯು ವಿಹಾರಕ್ಕಾಗಿಯೇ ಅಲ್ಲವೇ? ಈ ಕಾರಣಕ್ಕೆ, ಅವರು ಕುಸಿದದ್ದು ಖಂಡಿತಾ ಬಿಸಿಲಿನ ತಾಪದಿಂದಾಗಿ ಅಲ್ಲ ಎಂದು ಮಗದೊಂದು ಮೂಲವು ವಾದಿಸುತ್ತಿದೆ.

ಇನ್ನೂ ಒಂದು ಮೂಲದ ವಾದವಿದೆ. ಈ ಪ್ರಮಾಣದಲ್ಲಿ ರಾಜ್ಯ-ಹೊರರಾಜ್ಯಗಳ ಜನರನ್ನು ಕರೆದುತಂದು ದಿಲ್ಲಿಯಲ್ಲಿ ರ‌್ಯಾಲಿ ಮಾಡುತ್ತಿದ್ದರೂ, ಪ್ರಧಾನಿ ಮನಮೋಹನ್ ಸಿಂಗ್ ಎಲ್ಲಿದ್ದಾರೆ? ಸರಕಾರವನ್ನು ನಿಜಕ್ಕೂ ನಿಯಂತ್ರಿಸುತ್ತಿರುವ ಸೋನಿಯಾ ಗಾಂಧಿ ಎಲ್ಲಿದ್ದಾರೆ? ಕೇಂದ್ರ ವಿತ್ತ ಸಚಿವರು ಎಲ್ಲಿದ್ದಾರೆ ಎಂದೆಲ್ಲಾ ಕತ್ತು ಉದ್ದ ಮಾಡಿ, ಮಾಡಿ, ಗಡ್ಕರಿಯವರು ಅವರನ್ನು ಈ ದೇಶದೊಳಗೆಲ್ಲೂ ಕಾಣದೆ, ಸುಸ್ತಾಗಿ ಕುಸಿದುಬಿದ್ದರು!

ಅಧಿಕಾರಕ್ಕೆ ಬಂದ ನೂರೇ ದಿನಗಳಲ್ಲಿ ಬೆಲೆ ಕುಸಿತ ಮಾಡುತ್ತೇವೆ ಎಂದು ಅನಾದಿ ಕಾಲದಿಂದ ಭರವಸೆ ನೀಡಿ ಅಧಿಕಾರಕ್ಕೇರಿದ್ದ ಯುಪಿಎ ಸರಕಾರದಲ್ಲಿ, ಈ ರೀತಿ ಹೇಳಿದವರ್ಯಾರೂ ಕಾಣಿಸದೇ ಹೋಗಿದ್ದರಿಂದಾಗಿ ಈ ಅವಘಡ ಸಂಭವಿಸಿದೆ ಎಂದು ಹೇಳಲಾಗುತ್ತಿದೆಯಾದರೂ, ಭಾರತದ ದಕ್ಷಿಣ ಭಾಗದಿಂದ ಮೇಲಕ್ಕೇರುತ್ತಲೇ ಹೋದ ಅಗತ್ಯ ವಸ್ತುಗಳ ಬೆಲೆಗಳೆಲ್ಲವೂ ದೆಹಲಿ ಮೇಲೆ ಹಾರಾಡುತ್ತಿದ್ದರಿಂದಾಗಿ, ಅಲ್ಲಿನ ಭೂಮಿಯ ಭಾರ ಜಾಸ್ತಿಯಾಗಿ, ವೇದಿಕೆ ಅಲುಗಾಡಿ ಗಡ್ಕರಿ ಕುಸಿದರು ಎಂದೂ ಹೇಳಲಾಗುತ್ತಿದೆ.

ಕೊಟ್ಟ ಕೊನೆಯ ಮೂಲದ ಪ್ರಕಾರ, ಕೇಂದ್ರದಲ್ಲಿ ಇದೆ ಎನ್ನಲಾಗುತ್ತಿರುವ ಸರಕಾರವೇ ಬೆಲೆ ಕುಸಿತಕ್ಕೆ ಆದೇಶ ನೀಡಿದಾಗ, ಅದು ತಿಳಿಯದೆ ತಾವಾಗಿಯೇ ಸ್ವತಃ ಗಡ್ಕರಿ ಗಡಗಡನೆ ಕುಸಿದರು ಅಂತೆ!

ಬ್ರೇಕ್ ಮಾಡಲು ಸುದ್ದಿ ಇಲ್ಲದೆ ಪರದಾಡಿದ ಬೊಗಳೆ!

2010-04-13T08:07:00.000+05:30

[ಬೊಗಳೂರು ಬ್ರೇಕ್ ಆಗದ ಬ್ಯುರೋದಿಂದ]

ಬೊಗಳೂರು, ಏ.12- ಇಂದು ಬೊಗಳೂರು ಸುದ್ದಿ ಮನೆಯಲ್ಲಿ ಮಾತಿಲ್ಲ, ಕಥೆಯಿಲ್ಲ. ಏನೇ ಆದರೂ ಒಡೆದು ಹೋಗುತ್ತಿಲ್ಲ. ಅಂದರೆ ಅಕ್ಷರಶಃ ಬ್ರೇಕ್ ಆಗುತ್ತಿಲ್ಲ. ಬ್ರೇಕ್ ಆಗಲು ಏನೂ ಉಳಿದಿಲ್ಲ.

ಇದಕ್ಕೆಲ್ಲಾ ಕಾರಣ ನೂರಾರು ಜನಸಂಖ್ಯೆಯಿರುವ ಬೊಗಳೂರಿನಲ್ಲಿ ಕೋಟ್ಯಂತರ ಹೃದಯಗಳನ್ನು ಗೆದ್ದಿದ್ದ ಸಾನಿಯಾ ಮಿರ್ಜಾಳ ಮದುವೆ. ಹಾಂ! ತಪ್ಪು ತಿಳಕೋಬ್ಯಾಡ್ರೀ... ಇದು ವಿರಹವೇದನೆಯಂತೂ ಅಲ್ಲವೇ ಅಲ್ಲ. ಆದರೆ, ಶೋಯಬ್-ಸಾನಿಯಾ ಮದುವೆಯಾದ ಬಳಿಕ ಬೊಗಳೂರಿನ ಸುದ್ದಿಮನೆಯು ಬಿಕೋ ಎಂಬಂತಾಗಿಬಿಟ್ಟಿರುವ ಪರಿಸ್ಥಿತಿಯ ವಿವರಣೆ ಅಷ್ಟೆ!

ಸಾನಿಯಾ ಯಾವ ಸೀರೆ ಉಟ್ಟಿದ್ದಳು, ಅದರ ಬಣ್ಣ ಯಾವುದು, ಅದು ತಾಯಿಯ ಸೀರೆಯನ್ನೇ ಉಟ್ಟಳೇ, ಅದು ಯಾಕೆ? ಹಾಗಾದರೆ ತಾಯಿಗೆ ಉಡಲು ಸೀರೆ ಇತ್ತೇ? ಸಾನಿಯಾ ಪ್ರಯಾಣಿಸಿದ ಕಾರಿಗೆ ಎಷ್ಟು ಚಕ್ರಗಳಿದ್ದವು? ಅದರ ಗಾಲಿಯಲ್ಲಿ ಸಾಕಷ್ಟು ಗಾಳಿ ಇತ್ತೇ? ಮೂಗುತಿ ಸುಂದರಿ ಮೂಗಿಗೆ ಏನು ಇಟ್ಟಳು? ಬ್ರೇಕಿಂಗ್ ಸುದ್ದಿಯ ಧಾವಂತ ನೋಡಿ ನೋಡಿ ಮೂಗಿಗೆ ಕೈಯಿಟ್ಟಳೇ? ಅಥವಾ ಕೈಮುಚ್ಚಿಕೊಂಡಳೇ? ಎಂಬಿತ್ಯಾದಿ ರದ್ದಿಯನ್ನು ಬ್ರೇಕ್ ಮಾಡಿ ಮಾಡಿ ಸುಸ್ತಾಗಿದ್ದಾಗಲೇ, ಈ ಬ್ರೇಕಿಂಗ್ ನ್ಯೂಸ್ ಬಂದಿತ್ತು. ಸಾನಿಯಾ-ಶೋಯಬ್ ಕೊನೆಗೂ ಮದುವೆ ಆಗಿಬಿಟ್ಟಿತು! ಅಲ್ಲಿಗೆ ಇನ್ನು ಬ್ರೇಕ್ ಮಾಡಲು ಏನೂ ಉಳಿದಿಲ್ಲ ಎಂಬಂತಹಾ ಶೂನ್ಯ ಪರಿಸ್ಥಿತಿ!

ದಿಢೀರ್ ಆಗಿ ಮದುವೆ ಮಾಡಿಸುವಲ್ಲಿ ಸಾನಿಯಾ ಕೈವಾಡವೂ ಇದೆ ಎಂದು ಶಂಕಿಸಲಾಗಿದೆ. ಅಂದರೆ, ಬೊಗಳೂರು ರದ್ದಿ ಚಾನೆಲಿನಲ್ಲಿ ನಿರಂತರವಾಗಿ ಸಾನಿಯಾ-ಶೋಯಬ್ ಬಗ್ಗೆ, ಶೋಯಬ್ ತಂದೆಯ ಹೆಸರಿನ ಬಗ್ಗೆ, ಶೋಯಬ್ ಮೊದಲನೇ ಪತ್ನಿಯ ಬಗ್ಗೆ, ಎರಡನೇ ಪತ್ನಿಯ ಬಗ್ಗೆ ಇತ್ಯಾದಿತ್ಯಾದಿ ಹಗ್ಗೆ ರೇಜಿಗೆ ಹುಟ್ಟಿಸುವಂತಹಾ ಬ್ರೇಕಿಂಗ್ ರದ್ದಿಗಳು, ತಲೆಯಿರುವ ಆದರೆ ಬುಡವಿಲ್ಲದ ವಿಶ್ಲೇಷಣಾತ್ಮಕ ರದ್ದಿಗಳನ್ನು ತಂದು ತಂದು ಸುರಿದು ಮೂಗು ಮುಚ್ಚಿಸುತ್ತಿದ್ದವರಿಗೆ ಕೆಲಸವಿಲ್ಲದೆ ಹೊಡೆಯೋಣವೆಂದರೆ ನೊಣವೂ ಸಿಗಲಾರದ ಪರಿಸ್ಥಿತಿ. ಅವುಗಳೂ ಸಾನಿಯಾ ಮದುವೆಗೆ ಗುಂಯ್‌ಗುಡಲು ಹೋಗಿರುವ ಶಂಕೆ.

ಹೀಗಾಗಿ, ಇನ್ನು ಮುಂದೆ ಬೊಗಳೂರು ಬ್ಯುರೋ ಏನೇನೇ ಬಾಯಿಗೆ ಬಂದ ವರದ್ದಿ ಪ್ರಕಟಿಸಿ, ಯಾರೋ ಯಾರನ್ನೋ ಮದುವೆಯಾಗಿಬಿಟ್ಟರು ಎಂದೆಲ್ಲಾ ತಪ್ಪು ತಪ್ಪು ಚಿತ್ರಗಳನ್ನು ತೋರಿಸದಂತಾಗಲೂ, ಬೊಗಳೂರು ಛಾಯಾಗ್ರಾಹಕರಿಗೆ ಅವಕಾಶವೇ ನೀಡದೆ, ತಾವೇ ಚಿತ್ರಗಳನ್ನು ಕಳುಹಿಸುವುದಾಗಿ ಮದುವೆ ಮನೆಯಿಂದ ಸೂಚನೆಗಳು ಬಂದಿದ್ದವು.

ಆಗಿಬಿಟ್ಟಿತು. ಆಗಿಯೇ ಬಿಟ್ಟಿತು. ಇನ್ನು ಮುಂದೆ ಸಾನಿಯಾ ಬ್ರೇಕ್ ಆದ ನ್ಯೂಸಿಗೆ ಅವಕಾಶವೇ ಇಲ್ಲದಂತಾಗಿರುವ ಕಾರಣ, ಬೊಗಳೂರು ಬ್ಯುರೋ ಬಿಕೋ!

ಬಿಗ್-ಬಿ ಸಿನಿಮಾ ವೀಕ್ಷಿಸಿದ್ದಕ್ಕೆ ಕಠಿಣ ಶಿಕ್ಷೆ!

2010-03-29T18:02:00.002+05:30

(ಬೊಗಳೂರು ಅಸಾಧ್ಯ ಬ್ಯುರೋದಿಂದ)

ಬಾಂದ್ರಾ-ವರ್ಲಿ ಸೀ-ಲಿಂಕ್ (ಸಮುದ್ರ ಬೆಸೆಯುವ) ಕಾರ್ಯಕ್ರಮದಲ್ಲಿ ಅಮಿತಾಭ್ ಬಚ್ಚನ್ ಎಂಬ ಬಿಗ್-ಬಿ ಜೊತೆ ವೇದಿಕೆಯನ್ನು ಯಾರಿಗೂ ತಿಳಿಯದಂತೆ ಹಂಚಿಕೊಂಡಿದ್ದಕ್ಕಾಗಿ ಮತ್ತು ಅಮಿತಾಭ್ ಅವರು ಗುಜರಾತ್ ಪ್ರತಿನಿಧಿ ಎಂಬ ಕಾರಣಕ್ಕಾಗಿ ಅವರನ್ನು ದ್ವೇಷಿಸುತ್ತಿರುವ ಕಾ-ಗ್ರೇಸ್, ಇದೀಗ ಹೊಸ ಕಾನೂನು ಜಾರಿಗೆ ತರಲು ಪ್ರಯತ್ನಿಸುತ್ತಿದೆ ಎಂದು ಸುದ್ದಿರಹಿತ ಮೂಲಗಳು ತಿಳಿಸಿವೆ.

ಗುಜರಾತ್ ಗೂಜೆಪಿ ಸರಕಾರ, ಅದರಲ್ಲಿಯೂ ವಿಶೇಷವಾಗಿ ನರೇಂದ್ರ ಮೋಡಿ ಅಧಿಕಾರದಲ್ಲಿರುವ ರಾಜ್ಯವನ್ನು ದೇಶ-ವಿದೇಶದಲ್ಲಿ ಪ್ರಚಾರ ಮಾಡುವ ರಾಯಭಾರಿಗಾಗಿಯೇ ವಿಶೇಷ ಕಾನೂನೊಂದನ್ನು ಜಾರಿಗೆ ತರಲಾಗುತ್ತಿದ್ದು, ಬಿಗ್-ಬಿ ಸಿನಿಮಾ ನೋಡಿದವರಿಗೆ ಗಲ್ಲು ಶಿಕ್ಷೆಯಂತಹಾ ಕಠಿಣಾತಿಕಠಿಣ ಶಿಕ್ಷೆ ವಿಧಿಸುವ ಬಗ್ಗೆ ಪ್ರಸ್ತಾಪಿಸಲಾಗಿದೆ.

ಇದಲ್ಲದೆ, ಬಿಗ್-ಬಿ ಕೂಡ ಕೋಮುವಾದಿಯಾಗುತ್ತಿದ್ದಾರೆ ಎಂದು ಆಮಶಂಕೆ ವ್ಯಕ್ತಪಡಿಸಿರುವ ಕ್ಯಾ-ಗ್ರೇಸ್, ಈಗಾಗಲೇ ಬಿಗ್-ಬಿ ಪುತ್ರ ಸ್ಮಾಲ್-ಬಿ ಕಾರ್ಯಕ್ರಮ ಸಂಬಂಧವೂ ಕಿತಾಪತಿ ಮಾಡಿದ್ದು, ಇನ್ನು ಮುಂದೆ ಅವರ ಮಗ ಅಭಿಷೇಕ್, ಸೊಸೆ ಐಶ್ವರ್ಯಾ ರೈ ಮುಂತಾದವರು ಭಾಗವಹಿಸಿದ ಚಿತ್ರಗಳಿಗೂ ನಿಷೇಧ ಹೇರುವ ಸಾಧ್ಯತೆಗಳು ದಟ್ಟವಾಗಿವೆ.

ಇಷ್ಟು ಮಾತ್ರವಲ್ಲದೆ, ಅಮಿತಾಭ್ ಪ್ರಚಾರ ರಾಯಭಾರಿಯಾಗಿರುವ ಹಿಮಾನಿ ಫಾಸ್ಟ್ ರಿಲೀಫ್, ಬೋರೋಪ್ಲಸ್, ಬಿನಾನಿ ಸಿಮೆಂಟ್, ನವರತ್ನ ತೇಲ್ ಮುಂತಾದವುಗಳನ್ನೂ ನಿಷೇಧಿಸುವ ಕುರಿತು ಗಂಭೀರ ಮತ್ತು ಚಿಂತಾಜನಕ ಚಿಂತನೆಯೂ ನಡೆಯುತ್ತಿದೆ ಎಂದು ಮೂಲಗಳು ವರದ್ದಿ ತಂದು ಸುರಿದಿವೆ.

ಇದರ ನಡುವೆಯೇ, ಇತ್ತೀಚೆಗೆ ಬಂದಿರುವ ವರದಿಗಳ ಪ್ರಕಾರ, ಇದೀಗ ಗುಜರಾತನ್ನು ವಿಶ್ವದಲ್ಲೆಡೆ ಪ್ರಚಾರ ಮಾಡುತ್ತಿರುವ ಬಿಗ್-ಬಿ, ಗೋಧ್ರಾ ಗಲಭೆಯಲ್ಲಿ ಕೈವಾಡ ಹೊಂದಿರುವ ಶಂಕೆಯೊಂದು ಕೂಡ ಕ್ಯಾ-ಗ್ರೇಸ್ ಸರಕಾರಕ್ಕೆ ಹೊಳೆದಿದ್ದು, ಅವರು 2002ರಲ್ಲಿ ನಡೆದ ಗಲಭೆಯನ್ನು ಖಂಡಿಸ ಬೇಕು. ಇದೇ ರೀತಿಯಾಗಿ, ಸಿಖ್ ನರಮೇಧ, ಮುಂಬೈ ಭಯೋತ್ಪಾದನಾ ದಾಳಿ, ಅಹಮದಾಬಾದ್ ದಾಳಿ, ದಿಲ್ಲಿ ದಾಳಿ, ಬೆಂಗಳೂರು ದಾಳಿ, ಅಸ್ಸಾಂ ದಾಳಿ, ಜಮ್ಮು ಮತ್ತು ಕಾಶ್ಮೀರ ದಾಳಿ ಮುಂತಾಗಿ, ತಮ್ಮ ಆಡಳಿತಾವಧಿಯಲ್ಲಿಯೂ ನಡೆದ ದಾಳಿಗಳನ್ನು ಖಂಡಿಸಬೇಕು ಎಂದು ಕ್ಯಾ-ಗ್ರೇಸ್ ಆಗ್ರಹಿಸಿದೆ.

ಇಲ್ಲವಾದಲ್ಲಿ, ಈ ಬಗ್ಗೆಯೂ ಹಲವು ಸದಸ್ಯರ ತನಿಖಾ ಆಯೋಗವನ್ನು ರಚಿಸಲು ನಿರ್ಧರಿಸಲಾಗುತ್ತಿದೆ ಎಂದು ತಲೆಬುಡವಿಲ್ಲದ ಮೂಲಗಳು ವರದ್ದಿ ತಂದು ಸುರಿದಿವೆ. ಇದರೊಂದಿಗೆ, ಸೀ-ಲಿಂಕ್ ಗಲಾಟೆಗೂ ಗುಜರಾತ್-ಗೋಧ್ರಾ ಗಲಭೆಗೂ ಲಿಂಕ್ ಕಲ್ಪಿಸಲು ಹೇತುವಾಗಿದೆ ಎಂದು ಮೂಲಗಳು ವಿಶ್ಲೇಷಿಸುತ್ತಿಲ್ಲ.

ಮಲ್ಯರ ಕಿಂಗ್‌ಫಿಷರ್ ವಿಮಾನದಲ್ಲಿದ್ದುದು ಗುಂಡು!

2010-03-24T08:13:00.000+05:30

(ಬೊಗಳೂರು ಸಂಚೋದನಾ ಬ್ಯುರೋದಿಂದ)

ಬೊಗಳೂರು, ಮಾ.24- ಕಿಂಗ್ ಫಿಷರ್ ವಿಮಾನದಲ್ಲಿ ಸ್ಫೋಟಕ ಪತ್ತೆಯಾಗಿರುವ ಪ್ರಕರಣದ ಹಿಂದೆ ಬಿದ್ದಿರುವ ಬೊಗಳೆ ರಗಳೆ ಏಕಸದಸ್ಯ ಬ್ಯುರೋದ ಸಮಸ್ತ ಸಿಬ್ಬಂದಿ ಗಡಣವು ಕೊನೆಗೂ ಅದರೊಳಗಿದ್ದುದು ಗುಂಡು ಎಂಬುದನ್ನು ಪತ್ತೆ ಹಚ್ಚಿದ್ದಾರೆ.

ಬೃಹತ್ ಬೊಗಳೂರು ಚುನಾವಣೆ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಬೊಗಳೂರಿನಲ್ಲಿ ಕಂಡಲ್ಲಿ ಗುಂಡು ಹಾಕುವ ನಿಟ್ಟಿನಲ್ಲಿ ಕಿಂಗ್ ಫಿಷರ್ ಸಂಸ್ಥೆಯೇ ಈ ಗುಂಡುಗಳನ್ನು ತಿರುವನಂತಪುರದ ಗೇರು ತೋಟಗಳಿಂದ ತರಿಸುತ್ತಿತ್ತು ಎಂಬುದನ್ನು ಸಂಚೋದಿಸಲಾಗಿದೆ.

ಒಳಗೆ ಸೇರಿದರೆ ಗುಂಡು, ಹುಡುಗಿ ಆಗುವಳು ಗಂಡು ಎಂಬ ಹಾಡಿನಿಂದ ಪ್ರೇರಿತರಾಗಿರುವ ಮದಿರೆಯ ದೊರೆ ಮಲ್ಯರ ಕಿಂಗ್ ಫಿಷರ್ ಸಂಸ್ಥೆಯು, ಗುಂಡುಗಳನ್ನೇ ತರಿಸಿದರೆ ಚುನಾವಣೆ ಸಂದರ್ಭ ವಿಭಿನ್ನ ರಾಜಕೀಯ ಪಕ್ಷಗಳಿಗೆ ಹಂಚಲು ನೆರವಾಗಬಹುದು ಎಂದು ಲೆಕ್ಕಾಚಾರ ಹಾಕಿಯೇ ಇದನ್ನು ತರಿಸಿತ್ತು.

ಈ ಗುಂಡನ್ನು ಸ್ಫೋಟಕ ಎಂದು ಕರೆದಿರುವುದರಲ್ಲಿ ಯಾವುದೇ ತಪ್ಪಿಲ್ಲ ಎಂದೂ ಸಮರ್ಥಿಸಿಕೊಂಡಿರುವ ಸಂಸ್ಥೆಯು, ಒಳಗೆ ಸೇರಿದರೆ ಖಂಡಿತವಾಗಿಯೂ ಇದು ಸ್ಫೋಟಕ ಫಲಿತಾಂಶವನ್ನು ನೀಡುತ್ತದೆ. ಗೆಲ್ಲಬೇಕಾದ ಅಭ್ಯರ್ಥಿ ಸೋಲುವ, ಸೋಲಬೇಕಾದ ಅಭ್ಯರ್ಥಿ ಗೆಲ್ಲುವ ಸ್ಫೋಟಕ ಫಲಿತಾಂಶಗಳನ್ನು ಅದು ತಂದೊಡ್ಡುತ್ತದೆ ಎಂದು ಅವರು ಸಮರ್ಥಿಸಿಕೊಂಡಿದ್ದಾರೆ.

ಬ್ರೇಕ್: ವಿಮಾನದಲ್ಲಿ ಪತ್ತೆಯಾದದ್ದು ಯಾವ ಸ್ಫೋಟಕ?

2010-03-23T17:24:00.001+05:30

ಮಲ್ಯರ ಕಿಂಗ್ ಫಿಷರಿನಲ್ಲಿ ಪತ್ತೆಯಾದದ್ದು ಎಂತಹಾ ಸ್ಫೋಟಕ? ತಿಳಿಯಲು ಬುಧವಾರದ ಬೊಗಳೆ-ರಗಳೆ ಸಂಚಿಕೆ ಓದಿ. ನಿಮ್ಮ ಪ್ರತಿಗಳನ್ನು ನಾಡಿದ್ದು ಕಾದಿರಿಸಿ. ಯಾಕೆಂದರೆ ನಾಳೆ ಸಿಕ್ಕಾಪಟ್ಟೆ ಡಿಮಾಂಡ್ ಇರಬಹುದು. ರಶ್ ಆಗದಂತಿರಲು ಈ ವ್ಯವಸ್ಥೆ.

ಕಳೆದೊಂದು ತಿಂಗಳಿಂದ ಇದುವರೆಗೆ ತಲೆಮರೆಸಿಕೊಂಡಿದ್ದಕ್ಕೆ ಕೈಕಾಲು ಬಡಿದು ವಿಷಾದ ವ್ಯಕ್ತಪಡಿಸುತ್ತಿದ್ದೇವೆ. -ಸಂ

ಬೊಗಳೆ ಸಂಚೋದನೆ: ಪುಣೆ ಸ್ಫೋಟದ ರೂವಾರಿ ಒಬ್ಬ ಮಹಿಳೆ!

2010-02-16T16:15:00.000+05:30

(ಬೊಗಳೂರು ಓಂ ಶಾಂತಿ ಓಂ ಬ್ಯುರೋದಿಂದ)

ಬೊಗಳೂರು, ಫೆ. 16- ಪುಣೆಯಲ್ಲಿ ನಡೆದ ಬಾಂಬ್ ಸ್ಫೋಟ ಪ್ರಕರಣವನ್ನು ಬೊಗಳೂರು ಬ್ಯುರೋದ ಸಿಬ್ಬಂದಿಯೂ ತನಿಖೆ ಮಾಡಿದ್ದು, ಪ್ರಧಾನ ಆರೋಪಿಯನ್ನು ಬೊಗಳೂರು ಏಕಸದಸ್ಯ ಬ್ಯುರೋದ ಸರ್ವ ಸದಸ್ಯರೂ ಸೇರಿಕೊಂಡು ಪತ್ತೆ ಹಚ್ಚಿದ್ದಾರೆ.

ಪುಣೆ ಸ್ಫೋಟದ ಹಿಂದಿನ ರೂವಾರಿ ಶಾ ಎಂಬ ಪದದಿಂದ ಆರಂಭವಾಗುವ ಹೆಸರಿರುವ ಒಬ್ಬ ಮಹಿಳೆ ಎಂದು ಆರಂಭಿಕ ತನಿಖೆಯಿಂದ ಗೊತ್ತಾದ ತಕ್ಷಣವೇ ಬೊಗಳೂರಿನ ಬೊಗಳಿಗರ ತಂಡವು ನೇರವಾಗಿ ತನಿಖೆಗೆ ಭಾರತ-ಪಾಕಿಸ್ತಾನ ಗಡಿಗೆ ಹೋಯಿತು.

ಮಹಿಳೆ ಎಂಬ ಸುಳಿವು ಪತ್ತೆಯಾಗುವುದಕ್ಕೂ ಕಾರಣವಿದೆ. ಇದೊಂದು ಸಿಲಿಂಡರ್ ಸ್ಫೋಟ ಪ್ರಕರಣ ಎಂದು ಆರಂಭಿಕ ಮಾಹಿತಿಗಳು ಹೇಳಿದ್ದಾಗಲೇ, ಬೊಗಳೂರು ಬ್ಯುರೋ, ಅಡುಗೆ ಸಿಲಿಂಡರ್ ಆಗಿರುವುದರಿಂದ ಇದರ ಹಿಂದೆ ಖಂಡಿತ ಮಹಿಳೆಯೊಬ್ಬರು ನಿಂತಿದ್ದಿರಬಹುದು ಎಂದು ಶಂಕಿಸಿತ್ತು. (ಈಗ ಕಾಲ ಬದಲಾಗಿ, ಮಹಿಳೆಯರ ಬದಲಾಗಿ ಕೆಲವೊಮ್ಮೆ ಪುರುಷರು ಕೂಡ ಅಡುಗೆ ಸಿಲಿಂಡರ್ ಇಟ್ಟುಕೊಂಡು ಮನೆಯಲ್ಲಿ ಅಡುಗೆ ಮಾಡುತ್ತಿದ್ದರೂ ಕೂಡ!).

ಈ ಮಹಿಳೆಯ ಹೆಸರು 'ಶಾ'ದಿಂದ ಆರಂಭವಾಗುತ್ತಿದೆ ಎಂದು ತಿಳಿದ ತಕ್ಷಣ, ಇದಕ್ಕೂ ಪಾತಕಿಸ್ತಾನದ ಬಗೆಗೆ ಕೇಂದ್ರ ಸರಕಾರದ ನೀತಿಗೂ ಸಂಬಂಧವಿದೆಯೇ ಎಂದು ಹೊಳೆಯಿತು. ತಕ್ಷಣವೇ ನಮ್ಮ ಸರಕಾರ ಹೇಳುತ್ತಿರುವ ಶಾಂತಿ ಮಂತ್ರವೇ ನೆನಪಾದ ತಕ್ಷಣ, ಈ ಮಹಿಳೆ ಬೇರಾರೂ ಅಲ್ಲ, ಶಾಂತಿ ಎಂಬುದು ಖಚಿತವಾಯಿತು.

ಇದರೊಂದಿಗೆ, ಪುಣೆ ಸ್ಫೋಟದಲ್ಲಿ ಶಾಂತಿಯ ಕೈವಾಡವಿರುವುದು ಬಹಿರಂಗಗೊಂಡಂತಾಗಿದೆ. ಭಯೋತ್ಪಾದನೆ ಕೈಬಿಡದೆ ಶಾಂತಿಯ ಕುರಿತಾದ ಮಾತುಕತೆಯನ್ನು ಪ್ರಪೋಸ್ ಮಾಡುವುದೇ ಇಲ್ಲ ಎಂದು ಹೇಳುತ್ತಿದ್ದ ಯುಪಿಎ ಸರಕಾರ, ಇತ್ತೀಚೆಗೆ ತೊಂದರೆ ಇಲ್ಲ, ಶಾಂತಿಯೇ ಬೇಕು ಎಂದು ಹಠ ಹಿಡಿದು ಪ್ರಸ್ತಾಪ ಮುಂದಿಟ್ಟಿತ್ತು. ಇದೀಗ ಈ ಶಾಂತಿಯೇ ಈ ಅಶಾಂತಿಗೆ ಕಾರಣ ಎಂದು ಬೊಗಳೂರು ಬ್ಯುರೋ ಪತ್ತೆ ಹಚ್ಚಿ, ಸಂಚೋದನೆ ನಡೆಸಿದೆ.

Aunty-Mosquito ಸಾಫ್ಟ್-ವೇರ್ !

2010-02-03T15:36:00.002+05:30

(ಬೊಗಳೂರು ನೆಟ್ಗಳ್ಳರ ಬ್ಯುರೋದಿಂದ)

ಬೊಗಳೂರು, ಫೆ.3- ಪೆಪ್ಸಿ ಬಾಟಲಿಯಿಂದ ಸ್ಟ್ರಾ ಇಟ್ಟು ಕೋಲಾ ಹೀರುವಂತೆ ಮಾನವನ ರಕ್ತವನ್ನು ಹೀರುವ, ಕಿವಿ ತಮಟೆ ಒಡೆಯುವಂತೆ ಗುಂಯ್‌ಗುಡುವ ರಕ್ತ-ಪಿಪಾಸು ಸೊಳ್ಳೆಗಳಿಗೆ ಮುಕ್ತಿ ಕಾಣಿಸಲು ಹೊಸ ಸಾಫ್ಟ್ ವೇರ್ ಸಿದ್ಧವಾಗಿದೆ ಎಂಬ ಹಳೆ ವರದಿ ಪ್ರಕಟವಾಗಿರುವಂತೆಯೇ ಎಲ್ಲರ ಕಿವಿಗಳೂ ಒಮ್ಮೆಗೆ ನೆಟ್ಟಗಾಗಿವೆ.

Aunty ಸೊಳ್ಳೆಯಿಂದ ಕಚ್ಚಿಸಿಕೊಂಡು ತಡೆಯಲಾರದೆ ಈ Anti ಸೊಳ್ಳೆ ತಂತ್ರಜ್ಞಾನ ಕಂಡುಹುಡುಕಿದ ವಿಜ್ಞಾನಿಯ (ದೈಹಿಕ ಮತ್ತು ಮಾನಸಿಕ) ಸ್ಥಿತಿ ನೆನಪಿಸಿಕೊಂಡು ಗೊಳ್ಳನೆ ನಕ್ಕ ಅಸತ್ಯಾನ್ವೇಷಿ, ಈ ಬಗ್ಗೆ ತನಿಖೆ ನಡೆಸಿದಾಗ ಹೊಸ ಅಂಶವೊಂದು ಬಯಲಾಗಿದೆ.

ವಾಸ್ತವವಾಗಿ ವಿಜ್ಞಾನಿ ಇದನ್ನು ಕಂಡುಹುಡುಕಿದ್ದು ಸೊಳ್ಳೆಗಳಿಗಾಗಿ ಅಲ್ಲವಂತೆ. "Every new product comes out by an accident" ಎಂಬಂತೆ, ಸೊಳ್ಳೆಗಳಿಗೆ ಈ ಸಾಫ್ಟ್ ವೇರ್ ಮಾರಕವಾದದ್ದು ಕೂಡ ಒಂದು ಆಕ್ಸಿಡೆಂಟ್.

ಈ ಸುರಸುಂದರಾಂಗ ವಿಜ್ಞಾನಿಗೆ ಸುಂದರಿಯರ ವಿಪರೀತ ಕಾಟ. ಒಂಚೂರು ವಿಶ್ರಾಂತಿ ತೆಗೆದುಕೊಳ್ಳೋಣವೆಂದರೆ ಬಿಡಲೊಲ್ಲರು. ಅವರನ್ನು ದೂರ ಮಾಡುವುದು ಹೇಗೆ ಎಂಬ ಸಂಶೋಧನೆಯಲ್ಲಿದ್ದಾಗ ಹೆಣ್ಣು ಸೊಳ್ಳೆಗಳಿಗಷ್ಟೇ ಮಾರಕವಾಗಿರುವ ಈ ಸಾಫ್ಟ್ ವೇರ್ ಉತ್ಪತ್ತಿಯಾಗಿದೆ. ಮೊಬೈಲ್‌ ಫೋನ್‌ಗೂ ಇದು ಲಭ್ಯವೆಂಬುದು ಇತ್ತೀಚಿನ ಸುದ್ದಿ.

ಮಾನವನ ರಕ್ತ ಹೀರುವ ಹೆಣ್ಣು ಸೊಳ್ಳೆಗಳು ಈ ಸಾಫ್ಟ್ ವೇರ್ ಹೊರಡಿಸುವ ಶಬ್ದ ಬಂದತ್ತ ಧಾವಿಸುತ್ತವೆ. ಅದು ಕಂಪ್ಯೂಟರ್‌ನಿಂದ ಬರುವುದರಿಂದ ಅಲ್ಲಿ ಬ್ರೌಸ್ ಮಾಡುತ್ತಾ ಬೊಗಳೆ-ರಗಳೆ ಓದತೊಡಗುತ್ತವೆ. ಅಲ್ಲಿಗೆ ಬೇರೆಯವರ ರಕ್ತ ಹೀರುವ ಮನುಷ್ಯ ಪ್ರಾಣಿಗೆ ಸುಖ ನಿದ್ದೆ.

ಈ ಕುರಿತ ಹೆಚ್ಚಿನ ಮಾಹಿತಿ ನಿಮಗೆ ಇಲ್ಲಿ ಸಿಗಲಾರದು.

ಈ ಸಾಫ್ಟ್ ವೇರ್ ಇಲ್ಲಿ ಡೌನ್ ಲೋಡ್ ಮಾಡಬೇಕಿದ್ದರೆ ಬೊಗಳೆ-ರಗಳೆ ಓದುಗರಿಗೆ ಸಂಪೂರ್ಣ ಉಚಿತ. (ಶರತ್ತುಗಳು ಅನ್ವಯ. ಬೇಕಿದ್ದರೆ ನೀವು ಸೇವಾ ತೆರಿಗೆ, ಹ್ಯಾಂಡ್ಲಿಂಗ್ ಚಾರ್ಜ್, ಸಾಗಾಟ ವೆಚ್ಚ, ಕೂಲಿ ವೆಚ್ಚ, ತಯಾರಿಕಾ ವೆಚ್ಚ, ಊಟದ ಖರ್ಚು, ಮಾಹಿತಿ ಶುಲ್ಕ... ಇನ್ನೂ ಇತ್ಯಾದಿ ಏನೇನೋ ಶುಲ್ಕಗಳನ್ನೆಲ್ಲಾ ಸೇರಿಸಿ ಬೊಗಳೆ-ರಗಳೆ ಬ್ಯುರೋದ ಅಸತ್ಯಾನ್ವೇಷಿಗೆ ಕಳುಹಿಸಬಹುದು.

[ಒಂದಾನೊಂದು ಕಾಲದ ಬೊಗಳೆ ರಗಳೆಯ ವರದಿ]

ಅಮೀರ್ ಖಾನ್ ಹೊಸ ಚಿತ್ರ: All Idiots!

2010-01-18T08:13:00.001+05:30

(ಬೊಗಳೂರು ಈಡಿಯಟ್ಸ್ ಬ್ಯುರೋದಿಂದ)

ಬೊಗಳೂರು, ಜ.18 -ಕರ್‌ನಾಟಕದ ಬೆಳವಣಿಗೆಗಳಿಂದ ತೀವ್ರ ರೊಚ್ಚಿಗೆದ್ದಿರುವ ಆಮೀರ್ ಖಾನ್, ವಿಧು ವಿನೋದ್ ಚೋಪ್ರಾ ಮತ್ತು ರಾಮ್ ಗೋಪಾಲ್ ವರ್ಮಾ ಅವರೆಲ್ಲರೂ ಸೇರಿಕೊಂಡು 3 ಈಡಿಯಟ್ಸ್ ಎಂಬ ಚಿತ್ರವನ್ನು ಕಸದಬುಟ್ಟಿಗೆ ಹಾಕಿ All Idiots ಎಂಬ ಚಿತ್ರ ನಿರ್ಮಿಸಲು ತರಾತುರಿಯ ನಿರ್ಧಾರ ಕೈಗೊಂಡಿದ್ದಾರೆ.

ಇದು ನಿರಂತರವಾಗಿ ಓಡಲಿರುವ ಚಿತ್ರವಾಗಿದ್ದು, ಇದನ್ನು ವೀಕ್ಷಿಸಲು ಯಾವುದೇ ಶುಲ್ಕ ತೆರಬೇಕಾಗಿಲ್ಲ. ಈ ಚಿತ್ರವು ಚಿತ್ರ ಮಂದಿರಗಳಲ್ಲಿಯೂ ಪ್ರದರ್ಶಿಸಲ್ಪಡುವುದಿಲ್ಲ. ಬದಲಾಗಿ, ಕರ್ನಾಟಕದ ಬೀದಿ ಬೀದಿಗಳಲ್ಲಿ, ನಿಧಾನಸೌಧದ ಒಳಗೆ ಮತ್ತು ಹೊರಗೆ ಹಾಗೂ ಬಹುತೇಕ ವಾರ್ತಾ ವಾಹಿನಿಗಳ ಬ್ರೇಕಿಂಗ್ ನ್ಯೂಸ್ ವಿಭಾಗಗಳಲ್ಲೇ ಆಗಾಗ್ಗ ತೋರಿಸಲಾಗುತ್ತದೆ ಎಂದು ಮೂಲಗಳು ಹೇಳಿವೆ.

ಆದರೆ ಸಂಭಾಷಣೆ ಸಂದರ್ಭ ಮಧ್ಯೆ ಮಧ್ಯೆ 'ಕೀಂ....ssss' ಅಂತ ಸೌಂಡ್ ಬಂದರೆ ನಾವು ಜವಾಬ್ದಾರರಲ್ಲ ಎಂದೂ ನಿರ್ಮಾಪ-ಕರುಗಳು ತಿಳಿಸಿದ್ದಾರೆ.

ಈ ಮಧ್ಯೆಯೇ, ವೇದೇಗೌಡರ ಮಾಜಿ ಪ್ರಧಾನಿ ಎಂಬ ಬಿರುದನ್ನು ಕಿತ್ತೊಗೆಯಲು ಕೇಂದ್ರ ಸರಕಾರ ಪ್ರಯತ್ನಿಸುತ್ತಿರುವ ಸಂಗತಿಯೂ ಎಲ್ಲಿಯೂ ಬೆಳಕಿಗೆ ಬರಲಿಲ್ಲ. ನೈಸ್ ರಸ್ತೆಯಲ್ಲಿ ಹೇಗೆ ನಿಯಂತ್ರಣವಿಲ್ಲದೆಯೇ ಎಕ್ಸ್‌ಪ್ರೆಸ್ ಆಗಿ ನಾಲಿಗೆಯನ್ನು ಹರಿಯಬಿಟ್ಟರೆ ಹೇಗಾಗುತ್ತದೆ ಎಂದು ಪ್ರಯೋಗ ಮಾಡಿ ನೋಡಿರುವುದಾಗಿಯೂ ವೇದೇಗೌಡರು ಪ್ರತಿಕ್ರಿಯಿಸಿದ್ದಾರೆ.

ಇಷ್ಟೆಲ್ಲಾ ರಾದ್ಧಾಂತಕ್ಕೆ ಕಾರಣವೆಂದರೆ, ಈಗಾಗಲೇ ಈ ಕನ್ನಡ ನಾಡಿನಲ್ಲಿ ನಾನು ಹುಟ್ಟಬಾರದಾಗಿತ್ತು ಎಂದೆಲ್ಲಾ ಹೇಳಿದ್ದ ವೇದೇಗೌಡರ ಬಾಯಲ್ಲಿ ಬಂದ ಅತ್ಯಮೂಲ್ಯ ಶಬ್ದಗಳು.

ಪದಕೋಶಕ್ಕೆ ತಿದ್ದುಪಡಿ: ವೇದೇಗೌಡ್ರ ಒತ್ತಾಯ

2010-01-11T16:26:00.001+05:30

(ಬೊಗಳೂರು ಅಸಭ್ಯ ಪದಕೋಶ ಬ್ಯುರೋದಿಂದ)

ಬೊಗಳೂರು, ಜ.11- ಬಾಸ್ಟರ್ಡ್, ಬ್ಲಡಿ, ಬೋ... ಮಗ ಇತ್ಯಾದಿಗಳನ್ನು ಸಾಂವಿಧಾನಿಕ ಪದಕೋಶಕ್ಕೆ ಮತ್ತು ಸಾಧ್ಯವಾದರೆ ಆಕ್ಸ್‌ಫರ್ಡ್ ಪದಕೋಶಕ್ಕೂ, ಇದ್ದರೆ ಅದಕ್ಕಿಂತ ದೊಡ್ಡ ದೊಡ್ಡ ಡಿಕ್ಷನರಿಗೆ, ಫ್ರೆಂಚ್, ಗ್ರೀಸ್, ಇಟಲಿ, ಚೀನೀ ಇತ್ಯಾದಿ ಎಲ್ಲಾ ಭಾಷೆಗಳ ನಿಘಂಟುಗಳಿಗೂ ಸೇರಿಸಬೇಕು ಎಂದು ಪ್ರಾಂತೀಯ ಪಕ್ಷದ ರಾಷ್ಟ್ರೀಯ ಅಧ್ಯಕ್ಷರು ಒತ್ತಾಯಿಸಿದ್ದಾರೆ.

ಗೌರವಾನ್ವಿತ ಮಣ್ಣಿನ ಮಗನಾಗಿರುವ ಮಾಜಿ ನಿಧಾನಿಯೂ ಆಗಿರುವ ಶ್ರೀಶ್ರೀಮಾನ್‌ಮಾನ್ ವೇದೇಗೌಡರು ಮುಖ್ಯಮಂತ್ರಿಯನ್ನು ಬಹಳ ಆತ್ಮೀಯತೆಯಿಂದ, ಅತಿ ಸಲುಗೆಯಿಂದ ಈ ಮೇಲಿನ ಪದಗಳನ್ನು ಉಪಯೋಗಿಸಿ ಸಂಬೋಧಿಸಿರುವುದಾಗಿ ತಿಳಿದುಬಂದ ಹಿನ್ನೆಲೆಯಲ್ಲಿ ಬೊಗಳೂರು ಸಿಬ್ಬಂದಿ ಈ ಕುರಿತು ತನಿಖೆ ಆರಂಭಿಸಿದ್ದರು.

ತನಿಖೆ ಆರಂಭಿಸಿರುವಾಗ ತಿಳಿದುಬಂದ ಅಂಶವೆಂದರೆ, ಮಾಜಿ ನಿಧಾನಿಗಳೂ, ಮಣ್ಣಿನಿಂದಲೇ ಚಿನ್ನ ಮಾಡಿಕೊಂಡ ರೈತಪುತ್ರರೂ ಆದ ವೇದೇಗೌಡರು ಹೊಸ ಹೊಸ ಮತ್ತು ಹಳೆ ಹಳೆಯ ಶಬ್ದಕೋಶಗಳನ್ನು ಹುಡುಕಿ ಹುಡುಕಿ ಜರೆದಿದ್ದಾರೆ ಎಂಬುದು ಪತ್ತೆಯಾಗಿದೆ. ತಾವು ಯಾವತ್ತಿಗೂ ಅಧ್ಯಯನ ನಿರತರಾಗಿದ್ದು, ಈ ಹೊಸ ಪದಗಳನ್ನು ಯಾರೂ ಹೆಚ್ಚಾಗಿ ಯಾಕೆ ಬಳಸುತ್ತಿಲ್ಲವೆಂಬುದು ನಮಗೇ ಅಚ್ಚರಿಯಾದ ಕಾರಣದಿಂದ ಅವುಗಳನ್ನು ಬಳಸಿ, ಬೆಳೆಸಲು ಪ್ರಯತ್ನಿಸಿರುವುದಾಗಿ ಹೇಳಿದರು.

ಮತ್ತೊಂದು ವರದ್ದಿ ಮೂಲಗಳ ಪ್ರಕಾರ, ವೇದೇಗೌಡರು ಇಂತಹ ವೇದವಾಕ್ಯಗಳನ್ನು ಉದುರಿಸಿರುವುದಕ್ಕೆ ಬೇರೆ ಕಾರಣಗಳೂ ಇವೆ. ಅವರು ಇತ್ತೀಚೆಗೆ ತಮ್ಮ ರೈತಪುತ್ರರೊಂದಿಗೆ ಸೇರಿಕೊಂಡು ನೈಸಾಗಿರುವ ರಸ್ತೆಯ ವಿರುದ್ಧ ಬೀದಿಗಿಳಿದು ಹೋರಾಟ ನಡೆಸುತ್ತಿದ್ದಾರೆ. ಮಾಜಿ ನಿಧಾನಿ ಪಟ್ಟದ ಮೇಲಿದ್ದವರು ಧಡಕ್ಕನೇ ಬೀದಿಗಿಳಿದು ಹೋರಾಟ ಮಾಡುವುದೇನೂ ಸಣ್ಣ ಪುಟ್ಟ ವಿಷಯವಲ್ಲ. ಅದೊಂದು ದಿನ ತಾವು ದಿಢೀರನೇ ಈ ಪಟ್ಟಕ್ಕೇರಿದಾಗ, ಹಿಂದಿ ಕಲಿಯಲು ಹೋಗಿ ಸೋತು ಸುಣ್ಣವಾಗಿದ್ದು ಇನ್ನೂ ನೆನಪಿನಲ್ಲಿತ್ತು. ಆವತ್ತು 'ಏರಿದ' ಸಂದರ್ಭ ಎದುರಾದ ಬಿಕ್ಕಟ್ಟು ಈ ಬಾರಿ ಬೀದಿಗೆ 'ಇಳಿದಾಗ' ಕಾಣಿಸಿಕೊಳ್ಳಬಾರದು ಎಂಬ ಕಾರಣಕ್ಕೆ ಅವರು, ಬೀದಿ ಭಾಷೆಯನ್ನು ಬೀದಿಯಲ್ಲಿದ್ದುಕೊಂಡೇ ತಕ್ಷಣ ಪ್ರಯೋಗಿಸಿ ತಮ್ಮ ಕಲಿಕಾ ಸಾಮರ್ಥ್ಯವನ್ನು ಪ್ರದರ್ಶಿಸಿದ್ದಾರೆ ಎಂದು ಹೆಸರು ಹೇಳಲಿಚ್ಛಿಸದ ನಮ್ಮ ವರದ್ದಿಗಾರರು ಎಲ್ಲಿಯೂ ವರದಿ ಮಾಡಿಲ್ಲ.

ಇನ್ನೊಂದು ದೃಷ್ಟಿಕೋನದಿಂದ ತಪಾಸಣೆ ನಡೆಸಿದಾಗ ಬೇರೆಯೇ ವಿಷಯ ಹೊರಬಿದ್ದಿದೆ. ತಾವೊಬ್ಬ ಮಣ್ಣಿನ ಮಗನಾಗಿ ಇಷ್ಟು ದಿನಗಳಿಂದ ಬೀದಿಗಿಳಿದು ತಮ್ಮ ತಮ್ಮ ರೈತರ ಪರವಾಗಿ ಹೋರಾಟ ಮಾಡುತ್ತಿದ್ದಾರೆ, ತಾವೊಬ್ಬ ಮಾಜಿ ನಿಧಾನಿ ಎಂಬ ಪರಿಜ್ಞಾನವೂ ಇಲ್ಲದೆ ರಾಷ್ಟ್ರೀಯ ಸುದ್ದಿ ವಾಹಿನಿಗಳು, ರಾಷ್ಟ್ರೀಯ ಸುದ್ದಿ ಪತ್ರಿಕೆಗಳು ಈ ಬಗ್ಗೆ ಯಾವುದೇ ಗಮನ ಹರಿಸುತ್ತಿಲ್ಲ, ಒಂದೇ ಒಂದು ಸುದ್ದಿಯನ್ನೂ ಮಾಡುತ್ತಿಲ್ಲ, ಬಿತ್ತರಿಸುತ್ತಿಲ್ಲ. ಹೀಗಾಗಿ ಏನಾದರೂ ಮಾಡಬೇಕಲ್ಲ ಎಂದು ಕೂದಲಿಲ್ಲದ ತಲೆ ಕೆರೆದುಕೊಂಡು ಯೋಚಿಸಿದವರೇ, ಈ ಪದ ಪ್ರಯೋಗದ ಸಾಹಿತ್ಯಕೃಷಿಗೆ ಕೈಹಚ್ಚಿದ್ದರು ಎಂದು ಮೂಲಗಳು ವರದ್ದಿ ಮಾಡಿವೆ. ಇದರಲ್ಲಿ ಅವರು ಯಶಸ್ಸನ್ನೂ ಕಂಡಿದ್ದು, ಆದರೂ ಕೆಲವು ಚಾನೆಲ್‌ಗಳು ತಾವು ಕಷ್ಟಪಟ್ಟು ಹುಡುಕಿ ಕಾಯಿನ್ ಮಾಡಿದ್ದ ಈ ಹೊಸ ಶಬ್ದಗಳು ಬರುವಾಗ 'ಕೀಂssss....' ಎಂಬ ಸದ್ದು ತೂರಿಸಿ, ಅದೇನೆಂದು ಜನರು ತಿಳಿಯದಂತೆ ಮಾಡಿದ್ದಾರೆ ಎಂದೂ ಅವರು ಅಸಮಾಧಾನ ಹೊರಗೆಡಹಿದ್ದಾರೆ.

ಮಾತ್ರವಲ್ಲದೆ, ಈಗೀಗ ಜನರಲ್ಲಿ ರಾಜಕಾರಣಿಗಳ ಬಗ್ಗೆ ಹಾಗೂ ರಾಜಕಾರಣಿಗಳಲ್ಲಿ ಎದುರಾಳಿಗಳ ಬಗ್ಗೆ ಅಸಹನೆ ಹೆಚ್ಚಾಗುತ್ತಿದೆ, ಇಂತಹ ಸಂದರ್ಭದಲ್ಲಿ ಈ ರೀತಿಯ ಪದಗಳೇ ಕೆಲಸ ಮಾಡುತ್ತವೆ. ಹೀಗಾಗಿ ಅವುಗಳನ್ನು ಅಸಾಂವಿಧಾನಿಕ ಪದಕೋಶದಿಂದ ಕಿತ್ತೆಸೆದು ಸಾಂವಿಧಾನಿಕ ಪದಕೋಶಕ್ಕೆ ಸೇರಿಸಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.

ಗೋಚರವಾಗದ ಚಂದ್ರ ಗ್ರಹಣ: ತನಿಖೆಗೆ ಆದೇಶ

2010-01-04T12:43:00.001+05:30

(ಬೊಗಳೂರು ಹೊಸವರ್ಷ ತೇಲಾಡುವ ಬ್ಯುರೋದಿಂದ)

ಬೊಗಳೂರು, ಜ.4- ಕಳೆದ ವರ್ಷದಿಂದೀಚೆಗೆ ನಿಸ್ತೇಜವಾಗಿ, ಸ್ತಬ್ಧವಾಗಿ ಮತ್ತು ನಿಶ್ಚೇಷ್ಟಿತವಾಗಿ ಬಿದ್ದಿದ್ದ ಬೊಗಳೂರು ಏಕಸದಸ್ಯ ಬ್ಯುರೋದ ಸರ್ವ ಸದಸ್ಯರು ಹಾಗೂ ಮತ್ತೊಬ್ಬ ವರದ್ದಿಗಾರರು, 2010 ಬಂದು ನಾಲ್ಕು ದಿನಗಳೇ ಕಳೆದರೂ ಏಳದೇ ಇರುವುದಕ್ಕೆ ನ್ಯೂ ಇಯರ್ ಪಾರ್ಟಿ ಅಲ್ಲವೆಂದು ಸ್ಪಷ್ಟಪಡಿಸುತ್ತಾ, ಹೊಸದೊಂದು ವರದ್ದಿಯನ್ನು ತಂದು ಸುರುವಿದ್ದಾರೆ.

2010ನೇ ಇಸವಿ ಆರಂಭವಾಗುವ ಸ್ವಲ್ಪ ಹೊತ್ತಿಗೆ ಮುಂಚೆ ಚಂದ್ರನಿಗೆ ಗ್ರಹಣ ಹಿಡಿಯುತ್ತದೆ ಎಂಬ ಸುದ್ದಿ ಕೇಳಿ, ಆತಂಕಿತರಾಗಿದ್ದ ಬೊಗಳೂರು ಬ್ಯುರೋದ ರದ್ದಿಗಾರ ಅನ್ವೇಷಿ, ಅಷ್ಟೂ ದಿನಗಳ ಕಾಲ ತಲೆ ಮರೆಸಿಕೊಂಡು, ಚಂದ್ರ ಗ್ರಹಣವನ್ನೇ ಕಾಯುತ್ತಿದ್ದ ಎಂದು ಮೂಲಗಳು ಹೇಳಿವೆ.

ಆದರೆ, ಮತ್ತಷ್ಟು ಸಂಶೋಧಿಸಿದಾಗ, ಚಂದ್ರಗ್ರಹಣಕ್ಕಾಗಿ ಕಾತರಿಸುತ್ತಾ ಹಾತೊರೆಯುತ್ತಿದ್ದವರಲ್ಲಿ ತಾನು ಮಾತ್ರವೇ ಅಲ್ಲ, ಇಡೀ ವಿಶ್ವ ಸಮುದಾಯದ ಮಂದಿಯೂ ಸೇರಿದ್ದಾರೆ ಎಂಬುದು ಅನ್ವೇಷಿಗೆ ತಿಳಿದಾಗ ತಡವಾಗಿತ್ತು. ಹೀಗಾಗಿ ಮೂರ್ನಾಲ್ಕು ದಿನ ಕಳೆದು ವರದಿ ತಂದು ಒಪ್ಪಿಸಲಾಗಿದೆ ಎಂದು ಸೊಂಪಾದಕೀಯ ಮೂಲಗಳು ಹೇಳಿವೆ.

ಮರುದಿನ ಸುದ್ದಿ ಪತ್ರಿಕೆಗಳನ್ನೆಲ್ಲಾ ಹರವಿಕೊಂಡು, ಅಂತರಜಾಲದಲ್ಲಿ ಸಂಚೋಧನೆ ನಡೆಸಿದಾಗ ತಿಳಿದುಬಂದ ಅಂಶವೆಂದರೆ, ಆ ದಿನ ಅಲ್ಲಲ್ಲ... ರಾತ್ರಿಯಲ್ಲಿ, ಚಂದ್ರಗ್ರಹಣವು ಪಾರ್ಶ್ವ ಚಂದ್ರಗ್ರಹಣ ಎಂದು ನಿಗದಿಯಾಗಿದ್ದರೂ, ಕೆಲವು ಕಡೆ ಅದು ಗೋಚರಿಸಲೇ ಇರಲಿಲ್ಲ, ಇನ್ನು ಕೆಲವೆಡೆ ಅದು ಖಗ್ರಾಸ (ಪೂರ್ಣ) ಗ್ರಹಣವಾಗಿ ಗೋಚರಿಸಿತ್ತು, ಮಾತ್ರವೇ ಅಲ್ಲ, ಕೆಲವರಿಗೆ ಹಗಲಲ್ಲೂ ನಕ್ಷತ್ರಗಳು ಕಾಣಿಸತೊಡಗಿದ್ದವು!

ತಕ್ಷಣವೇ ಇದನ್ನು ಕೇಂದ್ರ ಸರಕಾರದ ಮತ್ತು ರಾಜ್ಯ ಸರಕಾರದ ಗಮನಕ್ಕೆ ತರಲಾಗಿ, ಎರಡೂ ಸರಕಾರಗಳು ಸಿಬಿಐ ಮತ್ತು ಸಿಐಡಿ ತನಿಖೆಗೆ ಆದೇಶ ನೀಡಿದ್ದು, ಒಂದಿಪ್ಪತ್ತು ಮೂವತ್ತು ವರ್ಷಗಳಲ್ಲೇ ವರದಿ ಸಲ್ಲಿಕೆಯಾಗುವ ನಿರೀಕ್ಷೆ ಇದೆ. ಹೀಗಾಗಿ ಅದಕ್ಕೆ ಮುಂಚೆಯೇ ಬೊಗಳೂರು ಬ್ಯುರೋದ ಸಮಸ್ತರು ಹಲವರನ್ನು, ಕೆಲವರನ್ನು, ಅಳಿದವರನ್ನು, ಉಳಿದವರನ್ನು ಮಾತನಾಡಿಸಿ, ತನಿಖೆ ನಡೆಸಿ ವರದಿ ಸಲ್ಲಿಸಿದೆ. ಯಾಕ್ರೀಯಪಾ ಇಂಗಾತು? ಎಂದೆಲ್ಲಾ ಬೊಗಳೂರು ಬ್ಯುರೋ ಸಮಸಮಶೋಧಿಸಿದಾಗ ಗೊತ್ತಾಗಿಬಿಟ್ಟ ವಿಷಯವೆಂದರೆ:

ಹಲವರಿಗೆ ಚಂದ್ರಗ್ರಹಣವೇ ಕಾಣಿಸದಿರಲು ಮತ್ತು ಕೆಲವರಿಗೆ ಪೂರ್ಣ ಚಂದ್ರಗ್ರಹಣದೊಂದಿಗೆ ನಕ್ಷತ್ರಗಳೂ ಕಾಣಿಸಲು ಕಾರಣವೆಂದರೆ, ಅವರೆಲ್ಲರೂ ಅಂದು ಹೊಸ ವರ್ಷಾಚರಣೆಯ ಸಂಭ್ರಮದ ರಾತ್ರಿ ಪಾರ್ಟಿಯಲ್ಲಿ 'ತೇಲಾಡುತ್ತಿದ್ದುದು'! ತೇಲಾಡುತ್ತಲೇ ಮನೆಗೆ ಬಂದಾಗ ಅವರಿಗೆ ಮನೆಯಲ್ಲಿಯೂ ಪೂಜೆ ಆಗಿತ್ತು, ಇದರಿಂದಾಗಿ ಹಗಲಲ್ಲೂ ಅವರಿಗೆ ನಕ್ಷತ್ರಗಳು ಕಾಣಿಸುತ್ತಿದ್ದವು ಎಂಬುದನ್ನು ವರದ್ದಿಗಾರ ಅನ್ವೇಷಿ ಪತ್ತೆ ಹಚ್ಚಿದ್ದಾನೆ.

ಸಮಸ್ತ ಓದುಗರಿಗೆ, ಓದುವವರಿಗೆ, ಓದಿಸುವವರಿಗೆ 2010ಕ್ಕಾಗಿ ಹ್ಯಾಪಿ ನ್ಯೂ ಇಯರ್!

ರಾತೋರಾತ್ರಿ ತೆಲಂಗಾಣಕ್ಕೆ ಅಸ್ತು: ಸಂಚು ಬಯಲು

2009-12-11T15:42:00.001+05:30

(ಬೊಗಳೂರು ರಾಜ್ಯ ಆಗ್ರಹ ಬ್ಯುರೋದಿಂದ)

ಬೊಗಳೂರು, ಡಿ.11- ತೆಲಂಗಾಣ ರಾಜ್ಯ ಘೋಷಣೆಗೆ ಕೇಂದ್ರ ಸರಕಾರ ನಿರ್ಧರಿಸಿರುವ ಬೆನ್ನಲ್ಲೇ, ಬೊಗಳೂರು ಸೇರಿದಂತೆ ಅಲ್ಲಲ್ಲಿ ರಾಜ್ಯ-ರಾಷ್ಟ್ರ ಘೋಷಣೆಯ ಕೂಗುಗಳು ಕೇಳಿಬರತೊಡಗಿವೆ.

ಇದೀಗ ಬೋಡೋಲ್ಯಾಂಡ್, ಗೂರ್ಖಾಲ್ಯಾಂಡ್, ಕಾಶ್ಮೀರ, ಕೊಡಗು, ಸೌರಾಷ್ಟ್ರ, ವಿದರ್ಭ, ಬುಂದೇಲ್‌ಖಂಡ, ಪೂರ್ವಾಂಚಲ, ಸೌರಾಷ್ಟ್ರ, ಮಿಥಿಲಾಂಚಲ, ಮಹಾಕೋಸಲ ಮುಂತಾದ ರಾಜ್ಯಗಳಿಗೂ ಬೇಡಿಕೆ ಹೆಚ್ಚಾಗುತ್ತಿದ್ದು, ಅಲ್ಲಲ್ಲಿ ಉಪವಾಸ ಸತ್ಯಾಗ್ರಹಗಳು ಕೂಡ ಆರಂಭವಾಗಿದೆ.

ಕೆಲವರು ಸಾಯುವವರೆಗೂ ನಾಲ್ಕು ದಿನ ಉಪವಾಸ ಮಾಡ್ತೀವಿ ಅಂತ ಪ್ರತಿಭಟನೆಗೆ ಇಳಿದಿದ್ದರೆ, ಇನ್ನು ಕೆಲವರು ನಾವು ಒಂದೆರಡು ದಿನ ಮಾತ್ರವೇ ಆಮರಣಾಂತ ಉಪವಾಸ ಮಾಡ್ತೀವಿ ಅಂತ ಬೊಗಳೆ ಬಿಡ್ತಿದ್ದಾರೆ. ಒಟ್ಟಿನಲ್ಲಿ ಉಪವಾಸ ಉಪವಾಸವೇ ಎಂಬುದು ಗೊತ್ತಾಗಿದೆ. ಅಂದರೆ ಮುಂದಿನ ಬಾರಿ ನೀರು-ಆಹಾರ-ಪಾನೀಯ ಸೇವಿಸುವವರೆಗೂ ಅದು ಉಪವಾಸವೇ ಆಗಿರುತ್ತದೆ ಎಂಬ ಅಮೂಲ್ಯ ದಾರ್ಶನಿಕ ತತ್ವವನ್ನು ಬೊಗಳೂರು ಬ್ಯುರೋ ಕಂಡುಹಿಡಿದಿದೆ.

ಇದೀಗ, ಅಲ್ಲಲ್ಲಿ ಪ್ರತ್ಯೇಕ ದೇಶ-ರಾಜ್ಯ ಸ್ಥಾಪನೆಗಾಗಿ ಇಷ್ಟೆಲ್ಲಾ ಹೈಪ್ ಹೆಚ್ಚಾಗಿದ್ದರ ಹಿಂದಿನ ಕಾರಣವನ್ನು ಬೊಗಳೂರು ಕೊನೆಗೂ ಪತ್ತೆ ಮಾಡಿದೆ.

ದೇಶಾದ್ಯಂತ ಆಹಾರಧಾನ್ಯಗಳು ಮತ್ತು ನಿತ್ಯೋಪಯೋಗಿ ವಸ್ತುಗಳ ಬೆಲೆ ಹೆಚ್ಚಳವಾಗಿದೆ. ಜನರು ಹಸಿವಿನಿಂದ ಹೊಟ್ಟೆಗಿಲ್ಲದೆ ಅಲ್ಲಲ್ಲಿ ಸಾಯುವ ಹಂತದಲ್ಲಿದ್ದಾರೆ. ಲಿಬರ್ಹಾನ್, ಭಾರತ-ಪಾಕ್ ಸಂಬಂಧ, ಕೋಪನ್ ಹೇಗನ್‌ನಲ್ಲಿ ಹೇಗೆ ಏಗೋಣ ಅಂತೆಲ್ಲಾ ಬ್ಯುಸಿಯಾಗಿರುವಾಗ ಈ ಬಗ್ಗೆ ಗಮನ ಹರಿಸಲು ಸರಕಾರಕ್ಕೂ ಪುರುಸೊತ್ತಿಲ್ಲ. ಹೀಗಾಗಿ ಬೆಲೆ ನಿಯಂತ್ರಣಕ್ಕೆ ದೇವರೇ ಕೊಟ್ಟ ಅವಕಾಶವಿದು. ಎಲ್ಲರೂ ಉಪವಾಸ ಮಾಡಿದರೆ, ಆಹಾರಕ್ಕೆ ಬೇಡಿಕೆ ತಗ್ಗುತ್ತದೆ. ಪೂರೈಕೆ ಹೆಚ್ಚಾಗುತ್ತದೆ. ಬೆಲೆ ಇಳಿಯುತ್ತದೆ ಎಂಬ ತಂತ್ರಗಾರಿಕೆಯನ್ನು ಬೊಗಳೂರು ನಿಧಾನಿಗಳು ಉಪಯೋಗಿಸಿರುವುದಾಗಿ ಮೂಲಗಳು ವರದ್ದಿ ತಂದು ಸುರಿದಿವೆ.

ಇದರ ನಡುವೆ, ಅಂತಾರಾಷ್ಟ್ರೀಯ ಸಂಚನ್ನು ಕೂಡ ಬೊಗಳೂರಿನ ಏಕಸದಸ್ಯ ಬ್ಯುರೋದ ಸರ್ವ ಸದಸ್ಯರ ತಂಡವು ಬಯಲಿಗೆಳೆದಿದ್ದು, ಜನಸಂಖ್ಯೆಯಲ್ಲಿ ನಂ.1 ಪಟ್ಟವನ್ನು ತನ್ನಿಂದ ಕಸಿದುಕೊಳ್ಳುವತ್ತ ದಾಪುಗಾಲಿಡುತ್ತಿರುವ ಭಾರತದ ಜನಸಂಖ್ಯೆ ಕಡಿತಗೊಳಿಸಲು ಚೀನಾದ ಷಡ್ಯಂತ್ರಗಳಲ್ಲಿ ಇದೂ ಒಂದಾಗಿದೆ ಎಂದು ನಮ್ಮ ಗುಪ್ತರಲ್ಲದ ಚರರು ತಿಳಿಸಿದ್ದಾರೆ.

ಕೋಪನ್ ಹೇಗನ್‌ಗೆ ಓಪನ್ ಏಗೋಣ್? ಬೊಗಳೂರು ಘೋಷಣ್

2009-12-09T08:04:00.001+05:30

(ಬೊಗಳೂರು ವಾಯುಮಾಲಿನ್ಯ ಬ್ಯುರೋದಿಂದ)

ಬೊಗಳೂರು, ಡಿ.8- ಕೋಪನ್ ಹೇಗನ್‌ನಲ್ಲಿ ಭೂಮಿಯ ಓಪನ್ ವಾತಾವರಣದಲ್ಲಿ ಹೇಗೆ ಏಗೋಣ್? ಅಥವಾ ಅಲ್ಲಿ ತೀವ್ರ ಪ್ರತಿರೋಧ ಇದ್ದರೂ ಹೇಗೆ ಏಗೋಣ್ ಎಂದು ಚಿಂತಿಸಲು ಬೊಗಳೂರಿನ ನಿಧಾನಮಂತ್ರಿಗಳು ಏನಕ್ಕೋ ಸಹಿ ಹಾಕಲು ತೆರಳಿರುವ ಹಿನ್ನೆಲೆಯಲ್ಲಿ ಬೊಗಳೂರುವಿನ ಏಕಸದಸ್ಯ ಬ್ಯುರೋದ ಸರ್ವರನ್ನೊಳಗೊಂಡ ತಂಡವು ಈ ಬಗ್ಗೆ ತನಿಖೆ ಕೈಗೊಳ್ಳಲು ನಿರ್ಧರಿಸಿತು.

ಇದೀಗ ಈ ತನಿಖೆಯಿಂದ ಪತ್ತೆಯಾಗಿರೋ ಅಂಶಗಳ ಪ್ರಕಾರ, ವಾತಾವರಣದ ತಾಪಮಾನ ಏರಿಕೆ ತಗ್ಗಿಸಲು ಮತ್ತು ವಾಯು ಮಾಲಿನ್ಯ, ಶಬ್ದ ಮಾಲಿನ್ಯ ತಡೆಯಲು ಕೆಲವೊಂದು ಉಪಕ್ರಮಗಳನ್ನು ಬೊಗಳೂರಿನ ಆಮ್ ಆದ್ಮೀಗಳು, ಮಾನ್ಯ ನಿಧಾನ ಮಂತ್ರಿಗಳ ಕೈಗೊಪ್ಪಿಸಿದ್ದಾರೆ ಎಂದು ತಿಳಿದುಬಂದಿದೆ. ಅದನ್ನು ನಿಧಾನಮಂತ್ರಿಗಳು ಹೋಪ್ ಇಲ್ಲದೆಯೇ ಓಪನ್ ಹೇಗನ್‌ನಲ್ಲಿ ವಾಚಿಸಲಿದ್ದಾರೆ ಎಂದು ಕೂಡ ಮೂಲಗಳು ವರದ್ದಿ ಮಾಡಿವೆ.

ಇದರಲ್ಲಿರುವ ಸಲಹೆಗಳ ಪ್ರಕಾರ, ವಾತಾವರಣದ ತಾಪಮಾನ ಏರಿಕೆಗೆ ಬೊಗಳೂರು ಜನರು ದಯನೀಯವಾಗಿ ನೀಡಿದ ಕೆಲವೊಂದಿಷ್ಟು ಸಲಹೆಗಳು:

* ವಾತಾವರಣ ಬಿಸಿಯಾಗದಂತೆ ತಡೆಯಲು ಹಾಟ್ ಹಾಟ್ ಚಲನಚಿತ್ರಗಳನ್ನು, ಬಹಿರಂಗ ಚುಂಬನ ಮತ್ತಿತರ ರೋಮ್ಯಾಂಟಿಕ್ ದೃಶ್ಯಗಳನ್ನು ಕಡಿವಾಣ ಹಾಕಬೇಕು.

* ಚಲನಚಿತ್ರಗಳಲ್ಲಿ ನಟಿಯರಿಗೆ ಮತ್ತು ಕೆಲವೊಮ್ಮೊಮ್ಮೆ ನಟರಿಗೂ - ಕನಿಷ್ಠ ಉಡುಪು (ಗರಿಷ್ಠ ಎಷ್ಟಿದ್ದರೂ ಆದೀತು) ತೊಡುವುದು ಕಡ್ಡಾಯ ಮಾಡಬೇಕು.

* ಈ ಮೇಲಿನ ಎಲ್ಲಾ ಸಲಹೆಗಳು ವಾತಾವರಣದ ಉಷ್ಣತೆ ತಡೆಯಲು ವಿಫಲವಾದರೆ, ಸೂರ್ಯನ ಬಿಸಿಲು ಸೋಕದ ಜಾಗದೊಳಗೆ, AC ಹಾಕಿಕೊಂಡು ತಣ್ಣಗೆ ಬಾಯಿ ಮುಚ್ಚಿ ಕೂರಬೇಕು.

ವಾತಾವರಣದ ಮಾಲಿನ್ಯ ತಡೆಗೆ ಬೊಗಳೂರು ಜನತೆ ಸೂಚಿಸಿದ ಸಲಹೆಗಳು:

* ಮೊತ್ತ ಮೊದಲನೆಯದಾಗಿ, ವಾಹನಗಳು ಹೊಗೆಯುಳುವ ಪ್ರದೇಶಗಳಾದ ಸೈಲೆನ್ಸರ್ ಅನ್ನು ಕಡ್ಡಾಯವಾಗಿ ಕಿತ್ತು ಹಾಕಬೇಕು. ಹೀಗೆ ಮಾಡಿದ್ರೆ ಅದರ ಸದ್ದು ಹೆಚ್ಚಾಗುತ್ತದೆ ಎಂಬ ಆತಂಕವಿದ್ದರೆ, ಸೈಲೆನ್ಸರ್ ಅನ್ನೇ ಸೈಲೆನ್ಸ್ (ಬಂದ್) ಮಾಡಿಬಿಡಬೇಕು.

* ತಿನ್ನುವ ವಸ್ತುಗಳ ಬೆಲೆಗಳನ್ನು ಏರಿಸಿ, ಈಗಾಗಲೇ ತಿನ್ನದಂತೆ ಮಾಡಲಾಗಿದ್ದು, ಆಮ್ ಆದ್ಮೀಗಳು ಇದರ ಸದುಪಯೋಗ ಪಡೆದುಕೊಂಡು ಉಸಿರಾಡುವುದನ್ನು ನಿಲ್ಲಿಸಬೇಕು. ಉಸಿರಾಟದಿಂದಲೂ ವಾಯು ಮಾಲಿನ್ಯ ಹೆಚ್ಚಾಗುವುದರಿಂದ ಈ ಕ್ರಮ.

* ಅಪ್ಪಿ ತಪ್ಪಿ ಯಾರಾದರೂ ಉಸಿರಾಡಲು ಸಮರ್ಥರಾದರೆ, ಅವರು ಕಡ್ಡಾಯವಾಗಿ ದಿನಕ್ಕೆ ನಾಲ್ಕೈದು ಬಾರಿ ಹಲ್ಲುಜ್ಜಬೇಕು.

* ಕೊಟ್ಟ ಕೊನೆಯದಾಗಿ, ಈಗಾಗಲೇ ತೊಗರಿಬೇಳೆ, ಸಕ್ಕರೆ, ಈರುಳ್ಳಿ, ಅಕ್ಕಿ ಮುಂತಾದ ಬಡವರ ವಸ್ತುಗಳು ಆಕಾಶದಲ್ಲೇ ಇರುವುದರಿಂದ, ಭೂಮಿಯಲ್ಲಿ ಯಾರು ಕೂಡ ಅಡುಗೆ ಮಾಡಬೇಕಿಲ್ಲ. ಆಕಾಶದಲ್ಲೇ ಬೆಂದು ಬೆಂದು ಉದುರಿದಾಗ ತಿಂದರೆ ಸಾಕು. ಅಡುಗೆ ಮಾಡಿದರೆ ಹೊಗೆ ಬರುತ್ತದೆ, ಇದು ಮಾಲಿನ್ಯ ಕಾರಕ ಎಂಬ ಕಾರಣಕ್ಕೆ ನಮ್ಮ ಸರಕಾರವೇ ಅದರ ಬೆಲೆಯನ್ನು ಆಕಾಶದಲ್ಲೇ ಇರಿಸಿ ಉತ್ತಮ ಕ್ರಮ ಕೈಗೊಂಡಿದ್ದಕ್ಕೆ ಧನ್ಯವಾದಗಳು.

* ಇಷ್ಟಾಗಿಯೂ, ಯಾರೆಲ್ಲಾ ಈ ಆಹಾರವಸ್ತುಗಳನ್ನು ಖರೀದಿಸಿ ತಿನ್ನಲು ಸಮರ್ಥರಾಗುತ್ತಾರೋ, ಅಂಥವರು ಕೂಡ ಒಲೆ ಉರಿಸಬಾರದು. ಒಲೆ ಉರಿಸುವುದರಿಂದ ಹೊಗೆ ಬಂದು ವಾಯು ಮಾಲಿನ್ಯ ಉಂಟುಮಾಡುವ ಬದಲು ಇಷ್ಟೆಲ್ಲಾ ಆಹಾರವನ್ನು ಆಮ್ ಆದ್ಮೀಗಳಿಗೆ ತೋರಿಸಿಯೇ ತಿಂದು ಅಥವಾ ಒಂದೊಂದು ಕಿಲೋ ತರಕಾರಿಯೋ, ಒಂದು ಕಿಲೋ ಸಕ್ಕರೆಯೋ ಇಲ್ಲವೇ ಒಂದು ಕಿಲೋ ತೊಗರಿಬೇಳೆ ಅಥವಾ ಅಕ್ಕಿಯನ್ನು ಖರೀದಿಸಿ, ಅದನ್ನು ಎತ್ತಿ ಎತ್ತಿ ತೋರಿಸುತ್ತಾ ಆಮ್ ಆದ್ಮೀಗಳ ಹೊಟ್ಟೆ ಉರಿಸಿದರೆ ಸಾಕು.

ಹಾಗಿದ್ದರೆ ಮಾಲಿನ್ಯ ಕಾರಕಗಳಲ್ಲಿ ಇನ್ನೂ ಒಂದು ಬಾಕಿ ಉಳಿಯಿತಲ್ಲಾ? ಅದುವೇ ಶಬ್ದ ಮಾಲಿನ್ಯ... ಅದರ ತಡೆಗೆ?

ಇದೋ ಇಲ್ಲಿದೆ ಬೊಗಳೂರು ಜನ ನೀಡಿದ ಸಲಹೆ: ಅಲೂಗಡ್ಡೆ, ಗೆಣಸು ಮತ್ತಿತರ ವಾಯುಕಾರಕ ವಸ್ತುಗಳ ಸೇವನೆ ಕಡಿಮೆ ಮಾಡಬೇಕು!

ಬೊಗಳೂರಿನಿಂದ ಕೋಪನ್ ಹೇಗನ್ ಘೋಷಣೆ!

2009-12-08T15:30:00.001+05:30

ಬೊಗಳೂರು ಬ್ಯುರೋದಿಂದ ಕೋಪನ್ ಹೇಗನ್‌ನಲ್ಲಿ ಓಪನ್ ಆಗಿ ಹೇಗೆ ಏಗೋಣ್ ಎಂಬ ಕುರಿತ ನಿರ್ಣಯ!

ನಾಳಿನ ಸಂಚಿಕೆಯಲ್ಲಿ ಪ್ರಕಟವಾಗುವ ಸಾಧ್ಯತೆಗಳಿರುವುದರಿಂದ, ಇಂದೇ ನಿಮ್ಮ ಬೊಗಳೂರು ಪ್ರತಿಯನ್ನು ದ್ವಿಪ್ರತಿಯಲ್ಲಿ ಕಾದಿರಿಸಿಕೊಳ್ಳಿ. ಕಾದು ಕಾದು ನಿರಾಶರಾಗಬೇಡಿ.

ಹೋಪ್ ಇಟ್ಟುಕೊಂಡು, ಕೋಪ ಮಾಡಿಕೊಳ್ಳದೆ ಕೋಪನ ಹೇಗಣ್ಣದ ಬೊಗಳೂರು ಘೋಷಣೆ ಬುಧವಾರದ ಸಂಚಿಕೆಯಲ್ಲಿ ಪ್ರಕಟವಾಗಲಿದೆ.!

Barking News!: ಮಕ್ಕಳೆಲ್ಲಾ ನಿಗೂಢ ನಾಪತ್ತೆ!

2009-12-03T08:34:00.002+05:30

[ಬೊಗಳೂರು ತನಿಖಾ ಬ್ಯುರೋದಿಂದ]

ಬೊಗಳೂರು, ಡಿ.2- ಬುಧವಾರದಿಂದೀಚೆಗೆ ಅಂಗನವಾಡಿಗಳಲ್ಲಿ, ಶಾಲೆಗಳಲ್ಲಿ ಮಕ್ಕಳು ದಿಢೀರ್ ನಾಪತ್ತೆಯಾಗುತ್ತಿರುವ ಘಟನೆ ಇಡೀ ಬೊಗಳೂರು ರಾಷ್ಟ್ರಾದ್ಯಂತ ತೀವ್ರ ಸಂಚಲನ ಮೂಡಿಸಿದ್ದು, ಇದರ ತನಿಖೆಗೆ ಸಿಬಿಐ, ಸಿಐಡಿ, ಸೇನೆ, ಪೊಲೀಸ್ ಇಲಾಖೆಗಳೆಲ್ಲವೂ, ಜೊತೆಗೆ ಹೋಂ ಗಾರ್ಡ್ಸ್, ನಾಗರಿಕ ಪೊಲೀಸರು, ಮೋರಲ್ ಪೊಲೀಸರು ಕೂಡ ಹೊರಟಿದ್ದಾರೆ ಎಂದು ವರದಿಯಾಗಿದೆ.

ಈ ಎಲ್ಲಾ ತನಿಖಾ ಏಜೆನ್ಸಿಗಳು ತೀವ್ರ ತಪಾಸಣೆ, ತನಿಖೆ, ಸಂಶೋಧನೆ, ಪರಿಶೋಧನೆ, ಪರೀಕ್ಷೆ, ಪರಿಶೀಲನೆ, ತಪಾಸಣೆ ಎಲ್ಲವನ್ನೂ ನಡೆಸಿ ಇದಕ್ಕೆ ಕಾರಣವೇನೆಂಬುದನ್ನು ಪತ್ತೆ ಹಚ್ಚುವಲ್ಲಿ ಕೊನೆಗೂ ಯಶಸ್ವಿಯಾಗಿದ್ದಾರೆ. ಇದಕ್ಕೆಲ್ಲ ಮೂಲ ಕಾರಣ, ಕಾಂಗ್ರೆಸ್ ಪ್ರಧಾನ ಕಾರ್ಯದರ್ಶಿ ರಾಹುಲ್ ಗಾಂಧಿ ಅವರು 'ಮಕ್ಕಳೇ ರಾಜಕೀಯಕ್ಕೆ ಬನ್ನಿ' ಎಂದು ಇಲ್ಲಿ ಆಹ್ವಾನ ನೀಡಿರುವುದು.

ನೆಟ್ಟೋದುಗ ಅಂಗನವಾಡಿ ಮಕ್ಕಳೆಲ್ಲಾ ನೆಟ್ ಬಿಟ್ಟೋಡುಗರಾಗಿ ಕಾಂಗ್ರೆಸ್ ಕಾರ್ಯಾಲಯದಲ್ಲಿ ಪತ್ತೆಯಾಗಿರುವುದನ್ನು ಇದೇ ಸಂದರ್ಭ ಬೊಗಳೆ ರಗಳೆ ಬ್ಯುರೋದ ಏಕ ಸದಸ್ಯ ತನಿಖಾ ತಂಡದ ಎಲ್ಲ ಸಿಬ್ಬಂದಿಗಳು ಪತ್ತೆ ಹಚ್ಚಿದ್ದಾರೆ.

ಆದರೆ, ಇದೇ ಸಂದರ್ಭ ಕೆಲವು ಮಕ್ಕಳು ಅದಾಗಲೇ ಅಳಲಾರಂಭಿಸಿದ್ದು, ತಮ್ಮ ತಮ್ಮ ಮನೆಗೆ ಜೋಲು ಮೋರೆ ಹಾಕಿಕೊಂಡು ಹಿಂತಿರುಗಲಾರಂಭಿಸಿದ್ದವು. ಅಲ್ಲೇ ಇದ್ದ ಮಕ್ಕಳ ರಾಶಿಯಲ್ಲಿ ಒಂದೆರಡು ಮಕ್ಕಳನ್ನು ಹೆಕ್ಕಿಕೊಂಡು ತಡೆದು ನಿಲ್ಲಿಸಿ ಮಾತನಾಡಿಸಿದಾಗ, ಯಾಕೆ ಆಳುತ್ತಿರುವುದು ಎಂಬ ಪ್ರಶ್ನೆಗೆ ತೊದಲು ನುಡಿಯ ಉತ್ತರವೂ ದೊರಕಿತು.

ಈ ಚಿಳ್ಳೆ ಪಿಳ್ಳೆಗಳು ಅಳುತ್ತಲೇ ಹೇಳಿದ ಉತ್ತರ: "ಅವರು ಹೇಳಿದ್ದು ಬರೇ ಮಕ್ಕಳ ಬಗ್ಗೆ ಅಲ್ಲ, ರಾಜಕಾರಣಿಗಳ ಮಕ್ಕಳ ಬಗ್ಗೆ ಮಾತ್ರ. ರಾಜಕಾರಣಿಗಳ ಮಕ್ಕಳಿಗೆ ಮಾತ್ರವೇ ಅವರು ಟಿಕೆಟ್ ನೀಡ್ತಾರಂತೆ. ಉಳಿದರೆ, ರಾಜಕಾರಣಿಗಳ ಪತ್ನಿಯರಿಗೂ ಟಿಕೆಟ್ ನೀಡ್ತಾರಂತೆ!"

ಮಕ್ಕಳೇಕೆ ಕಾಣಿಸುತ್ತಿಲ್ಲ? ಬೊಗಳೂರು ಬ್ಯುರೋ ತನಿಖೆ!

2009-12-02T17:45:00.000+05:30

ನಾಳೆ ಬೊಗಳೂರಿನಲ್ಲಿ ಸುದ್ಧಿ ಸ್ಫೋಟ ಆಗಲಿದೆ.

ಮಕ್ಕಳ ನಾಪತ್ತೆ ಪ್ರಕರಣವನ್ನು ಬೊಗಳೂರು ಬೊಗಳೆ ಬ್ಯುರೋ ಭೇದಿಸಿದೆ.

ಇದರ ಪರಿಪೂರ್ಣ ವರದ್ದಿ, ಗುರುವಾರದ ಸಂಚಿಕೆಯಲ್ಲಿ!

ನಿಮ್ಮ ಪ್ರತಿಯನ್ನು ದ್ವಿಪ್ರತಿಯಾಗಿ ಕಾದಿರಿಸಿ... ಮತ್ತು ನಿರಾಶರಾಗದಿರಿ!

(ಆ-ದೇಶದ ಮೇರೆಗೆ - ಸೊಂಪಾದ-ಕರು)

ಬೇಕಾರಾಗಿದ್ದಾರೆ!

2009-11-26T08:00:00.001+05:30

[ಮುಂಬೈ ಮೇಲೆ ಪಾಕಿಸ್ತಾನೀ ಬೆಂಬಲಿತ ಉಗ್ರಗಾಮಿಗಳಿಂದ ದಾಳಿ ನಡೆದು ಒಂದು ವರ್ಷವಾದರೂ, ಪಾಕಿಸ್ತಾನವು ಪರಿಣಾಮಕಾರಿಯಾಗಿ ಯಾವುದೇ ಕ್ರಮ ಕೈಗೊಂಡಿಲ್ಲ ಮತ್ತು ಆ ರೀತಿ ಕ್ರಮ ಕೈಗೊಳ್ಳುವಂತೆ ಮಾಡುವಲ್ಲಿ ಸರಕಾರ ವಿಫಲವಾಗಿರುವ ಹಿನ್ನೆಲೆಯಲ್ಲಿ ಬೊಗಳೂರಿನಲ್ಲಿ ಕಾಣಿಸಿಕೊಂಡ ಜಾಹೀರಾತಿದು]

ಮುಂಬೈ ಮೇಲೆ ಕಳೆದ ವರ್ಷದ ನವೆಂಬರ್ ತಿಂಗಳಲ್ಲಿ ದಾಳಿ ನಡೆಸಿದವರು ಮತ್ತು ಅವರ ಅಪ್ಪ ಅಮ್ಮ ಎಲ್ಲರೂ ಪಾಕಿಸ್ತಾನದಲ್ಲಿದ್ದಾರೆ ಎಂಬುದು ಜಗತ್ತಿಗೇ ತಿಳಿದರೂ, ಪಾಕಿಸ್ತಾನವು ಈ ಬಗ್ಗೆ ಕ್ರಮ ಕೈಗೊಳ್ಳುವಂತೆ ಮಾಡಿಸುವ ವ್ಯಕ್ತಿಗಳು ಬೇಕಾರಾಗಿದ್ದಾರೆ.

ಪಾಕಿಸ್ತಾನವು ಪ್ರತಿ ಬಾರಿಯೂ ಸಾಕ್ಷ್ಯಾಧಾರ ಕೊಡಿ, ಸಾಕ್ಷ್ಯಾಧಾರ ಕೊಡಿ ಅಂತ ಕೇಳುತ್ತಿರುವಾಗ, ಕೊಡ್ತೀವಿ ಕೊಡ್ತೀವಿ ಅನ್ನುತ್ತಲೇ ರಾಶಿ ರಾಶಿ ಕಾಗದ ಪತ್ರಗಳನ್ನು ಟ್ರಕ್‌ಗಳಲ್ಲಿ ಪಾಕಿಸ್ತಾನಕ್ಕೆ ರವಾನಿಸುವ ಸರಕಾರವನ್ನು ನಿಭಾಯಿಸುವವರು ಬೇಕಾರಾಗಿದ್ದಾರೆ.

ಅಮಾಯಕ ಜೀವಗಳನ್ನು ಬಲಿತೆಗೆದುಕೊಂಡ ಉಗ್ರಗಾಮಿ ದಾಳಿಯನ್ನು ಇನ್ನಾದರೂ ಸಮರ್ಥವಾಗಿ ಎದುರಿಸುವಲ್ಲಿ ಪೊಲೀಸ್ ವ್ಯವಸ್ಥೆಯನ್ನು ಇನ್ನೂ ಆಧುನೀಕರಣಗೊಳಿಸಲು ಸಮಯವಿಲ್ಲದಿರುವುದರಿಂದ, ಇನ್ನಾದರೂ ಪೊಲೀಸರಿಗೆ ಬಲ ತುಂಬುವವರು ಬೇಕಾರಾಗಿದ್ದಾರೆ.

ಪಾಕಿಸ್ತಾನದೊಂದಿಗೆ ಶಾಂತಿ ಶಾಂತಿಯೇ ಮುಖ್ಯವಾಗಿರುವವರು ಮತ್ತು ಯಾವುದೇ ಕಾರಣಕ್ಕೂ ಪಾಕಿಸ್ತಾನವು ನೊಂದುಕೊಳ್ಳಬಾರದು. ಯಾಕೆಂದರೆ, ಅವರಲ್ಲಿಯೂ ಉಗ್ರಗಾಮಿಗಳ ದಾಳಿ ನಡೆಯುತ್ತಿದೆಯಲ್ಲ ಎಂಬ ಮನೋಭಾವವಿರುವವರು ದೇಶವಾಳಲು ಬೇಕಾರಾಗಿದ್ದಾರೆ.

ಪಾಕಿಸ್ತಾನವನ್ನು ನಡುಗಿಸುವ, ಉಗ್ರರ ಮೇಲೆ ಕಠಿಣ ಕ್ರಮ ಕೈಗೊಳ್ಳುವಂತೆ ಸರ್ವ ರೀತಿಯಲ್ಲಿಯೂ ಒತ್ತಡ ಹೇರುವ ಅವಕಾಶಗಳನ್ನೆಲ್ಲಾ ಕೈಚೆಲ್ಲಿ, ಶಾಂತಿ ಮಂತ್ರ ಪಠಿಸುತ್ತಲೇ ಇರುವವರು ಬೇಕಾಗಿದ್ದಾರೆ.

ಅತ್ತ ಕಡೆಯಿಂದ ಚೀನಾ ಪಾಕಿಸ್ತಾನಕ್ಕೆ ಸಕಲ ರೀತಿಯಲ್ಲಿಯೂ ನೆರವು ನೀಡುತ್ತಾ, ಅರುಣಾಚಲ ಪ್ರದೇಶ ನನ್ನದು ಎಂದು ಹೇಳಿಕೊಳ್ಳುತ್ತಲೇ ಇದೆ. ಇನ್ನೊಂದೆಡೆಯಿಂದ, ಪಾಕಿಸ್ತಾನಕ್ಕೆ ಉಗ್ರರ ವಿರುದ್ಧ ಹೋರಾಡಲೆಂದು ಕೋಟಿ ಕೋಟಿ ನೆರವು ನೀಡುತ್ತಲೇ, ಭಾರತ ನನ್ನ ಪರಮಾಪ್ತ ರಾಷ್ಟ್ರ ಎಂದು ಹೇಳಿಕೊಳ್ಳುತ್ತಿರುವ ಚೀನಾ, ಇವುಗಳೊಂದಿಗೆ ಮೈತ್ರಿಯನ್ನು ಗಾಢವಾಗಿ ಬೆಸೆಯುವವರು ಬೇಕಾರಾಗಿದ್ದಾರೆ.

ದೇಶದಲ್ಲಿ ಪ್ರಜೆಗಳು ಬೆಲೆ ಏರಿಕೆಯಿಂದ ಕಂಗಾಲಾಗಿ, ಪ್ರವಾಹ, ಅತಿವೃಷ್ಟಿ-ಪ್ರವಾಹ, ಅನಾವೃಷ್ಟಿಯಿಂದ ತತ್ತರಿಸುತ್ತಿದ್ದರೂ, ನಮಗೆ ಬೇರೆ ದೇಶಗಳೊಂದಿಗಿನ ಸಂಬಂಧವೇ ಮುಖ್ಯ, ಅದಕ್ಕಿಂತಲೂ ಅಣು ಒಪ್ಪಂದ ಮುಖ್ಯ ಎನ್ನುತ್ತಾ, ದೇಶದ ಜನತೆಯ ಕಣ್ಣೀರೊರೆಸಬೇಕಾದವರು ಬೇಕಾರಾಗಿದ್ದಾರೆ.

ಭವಿಷ್ಯದಲ್ಲಿ ನಡೆಯುವ ಉಗ್ರರ ನೂರಾರು ದಾಳಿ ಪ್ರಕರಣಗಳಿಗೆ ಈಗಲೇ ವಿಷಾದಿಸ್ತೀವಿ ಮತ್ತು ಮುಂದೆ ನಡೆಯದಂತೆ ಸೂಕ್ತ ಕ್ರಮ ಕೈಗೊಳ್ತೀವಿ ಅಂತ ಭರವಸೆಯನ್ನು ಈಗಲೇ ಕೊಡುವ ದೇಶವಾಳುವ ನಾಯಕರೂ ಬೇಕಾರಾಗಿದ್ದಾರೆ.

ಮುಖ್ಯ ಅರ್ಹತೆ: ಉಗ್ರಗಾಮಿಗಳೇನಾದರೂ ಇನ್ನು ಮುಂದೆ ಭಾರತದ ಮೇಲೆ ದಾಳಿ ಮಾಡಿದರೆ ಅವರಿಗೆಲ್ಲಾ ಬಾಳಾ ಠಾಕ್ರೆ ಮತ್ತು ಶಿವಸೇನೆಯ ವಿರುದ್ಧ ಏನಾದರೂ ಒದರುವಂತೆ ಉಪಾಯ ಮಾಡಿ ಮನವೊಲಿಸುವುದು. ಇದರಿಂದ ಶಿವಸೈನಿಕರೇ ಈ ಉಗ್ರರನ್ನು ಚೆನ್ನಾಗಿ ಚಚ್ಚಿ ಚಚ್ಚಿ ಮುಗಿಸಿಬಿಡಬಹುದು. ಇಲ್ಲವಾದರೆ, ಹಿಂದಿ, ಇಂಗ್ಲಿಷಿನಲ್ಲಿ ಪ್ರಮಾಣವಚನ ಸ್ವೀಕರಿಸುವಂತೆ/ಶಪಥ ಮಾಡುವಂತೆ/ಪಣ ತೊಡುವಂತೆ/ ಭಾಷೆ ಕೊಡುವಂತೆ ಉಗ್ರರನ್ನು ಪ್ರೇರೇಪಿಸುವುದು. ಆಗ ಶಿವಸೇನೆ ಮತ್ತು ಮಹಾರಾಷ್ಟ್ರ ನವ ನಿರ್ನಾಮ ಸೇನೆಗಳು ನಾ ಮುಂದು ತಾ ಮುಂದು ಅಂತ ಚಚ್ಚಲು ಹೊರಡುತ್ತವೆ. ಇಂತ ಚಾಕಚಕ್ಯತೆ ಉಳ್ಳವರು ಕೂಡ ಬೇಕಾರಾಗಿದ್ದಾರೆ.
(ಸೂಚನೆ: ನಾವು ಸರಿಯಾಗಿಯೇ ಬರೆದಿದ್ದರೂ ಬೇಕಾಗಿದ್ದಾರೆ ಮಧ್ಯೆ ಒಂದು ರಾ ಹೆಚ್ಚು ಸೇರಿಕೊಂಡಿದ್ದು ಹೇಗೆಂಬುದು ನಮಗೇ ಗೊತ್ತಿಲ್ಲ. ಈ ಬಗ್ಗೆ ತನಿಖೆಗೆ ಆಯೋಗವೊಂದನ್ನು ರಚಿಸಲಾಗಿದ್ದು, ಅದಕ್ಕೆ ಹತ್ತಾರು ಕೋಟಿ ರೂಪಾಯಿ ಖರ್ಚು ಮಾಡಲಾಗುತ್ತದೆ. ಈ ಆಯೋಗವು ಸುಮಾರು ೧೭ ವರ್ಷಗಳ ಬಳಿಕ ಎಲ್ಲರಿಗೂ ಗೊತ್ತಿರುವ ವರದಿಯನ್ನು ಸಲ್ಲಿಸಲಿದೆ.)

ಗಂಡಾಂತರ ಪದ ನಿಷೇಧಕ್ಕೆ ಪುರುಷರ ಆಗ್ರಹ

2009-11-19T15:39:00.001+05:30

(ಬೊಗಳೂರು ಗಂಡಸರು-ಹೆಂಡಸರ ಅಸಮಾನತಾ ಬ್ಯುರೋದಿಂದ)

ಬೊಗಳೂರು, ನ.19- ಇಂದು ಅಂತಾರಾಷ್ಟ್ರೀಯ ಪುರುಷರ ದಿನವಾಗಿರುವುದರಿಂದ ಬೊಗಳೂರಿನ ಬೀದಿ ಬೀದಿಗಳಲ್ಲಿ ಪ್ರತಿಭಟನಾ ಮೆರವಣಿಗೆ ಹಮ್ಮಿಕೊಂಡ ಅಖಿಲ ಬೊಗಳೆ ಪುರುಷರ ಸಂಘವು, ಗಂಡಾಂತರ ಎಂಬ ಶಬ್ದ ನಿಷೇಧಿಸಬೇಕು ಎಂದು ಒತ್ತಾಯಿಸಿದ್ದಾರೆ.

ಮಹಿಳೆಯರು ಯಾವುದೇ ತಪ್ಪು ಮಾಡಿದರೂ ಅದು ದೊಡ್ಡ ಸಮಸ್ಯೆಗಳಿಗೆ ಕಾರಣವಾಗುತ್ತದೆ. ಅದನ್ನು ಗಂಡಾಂತರ ಎಂದು ಕರೆಯುವುದು ಎಷ್ಟು ಸರಿ ಎಂದು ಪ್ರಶ್ನಿಸಿದ ಅವರು, ಮಹಿಳೆಯರು ಗಂಡಂದಿರನ್ನು ಬದಲಾಯಿಸುವ ಪ್ರಕ್ರಿಯೆಗೆ ಮಾತ್ರವೇ ಗಂಡಾಂತರ ಎಂಬ ಪದವನ್ನು ಬಳಸಬೇಕು ಎಂದು ಆ(ಹ್)ಗ್ರಹಿಸಿದ್ದಾರೆ.

ಗಂಡಾಂತರ ಪದವನ್ನು ನಿಷೇಧಿಸದಿದ್ದರೆ, ಅದರ ಜೊತೆಗೆ ಪುರುಷರು ಆಗಾಗ್ಗೆ ಮಾಡುವ ತಪ್ಪುಗಳಿಗೆ ಮತ್ತು ಅವು ಭಾರೀ ತೊಂದರೆಗೆ ಕಾರಣವಾದರೆ, ಅವುಗಳನ್ನು ಹೆಂಡಾಂತರ(ಕಾರಿ) ಎಂದು ಕರೆಯಬೇಕು ಎಂದು ಕೂಡ ಒತ್ತಾಯಿಸಿದ್ದಾರೆ.

ಆದರೆ ಇದು ಹೆಂಡವನ್ನು ಪದೇ ಪದೇ ಬದಲಾಯಿಸಿ ಕುಡಿಯುವ ಪ್ರಕ್ರಿಯೆಗೆ ಪರ್ಯಾಯ ಪದವಾಗುತ್ತದೆಯೇ ಎಂದು ಬೊಗಳೂರು ಬ್ಯುರೋ ವರದ್ದಿಗಾರರು ಕೇಳಿದ ಪ್ರಶ್ನೆಗೆ ಅವರ ಬಳಿ ಉತ್ತರವಿರಲಿಲ್ಲ! ಅವರು ನಕ್ಕ ನಗೆ ನೋಡಿದರೆ, ಸಲ್ಮಾನ್ ರಶ್ದೀ ಆಗಾಗ್ಗೆ ಹೆಂಡ್ತೀರನ್ನು ಬದಲಾಯಿಸ್ತಾ ಹೆಂಡಾಂತರ ಮಾಡುವ ಪ್ರಕ್ರಿಯೆ ನೆನಪಿಗೆ ಬಂದಂತೆ ತೋರುತ್ತಿತ್ತು.

ಸಮಾನತೆ ಸಮಾನತೆ ಎಂದು ಹೋರಾಟ ಮಾಡುವ ಹೆಂಡಸರು ಉಫ್.... ಅಲ್ಲಲ್ಲ ಹೆಂಗಸರು, ಈ ಗಂಡಾಂತರದಂತಹುದೇ ಪದ (ಹೆಂಡಾಂತರ) ನಮಗೆ ಬೇಕು ಎಂದು ಒತ್ತಾಯಿಸುತ್ತಿಲ್ಲವೇಕೆ, ಕೂಗಾಡುತ್ತಿಲ್ಲವೇಕೆ ಮತ್ತು ಅರಚಾಡುತ್ತಿಲ್ಲವೇಕೆ ಎಂದು ಪ್ರಶ್ನಿಸಿದ ಅವರು, ಆದರೆ, ಹೆಣ್ಣುಗಳ ಪಾನೀಯ ಸೇವನೆ ಪ್ರಕ್ರಿಯೆಗೆ ಹೆಂಗಸರ ಕುಡಿತ ಅಂತ ಕರೀತಾರೆ, ಅದೇ ರೀತಿ ಗಂಡುಗಳ ಪ್ರಕ್ರಿಯೆಗೆ ಗಂಗಸರ* ಕುಡಿತ ಅಂತ ಕರೆಯುವುದಿಲ್ಲವೇಕೆ, ಹೆದರಿಕೆಯೇ? ಎಂದು ಪ್ರಶ್ನಿಸಿದರು.

ಇದೇ ರೀತಿಯಾಗಿ, ಗಂಡಸರನ್ನೆಲ್ಲಾ ಹೆಂಡಸಾರಾಯಿ ಕುಡುಕರು ಅಂತೆಲ್ಲಾ ಹೀಯಾಳಿಸುತ್ತಾರೆ, ಇನ್ನು ಮುಂದೆ ಅದನ್ನು ಗಂಡಸಾರಾಯಿ ಎಂದು ಬದಲಾಯಿಸತಕ್ಕದ್ದು ಎಂದೂ ಅವರು ಒತ್ತಾಯಿಸಿದ್ದಾರೆ. ಇಲ್ಲವಾದಲ್ಲಿ ಇಲ್ಲಿಯೂ ಹೆಂಗಸರಿಗೇ ಪ್ರಾಧಾನ್ಯತೆ ಕೊಟ್ಟು, ಸಾಮಾಜಿಕ ಅಸಮತೋಲನಕ್ಕೆ ನಾಂದಿ ಹಾಡುತ್ತದೆ ಎಂದವರು ಹೀಗಳೆದಿದ್ದಾರೆ.

ಈ ರೀತಿಯಾಗಿ ಮಹಿಳೆಯರಿಗೇ ಎಲ್ಲ ಪದಗಳಲ್ಲಿಯೂ ಪ್ರಾಧಾನ್ಯತೆ ನೀಡುವುದರಿಂದ ಸಾಮಾಜಿಕ ಸಮತೋಲನ ತಪ್ಪುತ್ತದೆ ಎಂದವರು ಅಭಿಪ್ರಾಯಪಟ್ಟರು.

* ಗಂಗಸರ = ಕರಾವಳಿ ಭಾಷೆಯಲ್ಲಿ ಹೆಂಡ ಎಂದರ್ಥ

ನರ್ಸರಿ ರೈಮ್ ಬೇಡ, ಸಿನಿಮಾ ಹಾಡು ಕಲಿಸಿ: ಮಕ್ಕಳ ಆಗ್ರಹ

2009-11-16T15:57:00.001+05:30

(ಬೊಗಳೂರು ಬಾಲ ಕರುಗಳ ಬ್ಯುರೋದಿಂದ)

ಬೊಗಳೂರು, ನ.15- ಕರ್ನಾಟಕ ರಾಜ್ಯೋತ್ಸವಕ್ಕೂ ಎಚ್ಚರವಾಗದ ಬೊಗಳೂರು ಬ್ಯುರೋ ವಿರುದ್ಧ ಕನ್ನಡ ವಿರೋಧಿ ಪತ್ರಿಕೆ ಎಂದು ಕನ್ನಡ ಹೋರಾಟಗಾರರು ಪ್ರತಿಭಟನೆ ನಡೆಸಲು ಸಿದ್ಧತೆ ನಡೆಸುತ್ತಿರುವಂತೆಯೇ, ನಾವೇನೂ ಗಣಿ ಧಣಿಗಳೊಂದಿಗೆ ಸೇರಿಕೊಂಡಿಲ್ಲ ಎಂದು ಸ್ಪಷ್ಟಪಡಿಸಿರುವ ಬೊಗಳೂರು ಸೊಂಪಾದಕರುಗಳು, ಇದೀಗ ಮಕ್ಕಳ ದಿನಾಚರಣೆಯ ದಿನ ಎಚ್ಚೆತ್ತುಕೊಳ್ಳಲು ನಿರ್ಧರಿಸಿದ್ದರಾದರೂ, ಅದು ಕೂಡ ಡೇಟ್ ಬಾರ್ ಆಗಿ ಹೋಗಿರುವುದಕ್ಕೆ ಯಾವುದೇ ಬಾರ್ ಕಾರಣವಲ್ಲ ಎಂದು ಸ್ಪಷ್ಟಪಡಿಸಲಾಗುತ್ತಿದೆ.

ಮಕ್ಕಳ ದಿನಾಚರಣೆ ಅದು ಕೂಡ ಎರಡನೇ ಶನಿವಾರ ಬಂದ ಕಾರಣದಿಂದಾಗಿ ಮಕ್ಕಳು ಮತ್ತು ಮರಿಗಳೆಲ್ಲಾ ಕೆಂಡಾಮಂಡಲವಾಗಿದ್ದುದು ಅವುಗಳ ಮುಖಾರವಿಂದ ನೋಡಿದಾಗಲೇ ಗೊತ್ತಾಗಿಬಿಟ್ಟಿತ್ತು ಬೊಗಳೂರು ಬ್ಯುರೋಗೆ. ಒಂದೊಂದೇ ಬಾಲದಕರುಗಳನ್ನು ವಿಚಾರಿಸುವುದು ಕಷ್ಟಕರ ಸಂಗತಿ ಎಂದು ತಿಳಿದ ಹಿನ್ನೆಲೆಯಲ್ಲಿ, ಅತ್ಯಂತ ಸುಲಭವಾದ ಬಾಲ-ಕರುಗಳ ಸಂಘವನ್ನು ಪ್ರವೇಶಿಸಲಾಯಿತು.

ಅವರು ಅದಾಗಲೇ ಬೊಗಳೂರು ಬ್ಯುರೋ ಸಿಬ್ಬಂದಿಗಾಗಿ ಕಾಯುತ್ತಿರುವಂತೆ ಕಂಡುಬಂದಿತ್ತು ಮತ್ತು ನಮ್ಮ ಸಿಬ್ಬಂದಿ ಹೊಕ್ಕ ತಕ್ಷಣ ಇದು ಪತ್ರಿಕಾಗೋಷ್ಠಿ ಎಂದು ಘೋಷಿಸಿ ಮಾತನಾಡತೊಡಗಿದರು.

ಮುಖ್ಯವಾಗಿ ಈ ಪತ್ರಿಕಾಗೋಷ್ಠಿ ಕರೆದಿರುವುದು ಮಕ್ಕಳಿಗೂ ಸಮಾನತೆ ಬೇಕು ಎಂಬುದನ್ನು ಹೇಳುವುದಕ್ಕಾಗಿ ಎಂದು ಬಾಲ-ಕರುಗಳ ಸಂಘದ ಅಧ್ಯಕ್ಷ ಬಾಲಕೃಷ್ಣ ಬಾಲ ಅವರು ಘೋಷಿಸಿದರು.

ನಮಗೆ ಅಂಗನವಾಡಿಗಳಲ್ಲಿ ನರ್ಸರಿ ರೈಮ್ ಹೇಳಿಕೊಡಲಾಗುತ್ತದೆ. ಹೇಳಿದ್ದನ್ನೇ ಹೇಳಿ ಹೇಳಿ ಸಾಕಾಗಿದೆ. ಆದರೆ, ಅದೇ ಬೆಳೆದುಬಿಟ್ಟ ಬಾಲಕರ ಬಾಯಲ್ಲಿ ಸಿನಿಮಾ ಪದಗಳು, ಮಚ್ಚು-ಗಿಚ್ಚು, ಹಳೇ ಪಾತ್ರೆ ಹಳೇ ಕಬ್ಣ ಮುಂತಾದ ಪದಗಳು ನಲಿದಾಡುತ್ತವೆ. ಆದರೆ ನಮಗೇಕೆ ಈ ಶಿಕ್ಷೆ ಎಂದು ಅವರು ಪ್ರಶ್ನಿಸಿದರು.

ಹೀಗಾಗಿ, ಇನ್ನು ಮುಂದೆ ನರ್ಸರಿ ರೈಮ್‌ಗಳ ಬದಲಿಗೆ ಕನ್ನಡದ ಸಿನಿಮಾ ಹಾಡುಗಳನ್ನೇ ನಮಗೆ ಕಲಿಸಬೇಕು, ಮತ್ತು ಅದನ್ನು ಬಾಲವಾಡಿ ಎಂದು ಕರೆಯಬಾರದು. ಬಾಲಶಿಕ್ಷಣ ಕೇಂದ್ರ ಎಂದು ಕರೆಯಬೇಕು ಎಂಬ ಬೇಡಿಕೆಗಳನ್ನೂ ಸಂಘದ ಅಧ್ಯಕ್ಷರು ಮತ್ತು ಸರ್ವ ಸದಸ್ಯರು ಮುಂದಿಟ್ಟರು.

ಟ್ವಿಂಕಲ್ ಟ್ವಿಂಕಲ್ ಲಿಟ್ಲ್ ಸ್ಟಾರ್ ಮುಂತಾದ ಕ್ಲಿಷ್ಟಕರ ಪದಗಳ ಉಚ್ಚಾರಣೆ ಮಕ್ಕಳಾಗಿರುವುದರಿಂದ ನಮಗೆ ಕಷ್ಟವಾಗುತ್ತದೆ. ಅದೇ ರೀತಿ ಬಾ ಬಾ ಬ್ಲ್ಯಾಕ್ ಶೀಪ್, ರೈನ್ ರೈನೇ ಗೋ ಅವೇ ಮುಂತಾದ ಅರ್ಥ ಹೀನ ಹಾಡುಗಳು ನಮಗೆ ಭವಿಷ್ಯದಲ್ಲಿ ಅಗತ್ಯವೇ ಇರುವುದಿಲ್ಲ. ಆದರೆ ಕೊಡೇ ಕಿಸ್ಸು, ಬಂತು ಬಂತು ಕರೆಂಟು ಬಂತು, ಹಳ್ಳಿ ಮೇಷ್ಟ್ರೇ ಹಳ್ಳಿ ಮೇಷ್ಟ್ರೇ ಪಾಠ ಹೇಳೀ ಬನ್ನೀ... ಮುಂತಾದ ಕನ್ನಡ ಸಿನಿಮಾ ಹಾಡುಗಳನ್ನು ಈಗಲೇ ಕಲಿತುಕೊಂಡರೆ, ಮುಂದೆ ಕುಣಿಯೋಣು ಬಾರಾ, ನಲಿಯೋಣು ಬಾರಾ, ಲಿಟ್ಲ್ ಸಿಂಗರ್, ಚಾಂಪಿಯನ್ ಡ್ಯಾನ್ಸರ್ ಮುಂತಾದ ರಿಯಾಲಿಟಿ ಶೋಗಳಲ್ಲಿ ಭಾಗವಹಿಸಲು ಅನುಕೂಲವಾಗುತ್ತದೆ ಎಂದು ಬಾಲ ಪ್ರತಿಪಾದಿಸಿದರು.

ನಾವು ಯಾವತ್ತೋ ಕರೆದ ಪತ್ರಿಕಾಗೋಷ್ಠಿಯ ವಿವರ ಇನ್ನೂ ನಿಮ್ಮ ಪತ್ರಿಕೆಯಲ್ಲಿ ಪ್ರಕಟವಾಗಿಲ್ಲವಲ್ಲ, ಎಂಥಾ ಪತ್ರಿಕೇರೀ ನಿಮ್ದು ಎಂದು ಬಾಲ-ಕರುಗಳೆಲ್ಲ ಜೋರು ಮಾಡಿ ಮಚ್ಚು-ಲಾಂಗು ಹಿಡಿದು ಬೆದರಿಕೆಯೊಡ್ಡಿದ ಬಳಿಕವಷ್ಟೇ ಈ ವರದ್ದಿಯನ್ನು ಇಲ್ಲಿ ಪ್ರಕಟಿಸಲಾಗಿದೆ ಎಂದು ಸೊಂಪಾದಕರು ಸ್ಪಷ್ಟಪಡಿಸಿದ್ದಾರೆ.

ಸಂತ್ರಸ್ತ ಗ್ರಾಮಗಳ ಸ್ಥಳಾಂತರ: ಬೊಗಳೂರಲ್ಲಿ ಆತಂಕ

2009-10-13T08:23:00.000+05:30

(ಬೊಗಳೂರು ಸಂತ್ರಸ್ತ ಸ್ಥಳಾಂತರ ಬ್ಯುರೋದಿಂದ)

ಬೊಗಳೂರು, ಅ.13- ಪ್ರವಾಹದ ಭೀತಿ ಎದುರಿಸುತ್ತಿರುವ ಹಳ್ಳಿಗಳನ್ನೇ ಸ್ಥಳಾಂತರಿಸುವ ಸರಕಾರದ ಕಾರ್ಯಕ್ರಮಕ್ಕೆ ಬೊಗಳೂರು ಒಂದು ಕಡೆಯಿಂದ ಸ್ವಾಗತಿಸಿದೆ ಮತ್ತು ಇನ್ನೊಂದು ಕಡೆಯಿಂದ ವಿರೋಧಿಸುತ್ತಿದೆ ಎಂದು ವರದಿಯಾಗಿದೆ.

ಓಟು ಪಡೆದು ನಿಧಾನಸಭೆಗೆ ಆಯ್ಕೆಯಾಗಿ ಅಲ್ಲಿ ಐದು ವರ್ಷಗಳ ಕಾಲ ನಿಧಾನವಾಗಿಯೇ ನಿದ್ದೆ ಮಾಡಿದ ಬಳಿಕ, ಮತ್ತೆ ಓಟು ಬರುವ ಹೊತ್ತಿಗೆ ನಿಧಾನವಾಗಿ ಮೇಲೆದ್ದು, ಸಕಲ ಮಂತ್ರಿ ಗಡಣ, ಹಿಂಬಾಲಕರನ್ನು ಕರೆದುಕೊಂಡು ಪ್ರವಾಹದೋಪಾದಿಯಲ್ಲಿ ಕ್ಷೇತ್ರಗಳಿಗೆ ಮಂತ್ರಿ ಮಾಗಧರು ಆಗಮಿಸುವುದರಿಂದ ಬೊಗಳೂರು ಸೇರಿದಂತೆ ಕೆಲವು ಹಳ್ಳಿಗಳ ಜನರು ಭಯಭೀತರಾಗಿದ್ದಾರೆ.

ಈ ರೀತಿ ಜಾರಕಾರಣಿಗಳ ಪ್ರವಾಹ ಬರುವ ಹಳ್ಳಿಗಳನ್ನು ಸ್ಥಳಾಂತರ ಮಾಡಿದರೆ, ಅಥವಾ ಇಂತಹಾ ಪ್ರವಾಹಗಳು ಮತ್ತೆ ಬಾರದಂತೆ ತಡೆದರೆ ಪುಣ್ಯ ಕಟ್ಟಿಕೊಟ್ಟಂತಾಗುತ್ತದೆ ಎಂದು ಬೊಗಳೂರಿನ ಜಾರಕೀಯ ಪ್ರವಾಹ ಸಂತ್ರಸ್ತರಲ್ಲೊಬ್ಬರಾದ ಬೊಗಳೇದಾಸ ಅವರು ಪ್ರತಿಕ್ರಿಯಿಸಿದ್ದಾರೆ.

ಈ ಗ್ರಾಮಗಳನ್ನು ನಿಧಾನಸೌಧ ಪಕ್ಕದಲ್ಲೇ ಇರುವ ಬೆಂಗಳೂರಿಗೆ ಸ್ಥಳಾಂತರಿಸಿದರೆ ಮತ್ತೂ ಉತ್ತಮ. ಅಲ್ಲಿನ ರಸ್ತೆಗಳಲ್ಲೇ ಹೇಗೂ ಬೇಕಾದಷ್ಟು ಹೊಂಡಾ-ಗುಂಡಿಗಳಿವೆ. ಅದರಲ್ಲೇ ಒಂದಷ್ಟು ಬೀಜ ಬಿತ್ತಿ ಕೃಷಿ ಮಾಡಬಹುದು ಎಂಬುದು ಅವರ ಮುಂದಾಲೋಚನೆ.

ಹಾಗಿದ್ದರೆ ಕಾಂಕ್ರೀಟು ಕಾಡುಗಳ ಮಧ್ಯೆ, ಕೃಷಿಗಾಗಿ ಫಲವತ್ತಾದ ಮಣ್ಣು ಬೇಡವೇ ಎಂಬ ಪ್ರಶ್ನೆಗೆ ಉತ್ತರಿಸಿದ ಬೊಗಳೇದಾಸ ಅವರು, ಸಿಕ್ಕೇ ಸಿಗುತ್ತದಲ್ಲ. ಹೇಗೂ ರಸ್ತೆಗಳ ಹೊಂಡಾಗುಂಡಿಗಳಿಂದ ಸಾಕಷ್ಟು ಧೂಳು ಅಥವಾ ಮಳೆ ಬಂದರೆ ಕೆಸರು ಮೇಲೇಳುತ್ತದೆ. ಪಕ್ಕದ ಕಟ್ಟಡಗಳಿಗೆ ರಾಚಿದ ಈ ಧೂಳು ಮತ್ತು ಕೆಸರನ್ನು ತೆಗೆದು ನಾವು ರಸ್ತೆಯಲ್ಲಿ ನೆಟ್ಟ ಗಿಡಗಳ ಬುಡಕ್ಕೆ ಹಾಕುತ್ತೇವೆ. ಇದು ಫಿಲ್ಟರ್ ಆದ ಮಣ್ಣು ಆಗಿದ್ದು, ಸಾಕಷ್ಟು ಫಲವತ್ತಾಗಿರುತ್ತದೆ ಎಂದವರು ಸ್ಪಷ್ಟನೆ ನೀಡಿದರು.

ಈಗ ಸ್ಥಳಾಂತರವನ್ನು ಸ್ವಾಗತಿಸುವವರು, ಅದನ್ನು ವಿರೋಧಿಸಲು ಏನು ಕಾರಣವಿದೆ ಎಂದು ಕೇಳಿದಾಗ, ತತ್ತರಿಸಿ ಉತ್ತರಿಸಿದ ಬೊಗಳೆದಾಸ, ಅವರು ಆ ಗ್ರಾಮಗಳನ್ನು ಏನಾದರೂ ಬೊಗಳೂರಿಗೆಯೇ ಸ್ಥಳಾಂತರಿಸಿದರೆ ಎಂಬುದೇ ನಮ್ಮ ಆತಂಕ ಎಂದರು.

ಇದಕ್ಕೇಕೆ ಆತಂಕಪಡಬೇಕು ಎಂದು ಪ್ರಶ್ನಿಸಿದಾಗ, ಎಲ್ಲ ಜಾರಕಾರಣಿಗಳ ಪ್ರವಾಹವು ಇಲ್ಲಿಗೆ ಬಂದರೆ ಅವರನ್ನು ಇಡಲು ಇಲ್ಲಿ ಜಾಗ ಇಲ್ಲ. ಅದಕ್ಕಾಗಿಯೇ ಶೋಕೇಸುಗಳನ್ನು ಸಿದ್ಧಪಡಿಸಬೇಕಾಗುತ್ತದೆ. ಒಂದಷ್ಟು ಜನರನ್ನು ಒಟ್ಟುಗೂಡಿಸಿ ಕೈಗೊಂದು ಮೈಕು ನೀಡುವ ಅನಿವಾರ್ಯತೆ ಎದುರಾಗುತ್ತದೆ. ಹೀಗಾಗಿ ಇಲ್ಲಸಲ್ಲದ ಕೆಲಸಕ್ಕೆ ಬೊಗಳೂರಿಗರು ಆತಂಕಿತರಾಗಿದ್ದಾರೆ ಎಂದರವರು.

ನೋBell ಶಾಂತಿ ಪ್ರಶಸ್ತಿ ಒಬಾಮ ಅಲ್ಲ, ಒಸಾಮ!

2009-10-09T15:35:00.000+05:30

(ಬೊಗಳೂರು Barking News! ಬ್ಯುರೋದಿಂದ)

ಬೊಗಳೂರು, ಅ.9- ಅಮೆರಿಕ ಅಧ್ಯಕ್ಷ ಒಬಾಮ ಅವರಿಗೇ ಈ ಬಾರಿಯ ನೊಬೆಲ್ ಶಾಂತಿ ಪ್ರಶಸ್ತಿ ಘೋಷಿಸಲಾಗಿದೆ ಎಂಬ ಮಾಧ್ಯಮಗಳ ವರದಿಯನ್ನು ನೇರಾನೇರವಾಗಿ, ಖಡಾಖಂಡಿತವಾಗಿ ತಳ್ಳಿ ಹಾಕಿರುವ ಬೊಗಳೆ-ರಗಳೆ, ಇದು ನಿಜ ಸುದ್ದಿಯನ್ನು ಒಡೆದು ಹಾಕಿದ (Breaking) ಸೊಂಪಾದಕರು ಮತ್ತು ವರದ್ದಿಗಾರರ ಕೈವಾಡ ಎಂದು ಘೋಷಿಸಿದೆ.

ಶೂ ಎಸೆದ ಪತ್ರಕರ್ತನನ್ನು ಕ್ಷಮಿಸಿದ್ದು, ಇರಾಕಿನಲ್ಲಿ ಯುದ್ಧಕ್ಕೆ ಮಂಗಳ ಹಾಡಿ ಶಾಂತಿಗೆ ಸಹಕರಿಸಿದ್ದು, ಮಾತ್ರವಲ್ಲದೆ ಭಾರತದ ಮೇಲೆ ದಾಳಿ ಮಾಡಿ, ದಿನಕ್ಕೊಂದು ಬಾಯಿಗೆ ಬಂದ ಹೇಳಿಕೆ ನೀಡುತ್ತಾ, ಸಣ್ಣ ಮಕ್ಕಳಂತೆ ಆಟವಾಡುತ್ತಿರುವ ಪಾಕಿಸ್ತಾನಕ್ಕೆ ಯಾವುದೇ ಬುದ್ಧಿ ಕಲಿಸುವ ಗೋಜಿಗೆ ಒಬಾಮ ಹೋಗಿಲ್ಲ ಎಂಬುದು ಅಪ(ಸ)ಥ್ಯವಾದರೂ, ಇದರ ನಡುವೆಯೇ ಇತ್ತೀಚೆಗೆ ಟಿವಿ ಸಂದರ್ಶನವೊಂದರಲ್ಲಿ ಅವರು ನೊಣವೊಂದನ್ನು ಹೊಡೆದು ಕೊಂದು ತಮ್ಮ ಹಿಂಸಾ ಮನೋಭಾವ ಮೆರೆದಿದ್ದಾರೆ. ಇದು ಅಶಾಂತಿಯಲ್ಲವೇ? ಹೀಗಾಗಿ ಒಬಾಮಗೆ ಹೇಗೆ ಈ ಪ್ರಶಸ್ತಿ ಲಭಿಸಿತು ಎಂಬುದು ಬೊಗಳೂರು ತಲೆಯಿಲ್ಲದ ಸೊಂಪಾದ-ಕರುಗಳ ಪ್ರಶ್ನೆ.

ಇದರ ಹಿಂದೆ ಸ್ವತಃ ಒಬಾಮ ಕೈವಾಡವನ್ನೂ ತಳ್ಳಿ ಹಾಕುವಂತಿಲ್ಲ. ಯಾಕೆಂದರೆ, ಒಬಾಮ ತಮ್ಮ ಅಧ್ಯಕ್ಷೀಯ ಚುನಾವಣಾ ಪ್ರಚಾರ ಸಂದರ್ಭದಲ್ಲಿ ಅಮೆರಿಕವನ್ನು ಬದಲಾಯಿಸುತ್ತೇವೆ ಎಂಬ ಸಂದೇಶದೊಂದಿಗೆ "Yes, We Can" ಎಂದೇ ಜನರಲ್ಲಿ ಸಮೂಹ ಸನ್ನಿ ಮೂಡಿಸಿದ್ದರು. ಈ ಕಾರಣಕ್ಕೆ, ನೊಬೆಲ್ ಸಮಿತಿಯವರಲ್ಲಿಯೂ "ನೀವು ನೊಬೆಲ್ ಪ್ರಶಸ್ತಿ ನನಗೆ ಕೊಡಬಹುದೇ?" ಎಂದು ಕೇಳಿದಾಗ, ಅದೇ ಸಮೂಹಸನ್ನಿಗೊಳಗಾಗಿದ್ದ ನೊಬೆಲ್ ಕಮಿಟಿಯವರು ಕೂಡ Yes, We can ಎಂದು ಹೇಳಿರುವುದೂ ಕೂಡ ಕಾರಣವಿರಬಹುದು ಎಂದು ಸಂದೇಹಿಸಲಾಗಿದೆ. ಈ ಬಗ್ಗೆ ತನಿಖೆ ನಡೆಯುತ್ತಿದೆ.

ಆದರೆ, ಇಲ್ಲಿ ಬೊಗಳೂರಿನ ಸಂದೇಹ ಬೇರೆಯದೇ ಆಗಿದೆ. ಇತ್ತೀಚೆಗಿನ ದಿನಗಳಲ್ಲಿ ಸತ್ತಿದ್ದಾನೆಯೇ ಬದುಕಿದ್ದಾನೆಯೇ ಎಂಬುದಿನ್ನೂ ಸಾಬೀ-ತಾಗದಿರುವ ಮತ್ತು ಅಮೆರಿಕದ ಯಾವುದೇ ಡ್ರೋನ್ ದಾಳಿಯೂ ತಾಗದಿರುವ ಒಸಾಮ ಬಿನ್ ಲಾಡೆನ್ ಯಾವುದೇ ಸದ್ದು ಮಾಡುತ್ತಿಲ್ಲ. ಬಾಂಬು ಪಟಾಕಿ ಸಿಡಿಸಿದ್ದೂ ಕಡಿಮೆ. ಸದ್ದು ಮಾಡಲು Bell ಬೇಕಲ್ಲವೇ? ಹೀಗಾಗಿ No Bell ಆಗಿಬಿಟ್ಟಿರುವ ಒಸಾಮನಿಗೆ ಅಶಾಂತಿ ಪ್ರಶಸ್ತಿ ಸಿಕ್ಕಿದ್ದು, ಅದನ್ನು ಸೊಂಪಾದಕರು ಅಥವಾ ರದ್ದಿಗಾರರು ಪ್ರೂಫ್ ಮಿಸ್ಟೇಕ್‌ನಿಂದ ಒbaಮ ಮಾಡಿ ಜಗಜ್ಜಾಹೀರುಗೊಳಿಸಿದ್ದಾರೆ ಎಂಬುದನ್ನು ಪತ್ತೆ ಹಚ್ಚಲಾಗುತ್ತಿದೆ.

ಅಹಿಂಸೆ ಪ್ರತಿಪಾದಿಸಿದ ಗಾಂಧೀಜಿಗೇ ದೊರೆಯದ ನೋ-ಬೆಲ್, ಗಾಂಧೀಜಿಯೇ ನನಗೆ ಪ್ರೇರಣೆ ಎನ್ನುತ್ತಲೇ ನೊಣವೊಂದನ್ನು ಕೊಂದು ಹಾಕಿದ್ದ ಒಬಾಮನಿಗೆ ದೊರೆತಿರುವುದು ಸರ್ವಥಾ ಸರಿಯಲ್ಲ ಎಂಬ ಕಾರಣಕ್ಕಾಗಿಯೇ ಬೊಗಳೂರು ಬ್ಯುರೋ ಈ ರೀತಿಯ ತಗಾದೆ ಎಬ್ಬಿಸಿರುವುದಾಗಿ ಎಲ್ಲಿಯೂ ವರದಿಯಾಗಿಲ್ಲ.

ಬೊಗಳೆ: ಜಾನುವಾರುಗಳ ದರ್ಜೆಗೆ ತಶಿ ಶರೂರ್ ಸಮರ್ಥನೆ

2009-10-01T09:11:00.001+05:30

(ಬೊಗಳೂರು ಟ್ವೀಟ್ ಬ್ಯುರೋದಿಂದ)

ಬೊಗಳೂರು, ಅ.1- ಕೇಂದ್ರ ಸಚಿವ ತಶಿ ಶರೂರ್ ಅವರು ವಿಮಾನದಲ್ಲಿ ಜಾನುವಾರು ಕ್ಲಾಸ್ ಇದೆ ಎಂಬ ಬಗ್ಗೆ ಹೇಳಿಕೆ ನೀಡಿ ಇದು ಸುಮ್ ಸುಮ್ನೇ ವಿವಾದವಾಗಿದ್ದನ್ನು ಕಂಡು ಕಿಡಿ ಕಾರಿದ್ದಾರೆ. ಅವರು ನೇರವಾಗಿ ಕಿಡಿ ಕಾರಿದವರೇ, ಅವರು ಕಾರಿದ ಕಿಡಿ ಬೊಗಳೂರಿನ ಕ.ಬು.ಗೇ ಬಂದು ಬಿದ್ದಿದೆ.

ಹೀಗಾಗಿ ಅವರು ಬೊಗಳೂರಿಗೇ ಬಂದು ಸಂದರ್ಶನ ನೀಡಿ ಒಂದು ಪ್ರಶ್ನೆಗೆ ಉತ್ತರಿಸಿ ಬೊಗಳೂರು ಬ್ಯುರೋವನ್ನು ತತ್ತರಿಸಿ ಹೋಗಿದ್ದಾರೆ.

ನೀವು ಜಾನುವಾರು ದರ್ಜೆಯ ವಿಮಾನ ಯಾನ ಅಂತ ಹೇಳಿದ್ದು ಸರಿಯೋ ತಪ್ಪೋ? ನೀವದನ್ನು ಒಪ್ಪುತ್ತೀರೋ ಇಲ್ವೋ? ಸಮರ್ಥಿಸಿಕೊಳ್ತೀರಾ ಇಲ್ಲಾ ನಿರಾಕರಿಸ್ತೀರಾ? ಪಕ್ಷವು ನಿಮ್ಮನ್ನು ಉಚ್ಚಾಟಿಸಿದರೆ ಒಪ್ತೀರಾ ಇಲ್ವಾ? ಜಾನುವಾರು ಅಂದಿದ್ದು ಸರಿಯೋ ತಪ್ಪೋ ಎಂಬಿತ್ಯಾದಿಯಾಗಿ ಒಂದೇ ಒಂದು ಪ್ರಶ್ನೆಯನ್ನು ಕೇಳಲಾಯಿತು.

ಅದಕ್ಕೆ ಅವರು ಉತ್ತರಿಸಿದ್ದು ಹೀಗೆ: ಜಾನುವಾರುಗಳು ಎಂದರೆ ನಾಯಿ, ಕುರಿ, ಬೆಕ್ಕು, ದನ, ಜನ, ಒಂಟೆ, ಆನೆ ಮುಂತಾದ ಪ್ರಾಣಿಗಳು ಬರುತ್ತವೆ. ನಾನು ನಿಜವಾಗಿಯೂ ಹೇಳಿದ್ದು ಆನೆಗಳನ್ನು ಉದ್ದೇಶಿಸಿ ಮಾತ್ರ. ಆದರೆ ಅವು ಬಿಳಿಯಾನೆಗಳಿಗೆ ಮಾತ್ರ!

ಅಂತ ಹೇಳಿ ಅವರು ಟ್ವಿಟ್ಟರಿನಲ್ಲಿಮತ್ತೊಂದು ಟ್ವೀಟ್ ಮಾಡಲು ಹೊರಟೇಹೋದರು.

ಚಂದ್ರನಲ್ಲಿ ನೀರು: ಭೂಮಿಯಲ್ಲಿ ತಲ್ಲಣ!

2009-09-24T12:56:00.004+05:30

(ಬೊಗಳೂರು ನೀರು ಪತ್ತೆ ಬ್ಯುರೋದಿಂದ)

ಬೊಗಳೂರು, ಸೆ.24- ಚಂದ್ರನಲ್ಲಿ ಸಾಕಷ್ಟು ನೀರು ಇದೆ ಎಂಬುದನ್ನು ತಿಳಿದುಕೊಂಡ ನಾಗರಿಕರು, ಇದೀಗ ಭೂಮಿಯ ಮೇಲಿರುವ ನೀರನ್ನೆಲ್ಲಾ ಬೇಕಾಬಿಟ್ಟಿ ಖರ್ಚು ಮಾಡಲಾರಂಭಿಸಿರುವುದು ಬೆಳಕಿಗೆ ಬಂದಿದೆ.

ಬೊಗಳೂರಿನ ಗಲ್ಲಿ ಗಲ್ಲಿಗಳ ಚರಂಡಿಯೆಲ್ಲಾ ಇದೀಗ ತುಂಬಿ ತುಳುಕಾಡುತ್ತಿದ್ದು, ಪ್ರವಾಹದ ಭೀತಿಯೂ ಉಂಟಾಗಿದೆ. ಬಹುಶಃ ಬುಧವಾರ ರಾತ್ರಿ ಬೆಂಗಳೂರಿನಲ್ಲಿ ಸಿಕ್ಕಾಪಟ್ಟೆ ಮಳೆಯಾಗಿರುವುದು ಕೂಡ ಇದೇ ಕಾರಣಕ್ಕೆ ಎಂದು ಅಜ್ಞಾನಿಗಳು ಶಂಕಿಸಿದ್ದಾರೆ.

ಸುದ್ದಿ ತಿಳಿದ ತಕ್ಷಣವೇ, ವರ್ಷಗಟ್ಟಲೆ ಸ್ನಾನ ಮಾಡದೇ ಇರುವವರೆಲ್ಲರೂ ಇದೀಗ ಸ್ನಾನ ಮಾಡಲು ಆರಂಭಿಸಿದ್ದಾರೆ ಎಂಬ ವರದಿಗಳು ರಾಜ್ಯದ ನಾನಾ ಕಡೆಗಳಿಂದ ಬರತೊಡಗಿವೆ.

ಚಂದ್ರನಲ್ಲಿ ಹೇಗಿದ್ದರೂ ಸಾಕಷ್ಟು ನೀರು ಇದೆಯಲ್ಲ, ಇನ್ನು ನಮಗೇತರ ಭಯ ಎಂದು ಬೊಗಳೂರಿನ ಪ್ರಜೆಯೊಬ್ಬರು ನೀರನ್ನೇ ಕುಡಿಯುತ್ತಾ, ನೀರಿನಲ್ಲೇ ಸ್ನಾನ ಮಾಡುತ್ತಾ, ನೀರನ್ನೇ ಹೊರಬಿಡುತ್ತಾ ಪ್ರಶ್ನಿಸಿದ್ದಾರೆ.

ಈ ವರದಿ ಪ್ರಕಟವಾಗತೊಡಗಿದಂತೆಯೇ, ದೇವಸ್ಥಾನದಲ್ಲಿ ಲೋಟೆಗಳಲ್ಲಿ ತೀರ್ಥ ಕೊಡಲು ಆರಂಭವಾಗಿರುವುದಾಗಿ ವರದಿಗಳು ತಿಳಿಸಿವೆ. ಮತ್ತೆ ಕೆಲವರು, ಚಂದ್ರನಲ್ಲಿ ನೀರಲ್ಲ, ಬೀರು ಲಭ್ಯವಾಗಿದೆ ಎಂದು ಅಪಾರ್ಥ ಮಾಡಿಕೊಂಡು, ಸಿಕ್ಕಾಪಟ್ಟೆ ಬೀರು ಕುಡಿದು ಕುಡಿದು ಸುಸ್ತಾಗಿ ಅಲ್ಲಲ್ಲಿ ಬಿದ್ದಿರುವ ವರದಿಗಳೂ ಬೊಗಳೂರು ಬ್ಯುರೋದ ಬಾಗಿಲಲ್ಲಿ ಬಂದು ಬೀಳತೊಡಗಿವೆ.

ಇನ್ನೊಬ್ಬ ನಾಗರಿಕರು ಹೇಳುವಂತೆ, UPAವಾಸ (©ಸುನಾಥ) ಸರಕಾರವಂತೂ ತಿನ್ನುವ ವಸ್ತುಗಳ ಬೆಲೆ ಬೇಕಾಬಿಟ್ಟಿಯಾಗಿ ಏರಿಸಿಬಿಟ್ಟಿದೆ. ಇನ್ನು ಬದುಕುವುದು ಹೇಗೆಂಬ ಚಿಂತೆ ಆವರಿಸಿಬಿಟ್ಟಿತ್ತು. ಇದೀಗ ನೀರು ಸಿಕ್ಕಿರುವುದರಿಂದ ನೀರನ್ನೇ ಸಾಕಷ್ಟು ಬಾರಿ ಕುಡಿದು ಬದುಕಬಹುದು ಎಂದು ಹರ್ಷ ವ್ಯಕ್ತಪಡಿಸಿದ್ದಾರೆ.

ಚಂದ್ರನಲ್ಲಿ ನೀರು ಪತ್ತೆಯಾಗಿರುವ ಸಂಭ್ರಮದ ಸಂಗತಿ ಕೇಳಿ, ಅಲ್ಲಲ್ಲಿ ಹಾಲಿನಲ್ಲಿ ನೀರಿನಂಶ ಹೆಚ್ಚಾಗಿರುವುದೂ ಕಂಡುಬಂದಿದೆ. ಇದು ಹಾಲಿನ ಸಾಂದ್ರತೆ ಪತ್ತೆ ಯಂತ್ರದಲ್ಲಿ ಶೇ.90ರಷ್ಟು ದಾಖಲಾಗಿದೆ ಎಂದು ಬೊಗಳೂರು ರದ್ದಿಗಾರರ ಮೂಲಗಳು ತಿಳಿಸಿವೆ.

ಈ ಮಧ್ಯೆ, ಕೊಳಚೆ ನೀರನ್ನು ಚೆನ್ನಾಗಿ ಸೋಪು ಹಾಕಿ ತೊಳೆದು ಶುದ್ಧವಾಗಿ ಕಾಣಿಸುವಂತೆ ಮಾಡಿ ಬಾಟಲಿಯಲ್ಲಿ ತುಂಬಿಸಿ ಮಾರಾಟ ಮಾಡುತ್ತಿದ್ದ ಪ್ಯಾಕೇಜ್ಡ್ ಡ್ರಿಂಕಿಂಗ್ ವಾಟರ್ ಪೂರೈಸುವ ಕಂಪನಿಗಳು ಅಂಗಾತ ನೆಲಕಚ್ಚತೊಡಗಿವೆ ಎಂದು ಮೂಲಗಳು ವರದ್ದಿ ಸುರಿದಿವೆ. ತೀವ್ರ ಬೆಲೆ ಕುಸಿತ ಕಂಡ ಹಿನ್ನೆಲೆಯಲ್ಲಿ, ಈ ಕಂಪನಿಗಳು ನೀರನ್ನು ರಸ್ತೆಗೆ ಸುರಿದು ಪ್ರತಿಭಟನೆ ನಡೆಸಿರುವ ವರದ್ದಿಗಳು ಅಲ್ಲಲ್ಲಿಂದ ಬೊಗಳೂರು ಬ್ಯುರೋಗೆ ಬಂದು ತಲುಪತೊಡಗಿವೆ.

ಇಷ್ಟು ಮಾತ್ರವಲ್ಲದೆ, ಅಮೆರಿಕದಲ್ಲಿ ಟಾಯ್ಲೆಟ್ ಪೇಪರ್ ಉದ್ಯಮವೂ ಮಕಾಡೆ ಮಲಗಿದ್ದು, ಎಲ್ಲರೂ ಇದೀಗ ನೀರು ಉಪಯೋಗಿಸಲಾರಂಭಿಸಿರುವುದಾಗಿ ನಮ್ಮ ಬಾತ್ಮೀದಾರರಾದ ಬರಾಕ್ ಹೋಗಾಕ್ ಒಬಾಮ ಅವರು ಬೊಗಳೂರಿಗೆ ದೂರವಾಣಿ ಮೂಲಕ ತಿಳಿಸಿದ್ದಾರೆ.

ಇನ್ನೊಂದೆಡೆ, ಚಂದ್ರನಲ್ಲಿ ನೀರು ಪತ್ತೆ ಮಾಡಿರುವುದರ ಹಿಂದೆ ಅಲ್ಪಸಂಖ್ಯಾತರ ಮೇಲೆ ದೌರ್ಜನ್ಯ ನಡೆಸುವ ಸಂಚು ಇದೆ ಎಂದು ಕಾನ್guess ವಕ್ತಾರರು ಅವಸರದ ಪತ್ರಿಕಾಗೋಷ್ಠಿ ಕರೆದು ದೂರಿದ್ದಾರೆ. ರಮ್ಜಾನ್ ಮಾಸ ಮುಗಿದ ತಕ್ಷಣವೇ ಆ ಚಂದ್ರನಲ್ಲಿ ನೀರು ಇದೆ ಎಂದೆಲ್ಲಾ ವರದ್ದಿ ಮಾಡಿರುವುದು, ಚಂದ್ರನನ್ನು ಮುಂದೆಂದೂ ಕಾಣಿಸದಂತೆ ಮಾಡುವ ಸಂಚು ಎಂದು ಅವರು ದೂರಿದ್ದಾರೆ. ಮಾತ್ರವಲ್ಲದೆ, ಚಂದ್ರನ ಮೇಲೆ ನೀರು ಇರುವಿಕೆಯನ್ನು ಪತ್ತೆ ಹಚ್ಚಿದ ಇಸ್ರೋ ಮೇಲೆ ಕ್ರಮ ಕೈಗೊಳ್ಳುವಂತೆ ಆಗ್ರಹಿಸಿದ್ದಾರೆ.

ಮುಂದುವರಿದು ಮಾತನಾಡಿದ ಅವರು, ಚಂದ್ರನಲ್ಲಿರುವ ನೀರಿನಲ್ಲಿ ಅಲ್ಪಸಂಖ್ಯಾತರಿಗೆ, ದಲಿತರಿಗೆ ಮೀಸಲಾತಿ ಇರಬೇಕು. ಒಳಮೀಸಲಾತಿಯನ್ನೂ ನೀಡಬೇಕು ಎಂದು ಒತ್ತಾಯಿಸತೊಡಗಿದ್ದಾರೆ.

ಇಷ್ಟೆಲ್ಲದರ ನಡುವೆ, ಚಂದ್ರನಿಗೊಂದು ಕೊಳವೆ ಸಿಕ್ಕಿಸಿ, ಅಲ್ಲಿಂದ ನೀರು ತರುವ ಅಥವಾ ಕದಿಯುವ ಹುನ್ನಾರವೂ ಆರಂಭವಾಗಿದೆ ಎಂದು ಮೂಲಗಳು ತಿಳಿಸಿವೆ.

ಬೆಲೆ ಏರಿಕೆಗೆ 'ಆಟೋಮ್ಯಾಟಿಕ್' ಪ್ರತಿಭಟನೆ

2009-09-22T08:13:00.000+05:30

(ಬೊಗಳೂರು ಅಪ್ರತಿಭ-ಟನೆ ಬ್ಯುರೋದಿಂದ)

ಬೊಗಳೂರು, ಸೆ.22- ಚೀಲ ತುಂಬಾ ನೋಟುಗಳನ್ನು ಹಾಕಿಕೊಂಡು ಜೇಬು ತುಂಬಾ ದಿನಸಿ ಸಾಮಾನು ಮತ್ತು ಒಂದು ಸಿಂಗಲ್ ತರಕಾರಿ ತುಂಡು ತರುವ ಸಾಧ್ಯತೆಯಿರುವ ಈ ಬೆಲೆ ಏರಿಕೆ ದಿನಗಳಲ್ಲಿ, ಕೇಂದ್ರದ ಪೀಪಿಏ ಸರಕಾರದ ನಿರ್ಲಕ್ಷ್ಯ ಧೋರಣೆಯನ್ನು ಪ್ರತಿಭಟಿಸಿ ಬೊಗಳೂರು ನಾಗರಿಕರು ಸ್ವಯಂಚಾಲಿತವಾಗಿ ಪ್ರತಿಭಟಿಸತೊಡಗಿದ್ದಾರೆ.

ವಿಶೇಷವೆಂದರೆ, ಈ ಪ್ರತಿಭಟನಾ ಆಂದೋಲನಕ್ಕೆ ಯಾರ ಕುಮ್ಮಕ್ಕು ಕೂಡ ಇಲ್ಲದಿರುವುದು ಮತ್ತು ಯಾರದ್ದೇ ಒತ್ತಡ, ಸಲಹೆ ಇತ್ಯಾದಿಗಳು ಅನಗತ್ಯವಾಗಿರುವುದು.

ಈ ಮಧ್ಯೆ, ಬೆಲೆ ಏರಿಕೆ ನಿಯಂತ್ರಿಸುವ ಬದಲು ನಾವು ಕಡಿಮೆ ಖರ್ಚು ಮಾಡುತ್ತಿದ್ದೇವೆ, ನೀವೂ ಕಡಿಮೆ ಖರ್ಚು ಮಾಡಿ ಎಂಬ ಸಂದೇಶ ನೀಡಲು ಕೇಂದ್ರದ Unprecedented Price-rise Agenda ಸರಕಾರ ನಿರ್ಧರಿಸಿದೆ.

ಸಚಿವರು, ಸಂಸದರು ಮತ್ತು 'ಸೂಪರ್ ಪ್ರಧಾನಿನಿ'ಯರೆಲ್ಲರೂ ಇಕಾನಮಿ ಕ್ಲಾಸ್ ಎನ್ನುತ್ತಾ ಬೊಗಳೆ ರಗಳೆ ಬ್ಯುರೋಗಿಂತಲೂ ಜೋರಾಗಿ ಬೊಗಳೆ ಬಿಡತೊಡಗಿರುವುದು ನಮ್ಮ ಬ್ಯುರೋದ ಅಸ್ತಿತ್ವಕ್ಕೇ ಬಂದ ಸವಾಲು ಆಗಿದೆ. ಕೇಂದ್ರದಲ್ಲಂತೂ ಸಾಕಷ್ಟು ಬೊಗಳೆ ಬ್ಯುರೋಗಳು ಅಣಬೆಗಳಂತೆ ಮೇಲೇಳುತ್ತಿವೆ. ಈ ಜಾಗತಿಕ ಬಿಕ್ಕಟ್ಟಿನ ಸಂದರ್ಭದಲ್ಲಿ ದುಂದುವೆಚ್ಚದ ಮಿತವ್ಯಯ ಬೋಧಿಸುತ್ತಾ ಬೊಗಳೆ ಬ್ಯುರೋ ಅಸ್ತಿತ್ವ ಉಳಿಸಿಕೊಳ್ಳಲು ಹೆಣಗಾಡುತ್ತಿದೆಯಾದರೂ, ಅದನ್ನು ಎಲ್ಲಿಯೂ ತೋರ್ಪಡಿಸಿಕೊಳ್ಳುತ್ತಿಲ್ಲ. ಜಾನುವಾರು ದರ್ಜೆಯಲ್ಲಿ ಪ್ರಯಾಣ ಮಾಡುವ ಸಲಹೆ ನೀಡಿದ ಕೇಂದ್ರದ ವಿದೇಶದ ಅಂಗವಾಗಿರುವ ಸಚಿವ ತಶಿ ಶರೂರ್ ಅವರನ್ನು ಪಶುಸಂಗೋಪನಾ ಖಾತೆ ಸಚಿವರನ್ನಾಗಿಸಬೇಕು ಎಂದು ಬೊಗಳೂರು ಬ್ಯುರೋ ಬಾಯಿಬಿಟ್ಟು ಆಗ್ರಹಿಸತೊಡಗಿದೆ.

ಇದಕ್ಕಾಗಿ ದೇಶದ ಪ್ರಜೆಗಳೆಲ್ಲರನ್ನೂ ಜಾನುವಾರುಗಳೆಂದು ಪರಿಗಣಿಸಿ, ಅವರಿಗೆ ದಿನಸಿ ಆಹಾರದ ಅಗತ್ಯವಿಲ್ಲ, ಅಕ್ಕಿಯಂತೂ ತೀರಾ ಅನಗತ್ಯ (ಇದಕ್ಕಾಗಿ ಅದರ ಬೆಲೆ 35 ರೂಪಾಯಿಗೂ ಹೆಚ್ಚು ಮಾಡಲಾಗಿದೆ). ಈ ಎಲ್ಲ ದುಂದುವೆಚ್ಚವನ್ನು ನಿಲ್ಲಿಸಿ ಮಿತವ್ಯಯ ಮಾಡಬೇಕು ಎಂದು ಪರಿಗಣಿಸಿರುವ ಕೇಂದ್ರದ ಸರಕಾರದ ಪಕ್ಷೋದ್ಧಾರದ ಗಮನವನ್ನು ಇತ್ತ ಕಡೆ ಸೆಳೆಯುವುದಕ್ಕಾಗಿ ಸಕಲ ಜನ-ಜಾನುವಾರುಗಳೊಂದಿಗೆ ಅಪ್ರತಿಭ-ಟನೆ ಮಾಡಲು ನಿರ್ಧರಿಸಲಾಗಿದೆ.

ಈ ಪ್ರತಿಭಟನೆಯ ಅಂಗವೇ ಬಾಯ್ಮುಚ್ಚುವ ಅಂಗ. ಅಂದರೆ ಬೆಲೆ ಏರಿಕೆಯಿಂದಾಗಿ ಜನ ಸಾಮಾನ್ಯರಿಗೆ ಯಾವುದೇ ಆಹಾರ ಪದಾರ್ಥ ಕೊಳ್ಳುವುದು ಅಸಾಧ್ಯವಾಗಿರುವುದರಿಂದ ಆಟೋಮ್ಯಾಟಿಕ್ ಆಗಿ ಉಪವಾಸ ಅನ್ನ ಸತ್ಯಾಗ್ರಹ ಕೈಗೊಳ್ಳಲಾಗುತ್ತದೆ. ಇದು ಬೊಗಳೂರು ಜನತೆಗೆ ಗಾಂಧೀಜಿಯೇ ಹೇಳಿಕೊಟ್ಟಿದ್ದು, ಈಗಿನ ಸಾನಿಯಾ ಗಾಂಧೀಜಿಗಳು ಕೂಡ ಅದನ್ನೇ ಅನುಸರಿಸುವಂತೆ ಜನತೆಗೆ ಕರೆ ನೀಡಿರುವುದನ್ನು ಬೊಗಳೂರು ಬ್ಯುರೋ ಮಾತ್ರವೇ ವರದಿ ಮಾಡಿದೆ.

ಇದನ್ನು ಕೇಳಿ ಮಾನ್ಯ ನಿಧಾನ ಮಂತ್ರಿಗಳು ಮತ್ತವರ ಸಚಿವರ ಬಳಗವು ಮಾಧ್ಯಮಗಳ ಕಣ್ಣಿಗೆ ಬೀಳದಂತೆ ನಾಪತ್ತೆಯಾಗಿ ಬೊಗಳೂರಿನಲ್ಲಿ ಅವಿತು ಕೂತಿದ್ದಾರೆ ಎಂಬುದನ್ನು ಪತ್ತೆ ಹಚ್ಚಲಾಗಿದೆ.

ತಿರುಪತಿ ಲಡ್ಡು ಮಾತ್ರವಲ್ಲ, ನಾಮಕ್ಕೂ ಪೇಟೆಂಟ್!

2009-09-17T08:07:00.001+05:30

(ಬೊಗಳೂರು ನಾಮ ಹಾಕಿಸಿಕೊಳ್ಳೋ ಬ್ಯುರೋದಿಂದ)

ಬೊಗಳೂರು, ಸೆ.17- ತಿರುಪತಿಯ ನಕಲಿ ಲಡ್ಡು ತಯಾರಿಸದಂತೆ ನಿರ್ಬಂಧ ವಿಧಿಸಿರುವ ಬೆನ್ನಲ್ಲೇ, ನಾಮ ಹಾಕಿಸಿಕೊಳ್ಳುವುದಕ್ಕೂ ಪೇಟೆಂಟ್ ಮಾಡಿಸಬೇಕು ಎಂದು ಬೊಗಳೂರು ಪ್ರಜೆಗಳು ವ್ಯರ್ಥಾಲಾಪ ಆರಂಭಿಸಿದ್ದಾರೆ.

ಈಗಾಗಲೇ ನಮ್ಮನ್ನು ಆಳಲೆಂದು ನಾವು ಆರಿಸಿ ಕಳುಹಿಸಿದವರೆಲ್ಲರೂ ಬೊಗಳೂರಿನ ಬಡ ಪ್ರಜೆಗಳಿಗೆ ಸಾಕಷ್ಟು ಬಾರಿ ನಕಲಿ ಮೂರ್‌ನಾಮಗಳನ್ನು ಹಾಕಿದ್ದಾರೆ. ಕೇಂದ್ರ ಸರಕಾರವಂತೂ ತಿನ್ನುವ ಆಹಾರ ವಸ್ತುಗಳ ಬೆಲೆಯನ್ನು ಬೇಕಾಬಿಟ್ಟಿ ಏರಿಸಿ, ಆರಾಮವಾಗಿ ಪ್ರಯಾಣದಲ್ಲಿ ಮಿತವ್ಯಯ ಮಾಡಿ ಎಂಬಿತ್ಯಾದಿ ಗಿಮಿಕ್‌ಗಳ ಮೂಲಕ ಈಗಾಗಲೇ ಪ್ರಜೆಗಳಿಗೆ ದೊಡ್ಡ ದೊಡ್ಡ ಮೂರು ನಾಮ ಹಾಕಲಾರಂಭಿಸಿದೆ. ಇದೇ ರೀತಿ ರಾಜ್ಯ ಸರಕಾರದಲ್ಲಿ ಭದ್ರವಾಗಿ ನೆಲೆಯಾಗಿರುವ ಮಂತ್ರಿ-ಮಾಗಧರು, ಅಧಿಕಾರಿಗಳು ಕೂಡ ಗಣಿ ಲೂಟಿ, ಇದ್ದಿಲು-ಮಣ್ಣು-ಮಸಿ ಹಗರಣ, ಭೂಕಬಳಿಕೆ ಮುಂತಾದ ಹಗರಣಗಳು, ವಿದ್ಯುತ್ ಕೊಡುತ್ತೇವೆ ಎಂಬೋ ಭರವಸೆಗಳ ಹೆಸರಲ್ಲಿ ನಕಲಿ ನಾಮ ಹಾಕುತ್ತಿರುವುದನ್ನು, ನಮ್ಮನ್ನಾಳುವವರ ಅಂದ-ಚಂದ-ವೈಭವವನ್ನೆಲ್ಲ ಕಣ್ಣಾರೆ ಕಾಣಲಾರಂಭಿಸಿದ್ದಾರೆ.

ಚೀಲ ತುಂಬಾ ಹಣ ಒಯ್ದು, ಜೇಬು ತುಂಬಾ ದಿನಸಿ ಸಾಮಗ್ರಿ ಖರೀದಿಸಬೇಕಾಗಿರುವ ಈ ದಿನಗಳಲ್ಲಿ, ನಾಮ ಹಾಕಿಸಿಕೊಳ್ಳೋದಕ್ಕೂ ಕೆಲವರ ಬಳಿ ಹಣವಿಲ್ಲದಿರುವುದು ಕಂಡುಬಂದಿದೆ. ಹಿಂದೆ, ವಿನಿವಿಂಕ್‌ನಿಂದ ಬಿದ್ದ ನಾಮದಿಂದಲೇ ಪ್ರಜೆಗಳು 'ಚಾ'ತರಿಸಿಕೊಂಡಿಲ್ಲ, ಅದರ ನಡುವೆ ಆ ಸ್ಕೀಮು, ಈ ಸ್ಕೀಮು ಎಂಬಿತ್ಯಾದಿ ಸಾಲೋಸಾಲಾಗಿ ಬ್ಲೇಡು ಕಂಪನಿಗಳು ನಾಮ ಹಾಕುತ್ತಲೇ ಇರುತ್ತವೆ. ಈ ನಾಮದ ಮಹಿಮೆ ಅಪಾರವಾಗಿ, ನಾಮದ ಬಲ ಜೋರಾಗಿ ಜನರು ಜಾಗತಿಕ ಹಣಕಾಸು ಬಿಕ್ಕಟ್ಟಿನ ಮಧ್ಯೆ ಅಳಿದುಳಿದ ಬಿಡಿಗಾಸನ್ನೂ ಕಳೆದುಕೊಳ್ಳತೊಡಗಿರುವುದು ಈ ಪೇಟೆಂಟ್ ಕುರಿತ ಜನಾಗ್ರಹಕ್ಕೆ ಮೂಲ ಹೇತುವಾಗಿದೆ ಎಂದು ತಿಳಿದುಬಂದಿದೆ.

ಈ ನಡುವೆಯೇ, ನಾಲ್ಕನೇ ನಾಮ ಹಾಕಲು ಭಾರೀ ಸಿದ್ಧತೆ ನಡೆದಿದ್ದು, ವಿಮಾನ ಪ್ರಯಾಣದಲ್ಲಿ ಎಕಾನಮಿ ದರ್ಜೆ, ಬ್ಯುಸಿನೆಸ್ ದರ್ಜೆ, ಎಕ್ಸಿಕ್ಯೂಟಿವ್ ದರ್ಜೆ ಮುಂತಾದವುಗಳು ಮಾತ್ರವಲ್ಲದೆ, ಹಸುಗಳ ದರ್ಜೆ, ನಾಯಿ-ನರಿಗಳ ದರ್ಜೆಗಳನ್ನೂ ತೆರೆಯುವ ಮೂಲಕ ಮತ್ತೊಂದು ನಾಮದ ಸ್ಮರಣೆಯೊಂದು ಕೇಳಿಬರುತ್ತಿದೆ ಎಂದು ಇಲ್ಲಿ ವರದಿಯಾಗಿರುವುದು, ಬಡ ಪ್ರಜೆಗಳೆಲ್ಲರೂ, ಇಷ್ಟೆಲ್ಲಾ ನಾಮಗಳನ್ನು ಎಲ್ಲಿ ಧರಿಸುವುದು ಎಂಬ ಕುರಿತು ಕಕ್ಕಾಬಿಕ್ಕಿಯಾಗಿದ್ದಾರೆ ಎಂದು ಅಪ್ರತ್ಯಕ್ಷದರ್ಶಿ ವರದಿಗಾರರು ವರದ್ದಿ ತಂದು ಸುರುವಿದ್ದಾರೆ.

ಇದ್ದ ಬದ್ದವರ ಕೈಯಲ್ಲಿ ನಮಗೆ ನಾಮ ಹಾಕಿಸಿಕೊಳ್ಳೋದೇ ಆಯ್ತು. ಹೀಗಾಗಿ ಈ ತಿರುಪತಿ ಲಡ್ಡಿನ ಬದಲು, ತಿರುಪತಿಯ ನಕಲಿ ನಾಮ ಹಾಕುವ ಈ ಪ್ರಕ್ರಿಯೆಗಳಿಗೆ ಪೇಟೆಂಟ್ ಮಾಡಿಸಿಟ್ಟರೆ ಸ್ವಲ್ಪವಾದರೂ ಉಸಿರುಬಿಡಬಹುದು ಎಂಬುದು ಬೊಗಳೂರು ಪ್ರಜೆಗಳ ಲೆಕ್ಕಾಚಾರ.

Blame-Game: ನಿಮಗೆ ಬ್ಲೇಮ್, ನಮಗೆ ಗೇಮ್ ಎಂದ ಪಾಕ್!

2009-09-14T06:59:00.000+05:30

(ಬೊಗಳೂರು Blame ಕ್ರೀಡಾ ಬ್ಯುರೋದಿಂದ)

ಬೊಗಳೂರು, ಸೆ.14- ಮುಂಬೈ ಮೇಲಿನ ದಾಳಿ ಪ್ರಕರಣಕ್ಕೆ ಸಂಬಂಧಿಸಿದಂತೆ ಭಾರತವು blame ಮಾತ್ರ ಮಾಡಬೇಕು, game ನಮಗೆ ಇರಲಿ ಎಂದು ಪಾತಕಿ ಸ್ತಾನವು ಸ್ಪಷ್ಟಪಡಿಸಿದೆ.

ಮುಂಬೈ ಮೇಲೆ ನಡೆದ ದಾಳಿಯ ವರ್ಷಾಚರಣೆ ಸಮೀಪಿಸುತ್ತಿರುವಂತೆಯೇ ಉಭಯ ರಾಷ್ಟ್ರಗಳ ನಡುವೆ ಸೌಹಾರ್ದತೆ ಏರ್ಪಡಲು ಹೊಸ ಹೊಸ ಸಾಧ್ಯತೆಗಳನ್ನು ಪರದಾಡಿ ಪರದಾಡಿ ಹುಡುಕಲಾಗುತ್ತಿದ್ದು, ಕಳೆದ ಒಂದು ವರ್ಷದಿಂದ "ಉಗ್ರರ ವಿರುದ್ಧ ಕ್ರಮ ಕೈಗೊಳ್ಳೀssssssssssss, ಇಲ್ಲವಾದರೆ ನಾವೇ ಕ್ರಮ ಕೈಗೊಳ್ಳುತ್ತೇವೆ" ಎಂದು ಪದೇ ಪದೇ ಹೇಳುತ್ತಿದ್ದ ಭಾರತ ಸರಕಾರವು ಪಾತಕಿಸ್ತಾನದ ಮೇಲೆ Blame ಮಾತ್ರ ಮಾಡಿ, Game ಆಡಲು ಅದಕ್ಕೆ ಬಿಟ್ಟಿರುವುದಾಗಿ ಮೂಲಗಳು ವರದ್ದಿ ಮಾಡಿವೆ.

"ನೀವು ಬ್ಲೇಮ್ ಮಾಡಿ, ನಾವು ಗೇಮ್ ಆಡುತ್ತೇವೆ" ಎಂದು ಇತ್ತೀಚೆಗೆ ಪಾತಕಿಸ್ತಾನದಿಂದ ಭಾರತದ ನಿಧಾನಮಂತ್ರಿ ಸೋನಿಯಾ ಸಿಂಗ್.... ಅಲ್ಲಲ್ಲ ಮನಮೋಹಕ ಸಿಂಗ್ ಅವರಿಗೆ ಪಾಕಿಸ್ತಾನದ ಸರಕಾರದ ಮುಖ್ಯಸ್ಥರೂ ಆಗಿರುವ ಐಎಸ್ಐ ಮುಖ್ಯಸ್ಥರು ಪತ್ರ ಬರೆದಿರುವುದಾಗಿ ಮೂಲಗಳು ಬೊಗಳೆ-ರಗಳೆಗೆ ತಿಳಿಸಿಲ್ಲ.

ಮುಂಬೈ ಮೇಲೆ ನಮ್ಮವರು ದಾಳಿ ಮಾಡಿ ಒಂದು ವರ್ಷವಾಗ್ತಾ ಬಂದ್ರೂ ನಿಮ್ ಕೈಯಲ್ಲಿ ಏನೂ ಮಾಡಲಾಗಿಲ್ಲ ಎಂಬ ಕುಹಕ ನಗೆಯೊಂದು, ಜಮ್ಮು ಮತ್ತು ಕಾಶ್ಮೀರದಲ್ಲಿ ಮಾಮೂಲಿ ಪ್ರಕ್ರಿಯೆಯಾಗಿಬಿಟ್ಟಿರುವ, ಗಡಿ ನಿಯಂತ್ರಣ ರೇಖೆ ದಾಟಿ ನುಸುಳುವ ಪ್ರಕ್ರಿಯೆಯ ಮೂಲಕ ಭಾರತ ಪ್ರವೇಶಿಸಿರುವುದಾಗಿ ಬೊ.ರ. ಬ್ಯುರೋದ ಮಂದಿ ಕದ್ದು ಮುಚ್ಚಿ ವರದ್ದಿ ತಂದು ಹಾಕಿದ್ದಾರೆ.

(ಕೆಲವಾರು ದಿನಗಳಿಂದ ಬೊಗಳೂರು ಬ್ಯುರೋ ಸಿಕ್ಕಾಪಟ್ಟೆ ಧೂಳು ತಿನ್ನುತ್ತಿದ್ದ ಕಾರಣ ಚಾ-ತರಿಸಿಕೊಂಡು ಬಳಿಕ ಧೂಳೊರೆಸಿ ವಾಪಸ್ ಮರಳಲಾಗಿದೆ. ಆದರೆ, ಈ ಸಮಯದಲ್ಲಿ ನಮ್ಮ ಬೊಗಳೆ-ರಗಳೆ ಪತ್ರಿಕೆ ಲಭಿಸದ ದಾರವಿಲ್ಲದ ಚಂದಾರಹಿತರು, ಅಡ್ಜಸ್ಟ್ ಮಾಡಿಕೊಂಡು, ಮುಂದಿನ ತಿಂಗಳ ಬಿಲ್‌ನಲ್ಲಿ ಸೇರಿಸಿ ನಮಗೆ ಪಾವತಿಸಲು ಕೋರಲಾಗಿದೆ.)

ಪಾತಕಿಸ್ತಾನ ಜೊತೆ ಅನರ್ಥಪೂರ್ಣ ಮಾತುಕತೆಗೆ ಸಿದ್ಧ

2009-08-25T08:08:00.001+05:30

(ಬೊಗಳೂರು ಬಂಬಡಾ ಬ್ಯುರೋದಿಂದ)

ಬೊಗಳೂರು, ಆ.25- ಪಾತಕಿಸ್ತಾನದ ಜೊತೆಗೆ ನಾವು ಟೂ ಬಿಡುತ್ತೇವೆ, ಕೋಪ.... ಮಾತನಾಡುವುದೇ ಇಲ್ಲ ಎಂದು ಭಾರತ ಸ್ಪಷ್ಟಪಡಿಸಿದೆ.

ಆದರೂ ಈ ಹುಸಿಮುನಿಸು ಆಗಾಗ್ಗೆ ಶಮನವಾಗಿ, ಎಲ್ಲಾದರೂ ನಮ್ಮ ಕೈಮೀರಿ, ನಮಗರಿವಿಲ್ಲದಂಯೆತೇ ಮಾತುಕತೆ ನಡೆಸಿಬಿಟ್ಟರೆ...? ಎಂಬ ಆತಂಕವೂ ಭಾರತವನ್ನು ಆಳುತ್ತಿರುವವರಿಗಿದೆ. ಹೀಗಾಗಿ, ಪಾತಕಿಸ್ತಾನದೊಂದಿಗೆ "ಅರ್ಥಪೂರ್ಣ" ಮಾತುಕತೆ ಇಲ್ಲ ಎಂಬ ಪದಗುಚ್ಛವನ್ನು ಪತ್ರಿಕಾ ಹೇಳಿಕೆಯೊಳಗೆ ಸೇರಿಸಲಾಗಿದೆ.

ಈ ಮೂಲಕ, ಖಂಡಿತವಾಗಿಯೂ ಪಾತಕಿಸ್ತಾನದ ಜೊತೆಗೆ ಅನರ್ಥಪೂರ್ಣವಾದ ಮಾತುಕತೆ ನಡೆಸುತ್ತೇವೆ ಎಂದು ವಿದೇಶದಅಂಗಿ (ಹಾಕಿಕೊಳ್ಳುವ) ಸಚಿವರು ಸ್ಪಷ್ಟಪಡಿಸಿದ್ದಾರೆ.

ಪಾತಕಿಸ್ತಾನವು ಉಗ್ರರ ವಿರುದ್ಧ ಕ್ರಮ ಕೈಗೊಳ್ಳುವುದಿಲ್ಲ, ಆದರೆ ಕ್ರಮ ಕೈಗೊಂಡಂತೆ ಆಗಾಗ್ಗೆ ಏನೇನೋ ಬಡಬಡಾಯಿಸುತ್ತಿರುತ್ತದೆ ಎಂಬುದನ್ನು ಮನಗಂಡಿರುವ ಬೊಗಳೂರು ಪ್ರಜೆಗಳು, ವಿದೇಶದ ಅಂಗವಾಗಿರುವ ಸಚಿವರ ವಿರುದ್ಧ ಪ್ರತಿಭಟನೆ ನಡೆಸದಿರಲು ತೀರ್ಮಾನಿಸಿದ್ದಾರೆ. ಪ್ರತಿಭಟನೆ ನಡೆಸಿದರೂ ಪ್ರಯೋಜನವಿಲ್ಲ ಎಂಬುದೇ ಅವರ ಈ ತೀರ್ಮಾನಕ್ಕೆ ಕಾರಣ.

ಭಾರತ-ಪಾತಕಿಸ್ತಾನಗಳ ನಡುವಣ ದ್ವಿಪಕ್ಷೀಯ ಸಂಬಂಧಗಳ ವೃದ್ಧಿಗೆ ಎಲ್ಲಾದರೂ "ಧನಾ"ತ್ಮಕ ತಿರುವು ದೊರೆಯುತ್ತದೆಯೋ ಎಂದು ಎರಡೂ ದೇಶಗಳ ರಾಜಕಾರಣಿಗಳು ಕಾಯುತ್ತಿದ್ದಾರೆ. ಈ ಧನ ಲಭ್ಯವಾದಲ್ಲಿ, ಈಗಾಗಲೇ ಭ್ರಷ್ಟ ರಾಜಕಾರಣಿಗಳಿಂದಾಗಿ ಭ್ರಷ್ಟ ದೇಶಗಳ ಪಟ್ಟಿ ಸೇರಿಕೊಂಡುಬಿಟ್ಟಿರುವ ಎರಡು ದೇಶಗಳಿಗೂ ತಮ್ಮ ರ‌್ಯಾಂಕಿಂಗ್ ವೃದ್ಧಿಸಿಕೊಳ್ಳಲು ಸಹಾಯಕವಾಗುತ್ತದೆ ಎಂಬುದು ಅವರ ನಂಬಿಕೆ.

ಪಾತಕಿಸ್ತಾನವು ಭರವಸೆಗಳನ್ನು ಪೂರೈಸುವುದಿಲ್ಲ ಎಂದು ಅಲ್ಲಿನ ಮಂಡೆಗಳ ಕಂಪ್ಯೂಟರುಗಳಲ್ಲಿ ಡೀಫಾಲ್ಟ್ ಪ್ರೋಗ್ರಾಂ ಆಗಿ ಫಿಕ್ಸ್ ಮಾಡಲಾಗಿದೆ. ಆದರೆ, ಅಲ್ಲಿನ ಎಲ್ಲ ಮಂಡೆಗಳು ಕೂಡ ಭರವಸೆಗಳನ್ನು ಧಂಡಿಯಾಗಿ ನೀಡುತ್ತವೆ. ಅಂತಾರಾಷ್ಟ್ರೀಯ ಸಮುದಾಯವನ್ನು ಸಂತುಷ್ಟಗೊಳಿಸಲು ಇದು ಸಾಕಾಗುತ್ತದೆ ಎಂದು ಭಾರತದ ಜಾರಕಾರಣಿಗಳು ಬಲವಾಗಿ ನಂಬಿದ್ದಾರೆ.

ಮುಂಬೈ ಮೇಲಿನ ದಾಳಿಗೆ ಸಂಬಂಧಿಸಿದಂತೆ ಅದೆಷ್ಟೋ ಸಾಕ್ಷ್ಯಾಧಾರಗಳ ಸಹಿತ ಅಜ್ಮಲ್ ಎಂಬ ಕಸ ಸಿಕ್ಕಿಬಿದ್ದಿದ್ದರೂ, ಆತನಿಗೆ ಏನೂ ಆಗದಂತೆ, ಕೋಟ್ಯಂತರ ರೂಪಾಯಿ ಖರ್ಚು ಮಾಡಿ ರಕ್ಷಣೆ ನೀಡುತ್ತಾ, ಬಿರಿಯಾನಿ, ಮಟನ್ ಎಲ್ಲ ನೀಡುತ್ತಾ ಆತನಿಗೆ ಐಷಾರಾಮದ ವ್ಯವಸ್ಥೆ ಮಾಡಿರುವುದು ಯಾಕೆ ಎಂಬುದರ ಕುರಿತು ಸ್ವತಃ ಪಾಕಿಸ್ತಾನವೇ ಅಚ್ಚರಿ ವ್ಯಕ್ತಪಡಿಸಿದೆ ಎಂದು ಮೂಲಗಳು ತಿಳಿಸಿವೆ.

ಉಗ್ರಗಾಮಿಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳದಿರುವ ಕುರಿತು ಭಾರತದಲ್ಲಿ ಜನಾಕ್ರೋಶವಿದ್ದರೂ, ನಮಗಿಂತ ಯಾರೂ ಮೇಲಲ್ಲ ಎಂದು ಸರಕಾರ ತೋರಿಸಿಕೊಡುತ್ತಿದೆ ಎಂಬುದನ್ನು ಬೊಗಳೂರು ಜನತೆ ಪತ್ತೆ ಹಚ್ಚಿಬಿಟ್ಟಿದ್ದಾರೆ. ಇದರ ಹಿಂದಿರುವ (ಓಟ್) ಬ್ಯಾಂಕಿನ ಕೈವಾಡವನ್ನು ಕೂಡ ತಳ್ಳಿ ಹಾಕಲು ಮೂಲಗಳು ನಿರಾಕರಿಸಿವೆ. ಸದ್ಯಕ್ಕೆ ಓಟುಗಳೆಲ್ಲವನ್ನೂ ಸ್ವಿಸ್ ಬ್ಯಾಂಕಿನಲ್ಲಿ ಭದ್ರ ಮಾಡಿ ಇರಿಸಲಾಗಿದೆ ಎಂಬುದನ್ನು ಕೂಡ ಮೂಲಗಳು ಪತ್ತೆ ಹಚ್ಚಿವೆ.

ಸ್ವೈನ್ ಫ್ಲೂ ನಿಷೇಧಿಸಿದ್ದೇವೆ: ಕೇಂದ್ರ ಸ್ಪಷ್ಟನೆ

2009-08-18T08:08:00.000+05:30

(ಬೊಗಳೂರು ಆರೋಗ್ಯಾತಂಕ ಬ್ಯುರೋದಿಂದ)

ಬೊಗಳೂರು, ಆ.17- ಐದಾರು ತಿಂಗಳ ಹಿಂದೆಯೇ ಕಾಣಿಸಿಕೊಂಡಿದ್ದರೂ, ಇದುವರೆಗೆ ಏನೂ ಮಾಡಲಿಲ್ಲ ಎಂಬ ಜನರ ಆಕ್ರೋಶವು ವಿರೋಧ ಪಕ್ಷಗಳ ತಂತ್ರ ಎಂದು ದೂರಿರುವ ಕೇಂದ್ರ ಸರಕಾರವು, ಸ್ವೈನ್ ಫ್ಲೂ ತಡೆಗೆ ಪರಿಣಾಮಕಾರಿ ಕ್ರಮಗಳನ್ನು ಕೈಗೊಂಡಿದ್ದು, ಒಬ್ಬರನ್ನೂ ಸಾಯಲು ಬಿಡುವುದಿಲ್ಲ ಎಂದು ಭರವಸೆ ನೀಡಿರುವುದಾಗಿ ನಮ್ಮ ಪ್ರತಿಸ್ಪರ್ಧಿ ಮತ್ತು ಎದುರಾಳಿ ಪತ್ರಿಕೆಗಳು ವರದ್ದಿ ಮಾಡಿವೆ.

ಸ್ವೈನ್ ಫ್ಲೂ ಬಗ್ಗೆ ಎಲ್ಲರಿಗೂ ಅರಿವು ಮತ್ತು ಆತಂಕ ಉಂಟಾಗಿದ್ದರೂ, ಒಂದು ಜೀವವನ್ನೇ ಅದು ಬಲಿ ತೆಗೆದುಕೊಂಡ ಬಳಿಕ ಎಚ್ಚೆತ್ತುಕೊಂಡ ಕೇಂದ್ರ ಸರಕಾರವು, ಸ್ವೈನ್ ಫ್ಲೂ ನಿಷೇಧಿಸಲು ಚಿಂತನೆ ನಡೆಸುತ್ತಿದೆ ಎಂದು ಮೂಲಗಳು ಹೇಳಿವೆ. ಮತ್ತು ಯಾರು ಕೂಡ ಆತಂಕ ಪಡಬೇಕಾಗಿಲ್ಲ, ಸರಕಾರದಲ್ಲಿರುವವರು, ಆಳುವವರು, ಅಧಿಕಾರದಲ್ಲಿರುವವರು, ಮಂತ್ರಿಗಳು, ಶಾಸಕರು ಮತ್ತು ಸಂಸದರು ಸುರಕ್ಷಿತರಾಗಿದ್ದಾರೆ. ನಿಮ್ಮನ್ನು ಆಳುವವರಿಗೆ ಏನೂ ಆಗಿಲ್ಲವಾದುದರಿಂದ ಯಾವುದೇ ರೀತಿಯಲ್ಲಿಯೂ ಯಾರೂ ಕೂಡ ಭಯಪಡಬೇಡುವ ಅಗತ್ಯವಿಲ್ಲ ಎಂದು ಸಾರಿ ಸಾರಿ ಹೇಳಲಾಗುತ್ತಿದೆ.

ಸ್ವೈನ್ ಫ್ಲೂ ಮೊದಲು ಸೊಳ್ಳೆಯಿಂದ ಹರಡುತ್ತದೆ ಎಂದು ಸರಕಾರವು ಸರ್ವಾನುಮತದ ನಿರ್ಣಯ ಕೈಗೊಂಡು ಕಾಯಿದೆ ರೂಪಿಸಿತ್ತು. ಆದರೆ, ಸಂವಿಧಾನ ತಿದ್ದುಪಡಿ ಮಾಡಿದ ಬಳಿಕ ಅದು ಹಂದಿಯಿಂದಲೇ ಬರುತ್ತದೆ ಎಂದು ಕೂಡ ತಿದ್ದುಪಡಿ ಕಾಯಿದೆಯನ್ನು ಜಾರಿಗೊಳಿಸಲಾಗಿತ್ತು. ಇದೀಗ ಸ್ವೈನ್ ಫ್ಲೂ ಉಸಿರಿನಿಂದಲೇ ಹರಡುತ್ತಿದೆ ಎಂದು ಸರಕಾರವನ್ನು ಅಸ್ಥಿರಗೊಳಿಸಲು ಪ್ರಯತ್ನಿಸುತ್ತಿರುವವರು ಮತ್ತು ಸರಕಾರವನ್ನು ಗಾಢ ನಿದ್ರೆಯಿಂದ ಎಬ್ಬಿಸಲು ಪ್ರಯತ್ನಿಸುವವರು ಅಪಪ್ರಚಾರ ಆರಂಭಿಸಿದ್ದಾರೆ. ಹೀಗಾಗಿ ಈ ಅಪಪ್ರಚಾರಕ್ಕೆ ಸ್ಪಂದಿಸಲೇಬೇಕಾಗಿದೆ ಎಂದು ಸರಕಾರದ ವಕ್ತಾರರು ಹೇಳಿದ್ದಾರೆ.

ಇಪ್ಪತ್ತೈದಕ್ಕೂ ಹೆಚ್ಚು ಮಂದಿ ದೇಶದಲ್ಲಿ ಹಂದಿಗೆ ಬಲಿಯಾಗಿದ್ದಾರೆ ಎಂಬುದನ್ನು ನಮಗೆ ಯಾರೂ ಹೇಳಿಲ್ಲ ಎಂದು ತಿಳಿಸಿರುವ ವಕ್ತಾರರು, ನೋಡೋಣ, ಮಂತ್ರಿ ಮಾಗಧರಿಗೇನಾದರೂ ಇದು ಬಂದರೆ ಈ ಬಗ್ಗೆ ಕ್ರಮ ಕೈಗೊಳ್ಳುತ್ತೇವೆ. ಜನರಿಗಾಗಿ ನಾವು ಈಗಾಗಲೇ ಹಂದಿ ಜ್ವರವನ್ನು ನಿಷೇಧಿಸಿದ್ದೇವೆ. ಈಗ ನಮಗೆ ಸಾಕಷ್ಟು ಬೇರೆ ವಿಷಯಗಳಿವೆ. ಅಂತಾರಾಷ್ಟ್ರೀಯ ಸಂಬಂಧಗಳನ್ನು ಸುಧಾರಿಸಬೇಕಿದೆ, ಅಣ್ವಸ್ತ್ರ ಒಪ್ಪಂದವು ಕಾರ್ಯಾನುಷ್ಠಾನವಾಗುವಂತೆ ನೋಡಿಕೊಳ್ಳಬೇಕಾಗಿದೆ. ಅಲ್ಲಲ್ಲಿ ರಾಜೀವ್ ಗಾಂಧಿ, ನೆಹರೂ ಹೆಸರಿನಲ್ಲಿ ಪ್ರತಿಮೆಗಳು, ಕ್ರೀಡಾಕೂಟಗಳು, ಸ್ಟೇಡಿಯಂಗಳು, ರಸ್ತೆಗಳು ಇತ್ಯಾದಿ ಸ್ಥಾಪನೆಯಾಗಬೇಕಿವೆ. ಈ ಜನಕಲ್ಯಾಣ ಕಾರ್ಯಕ್ರಮಗಳನ್ನು ಬಿಟ್ಟು ಯಃಕಶ್ಚಿತ್ ಹಂದಿಯ ಜ್ವರವನ್ನೇ ದೊಡ್ಡದು ಮಾಡುವುದು ಸರಿಯಲ್ಲ ಎಂಬ ನಿರ್ಧಾರ ನಮ್ಮದು ಎಂದು ಅವರು ಹೇಳಿದ್ದಾರೆ.

ಈಗಾಗಲೇ ಹಂದಿ ಜ್ವರವು ಹರಡದಂತೆ ನಾವು ಹಂದಿಗಳಿಗೆ ಸೂಚಿಸಿದ್ದೇವೆ. ಆದರೂ ಮುಂದುವರಿದರೆ ಕಠಿಣಾತಿಕಠಿಣ ಕ್ರಮ ಕೈಗೊಳ್ಳುವುದಾಗಿಯೂ ಅವುಗಳಿಗೆ ಎಚ್ಚರಿಸಿದ್ದೇವೆ. ಎಲ್ಲೆ ಮೀರಿ ಹರಡುತ್ತಿರುವ ಹಂದಿಜ್ವರದಿಂದ ಕಂಗೆಟ್ಟು ಬಾಡಿ ಹೋದ ಮುಖಗಳನ್ನು ಮುಚ್ಚಿಕೊಳ್ಳುವುದಕ್ಕಾಗಿ ಮುಖವಾಡಗಳನ್ನು (ಮಾಸ್ಕ್) ಕಾಳಸಂತೆಯಲ್ಲಿ ಸಾಕಷ್ಟು ಪ್ರಮಾಣದಲ್ಲಿ ಬಿಡುಗಡೆ ಮಾಡಿದ್ದೇವೆ ಎಂದು ವಕ್ತಾರರು ಒದರಿದ್ದಾರೆ.

ಆದರೆ ಅದನ್ನು ಧರಿಸಬಾರದು ಎಂದು ಸೂಚಿಸಿದ್ದೇವೆ. ಯಾಕೆಂದರೆ, ಅದನ್ನು ಧರಿಸಿದವರು ಉಗ್ರಗಾಮಿಗಳು ಎಂದು ಕರೆಸಿಕೊಳ್ಳುವ ಭಯವಿರುವುದರಿಂದ ಮತ್ತು ಇದು ನಮ್ಮ ಓಟಿನ ಬ್ಯಾಂಕುಗಳಿಗೂ ನೋವು ಉಂಟು ಮಾಡುವುದರಿಂದ ಮಾಸ್ಕ್‌ಗಳಿಗೆ ರಂಧ್ರ ಮಾಡಿ, ಮುಖ ಸಂಪೂರ್ಣವಾಗಿ ತೋರಿಸುವಂತಹ ಕಳಪೆ ಮಾಸ್ಕ್‌ಗಳನ್ನು ವಿತರಿಸಲಾಗುತ್ತಿದೆ ಎಂದವರು ಸ್ಪಷ್ಟಪಡಿಸಿದ್ದಾರೆ.

ಈ ಹಂದಿ ಜ್ವರಕ್ಕೆ ಎಷ್ಟೇ ಜನರು ಬಲಿಯಾದರೂ ಕೂಡ ಯಾರು ಕೂಡ ಒಂದಿನಿತೂ ಆತಂಕ ಪಡಬೇಕಾಗಿಲ್ಲ ಎಂದು ಸರಕಾರವು ಪದೇ ಪದೇ ಎಚ್ಚರಿಕೆ ಸಂದೇಶಗಳನ್ನು ನೀಡುತ್ತಿರುವುದಾಗಿ ಇಡೀ ದಿನ ವರದ್ದಿ ಮಾಡುವಂತೆ ಬೊಗಳೂರು ಬ್ಯುರೋಗೆ ಕೇಂದ್ರವು ನಿರ್ದೇಶಿಸಿದೆ.

ಚೆನ್ನೈ ಕನ್ನಡಿಗರ ಓಟಿಗಾಗಿ ಪೆರಿಯ ತಂಬಿ ಪ್ರತಿಮೆ!

2009-08-11T08:48:00.002+05:30

(ಬೊಗಳೂರು ಪ್ರತಿಮಾ ಬ್ಯುರೋದಿಂದ)

ಬೊಗಳೂರು, ಆ.11- ಬೊಗಳೂರಿನಲ್ಲಿ ಜಾಗವಿಲ್ಲದಿರುವುದರಿಂದ ಕರುನಾಡಿನ ಮೂರ್ತಿಗಳೆಲ್ಲವನ್ನೂ ತಮಿಳುಕಾಡಿನಲ್ಲಿ ಸ್ಥಾಪಿಸುವ ಬಗ್ಗೆ ಉಭಯ ರಾಜ್ಯಗಳ ನಡುವೆ ಒಪ್ಪಂದವೊಂದು ಏರ್ಪಟ್ಟಿದ್ದು, ಪ್ರಥಮ ಹೆಜ್ಜೆಯಾಗಿ ಸರ್ವಜ್ಞ ಮೂರ್ತಿಯು ಚೆನ್ನೈಯ ಅಯ್ಯಯ್ಯಾನವರಂನಲ್ಲಿ ಸ್ಥಾಪನೆಗೊಳ್ಳುತ್ತಿದೆ.

ಆ ನಂತರದ ದಿನಗಳಲ್ಲಿ ಕರ್ನಾಟಕ ಕಂಡ ಮಹಾನ್ ನೇತಾರರಾದ ವೇದೇಗೌಡ ಹಾಗೂ ಚಿನ್ನ ತಂಬಿಯಾಗಿಬಿಟ್ಟ ಕರ್ನಾಟಕ ಮುಖ್ಯಮಂತ್ರಿ ಯಡಿಯೂರಪ್ಪ ಅವರ ಪೆರಿಯ ತಂಬಿಯ ಪ್ರತಿಮೆಯನ್ನೂ ಸ್ಥಾಪಿಸಲಾಗುತ್ತದೆ ಎಂದು ತಿಳಿದುಬಂದಿದೆ.

ಈ ಪೆರಿಯ ತಂಬಿಯ ಪ್ರತಿಷ್ಠಾಪನೆಗಾಗಿ ಕಪ್ಪನೆಯ ಕನ್ನಡಕದ ನಿರ್ಮಾಣವು ಸಮಸ್ಯೆಯ ಸಂಗತಿ. ಯಾಕೆಂದರೆ, ಪೆರಿಯ ತಂಬಿಯು ತಮಿಳು ಭಾಷಿಕರಾದರೂ, ಅವರು ಹಾಕಬೇಕಿರುವುದು "ಕನ್ನಡ"ಕ. ಈ 'ಕನ್ನಡ'ಕ ಹಾಕಿದ ಕಣ್ಣಿನಲ್ಲಿ ನೋಡಿಬಿಟ್ಟರೆ, ಅವರಿಗೇನಾದರೂ ಅಜ್ಞಾನದ ಪೊರೆ ಸರಿದು, ಸುಜ್ಞಾನದ ಸಂಗತಿಗಳು ಕಂಡರೆ ಮತ್ತು ಅವರು ಏನಾದರೂ ಸರಿಯಾಗಿಬಿಟ್ಟರೆ ಎಂಬುದೇ ಹಲವು ಮಂದಿಯ ಆತಂಕ.

ಸರಿಯಾಗುವುದು ಎಂದರೆ ಹೇಗೆ? ಚೆನ್ನೈಯಲ್ಲಿರುನ ಕನ್ನಡಿಗ ಮತಗಳನ್ನು ಸೆಳೆಯುವ ನಿಟ್ಟಿನಲ್ಲಿ ಅವರು ಕೂಡ ಚೆನ್ನೈ ಕನ್ನಡಿಗರಿಗಾಗಿ ಒಂದಷ್ಟು ಪ್ರತಿಮೆಗಳನ್ನು ನೀಡುತ್ತಾರೆ. ಚೆನ್ನೈ ಅಥವಾ ತಮಿಳುನಾಡಿನ ಕನ್ನಡಿಗರಿಗೆ ಕಾವೇರಿ ನೀರು ಕುಡಿಸಬೇಕೆಂಬ ಅದಮ್ಯ ಆಸೆಯನ್ನು ಕರ್ನಾಟಕ ಸರಕಾರದ ಮುಂದಿಡಬುದಾಗಿದೆ.

ಈ ಕಾರಣಕ್ಕಾಗಿಯೇ, ಇದರ ಆರಂಭದಲ್ಲಿ ಸರ್ವಜ್ಞನ ಬಳಿಕ ಎರಡನೇ ಹೆಜ್ಜೆಯಾಗಿ ನಡೆಯುವ ಕಾರ್ಯಕ್ರಮಕ್ಕೆ, ನಿಮ್ಮೂರಿನ ಮುಖ್ಯಮಂತ್ರಿಯವರ ಪೆರಿಯ ತಂಬಿಯ ಪ್ರತಿಮೆ ಸ್ಥಾಪಿಸಲಾಗುತ್ತದೆ ಎಂದು ತಮಿಳುಕಾಡು ಸರಕಾರವು ವಾಗ್ದಾನ ನೀಡಿದೆ. ಅದರ ಅನಾವರಣಕ್ಕೆ ಕರ್ನಾಟಕದ ಮಹಾನ್ ಹೋರಾಟಗಾರ ನಾಟಾಳ್ ವಾಗರಾಜ್ ಅವರನ್ನು ಆಹ್ವಾನಿಸುವ ಸಾಧ್ಯತೆಗಳು ದಟ್ಟವಾಗಿವೆ ಎಂದು ಯಾವುದೇ ಮೂಲಗಳು ವರದಿ ಮಾಡಿಲ್ಲ.

ಅಲ್ಲಿಗೆ, ತಮಿಳ್ನಾಡು ಕನ್ನಡಿಗರಿಗೂ ನಮ್ಮ ಮುಖ್ಯಮಂತ್ರಿಯ ಪೆರಿಯ ತಂಬಿಯ ಮನೆಯಿದು ಎಂಬ ಎಮ್ಮೆಯ ಸಂಗತಿಯೂ ದೊರೆಯುತ್ತದೆ, ಮತ್ತು ನಮ್ಮ ಕಾವೇರಿ ನೀರು ನಮಗೆ ಸ್ವಲ್ಪಸ್ವಲ್ಪ ಸಿಗುತ್ತದೆ ಎಂಬ ಹಿರಿಮೆಯೂ ಇರುತ್ತದೆ. ಆದರೆ ಹೆಚ್ಚು ಲಾಭವಾಗಿದ್ದು ತಮಿಳುನಾಡಿನ ಸಹೋದರರಿಗೆ ಎಂಬ ಅಂಶವು ಕಪ್ಪು ಕನ್ನಡಕದ ಹಿಂದೆ ಮರೆಯಾಗಿತ್ತು ಎಂದು ಮೂಲಗಳು ತಿಳಿಸಿಲ್ಲ.

ಗೊರಿಲ್ಲಾಗೆ ಏಡ್ಸ್ ಹೆಗ್ಗಳಿಕೆ: ಮಾನವರ ಪ್ರತಿಭಟನೆ

2009-08-03T11:38:00.000+05:30

(ಬೊಗಳೂರು ಸಂಚೋದನಾ ಬ್ಯುರೋದಿಂದ)

ಬೊಗಳೂರು, ಆ.3- ಈ ವರದಿಗೆ ಮಾತ್ರ ನಮ್ಮ ಬೊಗಳೂರಿನ ಸಮಸ್ತರು ತೀವ್ರ ಪ್ರತಿಭಟನೆ ನಡೆಸಲು ನಿರ್ಧರಿಸಿದ್ದಾರೆ. ಇದುವರೆಗೆ ಎಲ್ಲ ಹೆಗ್ಗಳಿಕೆಗಳೂ ಮಾನವರಿಗೇ ದೊರೆಯುತ್ತಿದ್ದವು. ಯಾಕೆಂದರೆ ಅವರಿಗೆ ತಲೆಯೊಳಗೆ ಮೆದುಳಿನಂತಹ ಅಂಗವೊಂದು ಇದೆ ಎಂಬುದನ್ನು ವಿಜ್ಞಾನಿಗಳು ಸಾಬೀತು ಮಾಡಿದ್ದರು.

ಆದರೆ ಈಗ ನೋಡಿದರೆ, ಏಡ್ಸ್ ಎಂಬ ರೋಗಕ್ಕೆ ಗೊರಿಲ್ಲಾಗಳು ಕಾರಣ ಎಂದು ಆ ಹೆಗ್ಗಳಿಕೆಯನ್ನೂ ಕಿತ್ತುಕೊಂಡು, ಮಾನವನನ್ನು ಮೆದುಳಿಲ್ಲದ ಪ್ರಾಣಿ ಎಂದು ಸಾಬೀತುಪಡಿಸಲು ಹೊರಟಿರುವ ವಿಜ್ಞಾನಿಗಳ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಅವರು ಆಗ್ರಹಿಸಿದ್ದಾರೆ.

ಹಾಗಿದ್ದರೆ, ವಾಷಿಂಗ್ಟನ್ನಿನಲ್ಲಿ ಪತ್ತೆಯಾದಂತೆ, ಮಹಿಳೆಯ ದೇಹದೊಳಗೆ ಗೊರಿಲ್ಲಾದಿಂದ ಬಂದಿರುವ ಏಡ್ಸ್ ಪತ್ತೆಯಾಗಿದ್ದು ಹೇಗೆ ಎಂಬುದು ಬೊಗಳೂರು ಜನತೆಯ ಶಂಕೆಯ ಬೆಂಕಿಗೆ ತುಪ್ಪ ಎರೆದ ವಿಷಯವಾಗಿದೆ. ಯಾಕೆಂದರೆ, ಈ ಮಹಿಳೆಯು ಖಂಡಿತವಾಗಿಯೂ ಗೊರಿಲ್ಲಾ ಆಗಿರಲಿಲ್ಲ ಎಂದು ಸಂಚೋದಕರು ಪತ್ತೆ ಹಚ್ಚಿದ್ದಾರೆ.

ಆದರೆ, ತೀರಾ ಸಂಚೋದನೆ ಮಾಡಲು ಹೋಗುವುದರಲ್ಲಿರುವಾಗ ದೊರೆತ ಅಂಶವೆಂದರೆ, ಮಾನವರ ತಲೆಯೊಳಗಿರುವ ಮೆದುಳನ್ನು ಗೊರಿಲ್ಲಾಗಳಿಗೆ ಇರಿಸಿದ್ದೇ ಕಾರಣವಿರಬಹುದು. ಯಾಕೆಂದರೆ ಇತ್ತೀಚೆಗೆ ತಂದೆಯಿಂದ ಮಗಳ ಮೇಲೆ ಅತ್ಯಾಚಾರ, ವಿದ್ಯಾರ್ಥಿನಿ ಮೇಲೆ ಶಿಕ್ಷಕರಿಂದ ಅತ್ಯಾಚಾರ ಮುಂತಾದ ಪ್ರಕರಣಗಳು ಹೆಚ್ಚು ಹೆಚ್ಚು ಆಗುತ್ತಿರುವುದರಿಂದ, ಮಾನವರ ಮೆದುಳನ್ನು ಗೊರಿಲ್ಲಾಗಳ ತಲೆಯೊಳಗೆ ಅದಲುಬದಲು ಮಾಡಿಕೊಂಡಿರುವ ಸಾಧ್ಯತೆಗಳು ಹೆಚ್ಚಾಗಿವೆ ಎಂದು ಬೊಗಳೂರಿನ ಮಂದಿ ಆಮ ಶಂಕೆ ವ್ಯಕ್ತಪಡಿಸಿದ್ದಾರೆ.

ಜಂಟಿ ಹೇಳಿಕೆಯಲ್ಲಿ 'ಬಲೂಚಿ' ಸೇರಿಸಲು ಕಾರಣ!

2009-07-30T09:37:00.001+05:30

(ಬೊಗಳೂರು ಸ್ಪಷ್ಟನೆ, ನಿರಾಕರಣೆ, ತಪ್ಪೊಪ್ಪಿಗೆ, ಹೇಳಿಕೆ ಹಿಂತೆಗೆ ಬ್ಯುರೋದಿಂದ)

ಬೊಗಳೂರು, ಜು.30- ಭಾರತ ಮತ್ತು ಪಾತಕಿಸ್ತಾನ ಈಜಿಪ್ಟಿನಲ್ಲಿ ಹೊರಡಿಸಿದ ಜಂಟಿ ಹೇಳಿಕೆಯಲ್ಲಿ ಬಲೂಚಿಸ್ತಾನದ ಹೆಸರು ಸೇರಿಕೊಂಡಿರುವುದು ಮತ್ತು ಎಲ್ಲ ಸಮಸ್ಯೆಗಳಿಗೆ ಮಾತುಕತೆಯೊಂದೇ ಪರಿಹಾರ ಎಂದು ನಿಧಾನಮಂತ್ರಿಗಳು ಒಪ್ಪಿಕೊಂಡು ಬಂದು ಬ್ಲಂಡರ್ ಮಾಡಿರುವುದು ಜಾಗತಿಕ ತಾಪಮಾನವನ್ನು ಮತ್ತು ಭಾರತದ ಮಾನವನ್ನು ಕಂಗೆಡಿಸುತ್ತಿರುವ ಹಿನ್ನೆಲೆಯಲ್ಲಿ, ನಿಧಾನಮಂತ್ರಿಗಳನ್ನು ಅವಸರವಸರವಾಗಿ ಸಂದರ್ಶನ ನಡೆಸಲಾಯಿತು. ಸಂದೇಶದ ತುಣುಕುಗಳು ಈ ಕೆಳಗೆ ಬಿದ್ದಿವೆ. ಅವುಗಳನ್ನು ಹೆಕ್ಕಿಕೊಂಡು ಓದಲು ಪಾಕಿಸ್ತಾನದ ಅಧ್ಯಕ್ಷ ಆಸಿಫಾಲಿ ಜರ್ದಾ ಒಡೆಯರು ನಿರ್ದೇಶಿಸಿದ್ದಾರೆ.

* ನಮಸ್ಕಾರ ನಿಧಾನಿಗಳೇ, ನೀವೇಕೆ ಬಲೂಚಿಸ್ತಾನವನ್ನು ಜಂಟಿ ಹೇಳಿಕೆಯಲ್ಲಿ ಸೇರಿಸಿದ್ದೀರಿ?
ನಿಧಾನಿ: ಬಲೂಚಿಸ್ತಾನವು ಪಾತಕಿಸ್ತಾನದ ಅತಿದೊಡ್ಡ ಪ್ರಾಂತ್ಯ. ಆದರೆ ಪುಟ್ಟ ಪ್ರಾಂತ್ಯವಾದ ಕಾಶ್ಮೀರ ಭಾಗಕ್ಕೆ ಸಿಗುವಷ್ಟು ಪ್ರಚಾರ ಅದಕ್ಕೆ ಸಿಗುತ್ತಿಲ್ಲ. ಬಲೂಚಿಯಲ್ಲಿ ಕೂಡ ಸಾಕಷ್ಟು ಉಗ್ರಗಾಮಿಗಳಿದ್ದಾರೆ, ಪ್ರತ್ಯೇಕತಾವಾದಿಗಳಿದ್ದಾರೆ. ಈಗ ನಮ್ಮಲ್ಲೇ ಈಶಾನ್ಯ ರಾಜ್ಯಗಳಲ್ಲೂ ಇಂಥವರು ಇಲ್ಲವೇ? ಅವರೆಲ್ಲರೂ ಪ್ರಸಿದ್ಧಿ ಪಡೆದರುವಾಗ, ಬಲೂಚಿಸ್ತಾನ ಮಾತ್ರ ಯಾವುದೇ ಉಲ್ಲೇಖಗಳಿಲ್ಲದೆ, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಏನೂ ಸದ್ದು ಮಾಡುತ್ತಿರಲಿಲ್ಲ. ಅದಕ್ಕಾಗಿಯೇ ಅದನ್ನು ಸೇರಿಸಿದ್ದು.

* ಹೌದೇ? ಬಲೂಚಿಸ್ತಾನದಲ್ಲಿ ನಿಜವಾಗಿ ನಡೆಯುತ್ತಿರುವುದೇನು?
ಅದು ನಂಗೂ ಗೊತ್ತಿಲ್ಲ, ನನ್ನ ಎದುರಿಗೆ ಕೂತ ಯೂಸುಫ್ ರಾಜಾ ಗಿಲಿಗಿಲಾನಿ ಅವರು ತುಂಬಾ ಸಲ ಬಲೂಚಿಸ್ತಾನ, ಬಲೂಚಿಸ್ತಾನ ಅಂತ ಹೇಳ್ತಾನೇ ಇದ್ದರು. ನಂಗೆ ಅದೇನೂ ಅರ್ಥವಾಗ್ತಾ ಇರ್ಲಿಲ್ಲ. ಬಹುಶಃ ಬಲೂಚಿಸ್ತಾನ ಅಂದ್ರೆ ಅವರಿಗೆ ಪಂಚಪ್ರಾಣ ಇರ್ಬೇಕು, ಅದ್ಕೇ ಅವರು ಹೀಗಾಡ್ತಾರೆ ಅಂದ್ಕೊಂಡು, ಪಾಕಿಸ್ತಾನೀಯರಿಗೆ, ಆ ಮೂಲಕ ಭಾರತದಲ್ಲಿರುವ ಪಾಕಿಸ್ತಾನೀಯರಿಗೆ ಒಂದಷ್ಟು ನೆಮ್ಮದಿ ಸಿಗಲಿ ಎಂಬ ಕಾರಣಕ್ಕೆ ಜಂಟಿ ಹೇಳಿಕೆಯಲ್ಲಿ ಅದನ್ನು ಸೇರಿಸಿಬಿಟ್ಟೆ.

* ಮತ್ತೆ, ಮೊನ್ನೆ ಮೊನ್ನೆವರೆಗೂ ಉಗ್ರಗಾಮಿಗಳೊಂದಿಗೆ ಮಾತುಕತೆ ಇಲ್ಲ ಎನ್ನುತ್ತಿದ್ದವರು, ಈಗ ಮಾತುಕತೆಯೊಂದೇ ಪರಿಹಾರ ಎಂದು ಬಂಬಡಾ ಬಜಾಯಿಸುವ ಮೂಲಕ ತಿಪ್ಪರಲಾಗ ಹಾಕಲು ಕಾರಣವೇನು?

ತಿಪ್ಪರಲಾಗ ಹಾಕಿಕೊಟ್ಟಲು ನಮಗೆ ಪಾಕಿಸ್ತಾನವೇ ಹೇಳಿಕೊಟ್ಟದ್ದು. ಅದನ್ನು ನಾವು ಚೆನ್ನಾಗಿಯೇ ಕಲಿತುಕೊಂಡೆವು. ಹೀಗಾಗಿ, ಭಾರತದಲ್ಲಿರುವ ಎಲ್ಲ ಮೊಬೈಲ್ ಕಂಪನಿಗಳು ಕೂಡ, ಹೆಚ್ಚು ಹೆಚ್ಚು ಮಾತನಾಡಿದರೆ ಹೆಚ್ಚು ಉಳಿತಾಯ, ಹೆಚ್ಚು ಲಾಭ ಅಂತೆಲ್ಲಾ ಜಾಹೀರಾತು ಕೊಡುತ್ತಿವೆಯಲ್ಲ. ಅದನ್ನು ಪ್ರಯೋಗ ಮಾಡಿ ನೋಡೋಣ ಎಂದುಕೊಂಡೇ ನಾವು ಭಾರತ-ಪಾಕ್ ನಡುವೆಯೂ ಹೆಚ್ಚು ಹೆಚ್ಚು ಮಾತನಾಡಬೇಕು ಎಂದು ಒಪ್ಪಿಬಿಟ್ಟೆ. ಇದರಿಂದ ಮೊಬೈಲ್ ಕಂಪನಿಗಳಿಗೂ ಲಾಭವಾಗುತ್ತದೆ. ದೇಶದ ಆರ್ಥಿಕತೆ ಸುಧಾರಣೆಯಾಗುತ್ತದೆ.

* ಬೊಗಳೆ ರಗಳೆ ಓದುಗರಿಗಾಗಿ ಈ ಬಗ್ಗೆ ಇನ್ನೂ ಏನಾದರೂ ಹೇಳಬೇಕೆಂದು ನೀವು ಇಚ್ಛಿಸಿದ್ದೀರಾ?
ಹೌದು, ಬೊಗಳೆ ರಗಳೆಯೇ ಮೊದಲು ನಮ್ಮನ್ನು ಈ ಬಗ್ಗೆ ಮಾತನಾಡಿಸಿದ್ದು. ಹೀಗಾಗಿ ಅದರ ಓದುಗರಿಗೆಲ್ಲರೂ ಶ್ರೀಮಂತರಾಗಿರಬೇಕು ಎಂಬ ಉದ್ದೇಶದಿಂದಾಗಿ, ನಾವು ಅಕ್ಕಿ-ಬೇಳೆ-ತರಕಾರಿ ಬೆಲೆಗಳನ್ನು ಗಗನಕ್ಕೇರಿಸಿ, ಅವರು ಹೆಚ್ಚು ಹಣ ಕೊಟ್ಟು ಖರೀದಿಸುವಂತೆ ವ್ಯವಸ್ಥೆ ಮಾಡಿದ್ದೇವೆ. ಹೀಗಾಗಿ, ತರಕಾರಿ-ಅಕ್ಕಿ-ಬೇಳೆ ತಿನ್ನುವವರೆಲ್ಲರೂ ಶ್ರೀಮಂತರು ಎಂದು ನಾವು ತಿಳಿದುಕೊಂಡು, ನಮ್ಮ ದೇಶವೂ ಸಮೃದ್ಧವಾಗಿದೆ ಎಂದು ತಿಳಿದುಕೊಳ್ಳುತ್ತೇವೆ. ಈ ಬಗ್ಗೆ ಶೀಘ್ರವೇ ನಮ್ಮ ಸಾಧನೆಗಳ ಕುರಿತ ಒಂದು ಪುಸ್ತಕ ಹೊರತರಲಿದ್ದೇವೆ. ಧನ್ಯವಾದ.

ಮುಮೋದ್ ಪ್ರತಾಲಿಕ್ ಪದೇ ಪದೇ ಸೆರೆಗೆ ಕಾರಣ!

2009-07-28T09:29:00.001+05:30

(ಬೊಗಳೂರು ಪಿಂಕ್ ಸಂಚೋದನಾ ಬ್ಯುರೋದಿಂದ)

ಬೊಗಳೂರು, ಜು.28- ಯಾವುದೇ ಗಲಭೆ ನಡೆದರೂ, ಹೋದಲ್ಲೆಲ್ಲಾ ಹಿಂಬಾಲಿಸಿಕೊಂಡು ಹೋಗಿ ಮುಮೋದ್ ಪ್ರತಾಲಿಕ್ ಎಂಬ ಸೈನಿಕನನ್ನು ಬಂಧಿಸುವುದು ಏಕೆ ಎಂಬ ಬಗ್ಗೆ ಬೊಗಳೂರು ಬ್ಯುರೋ ಸಂಚೋದನೆ ನಡೆಸಿದಾಗ ಯಾರಿಗೂ ಗೊತ್ತಿಲ್ಲದ, ಗೊತ್ತಿರಲಾರದ ಮತ್ತು ಗೊತ್ತಿರಬೇಡದ ಸಂಗತಿಗಳೆಲ್ಲವೂ ದೊರಕಿದವು.

ನಾನು ಕ್ಯಾತಮಾರನಹಳ್ಳಿಯಲ್ಲಿ ಕ್ಯಾಕರಿಸಿ ಉಗುಳಲು ಹೋಗಿಲ್ಲ, ಸುಮ್ಮನೇ ತನ್ನ ಹೆಸರಿಗೆ ಲಿಂಕ್ ಕೊಡಲಾಗಿದೆ ಎಂದು ಮುಮೋದ್ ಪ್ರತಾಲಿಕ್ ಹೇಳಿರುವುದರಿಂದಾಗಿ ಈ ಸಂಚೋದನೆ ಮಾಡಲಾಯಿತು.

ಇದರ ಮೂಲವೆಲ್ಲವೂ ಮಂಗಳೂರಿನಲ್ಲಿ ನಡೆದ ಪಬ್ ದಾಳಿಯಲ್ಲಿದೆ. ಇಲ್ಲಿ ಕುಡಿದು ತೂರಾಡುತ್ತಿದ್ದವರಿಗೆ ಬಡಿದ ಪರಿಣಾಮ ಅದನ್ನು ರಾಷ್ಟ್ರಮಟ್ಟದ ಹೆಡ್ ಬ್ರೇಕಿಂಗ್ (=ತಲೆ ಒಡೆಯುವ ಹೆಡ್‌ಲೈನ್) ನ್ಯೂಸ್ ಆಗಿ ಮಾಡಲಾಗಿತ್ತು. ಆ ಬಳಿಕ ಅಲ್ಲಲ್ಲಿ ಪ್ರತಿಭಟನೆ, ಸಮಾವೇಶ ನಡೆದು, ಕೆಲವರಂತೂ ತಲೆಬಿಸಿಯಿಂದಾಗಿ ಪಬ್ ಭರೋ ಚಳವಳಿಯನ್ನೂ ಮಾಡಿದ್ದರು. ಆ ಮೇಲೆ, ಮಾವನ ಹಕ್ಕುಗಳ ಉಲ್ಲಂಘನೆಯ ಆರೋಪ, ತಾಲಿಬಾನ್ ಇತ್ಯಾದಿ ಕೇಳಿಬಂದಿತ್ತು.

ಕೊಟ್ಟಕೊನೆಗೆ ಮಾವನ ಹಕ್ಕುಗಳ ಉಲ್ಲಂಘನೆ ಸುದ್ದಿ ಜೋರಾಗಿಯೇ ಬಲ ಪಡೆದು ರೇಣುಕಾಚಉದುರಿ ಅವರು ಹೇಳಿಕೆಯೊಂದನ್ನು ಕೊಟ್ಟದ್ದೇ ತಡ, ಪಿಂಕ್ ಕಾಚಗಳು ನೆಟ್ಟಿನಲ್ಲೆಲ್ಲಾ ಹರಿದಾಡಿದವು. ಮುಮೋದ್ ಪ್ರತಾಲಿಕ್ ಮನೆಗೆ ಎಷ್ಟೋ ಸಾವಿರ ಪಿಂಕ್ ಕಾಚಗಳು ತಲುಪಿದವು ಎಂದು ತಿಳಿದುಬಂದಿದೆ.

ಆದರೆ, ಈ ಚಡ್ಡಿಗಳನ್ನು ಅವರೇನು ಮಾಡಿದರು? ಎಂಬ ಬಗ್ಗೆ ಸಂಚೋದಿಸಲಾಗಿ, ಅವುಗಳೆಲ್ಲವನ್ನೂ ರಾಜ್ಯಾದ್ಯಂತ ಬಡಬಗ್ಗರಿಗೆ ವಿತರಿಸಲಾಗಿದೆ. ರಾಜ್ಯದ ಮೂಲೆ ಮೂಲೆಯಲ್ಲಿಯೂ ಪ್ರತಾಲಿಕ್ ಅವರ ಹೆಸರು ಹೇಳಿಕೊಂಡು ಸಾಕಷ್ಟು ಮಂದಿ ಪಿಂಕ್ ಚಡ್ಡಿ ಧರಿಸಿಕೊಂಡಿದ್ದಾರೆ. ಹೀಗಾಗಿ, ಅವರೆಲ್ಲರ ಮೇಲೂ ಪಿಂಕ್ ಚಡ್ಡಿಯೂ, ಆ ಮೂಲಕ ಮುಮೋದ್ ಪ್ರತಾಲಿಕ್ ಅವರೂ ಪ್ರಭಾವ ಬೀರಿದರೆಂದಾಯಿತು. ಅಂದರೆ ಪಿಂಕ್ ಚಡ್ಡಿ ಇರುವೆಡೆ ಮುಮೋದ್ ಪ್ರತಾಲಿಕ್ ಕೈವಾಡ ಇದೆ ಎಂಬುದನ್ನು ಗಟ್ಟಿ ಮಾಡಿಕೊಂಡ ಕಾರಣಕ್ಕೆ ಪೊಲೀಸರು, ಎಲ್ಲೇ ಏನೇ ನಡೆದರೂ ಮುಮೋದ್ ಪ್ರತಾಲಿಕ್ ಕೈವಾಡವಿದೆ ಎಂದು ಪಿಂಕ್ ಚಡ್ಡಿಯ ಸಾಕ್ಷ್ಯಾಧಾರ ಸಮೇತ ಬಂಧಿಸಿ ಜೈಲಿಗಟ್ಟುತ್ತಿದ್ದಾರೆ ಎಂದು ನಮ್ಮ ಬಾತ್ಮೀದಾರರು ರದ್ದಿ ಮಾಡಿದ್ದಾರೆ.

ತಮಿಳುಕಾಡು ಮುಖ್ಯ ಮಂ. ರಾಮಾಯಣ ವಿರೋಧಿಸೋದೇಕೆ?

2009-07-22T08:00:00.001+05:30

(ಬೊಗಳೂರು ತಮಿಳುಕಾಡು ಸಂಚೋದನಾ ಬ್ಯುರೋದಿಂದ)

ಬೊಗಳೂರು, ಜು.22- ಹುಣ್ಣಿಮೆ ಅಮಾವಾಸ್ಯೆ (ಈ ಬಾರಿ ವಿಶೇಷವಾಗಿ ಸೂರ್ಯಗ್ರಹಣ ಹತ್ತಿರವಾಗುತ್ತಿರುವಂತೆಯೇ) ಬರುತ್ತಿರುವಂತೆಯೇ ರಾಮ ಇಲ್ಲ, ರಾಮಾಯಣ ಇಲ್ಲ ಎನ್ನುತ್ತಲೇ, ರಾಮಾಯಣವನ್ನು ಟೀಕಿಸುವುದು ನನ್ನ ಆಜನ್ಮ ಸಿದ್ಧ ಹಕ್ಕು ಎಂದು ನುಡಿದ ತಮಿಳುಕಾಡಿನ ಕಪ್ಪು ಕನ್ನಡಕಧಾರಿ ಮುಖ್ಯಮಂತ್ರಿಗಳನ್ನು ಬೊಗಳೆ ರಗಳೆ ಮಾತನಾಡಿಸುವ ಗೋಜಿಗೆ ಹೋದಾಗ ಕೆಲವೊಂದು ಅಮೂಲ್ಯ ಸಂಗತಿಗಳು ಪತ್ತೆಯಾದವು.

ಇತ್ತೀಚೆಗಷ್ಟೇ ರಾಮ ಯಾವ ಎಂಜಿನಿಯರಿಂಗ್ ಕಾಲೇಜಿನಲ್ಲಿ ಓದಿದ್ದು ಎಂದು ಪ್ರಶ್ನಿಸಿ ಅಭಿಮಾನಿಗಳ ವ್ಯಾಕ್‌ಥೂಗಳಿಗೆ ಈಡಾಗಿರುವ ತಮಿಳುಕಾಡಿನೊಡಿನ ಮುಖ್ಯ ಮಂ.ಗಳು, ಈ ಬಗ್ಗೆ ಸ್ಪಷ್ಟನೆ ನೀಡಿದರು.

ವ್ಯಾಕ್‌ಥೂವಲಿ (ಇದು actually ಎಂಬ ಇಂಗ್ಲಿಶ್ ಪದವನ್ನು ತಮಿಳಿನಲ್ಲಿಯೇ ಉಚ್ಚರಿಸಿದ್ದು ಎಂದು ಅವರು ಆ ಬಳಿಕ ಬೊಗಳೆ ರಗಳೆ ಕಿವಿಯಲ್ಲಿ ಪಿಸುಗುಟ್ಟಿದ್ದರು) ನಾನು ಏನು ಹೇಳಿದ್ದೆಂದರೆ, ಭಾರತದಿಂದ ಲಂಕೆಗೆ ಸಮುದ್ರದಲ್ಲಿ ಅಷ್ಟು ದೊಡ್ಡ ಸೇತುವೆ ಕಟ್ಟಿರಬೇಕಿದ್ದರೆ, ಶ್ರೀರಾಮ ಯಾವ ಎಂಜಿನಿಯರಿಂಗ್ ಕಾಲೇಜಿನಲ್ಲಿ ಓದಿದ್ದಿರಬಹುದು? ಎಂದು ನಾನು ಪ್ರಶ್ನಿಸಿದ್ದೆ. ಅದು ಗೊತ್ತಾದರೆ, ಆ ಕಾಲೇಜನ್ನು ತಮ್ಮ ನಾಲ್ಕಾರು ಹೆಂಡಿರ ಮಕ್ಕಳ ವಶಕ್ಕೆ ಕೊಡಿಸಿಬಿಟ್ಟಲ್ಲಿ ಹೋಗುವ ಮೊದಲು ಜನ್ಮ ಸಾರ್ಥಕ ಮಾಡಿಕೊಂಡೇ ಹೋಗುವೆ ಎಂದು ಅವರು ತತ್ತರಿಸುತ್ತಾ ಉತ್ತರಿಸಿದರು.

ಹಾಗಿದ್ದರೆ, ರಾಮಾಯಣವನ್ನು ಟೀಕಿಸುವೆ, ರಾಮನನ್ನು ಟೀಕಿಸುವೆ ಎಂಬ ಹೇಳಿಕೆ ನೀಡಿದ್ದೇಕೆ ಎಂದು ಪ್ರಶ್ನಿಸಿದಾಗ, ನೀವು ಯಾರಿಗೂ ಹೇಳದಿದ್ದರೆ ಮಾತ್ರ ಈ ಸಂಗತಿ ಬಾಯಿ ಬಿಡುತ್ತೇನೆ. ಈಗಾಗಲೇ ಕೆಟ್ಟದ್ದನ್ನು ನೋಡಬಾರದು ಎಂದು ಕಪ್ಪು ಗಾಜು ಧರಿಸಿದ್ದೇನೆ. ಆದರೂ ನೀವು ಅದು ಹೇಗೆ ನಮ್ಮ ಕಣ್ಣಿಗೆ ಕಾಣುತ್ತಿದ್ದೀರಿ ಅಂತಲೇ ಗೊತ್ತಾಗುತ್ತಿಲ್ಲ ಎಂದು ಬೊಗಳೆ ಸದಸ್ಯರೆದುರು (ಕಪ್ಪುಕನ್ನಡಕದ)ಒಳಗಣ್ಣು ಬಿಡುತ್ತಾ ನುಡಿದ ಅವರು, ಮಾತು ಮುಂದುವರಿಸಿ ಚಿದಂಬರ ರಹಸ್ಯವೊಂದನ್ನು ಬಿಚ್ಚಿಟ್ಟರು.

ಅದೆಂದರೆ, ಶ್ರೀರಾಮ ಏಕಪತ್ನೀ ವ್ರತಸ್ಥ. ಅದಕ್ಕೇ ನನಗೆ ಮತ್ತು ಅವನಿಗೆ ಸರಿಹೋಗುವುದಿಲ್ಲ. ನನಗೀಗಾಗಲೇ ಬಹುಪತ್ನಿಯರೂ, ಬಹುಪುತ್ರರೂ ಇದ್ದಾರೆ. ಹೀಗಾಗಿ ರಾಮನನ್ನು ವಿರೋಧಿಸದೆ ವಿಧಿಯಿಲ್ಲ. ರಾಮನ ಆದರ್ಶ ಪಾಲಿಸಲು ಯಾರಾದರೂ ಒತ್ತಡ ಹೇರಿಯಾರೆಂಬ ಆತಂಕ ಇನ್ನೂ ಕಾಡುತ್ತಿದೆ ಎಂದುಸುರಿದರು.

ಯಾರಿಗೂ ಹೇಳಬೇಡಿ ಎಂದು ಬೊಗಳೆ ರಗಳೆಗೆ ಕಪ್ಪೆಚ್ಚರಿಕೆ ನೀಡಿರುವುದರಿಂದ, ನಾವು ಕೂಡ ಇದನ್ನು ಪ್ರಕಟಿಸಲು ಇಚ್ಛಿಸುವುದಿಲ್ಲ ಎಂದು ಈ ಮೂಲಕ ಹೇಳುತ್ತಿದ್ದೇವೆ.

ಹಾಗಿದ್ದರೆ ಅವರು ಸೂರ್ಯಗ್ರಹಣ ಹತ್ತಿರವಾಗುತ್ತಿರುವಾಗ ಇಂತಹ ಹೇಳಿಕೆಗಳನ್ನು ನೀಡುತ್ತಿರುವುದೇಕೆ ಎಂದು ಕೇಳಲಾಯಿತು. ಇದಕ್ಕೆ ಪ್ರಧಾನ ಕಾರಣ ಅವರ ಪಕ್ಷದ ಚಿಹ್ನೆ ಉದಯಿಸುವ ಸೂರ್ಯ!

ಜಾಗತಿಕ ಉಷ್ಣತೆ: ಕಾರಣ, ಪರಿಹಾರ ಮತ್ತು ಆತಂಕ!!!

2009-07-20T07:31:00.000+05:30

(ಬೊಗಳೂರು ತಾಪಮಾನಾಪಮಾನ ಬ್ಯುರೋದಿಂದ)

ಬೊಗಳೂರು, ಜು.20- ಜಾಗತಿಕ ತಾಪಮಾನ ಹೆಚ್ಚಳಕ್ಕೆ ಕಾರಣ ಪತ್ತೆ ಹಚ್ಚಲಾಗುತ್ತಿರುವಾಗಲೇ ವಿಷಯ ಎಲ್ಲ ಗೊತ್ತಾಗಿಬಿಟ್ಟಿದೆ. ಇದಕ್ಕೆಲ್ಲಾ ಕಾರಣ ಬಾಲಿವುಡ್ ನಟೀಮಣಿಯರು!!

ಬಾಲಿವುಡ್ ನಟೀಮಣಿಯರು ಉಡುತ್ತಿರುವ ಬಟ್ಟೆಯ ಪ್ರಮಾಣ ಕಡಿಮೆಯಾಗುತ್ತಿರುವುದರಿಂದಲೇ ಜಾಗತಿಕವಾಗಿ ತಾಪಮಾನ ಹೆಚ್ಚಾಗುತ್ತಿದೆ ಎಂಬುದನ್ನು ಬೊಗಳೂರು ಬ್ಯುರೋ ಕಂಡುಕೊಳ್ಳಲು ಹೊರಟಿತ್ತು. ಇದೀಗ ಮೋಸ್ಟ್ ಗೂಗಲ್ಡ್ ಸೆಕ್ಸೀ ನಟಿ ಕತ್ರಿನಾ ಕೈಫ್ "ಬಟ್ಟೆಗೂ ಕತ್ರೀನಾ?" ಎಂದು ಹುಬ್ಬೇರಿಸುವಷ್ಟರ ಮಟ್ಟಿಗೆ ಮೆರೆದಾಡಿದರೂ, ಜಾಗತಿಕ ತಾಪಮಾನದ ಬಗ್ಗೆ ಇಲ್ಲಿ ಕಳವಳ ವ್ಯಕ್ತಪಡಿಸಿರುವುದು ಬಾಲಿವುಡ್ ಪ್ರಿಯರ ಕಳವಳಕ್ಕೂ ಕಾರಣವಾಗಿದೆ.

ಮೂರು ವರ್ಷಗಳ ಹಿಂದೆಯೇ ತಾಪಮಾನ ಹೆಚ್ಚಳಕ್ಕೆ ಮತ್ತೊಂದು ಕಾರಣವನ್ನೂ ಬೊಗಳೆ ರಗಳೆ ಇಲ್ಲಿ ಪತ್ತೆ ಮಾಡಿತ್ತು.

ಇದೀಗ ಕಿಲರಿ ಹ್ಲಿಂಟನ್ ಅವರು ಕೂಡ ಜಾಗತಿಕ ತಾಪಮಾನಕ್ಕೆ ಕಡಿವಾಣ ಹಾಕಬೇಕಾಗಿದೆ ಎಂದು ಬೊಂಬಾಯಿಯೊಂದಿಗೆ ಮುಂಬಯಿಗೆ ಬಂದು, ಬಾಲಿವುಡ್ ನಟೀಮಣಿಯರಿರುವ ತಾಣದಲ್ಲೇ ಹೇಳಿರುವುದರ ಹಿಂದಿನ ಮರ್ಮವೇನು ಎಂಬ ಬಗ್ಗೆ ಸಂಚೋದನೆ ನಡೆಯುತ್ತಿದೆ.

ಇತ್ತೀಚೆಗೆ ನಟೀಮಣಿಯರು ಪುಟ್ಟ ಬೆಂಕಿ ಪೆಟ್ಟಿಗೆಯೊಳಗೆ ಮಡಚಿ ಇರಿಸಬಹುದಾದಷ್ಟು ಭಾರೀ ಗಾತ್ರದ ಉಡುಗೆ ತೊಡುವ, ಅಥವಾ ಆ ಉಡುಗೆಯನ್ನು ದೇಹಕ್ಕೆ "ಸ್ಯಾಂಪಲ್' ಆಗಿ ತೋರಿಸುವ ಪ್ರವೃತ್ತಿ ಹೆಚ್ಚಿಸುತ್ತಾ ಪ್ರಸಿದ್ಧಿ ಪಡೆಯಲು ಹರಸಾಹಸ ಮಾಡುತ್ತಿರುವುದರಿಂದ, ದೇಹದ ಮತ್ತು ದೇಶದ ತಾಪಮಾನ ಹೆಚ್ಚಾಗುತ್ತಿದೆ ಎಂದು ತಿಳಿದುಬಂದಿದೆ.

ಇದೀಗ ತಾಪಮಾನ ತಗ್ಗಿಸಲು ಎಲ್ಲರೂ ಹರ ಸಾಹಸ ಮಾಡುತ್ತಿರುವದರಿಂದ ದೇಶದೆಲ್ಲೆಡೆ ಕಳವಳವೂ ಬಿಸಿಬಿಸಿಯಾಗಿ ಏರತೊಡಗಿದೆ. ರೆ ಕತ್ರಿನಾ ಸೇರಿದಂತೆ ಬಾಲಿವುಡ್ ನಟೀಮಣಿಯರೇನಾದರೂ ಜಾಗತಿಕ ತಾಪಮಾನ ಕಡಿಮೆ ಮಾಡಲು ಪಣ ತೊಟ್ಟರೆ ಎಂಬ ಆತಂಕವೇ ಇದಕ್ಕೆ ಕಾರಣ ಎಂದು ಸಂಚೋದಿಸಲಾಗಿದೆ.

ಜಾಗತಿಕ ತಾಪಮಾನ ಏರಲು ಕಾರಣ, ಪರಿಹಾರದ ಭೀತಿ!!?

2009-07-18T19:29:00.002+05:30

ಹೆಚ್ಚುತ್ತಿರುವ ಜಾಗತಿಕ ತಾಪಮಾನಕ್ಕೆ ಪರಿಹಾರ ಕಂಡು ಹುಡುಕಿದರೆ ಭೀತಿ ಯಾಕೆ???

ಬೊಗಳೆ ರಗಳೆಯ ಮುಂದಿನ ಸಂಚಿಕೆ ನಿರೀಕ್ಷಿಸಿ...

ಪ್ರತಿಗಳನ್ನು ಕಾದಿರಿಸಿ, ಬಾರದೇ ಇದ್ದರೆ ಪ್ರತಿಗಳನ್ನು ಸುಡುವ ಕಾರ್ಯಕ್ರಮ ಮಾತ್ರ ಇಟ್ಟುಕೊಳ್ಳದಿರಿ...

ಈ ಅವಕಾಶವನ್ನು ಇನ್ನೆಂದಿಗೂ ಕಳೆದುಕೊಳ್ಳಲಾರಿರಿ ನೀವು. ನಿರೀಕ್ಷಿಸುತ್ತಿರಿ.

ಎಂಪಿಗಳು ಎಮ್ಮೆಗಳಾಗಲು ಒಪ್ಪಲಿಲ್ಲವೇಕೆ?

2009-07-16T08:00:00.000+05:30

(ಬೊಗಳೂರು ಎಮ್ಮೆ ಪ್ರತಿಭಟನಾ ಬ್ಯುರೋದಿಂದ)

ಬೊಗಳೂರು, ಜು.16- ಎಂಎ ಪದವಿ ಕೊಡುತ್ತೇವೆಂದರೂ ಕೈಗೆ ಸಿಗದಂತೆ ಓಡಿ ಪರಾರಿಯಾಗಿರುವ ಎಂಪಿಗಳ ಬಗ್ಗೆ ಬೊಗಳೂರಿನಲ್ಲಿ ತೀವ್ರ ಉತ್ಸಾಹದ ನುಡಿಗಳು, ಪ್ರಶಂಸೆ ಭರಿತ ಆಕ್ರೋಶದ ನುಡಿಗಳು, ಹಗೆನುಡಿಗಳು ಮತ್ತಿತರ ನುಡಿಗಳು ಕೇಳಿಬರುತ್ತಿವೆ.

ಇದಕ್ಕೆಲ್ಲಾ ಕಾರಣವಾದದ್ದು ಹೈಕದ ಹೈಕಳು ನಡೆಸಿದ ಪ್ರತಿಭಟನೆ. ಅದನ್ನು ಪ್ರತಿಭಟನೆ ಎಂದು ಕರೆಯಬಾರದು, ಪ್ರಶಂಸಾಘಟನೆ ಎಂದು ಕರೆಯಬೇಕೆಂಬ ಬೊಗಳೋದುಗರ ಒತ್ತಾಯದಿಂದಾಗಿ ಕೆಲವುಕಾಲ ಇಂಟರ್ನೆಟ್‌ನಲ್ಲಿ ಟ್ರಾಫಿಕ್ ಜಾಮ್ ಆದ ವರದಿಗಳು ಒಂದೆಡೆಯಿಂದ ಬರುತ್ತಿರುವಂತೆಯೇ ಅದನ್ನು ಬಿಟ್ಟು, ರಾಜ್ಯದ ಸಮಸ್ಯೆಗಳ ಬಗ್ಗೆ ಸಂಸತ್ತಿನಲ್ಲಿ ಮೌನವೇ ಮೂರ್ತಿವೆತ್ತಂತೆ ಕುಳಿತುಕೊಳ್ಳುವ 28 ಮಂದಿ ಸಂಸದರಿಗೆ ಎಂಎ ಪ್ರದಾನಮಾಡುವ ಬಗ್ಗೆ ಬಿಸಿಬಿಸಿ ಸಿದ್ಧತೆ ನಡೆಸಿರುವುದನ್ನು ವರದಿ ಮಾಡಲು ತೀರ್ಮಾನಿಸಲಾಗಿದೆ.

ಅಲ್ಲಿ ನಡೆದ ಪ್ರಶಂಸಾಘಟನೆಯಲ್ಲಿ, ಆ 28 ಮಂದಿಯಲ್ಲಿ ಉಳಿದದ್ದು ಕೇವಲ ಒಂದು ಎಮ್ಮೆ ಮಾತ್ರ. ಅದು ಕೂಡ ಸಂಸತ್ತಿನಲ್ಲಿ ಸಂಸದರು ಕಣ್ಣಿನ ಭಾರವನ್ನು ಅಳೆದು ಅಳೆದು ತೂಗಿ ತೂಗಿ ತೂಕಡಿಸುತ್ತಾ ಕುಳಿತಿದ್ದ ಮಾದರಿಯಲ್ಲೇ, ಅಥವಾ ಎಂದಿನ ಅಭ್ಯಾಸ ಬಲದಂತೆ ಅಂದು ಕೂಡ ಇದ್ದುದರಿಂದಾಗಿ ಆ ಒಂದು ಎಮ್ಮೆಗೆ ಓಡಲಾಗಿರಲಿಲ್ಲ. ಕೊನೆಗೆ ಎಲ್ಲ ಅತ್ಯುತ್ತಮ ಎಂಎ ಪ್ರಶಸ್ತಿಗಳನ್ನು ಇದ್ದ ಎಮ್ಮೆಯ ಕೊರಳಿಗೇ ಕಟ್ಟಲಾಯಿತು.

ರೈಲ್ವೇ ಬಜೆಟಿನಲ್ಲಾಗಲೀ, ಮುಖ್ಯ ಬಜೆಟಿನಲ್ಲಾಗಲೀ, ಅದರ ಆಚೀಚೆಯಾಗಲೀ, ಕರ್ನಾಟಕಕ್ಕೆ ಯಾವಾಗಲೂ ಕೇಂದ್ರ ಸರಕಾರದಿಂದ ಅನ್ಯಾಯವಾಗುತ್ತಿದೆ. ಇದೆಲ್ಲಾ "ಮಾಮೂಲು, ಇದ್ದದ್ದೇ, ಕಳೆದ ಐವತ್ತು ವರ್ಷಗಳಿಂದ ಹೀಗೇ ನಡೆದುಕೊಂಡುಬರುತ್ತಿದೆ. ಈ ಒಂದು ವರ್ಷ ಮುಂದುವರಿದರೆ ಆಕಾಶ ಕಳಚಿಬೀಳುವುದಿಲ್ಲ" ಎಂದುಕೊಂಡಿದ್ದ 28 ಮಂದಿ ಸಂಸದರು, ಸಂಸತ್ತಿನಲ್ಲಿ ಕುಳಿತು ಎಲ್ಲವನ್ನೂ ಅಳೆದು ತೂಗಿ ನೋಡುವುದರಲ್ಲೇ ಕಾಲ ಕಳೆಯುತ್ತಿದ್ದರು ಎಂದು ನಮ್ಮ ರಹಸ್ಯ ವರದ್ದಿಗಾರರು ಯಾವಾಗಲೂ ವರದ್ದಿ ತಂದೊಪ್ಪಿಸುತ್ತಿರುತ್ತಾರೆ.

ಈ ಸಂಸದರನ್ನೂ ಈ ಪ್ರಶಂಸಾಘಟನಾ ಸ್ಥಳಕ್ಕೆ ಕರೆದಾಗ ಅವರು ಬಂದರೂ, 27 ಮಂದಿ ಚೆಲ್ಲಾಪಿಲ್ಲಿಯಾಗಿ ಓಡಿ ಹೋಗಿದ್ದೇಕೆ ಎಂಬ ಬಗ್ಗೆ ಬೊಗಳೆ ರಗಳೆ ಬ್ಯುರೋ ತೀವ್ರ ತನಿಖೆ ನಡೆಸಿತು. ಇದಕ್ಕೆ ಕಾರಣವೆಂದರೆ, ಪ್ರಜಾಪ್ರತಿನಿಧಿಗಳ ವೇತನ ಹೆಚ್ಚಳದ ಪ್ರಜಾಪ್ರತಿನಿಧಿ ಕಾಯ್ದೆಗೆ ತಿದ್ದುಪಡಿ ತರುವ ಬಗ್ಗೆ ಸಂಸತ್ತಿನಲ್ಲಿ ತೀವ್ರ ಚರ್ಚೆಯಾಗುತ್ತಿತ್ತು ಮತ್ತು ಅದು ಅವಿರೋಧವಾಗಿ ಮಂಡನೆಯಾಗಿ, ಅವಿರೋಧವಾಗಿಯೇ ಸ್ವೀಕಾರವಾಗುವಂತೆ, ಅವಿರೋಧವಾಗಿಯೇ ಅನುಮೋದನೆ ದೊರೆಯುವಂತೆ ನೋಡಿಕೊಳ್ಳಬೇಕಾಗಿತ್ತು. ಯಾಕೆಂದರೆ ಇದು ಅತಿಗಂಭೀರವಾದ, ದೇಶವನ್ನೇ ಗಡಗಡನೆ ನಡುಗಿಸಬಹುದಾದ ಗಂಡಾಂತರ ತರಬಲ್ಲಂತಹ ತೀವ್ರ ಗಂಡಾಂತರಕಾರಿಯೂ ಹೆಂಡಾಂತರಕಾರಿಯೂ ಆಗಿರುವ ಚರ್ಚೆಯಾಗಿತ್ತು.

ಹೀಗಾಗಿ ಸಂಸತ್ತಿನಲ್ಲಿ ತಾವಿರುವುದು ಕಡ್ಡಾಯ ಎಂಬುದು ಅರಿವಿಗೆ ಬಂದ ತಕ್ಷಣವೇ ಅವರೆಲ್ಲರೂ ಚೆಲ್ಲಾಪಿಲ್ಲಿಯಾಗಿ ಓಡಿದ್ದರು. ಆದರೆ ಒಬ್ಬರಿಗೆ ಮಾತ್ರ ಹಗಲು ರಾತ್ರಿ ದುಡಿದು, ಮುದ್ದೆ ತಿಂದು ಕಣ್ಣುಗಳಲ್ಲೆಲ್ಲಾ ಮಣಭಾರವಾದ ಏನೋ ವಸ್ತುಗಳು ತಗುಲಿಸಿದಂತಾಗಿದ್ದ ಪರಿಣಾಮ ಏಳಲಾಗಿರಲಿಲ್ಲ ಎಂಬುದನ್ನು ಪತ್ತೆ ಹಚ್ಚಲಾಗಿದೆ.

ತಲೆ ಹೋಗೋ ಸಂಚೋದನೆ: ಜನನಪೂರ್ವ ಫಲವತ್ತತೆ ಪರೀಕ್ಷೆ

2009-07-14T09:50:00.000+05:30

(ಬೊಗಳೂರು ಫರ್ಟಿಲೈಸರ್ ಬ್ಯುರೋದಿಂದ)

ಬೊಗಳೂರು, ಜು.14- ಕಾಲ ಬದಲಾಗಿದೆ ಎಂದು ತಿಳಿದುಬಂದಿದೆ. ಅದು ಬೊಗಳೂರು ಬ್ಯುರೋಗೆ ಈಗಷ್ಟೇ ಜ್ಞಾನೋದಯವಾಗಿದ್ದೇ ಅಥವಾ ಮೊದಲೇ ಈ ಕುರಿತ ಅಜ್ಞಾನ ಇತ್ತೇ ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ.

ಈ ತನಿಖೆಯ ನಡುವೆ, ಗರ್ಭಿಣಿಯರಿಗೂ ಮದುವೆಯಾಗುವ ಹಕ್ಕುಗಳನ್ನು ನೀಡಬೇಕು ಎಂದು ಒತ್ತಾಯಿಸಿದ ಘಟನೆಯೊಂದು ಇಲ್ಲಿ ಪ್ರಕಟವಾಗಿದ್ದನ್ನು ಕೇಳಿದ ಬೊಗಳೂರು ಬ್ಯುರೋ, ಈ ಸಮಸ್ಯೆಗೆ ಪರಿಹಾರವೇನೆಂಬುದನ್ನು ಆಲೋಚಿಸತೊಡಗಿತು.

ದೊಡ್ಡವರಾದ ಬಳಿಕ ಬ್ರಹ್ಮಚರ್ಯ ಪರೀಕ್ಷೆ, ಕನ್ಯತ್ವ ಪರೀಕ್ಷೆ ಮುಂತಾದವೆಲ್ಲ ಮಾಡಿಸಿದರೆ, ಅವು ಮಾನವ ಹಕ್ಕುಗಳ ಉಲ್ಲಂಘನೆ ಎಂಬ ಟೀಕೆ, ಆಕ್ರೋಶ, ಸಿಡಿಮಿಡಿ, ಆರೋಪ ಕೇಳಿಬರುವ ಹಿನ್ನೆಲೆಯಲ್ಲಿ, ಹುಟ್ಟುವ ಮೊದಲೇ ಇಂಥ ಪರೀಕ್ಷೆಗಳನ್ನು ನಡೆಸಬೇಕು ಎಂಬ ಊರು ಲಗಾಡಿ ತೆಗೆಯುವ ಉಪಾಯವೊಂದು ಬೊಗಳೂರು ಬ್ಯುರೋ ಸಿಬ್ಬಂದಿಗೆ ಹೊಳೆದಿದೆ.

ಬರ್ತ್ ಸರ್ಟಿಫಿಕೆಟ್ ಜೊತೆಗೇ ಈ ಕುರಿತ Fertiಸಿಕೆಟ್ ಕೂಡ ಲಗತ್ತಿಸಿ ನೀಡುವ ಯೋಜನೆಯನ್ನು ಶೀಘ್ರವೇ ಸರಕಾರಗಳು ಸಿದ್ಧಪಡಿಸಬೇಕು ಎಂದು ಬೊಗಳೂರು ಮಂದಿ ಒತ್ತಾಯಿಸತೊಡಗಿದ್ದಾರೆ.

ಆದರೆ, ಕನ್ಯಾ ಪರೀಕ್ಷೆ, ವಧು ಪರೀಕ್ಷೆ ಎಂಬಿತ್ಯಾದಿಗಳು ಇದುವರೆಗೆ ಮದುವೆಗೆ ಮುನ್ನ ನಡೆಯುತ್ತಿದ್ದವು. ಈಗ ಮದುವೆ ಮಂಟಪದಲ್ಲೇ ಕನ್ಯಾ ಪರೀಕ್ಷೆ, ವರ ಪರೀಕ್ಷೆ, ವಧು ಪರೀಕ್ಷೆಗಳನ್ನೆಲ್ಲಾ ನಡೆಸುವ ಸಂಪ್ರದಾಯದಿಂದಾಗಿಯೇ ಇದು ಕಾಲ ಬದಲಾಗಿದೆ ಎಂಬ ಅಂಶವೊಂದು ಬೊಗಳೂರು ಮಂದಿಯ ಇಲ್ಲದ ತಲೆಯೊಳಗೆ ಧುತ್ತನೇ ಗೋಚರವಾಗಿತ್ತು ಎಂದು ಮೂಲಗಳು ವರದಿ ಮಾಡಿವೆ.

ಕೆಲವ್ರು ಮಾತ್ರ ಸೋಂಬೇರಿಗಳು: ಮು.ಮಂ. ಹೇಳಿಕೆಗೆ ಆಕ್ರೋಶ

2009-07-10T09:16:00.001+05:30

(ಬೊಗಳೂರು ಸೋಂಬೇರಿ ಬ್ಯುರೋದಿಂದ)

ಬೊಗಳೂರು, ಜು. 10- ಕೆಲವರನ್ನು ಮಾತ್ರ ಸೋಂಬೇರಿಗಳು ಎಂದು ಕರೆದಿರುವ ಮುಖ್ಮಂತ್ರಿಗಳ ವಿರುದ್ಧ ಉಳಿದ ಸಚಿವರು ಕ್ಯಾತೆ ತೆಗೆದಿದ್ದಾರೆ.

ಕಳೆದೊಂದು ವರ್ಷದಿಂದ ಆಪರೇಶನ್‌ನಲ್ಲೇ ಮುಳುಗಿ, ಸಚಿವಾಲಯಕ್ಕೆ ಸಂಬಂಧಿಸಿದ ಕೆಲಸ ಕಾರ್ಯಗಳತ್ತ ತಲೆ ಹಾಕದಿರುವ ನಮ್ಮೆಲ್ಲರಿಗೂ ಸೋಂಬೇರಿ ಬಿರುದು ದಯಪಾಲಿಸಬೇಕಿತ್ತು. ಹೀಗೇ ಮಾಡದೆ ಮುಖ್ಯಮಂತ್ರಿಗಳು ಸ್ವಜನಪಕ್ಷ-ವಾತ ಮೆರೆದಿದ್ದಾರೆ ಎಂದು ಸಾವಿರಾರು ಮಂದಿ ಸಚಿವರು ವಿಧಾನಸೌಧದ ಮುಂದೆ ಧರಣಿ ಕೂರಲು ನಿರ್ಧರಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

ಸಂಸತ್ತಿನಲ್ಲಿ ಇತ್ತೀಚೆಗೆ ರೈಲ್ವೇ ಬಜೆಟಿನಲ್ಲಿ ರಾಜ್ಯಕ್ಕೆ ಅನ್ಯಾಯವಾಗಿದೆ. ಅದೆಲ್ಲಾ ಮಾಮೂಲಿ ಇದ್ದದ್ದೇ. ಕನ್ನಡಿಗರು ಕ್ಷಮಯಾಧರಿತ್ರಿಗಳು ಆಗಿರುವುದರಿಂದ ಅವರ ತಾಳ್ಮೆಗಾಗಿಯೇ ಬೂಕರ್, ನೊಬೆಲ್ ಪ್ರಶಸ್ತಿ ಎಲ್ಲಾ ಕೊಡಬೇಕಾಗಿತ್ತು.

ಕೇಂದ್ರದಲ್ಲಿ ರಾಜ್ಯದಿಂದ ನಾಲ್ಕು ಮಂದಿ ಮಂತ್ರಿಗಳಿದ್ದರೂ ಗಪ್ ಚುಪ್ಪೆನ್ನದೆ ನಿಂತಿದ್ದು ಅವರ ಸೋಂಬೇರಿತನಕ್ಕೆ ಸಾಕ್ಷಿಯಲ್ಲವೇ ಎಂದು ಸಾಕ್ಷ್ಯಾಧಾರ ಸಹಿತ ಈ ಸಚಿವರ ಗಡಣ ಕೇಳಿದೆ.

ಅಷ್ಟು ಮಾತ್ರವಲ್ಲ, ಅಷ್ಟು ಪ್ರಮಾಣದಲ್ಲಿ ಅನ್ಯಾಯವಾಗಿದ್ದರೂ ಕೂಡ, ರಾಜ್ಯದ ಸಂಸದರು, ಸಚಿವರ ಗಡಣ, ಮುಖ್ಯಮಂತ್ರಿಗಳು, ಹಿಂಬಾಲಕರು, ಬೆಂಬಾಲಕರು ಎಲ್ಲರೂ ಸುಮ್ಮನಿರುವುದು ಅವರವರ ಸೋಂಬೇರಿತನದ ಪ್ರತಿಭೆಗೆ ಸಾಕ್ಷಿ. ಹೀಗೆಲ್ಲಾ ಇರುವಾಗ, ಕೆಲವರಿಗೆ ಮಾತ್ರವೇ ಸೋಂಬೇರಿತನ ಪಟ್ಟ ಕೊಡುವುದು ಅನ್ಯಾಯ. ಇದರ ಬಗ್ಗೆ ನಾವಂತೂ ನಾಲ್ಕೈದು ವರ್ಷಗಳ ಬಳಿಕ ಖಂಡಿತಾ ಸಿಡಿದೇಳುತ್ತೇವೆ ಎಂದು ಅವರು 'ಈಗ ಪ್ರತಿಭಟನೆ ಮಾಡಲು ಉದಾಸೀನ' ಎನ್ನುತ್ತಾ ನುಡಿದರು.

ಹೇಗೂ ಬಹುತೇಕರು ಆಲಸಿಗಳಾಗಿದ್ದಾರೆ. ಈ ಆಲಸ್ಯ ನಿವಾರಣೆ ಹೇಗೆ ಎಂಬ ಬಗ್ಗೆ ಸಚಿವರು, ಶಾಸಕರ ಗಡಣವೆಲ್ಲವನ್ನೂ ವಿದೇಶಕ್ಕೆ ಕಳುಹಿಸಿ ಅಧ್ಯಯನ ಮಾಡಿಕೊಂಡು ಬರುವಂತೆ ವ್ಯವಸ್ಥೆ ಮಾಡಬೇಕು ಎಂದು ಹೇಳಿರುವ ಅವರು, ಆದರೆ ವಿದೇಶಕ್ಕೆ ಹೋದವರು ಆಲಸ್ಯ ನಿವಾರಣೆ ಬಗ್ಗೆ ಅಧ್ಯಯನ ಮಾಡುತ್ತಾರೋ ಅಥವಾ ಈ ಸಚಿವ-ಶಾಸಕರ ಗಡಣವೇ ವಿದೇಶೀಯರಿಂದ ಅಧ್ಯಯನಕ್ಕೀಡಾಗುತ್ತದೆಯೋ ಎಂಬುದನ್ನು ಮಾತ್ರ ಜಪ್ಪಯ್ಯ ಎಂದರೂ ಸ್ಪಷ್ಟಪಡಿಸಲಿಲ್ಲ.

ಬೊಗಳೆ Budget: ಐಷಾರಾಮಕ್ಕೆ, ಬೆಲೆ ಏರಿಕೆಗೆ ಒತ್ತು

2009-07-07T08:27:00.000+05:30

(ಬೊಗಳೂರು ಹಿಂಗಡ ಪತ್ರ ಬ್ಯುರೋದಿಂದ)

ಬೊಗಳೂರು, ಜು.7- ಕೇಂದ್ರದಲ್ಲಿ ಕಳೆದ ಬಾರಿ ಪೀಚಿ ದಂಬರಂ ಅವರು ಮಂಡಿಸಿದ ರೀತಿಯಲ್ಲಿ ಮತ್ತು ಈ ಬಾರಿ ಒಣಬ್ ಮುಖರ್ಜಿ ಅವರು ಮಂಡಿಸಿದ ರೀತಿಯಲ್ಲಿ ಬೊಗಳೂರಿನಲ್ಲಿಯೂ ಮುಂ-ಕಡ ಪತ್ರವನ್ನು ಜನತೆಗೆ ಮಂಕುಬೂದಿ ಎರಚುವುದಕ್ಕಾಗಿಯೇ ಮಂಡಿಸಲಾಯಿತು. ಪಿತ್ತ ಸಚಿವರು ಅದನ್ನು ಮಂಡಿಸುತ್ತಿದ್ದಾಗ ಕೆಳಗೆ ಬಿದ್ದ ಅಂಶಗಳನ್ನೆಲ್ಲಾ ಹೆಕ್ಕಿ ಹೆಕ್ಕಿ ಮುಖ್ಯಾಂಶಗಳನ್ನಾಗಿ ಪರಿವರ್ತಿಸಿ ಬೊಗಳೋದುಗರಿಗಾಗಿ ಇಲ್ಲಿ ನೀಡಲಾಗಿದೆ:

* ರಜಾಕಾರಣಿಗಳಿಗೆ ಮಜಾ ಕಾರಣಗಳಿಗಾಗಿ ನೀಡುವ ದೇಣಿಗೆಗೆ ಶೇ.200 ತೆರಿಗೆ-ಮುಕ್ತ ಸೌಲಭ್ಯ

* ಕಾರು ಬೈಕಿಲ್ಲದೆ ರಸ್ತೆಗಳಲ್ಲಿ ಓಡಾಡುವವರಿಗೆ ಉಚಿತ ಪಾದಯಾತ್ರೆ ಸೌಲಭ್ಯ

* ದೇಹವನ್ನು ಆರಾಮವಾಗಿ ಚಾಚಲು ಸರಿಯಾಗಿ ಜಾಗ ಮತ್ತು ಮನೆ ಇಲ್ಲದವರು, ಕಾರಿನಲ್ಲೇ ಜೀವನ ಸವೆಸುತ್ತಾ, ಆನಂದ ಅನುಭವಿಸುವಂತಾಗಲು ಕಾರು ಮತ್ತು ಲಾರಿಗಳ ಮೇಲಿನ ಸಂಕ ರದ್ದು.

* ರಜಾಕಾರಣಿಗಳು ಸಂಸತ್ತಿನಲ್ಲಿ ಐದು ವರ್ಷಗಳ ಕಾಲ ಮಾಡುವ ಮಜಾಗಳನ್ನು ನೋಡಿ ಆನಂದಿಸಲು ಸೆಟ್ ಟಾಪ್ ಬಾಕ್ಸ್, ಟೀವಿ ಮತ್ತು ಅದಕ್ಕೆ ಬೇಕಾದ ರಿಮೋಟು ಕಂಟ್ರೋಲರುಗಳನ್ನು ಚೀಪು ಮಾಡುವುದು.

* ರೈತರು ಬೆಳೆದ ಬೆಳೆಗಳಿಗೆ ಮಧ್ಯವರ್ತಿಗಳೇ ಸಾಕಷ್ಟು ನುಂಗಿ ನೀರು ಕುಡಿಯುತ್ತಿರುವ ಕಾರಣ, ಅವರ ಮೇಲೆ ಕ್ರಮ ಕೈಗೊಳ್ಳುವುದು ಸರಕಾರಕ್ಕೆ ಅಸಾಧ್ಯ ಸಂಗತಿಯಾಗಿರುವುದರಿಂದ ರೈತರಿಗೆ ಕೀಟ ನಾಶಕಗಳನ್ನು ಕಡಿಮೆ ದರದಲ್ಲಿ ಅಥವಾ ಉಚಿತವಾಗಿ ಪೂರೈಸುವ ಯೋಜನೆ.

* ಹೊಟ್ಟೆ ತುಂಬುವುದಕ್ಕಾಗಿ ಮತ್ತು ಒಂದಷ್ಟು ಹಸಿವು ನೀಗಿಸಿಕೊಳ್ಳಲು ಬಿಸ್ಕತ್ತು, ಶರಬತ್ತು ಇತ್ಯಾದಿ ತಿಂದು ಕುಡಿದು ತೇಗೋಣವೆಂದು ಅಂದುಕೊಂಡವರಿಗೆ ಅದನ್ನು ಕೈಗೆಟುಕದಂತೆ ಮಾಡುವ ಮೂಲಕ ಅವರು ಇದುವರೆಗೆ ಕಣ್ಣೆತ್ತಿಯೂ ನೋಡಲಾಗದಂತಹ ಪಿಜ್ಜಾ, ಬರ್ಗರು ಇತ್ಯಾದಿಗಳ ಮೇಲಿನ ವಿದೇಶೀ ಆಮದು ಸುಂಕ ರದ್ದು.

* ಪ್ರೆಶರ್ ಕುಕರ್ ಹೆಚ್ಚು ಪ್ರೆಶರ್ ನೀಡುವುದರಿಂದ ಅದರೊಳಗಿರುವ ಪ್ರೆಶರನ್ನು ಜನರ ತಲೆಯೊಳಗೂ ವರ್ಗಾಯಿಸುವಂತಾಗಲು ಪ್ರೆಶರ್ ಕುಕರ್ ಬೆಲೆಗಳನ್ನು ಅದರ ಹೊಗೆ ಏರುವಷ್ಟು ಎತ್ತರಕ್ಕೆ ಏರಿಸುವುದು.

* ಬಡ ವರ್ಗದವರು ತಿನ್ನಲು ಉಣ್ಣಲು ಏನಿಲ್ಲದಿದ್ದರೂ ಒಂದಲ್ಲ ಒಂದು ದಿನ ಕಂಪ್ಯೂಟರು ಮುಟ್ಟಬೇಕು ಎಂಬ ಕನಸು ಕಂಡಿರುತ್ತಾರೆ. ಅಂಥವರಿಗೆ ಎಲ್‌ಸಿಡಿ ಕಂಪ್ಯೂಟರುಗಳ ಬೆಲೆಯನ್ನು ಒಂದೆರಡು ರೂಪಾಯಿ ಇಳಿಸುವುದು.

* ಇತ್ತೀಚೆಗೆ ನಗರ ಪ್ರದೇಶಗಳಲ್ಲಿ ಮಾತ್ರವಲ್ಲದೆ ಹಳ್ಳಿಯಲ್ಲಿಯೂ ಸೌಂದರ್ಯ ಸಾಧನಗಳ ಬಳಕೆ ಹೆಚ್ಚಾಗುತ್ತಿದ್ದು, ಈ ಸಾಂಕ್ರಾಮಿಕ ರೋಗವನ್ನು ತಡೆಯುವ ನಿಟ್ಟಿನಲ್ಲಿ ಅವುಗಳು ಜನ ಸಾಮಾನ್ಯರ ಕೈಗೆಟುಕದಂತೆ ಮೇಲೆ ಇರಿಸುವ ನಿಟ್ಟಿನಲ್ಲಿ ಅವುಗಳ ಮೇಲೆ ಶೇ.11 ಸೌಂದರ್ಯ ತೆರಿಗೆ ಹಾಗೂ ಶೇ. 12 ಮನರಂಜನಾ ತೆರಿಗೆ.

* ಭಿಕ್ಷುಕರೆಲ್ಲರೂ ತಮ್ಮ ಉದ್ಯಮವನ್ನು ಮತ್ತಷ್ಟು ಬಲ ಪಡಿಸಿ, ಸದಾ ಸಂಪರ್ಕದಲ್ಲಿರುವಂತಾಗಲು ಮೊಬೈಲ್ ಫೋನುಗಳ ಮೇಲಿನ ಸೀಮೆಯಿಲ್ಲದ ಸುಂಕ ರದ್ದು.

* ಪ್ರತಿ ವರ್ಷ ಕೋಟಿ ಕೋಟಿ ಉದ್ಯೋಗ ಸ್ಥಾಪನೆ. ಅವುಗಳ ದಾಖಲೆ ಬರೆದಿಡಲು, ಅವುಗಳನ್ನು "ಇದೆ, ಅಸ್ತಿತ್ವದಲ್ಲಿದೆ" ಎಂದು ದಾಖಲೆಯಲ್ಲಿ ತೋರಿಸಿ ಕೇಳಿದಾಗಲೆಲ್ಲಾ ಅದರ ಬಗ್ಗೆ ವರದಿ ಒಪ್ಪಿಸಲು ಒಬ್ಬ ರಾಜಕೀಯ ನಿಷ್ಠನನ್ನು ನೇಮಿಸುವ ಮೂಲಕ ದೇಶದ ನೂರು ಕೋಟಿ ಮಂದಿಯಲ್ಲಿ ಕನಿಷ್ಠ ಒಬ್ಬನಿಗೆ "ಉದ್ಯೋಗ ಸೃಷ್ಟಿ" ಯೋಜನೆ.

* ಮನೆಗಳಲ್ಲಿ ಟಾಯ್ಲೆಟ್ ಇಲ್ಲದವರಿಗೆ ಅನುಕೂಲವಾಗುವಂತೆ ಕಡಿಮೆ ದರದಲ್ಲಿ ಅದರಲ್ಲಿಯೂ ವಿಶೇಷವಾಗಿ ಪಟ್ಟಣ ಪ್ರದೇಶಗಳ ಚರಂಡಿ ಬದಿಯಲ್ಲಿ ದಿಢೀರ್ ಶೌಚಾಲಯ ಸ್ಥಾಪಿಸುವ ಬಡ ವರ್ಗದವರ, ಬೀದಿ ವಾಸಿಗಳ ಯೋಜನೆಗೆ ಮತ್ತಷ್ಟು ಕುಮ್ಮಕ್ಕು ನೀಡುವುದು.

* ಬಡತನ ರೇಖೆಯಲ್ಲಿರುವವರು ಅದಕ್ಕಿಂತಲೂ ಕೆಳಗೆ ಹೋಗಲು ಅನುಕೂಲವಾಗುವಂತೆ ಅವರಿಗೆ ಟಿವಿ, ಕಂಪ್ಯೂಟರು, ಲ್ಯಾಪಿಗೊಂದು ಟಾಪು, ಮೊಬೈಲ್, ಕಾರು ಇತ್ಯಾದಿಗಳನ್ನು ಕೊಳ್ಳುವುದಕ್ಕಾಗಿ ಕಡಿಮೆ ದರದ ಬಡ್ಡಿ ಇರುವ ಸಾಲಸೋಲ ಯೋಜನೆ.

* ಜವಾಹರ ರೋಜ್ಗಾರ್, ಇಂದಿರಾ ಆವಾಸ್, ರಾಜೀವ್ ಸಡಕ್, ಸೋನಿಯಾ ಮಾಂಗಲ್ಯಭಾಗ್ಯ, ರಾಹುಲ್ ವಸತಿ, ಪ್ರಿಯಾಂಕ ಯುವಜನ... ಇತ್ಯಾದಿ ಯೋಜನೆಗಳನ್ನು ಹುಡುಕಿ ಹುಡುಕಿ, ಪತ್ತೆ ಹಚ್ಚಿ ಸ್ಥಾಪಿಸುವುದು. ಪಕ್ಷದ ನಿಷ್ಠರಿಗೆಲ್ಲಾ ಈ ಗಾಂಧಿಗಳ ಹೆಸರಿನಲ್ಲಿ ಪ್ರಶಸ್ತಿ ನೀಡಿ, ಒರಿಜಿನಲ್ ಗಾಂಧಿಯನ್ನು ಮರೆಯುವಂತೆ ಮಾಡುವುದು ಅಥವಾ "ನಮ್ಮ ರಾಷ್ಟ್ರಪಿತ ಯಾರು" ಎಂದು ಕೇಳಿದಾಗ ಈ ಗಾಂಧಿಗಳಲ್ಲಿ ಯಾರ ಹೆಸರು ಹೇಳುವುದು ಎಂಬುದರ ಬಗ್ಗೆ ಗೊಂದಲ ಮೂಡಿಸುವ ನಾಮಕರಣ ಯೋಜನೆಗಳ ಜಾರಿ.

* ವಿದ್ಯುತ್ ಇಲ್ಲದಿದ್ದರೂ ಮನೆ ಮನೆಗಳಲ್ಲಿ ಬಲ್ಬು ಇರಬೇಕೆಂಬ ಉದ್ದೇಶದಿಂದ ಪ್ರಿಯಾಂಕ ಮಕ್ಕಳಾದ ರೈಹಾನ್ ಹಾಗೂ ಮಿರಾಯಾ ಹೆಸರಿನಲ್ಲಿ ಜ್ಯೋತಿ ಯೋಜನೆ.

* ತಿಂದು ಸಾಯಲು ಅಗತ್ಯವಿರುವ ಅಕ್ಕಿ, ಬೇಳೆ, ತರಕಾರಿ ಬೆಲೆಗಳನ್ನು ಗಗನದಿಂದ ಕೆಳಗೆ ಇಳಿಸಲು ಶೀಘ್ರವೇ ಏಣಿ ಸ್ಥಾಪನೆ ಯೋಜನೆಯನ್ನು ಘೋಷಿಸಲಾಗುತ್ತದೆ. ಈ ನೂರಾರು ಕೋಟಿ ರೂ.ಗಳ ಯೋಜನೆಗೆ ಹತ್ತಾರು ವರ್ಷಗಳೇ ತಗುಲುವುದರಿಂದ ಜನರು ಅಂಜದೆ, ಅಳುಕದೆ, ಭಯಭೀತರಾಗದೆ, ಆತ್ಮಹತ್ಯೆಗೆ ಮೊರೆ ಹೋಗದೆ ಏಳೆಂಟು ವರ್ಷ ಹಸಿವು ತಡೆದುಕೊಳ್ಳುವಂತಾಗಲು ಉಚಿತ ಕೊಳಚೆ ನೀರು ಪೂರೈಕೆ ಯೋಜನೆ.

* ಸಂಸತ್ಸದಸ್ಯರು ಐಷಾರಾಮಿ ಜೀವನ ನಡೆಸುವಂತಾಗಲು ಮತ್ತು ವಯೋವೃದ್ಧ ರಾಜಕಾರಣಿಗಳು, ಏಳಲಾಗದವರು ರಾಜಭವನದಲ್ಲಿ ವಿಶ್ರಾಂತ ಜೀವನ ನಡೆಸುವಂತಾಗಲು, ಅವರ ವೇತನವನ್ನು ಸೊನ್ನೆ ಕಂಡುಹುಡುಕಿದ ಭಾರತೀಯರೂ ಕಂಡುಹುಡುಕಲಾಗದಷ್ಟು ದೊಡ್ಡದಾದ ಮೊತ್ತದಷ್ಟಕ್ಕೆ ಏರಿಸುವುದು.